लूका 20
20
येशूला सुई अधिकार ङेत्ला काम खिते सिन ठिबाते
(मत्ती २१:२३-२७; मर्कूस ११:२७-३३)
1ङीमाई याङराङ येशू मन्दिरदु देत्ला मिओनला गा लाङच्येते बात च्यि ईन्दे सिन लोप्कीन ओतान। दोक खाला लोप्कीन ओते बेलाला छ्ये छ्ये पूजारी, धर्मे गुरूओन थेमे यहूदीओनते ज्येनोङ छ्ये छ्ये मिकी दोन्दु वाकीन थेला 2“खो दुरू मन्दिरदु वाला मिओनला लोप्च्येते थेमे मिओनला दुरूई तेन्ला तोङच्येते खुईते च्यि अधिकार ओते? खोल्ला दोक खि सिन सुई कोत्सुङा?” सिन सिराला स्यूसुङ। 3थेबेकी थोक सिरजीन येशूकीङ “लो ङाङ ख्योकोनला बातज्यीक ठामीन। लो दि बात ङाला सिते ओना, 4मिओनला छ्युला लुक्ला बप्तिस्मा तेरकान्ते यूहन्नाला थे काम खि सिन परमेश्वरगी ताङाते ईन्दाना मिकी ईन्दे?” सिन सिदुक। 5थोक सानामेई थेबाबरी था च्यि सिरापना च्यि सिराप गाल्गीन खोपरोङ नाङ दोक सिन ठो खिताला स्यूसुङ। “था दिला च्यि सिरच्ये? यूहन्नाला थे काम खिताला परमेश्वरगी ताङाते ईन सिइ सासुङ सासीन दिकी ङुरूङला च्यिला थे बात माङेन्दे सिरच्या ओङसुङ। 6मेन मिकीका ताङाते ईन सिइ सासीन मिओनगी ङुरूङला दोई ग्याप्ला सेत्क्यो। च्यिला सासीन यूहन्ना परमेश्वर बात खित्कान्ते मि ओतान सिन मि गाङेकी मान खिओ सिन ङुरूङला छ्या ओत,” सिन बात खासुङ। 7थोगी ज्येनतोक छ्याःङ सिरा माथुपेई थेबेकी येशूला “थेला थोक खि सिन सुई ताङाते ईन्दे सिन ङ्योकोनला छ्याःङ छ्या मेत,” सिन सिदुक। 8थेमे थेकीङ “थोक सासीन दुरू दोक खित्च्येते अधिकार ङाला सुई बिन्दाते ईन्दे सिन ङाङ ख्योकोनला मिसिरो,” सिन सिदुक।
फेम्माला कमे खित्कान्ते मिओन कथा
(मत्ती २१:३३-४६; मर्कूस १२:१-१२)
9थेमे येशूकी थेरू ओताते मिओनला दोक सिन कथा लाःपाला स्यूसुङ। च्यि सासीन “ठाउँज्यीक्तु स्यीङगी धनीज्यीक ओताक्वालो। थेकी थे खोरोङ स्यीङला अंगूर बिरूवा चुदुक्लो। थेमे थे स्यीङ फेम्माला बिन्गीन थे खोरोङचेन काल्बासाक मुग्युरच्या खाईन ज्येन लुङबाला गाल्गीन देत्तुक्लो। 10तिरी अंगूर छोनामेई थेकी थे खोरोङ काम खित्कान्ते मिज्यीकला थे खोरोङ बो लिन्दाला ताङदुक्लो। तर थे फेम्माला कमे खित्कान्ते मिओनगी दुकीन दुकीन थेला छ्याःङ मेतेरा खाईन तोङबाराङ ग्युरगीन ताङदुक्लो। 11थे स्यीङगी धनीकी लोक्ला थे खोरोङ काम खित्कान्ते ज्येनज्यीक मिला थे खोरोङ बो लिन ताङदुक्लो। तर थेबेकी थेलाङ दुकीन इज्जत बेइज्जत खाईन तोङबाराङ ग्युरगीन ताङदुक्लो। 12लोक्ला ज्येनज्यीकला तोङजीनोङ झन खोक्पो खाईन दुकीन ठाकच्युर माकच्युर जोकीन उरगीन ताङदुक्लो।
