लूका 13
13
परमेश्वर छ्य्वापा लै माक्यासीन सजाय ङेत्क्यो
1थे बेलालाराङ थेरू ओताते मिओन नाङ कोई कोईकी येशूला “रोमी गेल्बो हाकिम पिलातसकी गालीलपे मि कोई कोईला परमेश्वर मन्दिरदु रीउ पूजा खिन खिनला सेत च्युत्तुक। दोक खाईन मित्ताङ रीउकी ठाक ठाउँज्यीकराङ खिल्दुक,” सिन लाःप्सुङ। 2थोक सिरजीन थेकी “च्यि ख्योकोनला थेबाचेन गालील अञ्चल ज्येन मि भन्दा पापी ओतेकीका थेबाला थोक मेलेबा खाईन सेताते ईन सिराच्योक लाङगीदुक? 3अहँ, थोक मेन। ङा ख्योकोनला च्यि सिते सासीन ख्योकोनगी खेराङ पापी दुका सिन छ्या स्येला परमेश्वर छ्य्वापा लै खि। थोक माक्यासीन ख्योकोनोङ होथोकराङ खाला काल माछाङालाराङ स्यिइओ। 4थेमे याङराङ खरचिङ यरूशलेम सारगी सिलोआम टोलदु थोम्बोज्यीक खाम्बा राम्गीन मेरा च्याप्केत मि स्याप्ते बात ख्योकोनला छ्याराङ ओतासीन। च्यि ख्योकोनला थेबाचेन यरूशलेम ज्येन मि भन्दा पापी ओतेकीका थेबा थोक खाईन स्याप्ते ईन सिराच्योक लाङगीदुक? 5थोगोङ मेन। थोगी ङा लोक्लाङ ख्योकोनला खेराङ पापी दुका सिन छ्या स्येला परमेश्वर छ्य्वापा लै खि सिन सिओ। थोक माक्यासीन ख्योकोनोङ होथोकराङ खाला काल माछाङालाराङ स्यिइओ,” सिन सिदुक।
6थोरूमोङ बात खिन थेकी थेबाला “लो ख्योकोनगी दि कथा ङेन। पालोई मिज्यीगी थे खोरोङ अंगूर स्यीङदु नेभारे बिरूवाज्यीक चुबा ओताक्वालो। छारगीन नेभारा गोन्दे बेला लेप्नामेई गोन्काना मागोन्का सिन थे तार गाल्दुक्लो। तर जुन लोला डोजीनोङ थे दोङबोला नेभाराज्यीगोङ गोन्दा माथोङदुक्लो। 7थोगी थेकी थे खोरोङ स्यीङगी काम खित्कान्ते मिला ‘लो दि दोङबो टिल्ला क्युर, गोन्गीता सिन ङे लो सुमसाक ताबाप। तर छ्याःङ मागोन्सुङ। थाराङ दिला स्यीङदु च्यिला ज्य्वाच्ये,’ सिन सादुक्लो। 8थोक सिरजीन थे स्यीङगी काम खित्कान्ते मिकीचेन ‘थोरूमोङ लोज्यीक तेइना हजूर, ना गोन्गीता। ङा दिला फेरोला लेमु खाला कोला थोरूमोङ छ्या लुक्ला तामीन। 9दोक खानामेई साङबो गोन्सीन लेमुराङ ओङसुङ, मागोन्सीन टिल्गीन क्युरसीन ओङगो,’ सिन सादुक्लो,” सिन सिदुक।
येशूकी सन्चारी छोमु फेम्मे मिज्यीकला ठाक्पा खाबाते
10ङीमाई सन्चारी छोमु येशू मिटिङ खित्च्येते खाम्बाज्यीक्तु मिओनला परमेश्वर बात लोप्कीन ओतान। 11थेरू लो च्याप्केत गोमामेई ल्हन्डीककी दुक्पा बिन्गीन नाबाते फेम्मे मिज्यीगोङ ओतान। थेते जीउराङ खुङ खुइन कुकुरोक गाला ओतेकी ठाङे खाला लाङाङ थुप्कीन मेतान। 12थेला थोङगीन येशूकी “ए आज्यी, खो देपा स्योक,” सिन काताङगीन “थरिङमेई खो ठाक्सुङ,” सिनकामा 13लाक्पा ङिकाराङ थे लाक ज्याक्सुङ। थोक खिताईताङ थे फेम्मे मि दाक ठाइन सोझो खाईन लाङा थुप्सुङ। थेमे थेकी परमेश्वरगी ङाला चुक लेमु खासुङा सिन परमेश्वरते जय जय खासुङ।
