लूका 21
21
ख्योबो स्याप्ते मिकी चढे खाबाते भेटी बात
(मर्कूस १२:४१-४४)
1थेमे मन्दिरदु ओत्जीनराङ येशूकी ताजीन मिओनगी परमेश्वरला भेटी चढे खाबाते थोङसुङ। छ्युक्पुते मिओन दाक्पोन दाक्पोन भेटीतेबा लुकीन ओतान। 2थेमे फेम्मे मिज्यीगीङ स्यीम्मीते पैसा ङि भेटी चढे खासुङ। थेते ख्योबो स्यिइन सिन्दा ओतान। थेमे थे आउदी दुक्पा ङेताज्यीक ओतान। मिओनगी थोक खाईन भेटी लुक्पाते गाङे येशूकी थोङसुङ। 3थेमे थेकी चेलातेबाला “ङा ख्योकोनला दि बात सिओ। च्यि सासीन दुरू भेटी चढे खित्कान्तेबे नाङ गाङे भन्दा काल्बेईचेन थे दुक्पा ङेताते फेम्मे मिकी चढे खासुङ। 4च्यिला सासीन ज्येन ज्येनगी भेटी काल्बातेन्दे चढे खासीनोङ थेबाताङ थोरूमोङ सम्पत्ति थुप्रो ओत। तर थे फेम्मे मिकीचेन मोरोङताङ ओताते जति गाङे भेटी चढे खासुङ। थेतेनी खाम्बादुङ छ्याःङ मेत,” सिन सिदुक।
परमेश्वर मन्दिर राम्ला डोच्येते बात
(मत्ती २४:१-२; मर्कूस १३:१-२)
5थेमे चेलातेबा कोई कोईकी परमेश्वर मन्दिर चुक लेमु दुका सिन बात खिन “दि मन्दिर भित्ताला लुक्पाते हीरा, मोतीताङ युतेबा चुक लेमु थोङगीका आङ? थेमे मिओनगी परमेश्वरला चढे खाबाते जेसुकै चीज चुक लेमु दुका,” सिन सासुङ। थेबेकी थोक सिन बात खित्जीन येशूकी 6“ख्योकोनगी दि मन्दिरदु जेसुकै दोक लेमु ओता थोङसुङ मेन? दि मन्दिरनी था तिरी ङीमाई बराङ बुरूङ रोम्ग्यो। थेजीन दिते गारो दोज्यीगोङ बाँकी मोज्योओ,” सिन सिदुक।
दि जुग सिन्दे खाला चुक चुक ओङगीते
(मत्ती २४:३-२८; मर्कूस १३:३-२३)
7येशूकी थोक सिरजीन थेबेकी “थाल्ला खुई साबाच्योक नाम ओङगीते गुरू? थेमे थोक ओङा खासुङ सिन चुक खाला छ्या स्येकीते?” सिन ठिसुङ। 8थोक सिरजीन येशूकी “च्याङबो खाला देत। सुङगीङ ख्योकोनला छक्के खाला ङे छ्य्वापेई मेडेल्स्यीत। परमेश्वरगी मिओनला जोए खिताला तोङगो साबाते मि ङाराङ ईन। था दि जुग सिन्दे बेला लेप्सुङ सिन सिरकान्ते मि था काल्बेई ओङगो। थेबे बात ङेन्ला ख्योकोन थेबे तिङ माङ्योक। 9ख्योकोनगी लुङबा लुङबाला लडाइँ ओङाते थेमे ठाउँ ठाउँला गोलमाल ओङाते बात थोक्यो। थोक्ते बात थोजीन था च्यि ओङोङा, चुक ओङोङा सिन ख्योकोन ज्यीबा माकेत। थोक थोकनी ओङाराङ फाप्क्यो। ईन्सीनोङ थोक थोककामा ओङला दि जुग सिन्च्येते मेन,” सिन सिदुक। 10थोरूमोङ बात खिन थेकी “थेजीन जात जातकी मि जीङगो, लुङबा लुङबे गेल्बोओन नाङदुङ लडाइँ ओङगो, 11ज्यीबा लाङच्या सेदेर्मु डुइओ, ठाउँ ठाउँला छ्ये छ्ये अनिकाल लाङगो, आउदी मेलेबा मेलेबातेन्दे रोग फैले खिओ थेमे नामगी नाङनेङ आउदी ज्यीबा लाङच्या अचम्ब अचम्ब ओङाते थोङगो।