13थोक ओङनामेकी थे स्यीङगी धनीकी था चुक खिता ईन्दाका सिन विचार खादुक्लो। थेमे फुज्युङज्यीककामा ईन्सीनोङ थाचेन ङा दिलाराङ तोङामीन। दिलानी थेबेकी मान खाला छ्याःङ मेलेबा मिक्कितासीन सिन थेलाराङ अंगूर बो लिन ताङदुक्लो। 14धनीते फुज्युङला खोपरोङ ओत्सादु ओङा थोङगीन थेबेकी ‘तोना, थेकीनी फुज्युङतेलाराङका ताङदुक। थेला सेत्की। थेमे ईन्सीन दि स्यीङ ङुरूङतेराङनी ओङगो,’ सिन बात खाईन 15थेला जुम्गीन स्यीङदुकी तेन्गीन खेरगीन सेत्कीन क्युरदुक्लो। लो ख्योकोन विचार खि, था थे स्यीङगी धनीकी थे मिओनला च्यि खाओङा। 16च्यि थेकी वाला थोक खित्कान्ते मिओनला सेत्ला थे स्यीङ ज्येनला फेम्माला मेतेरोतरो?” सिन सिदुक।
थेकी थोक सिरजीन थेरू ओताते मिओनगी “दोकनी मिलामलाङ मेङस्यीत,” सिन सिदुक। 17थेबेकी थोक सिरजीन येशूकी “थोक सासीन परमेश्वर बातला दोक सिन टिबाते च्यि साबाते ईन्दे ओना? थेरू चुक सिन टिबा ओते सासीन
‘जुन दोला कर्मीओनगी कामराङ लै मिक्किओ सिन क्युरा ओतान, थे दोराङ आउदी काम लै खित्च्या थे मेताला छ्याःङ खिता मुथुप्च्या ओङसुङ,’ सिन साबा ओत।#भजन ११८:२२
18थेमे जो जो थे दोला नार्दोक ग्याप्ला रिल्गीदुक थेबा गाङे रूबा फराक फुरूक छ्याक्ला स्यिइओ। थोकराङ खाला सुइँदे लाक्तु थे दो ल्हुम्सुङ सासीन थेबाङ छ्येक्ला स्योबेन डुइओ,” सिन सिदुक।
19थेकी साबाते थे अंगूर स्यीङ फेम्माला बिन्दाते कथा थोनामेई धर्मे गुरूओनताङ छ्ये छ्ये पूजारीकी दिकी थोक साबातेनी ङुरूङला छ्येर ग्यापातेका ईन सिन थेजीनराङ थेला जिन्दा चाल्सुङ। तर थेरू ओताते ज्येन मि ज्यीबेकी थेबेकी थोक खिता माथुप्सुङ।
रोमी गेल्बोला तिरो ज्येल्च्येते बात
(मत्ती २२:१५-२२; मर्कूस १२:१३-१७)
20थेमे थे बेलामेईराङ धर्मे गुरूओनताङ छ्ये छ्ये पूजारीकी येशूकी खइँदा गल्ती बात खिता सिन मौका तेइनराङ देत्सुङ। थेकी थोक्ते खइँदा बात सासीन रोमी गेल्बो हाकिम ओत्सादु खेरला सजाय तेर ज्युत्च्ये सेम ओतान। थोगी थेबेकी कोई कोई मिला येशू ओत्सादु ताङसुङ। गाल्गीन थेबेकीचेन खोपरोङ आउदी खाला परमेश्वर नियम ङेन्कान्ते मि ईन्दाच्योक खाईन बात खिताला स्यूसुङ। 21बात खिन थेबेकी येशूला “गुरू, मिओनला खुई साँचोते बातकामा खिओ। थेमे छ्ये टेक्टे मिसिरा खाला गाङेला परमेश्वरगी च्यि च्यि खि सिका सिन लेमु खाला लोप्क्यो सिन ङ्योकोनला छ्या ओत। 