लूका 19
19
येशूताङ जखायस बात
1थेमे येशू यरीहो सारदु लेप्कीन थे सारनापा सरासर डुइन ओतान। 2थे सारदु जखायस सिराज्यीक मि ओतान। थेचेन कर लिन्कान्ते मिओनते छ्येते मि ओतान। थे आउदी छ्युक्पु ओतान। 3येशू थेपा खाला डोजीन येशू सिराते सु ईन्ताका सिन ताप्ला थे गुकीन देता ओतान। तर येशू फेरोला मि काल्बेई ओतेकी थेकी थेला थोङा माथुप्सुङ। च्यिला सासीन थे पोटोलोकज्यीक ओतान। 4तर थेला माताबाला तोङराङ मोतोङो सिन थेचेन थे मिओन गोमा गोमा छ्य्वाकीन गाल्गीन येशू डुइन ओताते लामगी खादु ओताते अञ्जीर दोङबोज्यीकला जेसुङ। 5थे जेकीन देताते दोङबो खादु लेप्नामेकी येशूकी थे दोङबोने ताकीन “जखायस, खो साला फोप। ङा थरिङ खुई खाम्बादुराङ देत्क्यो,” सिन सिदुक। 6थेकी थोक सिराईताङ दोङबो लाक्तुकी फाप्कीन आउदी गा खिनकामा थेकी येशूला खाम्बापा टीकीन खेरसुङ।
7येशू थोक खाईन थेत्ताङ गाला थोङनामेई “दि चुकस्यिक ईन्दाका। दिनी थोक पापीताङका साङ खाईन देताला गाल्सुङ,” सिन मि गाङेराङ येशूला मोताला स्यूसुङ। 8थेमे प्रभु येशूताङ बात खिन खिनला लाकीन जखायसकी “लो प्रभु, था ङा ङाराङते ओताते जति सम्पत्ति बो ङि जोला बोज्यीकचेन दुक्पा ङेताते मिओनला गोला तेरग्यो। थेमे ङे ठगे खाबाते मिओनला ङाराङगी ठगे खाबाते लाक्तु दोबोर सुम थपे खाला तेरामीन,” सिन सिदुक। 9थेमे येशूकी थेला “थरिङ परमेश्वरगी खोत्ताङ खुई खाम्बे मि गाङेला पापदुकी टाला ओत। मिओनगी जे सासीनोङ खोङ अब्राहाम सन्तानराङ ईन। 10परमेश्वर ओत्सादुई वाबाते मि ङाचेन परमेश्वरताङ ठाल्गीन गालाते मिओनला थेत्ताङ डिक ज्युताला थेमे थेबाला पापदुकी डेलाला वाबाते ईन,” सिन सिदुक।
जिम्मा बिन्गीन ज्याक्पाते सेरगी डबल कथा
(मत्ती २५:१४-३०)
11येशू यरूशलेमदु लेपा लेपा खाबा ओतान। थेत्ताङ ख्याम्बा ओताते मिओनगी थेकी खाबाते बातताङ कामतेबा थोबा ओतान, थोङाङ ओतान। थोगी थे मिओनगी था परमेश्वरगी राज्य खित्च्येते समय ओङा खाबाक्वा सिन विचार खिन ओतान। थेबेकी विचार खाबाच्योक होत्ताराङ मेङगो सिन येशूकी थेबाला दि कथा सिराला स्यूसुङ। 12च्यि सासीन “बाजिई ठाउँज्यीक्तु छ्येज्यीक मि सन्तानज्यीक ओताक्वालो। थेते गेल्बो ओङच्येते हक ओतेकी गेल्बो ओङला ग्युराला थेला आउदी थारीज्यीक लुङबाला ड्वा फाप्तुक्लो। 13थोक खाला ड्वा भन्दा गोमा थेकी दरवारदु काम खित्कान्तेबा मेरा च्युताम्बाला काताङगीन च्याकीन ‘ङा दुरू ग्युरला ओङकेसाकला ख्योकोनगी दि पैसा बेपारला खेलो खि,’ सिन साकीन गाङेला सेरगी डबल रेरे बिन्गीन ज्यागीन थे थेरूकी ख्याम्दुक्लो। 14तर थे लुङबे मिओनगी थे मिला मन परे खिन मेतानलो। थोगी थे मि खोपरोङ गेल्बो मेङस्यीत सिन थेबेकी ‘ङ्योकोन खोल्ला ङेराङ गेल्बो सिन मिसिरो सि,’ सिराला थे तिरी तिरी मि ताङदुक्लो। 15थेबेकी थोक खासीनोङ थे मि गेल्बो ओङगीन थे खोरोङ लुङबापा ग्युरगीन वादुक्लो।