12थोक थोक ओङा भन्दा गोमा मिओनगी ख्योकोनला जुम्ला आउदी दुक्पा तेरग्यो। थेबेकी ख्योकोनला मिटिङ खित्च्येते खाम्बादु ओताते अड्डे मि दोन्दु केल्ग्यो। थेमे जेलदुङ लु ज्युत्क्यो। दोस्यिककामा मेन, ख्योकोनला गेल्बोओनताङ रोमी गेल्बो हाकिमओन दोन्दुङ केल्ग्यो। ङे मि ईन्देकीराङ ख्योकोनला दोक दोक खिओ। 13थेजीन ख्योकोनगी थेबाला खेराङ च्यिला ङाला विश्वास खिते सिन लाःपा ङेत्क्यो। 14तर थेबेकी बात ठा बेलाला च्यि सिरच्या ईन्ताका, चुक सिरच्या ईन्ताका सिन गोमामेई ज्यीबा खाला मादेत। 15च्यिला सासीन थेजीन ङा ङाराङराङ ख्योकोनला चुक सिन बात खित्च्ये सिन बुद्धि तेरग्यो। थोक ओङनामेकी ख्योकोन विरोध खित्कान्तेबा सुङगीङ ख्योकोन बातला मेन सिरा मुथुबो, ख्योकोन बात साँचो मेन सिन थेबेकी छ्याःङ कारण तेरा मुथुबो। 16ख्योकोनला खेराङ आबा आमेकी, आज्यो न्वाकी, दाक्पोन मिकी थेमे र्वाओनगी समेत धोका बिन्ला छ्ये छ्ये मि लाःक्तु सोम्पे खिओ। थोक खानामेई ख्योकोन कोई कोईला सेत्क्योदोङ। 17ङे मि ईन्देकीराङ मि गाङेकी ख्योकोनला मिगी थोङसार्मु खिओ। 18थेबेकी थोक खासीनोङ ख्योकोनते टे केस्राज्यीगोङ मोतोरो। 19थोक थोक दुक्पा ओङजीनोङ सेम मेसेता खाईन ङाला विश्वास खिन देत्सीन ख्योकोनगी नोमुङ मिसिन्च्येते जुनी ङेत्क्यो।
20थेमे मिल्टेरीओनगी वाकीन यरूशलेम सारला घेरो हाले खाबा थोङनामेई था दि सार खतम डोच्या दुका सिन ख्योकोनगी छ्या स्येक्यो। 21थेबेकी थोक खानामेई यहूदिये अञ्चलदु देत्कान्ते मि गाङेराङ दाक्पोन ज्यान जोए खिताला बोम बोमला छ्योङा फाप्क्यो। यरूशलेमदु देत्कान्तेबाङ सार ताङला ड्वा फाप्क्यो। थेमे युल युलला देत्कान्ते मिओन दि सारदु ओङा मेङगो। 22दिचेन परमेश्वरगी यहूदीओनला सजाय तेरच्येते समय ईन। थोक खाला परमेश्वर बातला गोमाका टिबाते सजाय तेरच्येते बात साबा च्योकराङ ओङगो। 23थोक ओङे बेलाला फुज्यीमा खुरा ओताते मिओन थेमे नुमा थुङकान्ते फिजा ओत्कान्तेबाला आउदी दुक्पा ओङगो। यहूदीओनला परमेश्वरगी था स्येदाङगी चूर गाल्ला सजाय तेरच्येते ईन्देकी दि लुङबा खाङराङ आउदी मेलेबा ओङगो। 24थे मिल्टेरीओनगी यहूदी काल्बेईला तरवारगी तुप्ला सेत्क्यो। थेमे ज्येनलाचेन जुम्ला ज्येन ज्येन लुङबाला खेरग्यो। थे ज्येन ज्येन जातकी मिकी मेलेबा खिता ङेत्च्येते समय मासिनथुप यरूशलेम खाङ थोक खिनराङ देत्क्यो।
परमेश्वर ओत्सादुई वाबाते मि ग्युरला ओङच्येते बात
(मत्ती २४:२९-३६; मर्कूस १३:२४-३५)
