Matthaisioi Phrinzangpo 14

1De dusiang rgyastridi po jbji-i poeka Herodes rgyalchos bakhanla Yeshui mingpo thsor. 2Yang khos rangi yoqpounla zes : Dyu chhurkyal tangkhan Yoannas in! Kho shiskhanuniangna sone langskhan in, de phya di khyudpariks lasun khoeangna binged. 3Chiazerbana, Herodesi rangi no Philippusi aneo Herodiasi phya Yoannas zune chingse zgaqkhanga tangspin. 4Chiazerbana Yoannasis Herodusla zespin : Do ane jaqchao khyeranga dodpa med. 5Yang khos Yoannas saduk sama samseang mithsounla jiks, chiazerbana khongunla kho khyenkhan chik shesedpin. 6Amma, Herodesi skyojaqi redi gronpo bana. Horodiasi buiao khori rshkilla rtsese Horodos thadchuks. 7De phya khos de bomowa khores chi tsalsna khos khoranga tangnuk zere Na bore chhad bas. 8Dekana, bomos rangi amaos snanla ltsabse yodpao na zomse chhurkyal tangkhan Yoannesi gô, dir, tawaq chikc igika kale nga-a salang ju zere khoa jus. 9Yang rgyalpoa qolṯo song, amma, rangi Nao nang gronpauni phya do khyongse bomoa tong zere mols. 10Yang mi-tangse kaqkhangeang Yoannasi go chadchuks. 11Yang khoe go tawaq chikchigika kale khyongs yang bomoe laqa tangs yang de bomos do rangi ami shitia khyes. 12Yang khoe lzadrulbakhanun yongse khoe ro lene khyere kabs; yang songse do Yeshus spera bas. 13Ni, Yeshua do thsorbana nayo chigis dekana thangstong chigika sosoa dukpa skyods.

Yang mibongsunla thsorbana grongdusuniangna khoo jukjukna drule yongs.

14Yang kho bingso skyodena khoa mithsoek mangmoek thong, yang khongzdikpa thsor, yang khonguni mardea yodkhanun noro chhachuks. 15Ni, rgongs ranmana khoe lzadrulbakhanun khoe shitia yongse zered : Di malsao changmedkhanchik in, namzawang rgal, mibongsunla rangi phya zachas nyoa gronguniang chha chuksang. 16Amma, Yeshus khonga mols : Khongunla chhachi chang thsathsek med, khyentes khongunla zacha tangshik. 17Amma, khongi khoa juid : Dir ngachi shitia ṯaki qa nang nya nyis mene yang changmed. 18Ni, khos mols : Doun dir ngi shitia khure yongshik!

19Yang khos mibongsunla spangpeka dukshik zere skalena, de ṯaki qao nang nya nyiska laqpoang lene rshnami rolla ltase stodkha bas, yang chaqsena ṯakiun lzadrulbakhanunla tangs; dekana lzadrulbakhanunis mithsounla (zgose tangs). 20Yang, khongun jungis zoso drangs; yang luskhan ṯaki-i chhaqpoun tsepo chunyis gangse lons. 21De zakhanun, aneun nang phru-un menma, khyoqaun stong qa tsek yodpin.

22Yang dyana bangs khurika Yeshus mithsoun chha chukchukpo khontang nayoeeng jukse kho basang snanla pharkha-a bingsuk zero rangi lzadrulbakhanunla labchad bas. 23Yang mibongsun Lzoqse tangsona kho sosoa ri-ika rchorba skyod. Mi, rgongstsana der khorang tsa yodpin. 24Amma dotsana nayo thsoo rshkilla yodpin, chhuzbraunis do hlingspin chiazerbana loqphar inkhan hlungpo yodpin. 25Amma thsani bya bostsana Yeshu thsoe gycnis drulo lzadrulbakhanuni shitia skyod. 26Ni, khonga kho thsoe gyenis drulba thongmana droqse dyu dre in zere khongis jikse kustabs. 27Amma, dyana bangs khurika Yoshus khong na graqse moled : koqpa malba jaqshik, nga in khyentang jiks majikshik. 28Yang Petrosis tamlaniang jus : Kasa Ashipa, taqdir yerang in na, nga chhui rdongpoka drule yeri shitia yongchi molchaspo ba zadang. 29Yang khos mols : Yong! yang Petros nayoeangna babso Yeshui shitia yongma chhui rdongpeka druls. 30Amma, hlungi raru thongmana kho jiks, yang chhueang nuba ryaḵẖspana kustabso zered : Kasa Ashipa, nga khomchuk. 31Ni, dya na tho khurika Yeshus laqpao rshkyangse kho zuns, yang (khoa) molod : Wa, chhesluks yangmo yodkhan khyoranga thaqthik chia song ? 32Yang, khong nayoeang jukpachikna hlungi raru chhads. 33Ni, nayoeang yodkhanunis khuri shitia yongse rchoren zered : Mantaḵẖsika Yerang Rshnamchoe Rshras in.

34Ni, khong pharkha-a hlebsena, Gennesareti rqyastridiang yongs. 35Yang deri miunla kho ngozin chhana dyana yuli khridkhor saqa mi tangse mardea yodkhanun jung khoe shitia khyongs. 36Yang khoe gonchi snao tsa thus bok zere khoa jus; ni, thus bakhanun tsoq noro song.

Currently Selected:

Matthaisioi Phrinzangpo 14: SOMA

Highlight

Copy