14थे फेम्मे मिला ठाक्पा खानामेई येशूकी सन्चारी छोमु काम खासुङ सिन थे मिटिङ खित्च्येते खाम्बे छ्येते मि थेत्ताङ आउदी खाईन स्येदाङ खासुङ। थोगी थेकी थेरू ओताते मिओनला “हप्ताला ङीमा ठुक काम खिता ओङगो। थरिङचेन काम खिता मेङगो सिन ख्योकोन गाङेला छ्याराङ ओत। थोगी ख्योकोन सुइँदा ठाक्पा खाला नाङ सिरा फाप्च्या ओत्सीन ज्येन दिनला ओङच्येते खि, सन्चारी छोमु मेन,” सिन सिरजीन 15प्रभु येशूकी “ख्योकोन चुक्तेन्दे ईन्दाका, सन्चारी छोमु काम खिता मेङगो सिन साबा ओत्सीनोङ थे छोमु ख्योकोन नाङ सुईचेन खेराङ लाङ कि गधाला ताङला छ्यु तेर मेखेरते? 16लाङताङ गधालानी ख्योकोन थोजो वास्ता खिदुक सासीन च्यि ङुरूङ ज्युज्यु अब्राहाम सन्तान दि फेम्मे मिला लो च्याप्केतसाक ल्हन्डीक गेल्बो शैतानगी दुक्पा बिन्सादुई थरिङराङ डेला लेमु मेनरो?” सिन सिदुक। 17थेकी थोक सानामेई थे छ्येते मि थेमे थेत्ताङ डिक्कान्ते गाङेते नोउ तेन्च्ये लामराङ मादेत्सुङ। ज्येन मिओनचेन दि मिकी चुक अचम्बतेन्दे काम खिका सिन गा खासुङ।
स्यीम्मीज्यीक सोनताङ सोडे बात
(मत्ती १३:३१-३३; मर्कूस ४:३०-३२)
18थेमे येशूकी मिओनला “परमेश्वर राज्य चुक खाला जोदा डुइते सिन ङा ख्योकोनला सिरामीन। थे राज्य जोदा डोच्येतेचेन दि बात च्योकराङ ईन। 19च्यि सासीन सुइँदा मिकी थे खोरोङ स्यीङदु तोरी सोन देप्क्यो। दि तोरी सोन च्योक स्यीम्मी ज्येन छ्याःङगीङ सोन मेत्सीनोङ दि केनामेई छारला दोङबो छेतराङ डुइओ। दि झाङलाचेन छ्योज्युङमेकी छाङोङ ज्वा थुप्क्यो,” सिन सिदुक।
20दोक सानामेई याङराङ थेकी “परमेश्वर राज्य बात चुक खाला गाङेपा फैले खिते सिनोङ ङा ख्योकोनला सिरामीन। दोक ओङच्येतेचेन दि बात च्योकराङ ईन। 21च्यि सासीन सुइँदा फेम्मे मिकी स्योबेन स्येक्पे बेलाला फाम सुमजो ज्येन्ताक ङेक्जीन सोडा टिक्पीस्यिककामा लुक्यो। छुस्सईकामा लुक्सीनोङ थेराङ गाङेपा ठाम्ला थे ज्येन्ताक लेमु खाला फुले खिओ,” सिन सिदुक।
परमेश्वर राज्यने स्यूक्च्येते गोई बात
22दोक खाला येशू यरूशलेमपा डोजीन सार सारला थेमे युल युलला मिओनला परमेश्वर बात लोप्कीन डुइन ओतान। 23थेमे ठाउँज्यीक्तु मिज्यीगी थेला “तिरी परमेश्वर राज्यदु स्यूला देता ङेत्कान्ते मि काल्बेई मेङतासीन, आङ प्रभु?” सिन ठिसुङ। 24थेकी थोक सिरजीन येशूकी थेरू ओतातेबा गाङेला “परमेश्वर राज्यने स्यूक्च्येते गो टेक्टेज्यीक ओत। मि काल्बेईकी थेने स्यूक्पा चाल्सीनोङ गाङेराङ स्यूक्पा मुथुबो। थे टेक्टेते गोने स्यूक्पाला च्यि खिता फाप्च्या ईन्दाका ख्योकोनगी थे छ्य्वापाकामा स्येत खि। 