थेमे गोमा थे खोरोङगी सेरगी डबल बिन्गीन ज्याक्पाते मिओनगी सु सुकी थोई थोई जोका सिन ठाप्ला थेबाला काताङदुक्लो। 16थेमे दोक्पोईकी वाकीन थेला ‘हजूर, खुई बिन्दाते सेरगी डबल खेलो खाईन ङे ज्येन सेरगी डबल च्युताम्बा जोबाप,’ सिन सादुक्लो। 17थोक सिरजीन थे गेल्बोकी थेला ‘खुई आउदी लेमु खाईन काम खादुक। ङे खोल्ला डबलज्यीककामा बिन्गीन ज्याक्सीनोङ खुई लेमु खाईन दि पैसा चले खाबेकी था ङा खोल्ला छ्येज्यीक जिम्मा तेरग्यो। ङा खोल्ला सार च्युताम्बाला राज्य खित ज्युत्क्यो,’ सिन थेला थोस्यिक सारला राज्य खित च्युत्तुक्लो। 18थोकराङ खाईन ज्येनज्यीगीङ वाकीन ‘हजूर, खुई बिन्दाते सेरगी डबल खेलो खाईन ङे ज्येन सेरगी डबल ङा जोबाप,’ सिन सिरजीन 19थे गेल्बोकी थेलाङ ‘खुई लेमु खादुक, ङा खोल्लाङ सार ङाला राज्य खित ज्युत्क्यो,’ साकीन थेलाङ थोस्यिक सारला राज्य खित च्युत्तुक्लो।
20तर दोक्पोईकीचेन वाकीन च्यि साकालो सासीन ‘हजूर, लो या खुई सेरगी डबल लोङ। तोरगीता सिन ङे दि लेमु खाईन रूमालला तुम्गीन ज्याक्पाप। 21ङाला ज्यीबा लाबेकी ङे दोक खाईन ज्याक्पाप। च्यिला सासीन खो आउदी खोक्पोते मि ईन। खुई खोरोङते ईनराङ मेन्दातेङ खोरोङगी ङेत्च्या जोइओ। थेमे खोरोङगी लै माक्याबे बालीनालीङ खुई रूइओ,’ सिन सादुक्लो। 22थेकी थोक सिरजीन थे गेल्बोकी ‘खो चुक मेलेबा मि ओता ईन्दाका। खुई खेकी खित्सादु ङा खोल्ला सजाय तेरग्यो। ङाचेन ङाराङते ईनराङ मेन्दातेङ ङाराङगी ङेत्च्या जोकान्ते थेमे ङाराङगी लै माक्याबाते बालीनालीङ रूक्कान्ते खोक्पोते मि ईन सिन खोल्ला छ्या ओतानरो? 23ङा थोक्ते मि ईन सिन छ्या ओता ईन्सीन खुई च्यिला ङे पैसा बैंकदु माज्याक्पे? थोक खाबा ईन्सीन ङाराङ ग्युरगीन वानामेई ङे ङाराङ पैसेते साउँताङ ब्याज ङिकाराङ थेन्दा ङेत्च्या ओतान,’ साकीन च्याकीन 24थे गेल्बोकी थेरू ओताते ज्येन मिओनला ‘लो दित्ताङ ओताते सेरगी डबल लाला डबल च्युताम्बा जोकान्तेलाराङ बिन,’ सिन कोत्तुक्लो। 25थेमे थे मिओनगी ‘हजूर, थेत्ताङनी थर्गेई पैसा ओत्कीन दुक। याङराङ थेला च्यिला तेरच्ये?’ सिन सिरजीन 26थे गेल्बोकी ‘खित्कान्तेला थे लाक्तुङ थपे खाला तेरग्यो, मिक्किकान्ते लाःक्तुकीचेन थेत्ताङ ओतातेङ ठ्वाला खेरग्यो। 27थेमे ङा गेल्बो मेङस्यीत सिन ङे विरोध खित्कान्तेबा सु सु ईन्दाका ख्योकोनगी थेबाला दुरू ङे दोन्दु खुलाला सेत,’ सिन सादुक्लो,” सिन सिदुक।
येशू यरूशलेमपा गालाते
(मत्ती २१:१-११; मर्कूस ११:१-११; यूहन्ना १२:१२-१९)
28दि कथा लाःप्कीन सिन्नामेई येशू थेरूकी ख्याम्सुङ। थे थोरूमोङ यरूशलेमदु लेपा मेतान। 29डुइन डुइन थे जैतुन बोम सिरसादु फाप्च्येते बेथफागेताङ बेथानी सिराते युलनापा लेपा खाबा ओतान। थेमे थेकी चेलातेबा मेन्दा ङिला दोन्दु काताङगीन 30“लो ख्योकोन ङिबो उफि युलनापा ग्युक। थे युलनापा स्यूक्पाईताङ ताकीन ज्याक्पाते गधे कीउज्यीक ख्योकोनगी थोङगो। थे गधाला थातासाक सुङ जेबा मेत। थेला ताङला च्याला देपा खोरच्योक। 31थोक खाला तोङजीन सुइँदेकी ख्योकोनला ‘च्यिला तोङगीते?’ सिन सासीन ‘प्रभु येशूला गोसुङलो,’ सिन सि,” साकीन थेरूकी गोमा गोमा ताङसुङ।