25थेमे दागार, ङीमाताङ कार्माओनला अचम्ब अचम्ब ओङा थोङगो। थोकराङ खाला समुन्द्रदु ज्यीबा लाङच्येतेन्दे छाल लाङगो। थोक खाईन छाल लाबाते थोङला थेमे नामज्योक बुराङ साच्याज्यीक थे छालगी ङोरो थोला ज्यीबेकी लुङबा लुङबे मि लेम्बा दोगे दोगे डुइओ। 26दागार, ङीमाताङ कार्माओनते नाम्दाक तोरला खराप खुरूप नाश गाल्ला ड्वा थोङजीन दि सा लुङबादु थोरूम चुक चुक ओङगीताना सिन ज्यीबेकी मि गाङेते ङिङगी ठाउँ ताङला ङ्याला ङ्योला डुइओ। 27थोक थोक ओङनामेई परमेश्वर ओत्सादुई वाबाते मि ङा छ्येज्यीक शक्ति ङेत्ला मिगी ताराङ मुथुप्च्या नाम्दाककी झिलिमिली गाल्ला मुक्पे नाङ देत्ला स्वर्गनेकी देमा ओङगीन ओताते मि गाङेकी थोङगो। 28थोगी थोक थोक ज्यीबा लाङच्या ओङा थोङजीन ख्योकोन सेम मासेत। बरू था दुक्पादुकी ठाल्च्ये बेला लेपा खासुङ सिन गा खि,” सिन सिदुक।
29-30थोरूमोङ बात खिन थेकी “दि बात ङेन। नेभारे दोङबोताङ ज्येन ज्येन दोङबोला च्यूली बुराला स्यूनामेकी था यार स्यूक्पा खासुङ सिन ख्योकोनगी छ्या स्येक्यो। 31थोकराङ खाला ङे आनाङका था तिरी चुक चुक ओङगो सिन साबा ओताने थोक थोक ओङाला स्यूनामेकीचेन था परमेश्वर राज्य ओङा खाबाक्वा सिन ख्योकोनगी छ्या स्येबा खि। 32ङा ख्योकोनला दि बात सिओ। च्यि सासीन दि पुस्तालाराङ ङे ओङगो साबाच्योक गाङे ओङगो। 33दि साताङ नाम नाश गाल्ला तोरला डुइओ। तर ङे साबाते बातचेन फरकराङ परे मिक्किओ।
34थोगी ख्योकोनगी परमेश्वर ओत्सादुई वाबाते मि ङा ग्युरला ओङे छोमुसाक चुक खाला देता फाप्च्या ईन्दाका सिन खोबा खि। तिरी बो माताबा खाला सोला थुला छ्याङगी जिला मादेत। दि जुनी विचारकामा खाला साच्या थुङच्याताङ खोन्च्ये पीर माकेत। दोक खिन देत्सीन खरेउ तोर्बाकला थेप्लु खाला थे दिन लेपे छोमुकामा ख्योकोनगी छ्या स्येक्यो। 35थोक खाला दि सा लुङबे मि सुङगीङ थाहाराङ मेङेता खाला थे दिन ओङगो। 36थोगी च्याङबो खाला देत। थेमे थोक थोक ज्यीबा लाङच्या दुक्पा ओङजीन ङाला विश्वास खिन थे दुक्पा खपे खिता थुप्स्यीत थेमे परमेश्वर ओत्सादुई वाबाते मि ङा ग्युरगीन वानामेई सजाय ङेत्कीता सिन छ्याःङ ज्यीबा मिक्किता खाला थे दोन्दु देता ङेत्स्यीत सिन प्रार्थना खिनराङ देत,” सिन सिदुक।
37थोक खाला येशू ङीन रेरे परमेश्वर मन्दिरदुराङ देत्ला मिओनला लोप्कीन ओतान। थेमे ग्वासे ग्वासेचेन स्यासा देताला जैतुन बोम सिरसादु डुइन ओतान। 38थेकी लोप्च्येते बात ङेन्दाला मिओनोङ ङोमु ठोनामेईराङ मन्दिरदु ओङगीन ओतान।
Currently Selected:
लूका 21: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