22थोगी ङ्योकोन गुरू खोल्ला बातज्यीक ठामीन। ङुरूङगी रोमी गेल्बोला तिरो ज्येला परमेश्वर नियमताङ डिगीताना मिडिक्ते?” सिन सासुङ। 23थेबेकी च्यि सेमगी थोक साबाते ईन्दे सिन छ्या स्येकीन थेकी 24“खै ङाला चाँदी डबलज्यीक नाङते,” साकीन च्याकीन “दि डबलला सुई गोः नक्सा दुका? थेमे सुई छाप दुका?” सिन ठिसुङ। थोक सिरजीन थेबेकी “रोमी गेल्बोते,” सिन सासुङ। 25थेमे थेकी “थोक ईन्देकी रोमी गेल्बोला तेरा फाप्च्येते थेला बिन, परमेश्वरला तेरा फाप्च्येतेचेन परमेश्वरलाराङ बिन,” सिन सिदुक। 26थेकी थोक सानामेई थेबाला आउदी अचम्ब लासुङ। थेकी थोक सितासीन सिन थेबेकी सेमगी छेउलाङ नोबा मेतान। थोगी थेबाबरी खाराक्पा खाराक्पा देत्सुङ।
स्याप्ते मिओन सोम्बो लोक्च्येते बात
(मत्ती २२:२३-३३; मर्कूस १२:१८-२७)
27थेरूकी कोई कोई सदुकी पाटी मिङ येशूताङ बात खिताप सिन थे ओत्सादु लेप्सुङ। थेबाचेन मि पालोई स्यिनामेई स्याप्ते स्यापराङ ओङगो सिन ओतान। स्याप्ते मिओनला परमेश्वरगी तिरी सोम्बो लोइओ सिरच्येते बात पत्ते खिन मेतान। 28येशूकी दि बातला च्यि सिरच्या ईन्दाका सिन थेबेकी “गुरू, मोशेकी टिबाते परमेश्वर नियमला चुक साबा ओते सासीन सुइँदेते आज्योते जैजन्मराङ मायाङाला स्यिसुङ सासीन थेकी आज्योतेते सन्तान ओङस्यीत सिन आज्योते फेम्मे खुलाङा फाप्क्यो। थेमे थेबेते केबाते फिजाचेन आज्योतेते च्योक ओङगो सिन टिबा ओत। 29बाजिई चुक ओङकालो सासीन ठाउँज्यीक्तु पुन दुईन आज्यो न्वा ओतानलो। थेबे नाङ छ्येतेते फाङमा ओङगीन जैजन्मराङ मायाङाला स्यिदुक्लो। 30थोक ओङनामेई थे फेम्मे मिला फार्बातेकी खुलादुक्लो। तर थेङ फिजाराङ माकेबाला स्यिदुक्लो। 31थेमे साहिँलाते पालोङ थोकराङ ओङदुक्लो। थोक खाईन पुन दुईनकारगी थे फेम्मे मित्ताङ फाङमा खाईन फिजाज्यीगोङ मेकेबा खाईन स्यिदुक्लो। 32तिरी थे फेम्मे मिङ स्यिदुक्लो। 33था तिरी स्याप्ते मिओन सोम्बो लोक्जीन थे फेम्मे मिला खाङगी फेम्मे सिन सिरच्ये ओना? थेलानी गोमा पुन दुईनकारगी फाङमा खाबा ओतान,” सिन सासुङ।
34थेबेकी थोक सिरजीन येशूकी “मिओनगी फाङमा खित्च्येते खालि दि जुनीलाकामा ईन। 35तिरी जुनी बातचेन खुदुक ईन। थेजीन सोम्बो लोक्ला परमेश्वरताङ देता ङेत्कान्ते मिओनगी फाङमा मिक्किओ। थेजीन फाङमा खित्च्येते बात छ्याःङ मेङगो। 36थेरू स्यिच्येते बादोङ छ्याःङ मेङगो। थेबा गाङे परमेश्वर दूत च्योकराङ ओङला देत्क्यो। परमेश्वरगी थेबाला स्यिसादुई सोम्बो लोक्च्येते ईन्देकी थेकी थेबाला थे खोरोङ फुज्युङ फुमु ईन सिन सिओ। 