32युलनापा लेप्नामेकी थेबा ङिबोकी येशूकी साबा च्योकराङ ताकीन ज्याक्पाते गधे कीउज्यीक थोङसुङ। 33थे गधे कीउ तोङजीन धनीतेबेकी थोङगीन “एइ ख्योकोन च्यिला थे गधे कीउ तोङगीते हँ?” सिन सासुङ। 34थेमे थेबा ङिबोकी “प्रभु येशूला गोसुङलो,” सिन सानामेई थेबेकी बिन्गीन ताङसुङ। 35थेमे गधे कीउ टीकीन थेबा ङिबो येशू ओत्सादु लेप्सुङ। थेमे खोपरोङगी लाक्तु खोन्दाते खोलाकओन टोल्गीन थे गधे कीउ लाक तिङगीन येशूला लेमु खाईन थे लाक्तु जेत्सुङ। 36थोक खाईन येशू थे गधे कीउ लाक जेकीन ख्याम्नामेई थेत्ताङ ख्याम्गीन ओताते मिओनगीचेन लाक्तु खोन्दाते खोलाक टोल्गीन लामला तिङगीन थेला मान खासुङ। 37दोक खिन खिन येशू जैतुन बोमगी लाक लेप्सुङ। थेरूकीचेन लाम थुल फाप्कीन ओतान। बोमदुकी यरूशलेम सारला थोङगीन चेला च्युन्ङीताङ ज्येन चेलातेबा गाङेराङ गा खिन छेरा खिनकामा येशूकी खाबाते अचम्बते कामताङ बातओन लाईदु परमेश्वरते जय जय खिताला स्यूसुङ। 38थेबा गाङेराङ “प्रभु परमेश्वरगी देमा ताङाते गेल्बो काल्बेईसाक सोन्स्यीत। थेते जय जय ओङस्यीत। स्वर्गदु देत्ला लेमु खित्कान्ते परमेश्वरते जय जय ओङस्यीत,” सिन छेरा खिताला स्यूसुङ। 39थेमे थेबाताङराङ ख्याम्गीन ओताते कोई कोई फरिसी पाटी मिकीचेन येशूला “ए गुरू, थेबाला थोक सिर माज्युत, खाराक्पा देत सि,” सिन सासुङ। 40तर येशूकी “ङा थेबाला खाराक्पा देत मिसिरो। थेबा खाराक्पा देत्सीन थेबे साटोला देङला ओताते दोतेबेकीराङ छेरा खाला खाला दि बातओन सिओ,” सिन सिदुक।
येशूकी लोईन यरूशलेम मिओन लाईदु पीर खाबाते
41थेमे यरूशलेम खादु लेप्कीन थे सारला लेमु खाईन थोङनामेई येशूकी थे सारगी मिओन लाईदु पीर खाईन मिकच्युक ताङसुङ। 42ङुइनकामा थेकी “यरूशलेम मिवे, सुङगीङ ज्यीबा मुखुरा खाला लेमु खाला देताला खेराङगी च्यि खिता फाप्कीते सिन ख्योकोनगी थरिङकामा छ्या स्येबा ईन्सीनोङ थोई लेमु ओङच्या ओताने। तर दि बात ख्योकोनगी थोरूमसाकोङ छ्याःङ छ्या मास्येसुङ। 43थोगी था शत्रु वाला ख्योकोन सुङ खापाङ फ्रोबा मुथुप्च्या खाला दि सारला फेरो खिरी घेरे खिओ। 44थेमे थेबेकी ख्योकोन छ्ये टेक्टे गाङेला सोतोर जोइओ। थेमे सारोङ बराङ बुरूङ रोम्ग्यो। परमेश्वरगी खेराङला सजाय छ्य्वापेई थारच्येते मौका तेरजीन ख्योकोनगी टेरे माक्याबेकीराङ था होथोक ओङगो,” सिन सिदुक।
येशूकी परमेश्वर मन्दिरदु खाबाते काम
(मत्ती २१:१२-१७; मर्कूस ११:१५-१९; यूहन्ना २:१३-१६)
45-46थेमे येशू परमेश्वर मन्दिरदु गाल्सुङ। थेकी मन्दिर स्याङके नाङला देत्ला बेपार खित्कान्तेबाला थोङगीन “परमेश्वर बातला परमेश्वरगी ‘ङे खाम्बा ङाला प्रार्थना खिताला जोबाते ईन,’ सिन साबा ओत।#यशैया ५६:७ तर ख्योकोनगीनी दुरू चोर डाँका देत्च्येते ठाउँ च्योकका जोदुक। ख्योकोन दुरूकी थेन्ला ग्युक,” सिन ङारगीन थेरूकी तेन्गीन ताङसुङ।
47थेमे ङीमे ठाङमा येशू मन्दिरदु गाल्ला मिओनला लोप्कीन ओतान। छ्ये छ्ये पूजारी, धर्मे गुरूओन थेमे यहूदीओनते ज्येनोङ छ्ये छ्ये मिकीचेन थेला सेता छोल्गीन ओतान। 48तर मि गाङे थे फेरोला देत्ला थे बात ङेन्गीन ओतेकी खित्सादु जति खासीनोङ थेबेकी थेला छ्याःङ खिता माथुप्सुङ।
Currently Selected:
लूका 19: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