37स्याप्ते मिओनला परमेश्वरगी सोम्बो लोइओ सिरच्येते बात मोशेकीङ साबा ओत। बाराते बुटादु ओङाते बात खित्जीन थेकी प्रभु परमेश्वरचेन अब्राहाम, इसहाक थेमे याकूब परमेश्वर ईन सिन साबा ओत। 38मि स्यिनामेई थोकराङ तोरला डोच्या ईन्दा ईन्सीन परमेश्वरला मोशेकी स्यिइन सिन्दाते ज्युज्युतेबे परमेश्वर ईन सिन सिरच्या मेतान। स्यिनामेकीङ मि गाङे परमेश्वर दोन्दु सोम्बोराङ ओङगो,” सिन सिदुक। 39थेकी दोक सानामेई कोई कोई धर्मे गुरूकी “दि बातओन खुई थेबाला आउदी लेमु खाईन लाःप्सुङ गुरू,” सिन सासुङ। 40थे तिरीचेन छ्याःङ खालाङ येशूला ग्याला मुथुप्च्याक्वा सिन सुङगीङ थेला बातज्यीगोङ ठिच्ये आँट माक्यासुङ।
ख्रीष्टचेन गेल्बो दाऊद सन्तानकामा मेन
(मत्ती २२:४१-४६; मर्कूस १२:३५-३७)
41थेमे येशूकी थेरू ओताते मिओनला दि बात खिताला स्यूसुङ। थेकी च्यि सिका सासीन “परमेश्वरगी तोङगो साबाते ख्रीष्टला गेल्बो दाऊद सन्तान ईन सिन धर्मे गुरूओनगी चुक खाला सिरा थुप्कीते? 42-43च्यिला सासीन ख्रीष्टकी विषयला बात खित्जीन भजन किताबला गेल्बो दाऊद खोरोङगीराङ दोक सिन टिबा ओत। चुक सासीन
‘प्रभु परमेश्वरगी ङे प्रभुला ङे खुई शत्रुओनला ग्याल्गीन खुई तिङबे ओक्तु माज्याकथुप
खो दुरू स्योक, ङे सामे छ्य्वापा देत,’ सिन साबाते बात टिबा ओत।#भजन ११०:१
44थोक खाईन गेल्बो दाऊद खोरोङगीराङ ख्रीष्टला मान खिन प्रभु सानामेकी चुक खाईन ख्रीष्ट थे सन्तान ओङसुङा? विचार खिते,” सिन सिदुक।
येशूकी धर्मे गुरूओनगी च्योक माकेत सिन साबाते
(मत्ती २३:१-३६; मर्कूस १२:३८-४०)
45थेमे थेरू मि गाङेकी थोच्या खाईन येशूकी चेलातेबाला 46“धर्मे गुरूओनताङ ख्योकोन च्याङबो खाला देत। थेबेकी च्योकराङ माकेत। थेबाचेन छ्ये मि ईन सिन तेन्दाला खोलाक रीम्बुतेन्दे खोन्ला ख्याम्गीदुक। थेमे मि छ्वासा रूसाला युक्जीन ज्येनगी खोपरोङला मान खिन नमस्ते सिरजीन थेबा आउदी गा खिदुक। थोकराङ खाला मिटिङ खित्च्येते खाम्बे नाङला थेमे भोजलाङ थेबाचेन छ्ये छ्ये मि देत्च्येते ठाउँलाकामा देता छोल्गीदुक। 47परमेश्वरला आउदी खाला माने खित्कान्ते ईन सिन तेन्दाला थेबाचेन काल्बासाक प्रार्थना खिन देत्कीदुक। लेमु खाईन तासीन नाङ नाङलाचेन थेबेकी ख्योबो स्यिइन सिन्दाते फेम्मे मिओन सम्पत्ति ठगे खाईन सोकीन सिन्दा ओङगो। था तिरी थेबेकी आउदी छ्येज्यीक सजाय ङेत्क्यो,” सिन सिदुक।
Currently Selected:
लूका 20: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