25परमेश्वर राज्यचेन खाम्बा च्योकराङ ईन। ङीमाई थे खाम्बे धनीकी खाम्बे गो डेप च्येत्क्यो। गो च्येत्नामेई च्यि ओङगीते छ्या ओत? ख्योकोनचेन फिनामा देत्ला ‘ए हजूर, गो फेतना, ङ्योकोनोङ ओङामीन,’ सिन छेरा खिओ। ख्योकोनगी थोक खित्जीन खाम्बे धनीकीचेन नाङनेकी ‘ख्योकोन सु ईन्दे, खापेकी वाबाते ईन्दे सिन ङाला छ्या मेत। थोगी ङे च्यिला गो बेत्च्ये?’ सिन सिओ। 26लोक्ला ख्योकोनगी ‘थोक मासेरना हजूर। ङ्योकोनगीनी खोत्ताङराङ सोकीन थुकीन खाबाते ईन। थेमे खुई ङ्योकोन थेङलाराङ परमेश्वर बादोङ लापा ओतान। दोक ईन्सीनोङ खो ङ्योकोनला च्यिला छ्या मेस्येओ सिते?’ सिन सिओ। 27ख्योकोनगी थोक सिरजीनोङ थे खाम्बे धनीकीचेन ‘ख्योकोननी परमेश्वरगी खि साबाते मेङेन्कान्ते मि ईन। ख्योकोन ङे मि मेन। दुरू मादेत, दुरूकी ग्युक,’ सिन सिओ। 28थेमे ख्योकोनगी खेराङ ज्युज्यु पुर्खा अब्राहाम, इसहाकताङ याकूब थेमे परमेश्वर बात खित्कान्ते मि गाङेराङ परमेश्वर राज्यदु देता ओता थोङगो। थोक खाईन थेबा परमेश्वर राज्यदु देताते थेमे खेराङलाचेन नरककुण्डमा क्युरनामेई थेमा ख्योकोन स्येदाङगी सा थागीन खोक्पो खाला ङुइन देत्क्यो। 29पूर्व, पश्चिम, उत्तर, दक्षिण गाङेपे मिकीचेन परमेश्वर राज्यदु स्यूला भोज सा ङेत्क्यो। 30थेमे थरिङोला ज्येनगी दिङ सु ईन्देरो सिराच्योक ठाने खाबाते मिओन तिरी छ्ये ओङगो। थरिङोला छ्ये ओतातेबाचेन थेजीन छ्ये मेङगो,” सिन सिदुक।
येशूकी यरूशलेम मि लाईदु पीर खाबाते
(मत्ती २३:३७-३९)
31थे बेलालाराङ फरिसी पाटी मि कोई कोईकी वाकीन येशूला “हेरोद गेल्बोकी खोल्ला सेता चाल्ला दुक। थोगी खो देङला मादेत, खइँसाला ग्युक,” सिन सासुङ। 32थोक सिरजीन थेकी “ख्योकोनगी थे किप्च्याङ च्योकराङ च्याङबो खित्कान्ते हेरोदला गाल्ला दि बात लोप। च्यि सासीन ङा थोरूमोङ ङीमाई ङीमा ङि मि नाङदुकी ल्हन्डीक तेन्ला तोङच्येते थेमे नाबाते मिओनला ठाक्पा खित्च्येते काम खिन देत्क्यो। ङीमा सुमगी छोमुकामा ङे खिता फाप्च्येते काम सिन्दा खिओ। 33ङाला सुइँदेकी छिटो ग्युक सिरजीनमेईराङ ङा छिटो मोन्डो। ङानी ङाराङ सारगी लाम ख्याम्ग्यो। ङा नाकामा लेपा फाप्सादु लेप्क्यो। च्यिला सासीन परमेश्वर बात खित्कान्ते मि सुङलाङ यरूशलेमदु मेन्दाला ज्येननापा सेताप सिराराङ मेत।
34यरूशलेम मिओन लाईदु ङे चुक दुक्पा लाङच्ये बात खिता फाप्कीका। ख्योकोनला लेमु खिताला ताङाते परमेश्वर बात खित्कान्ते मिओनला ख्योकोनगी सेत्कीदुक। परमेश्वरगी ताङाते ज्येन ज्येन मिलाङ ख्योकोनगी दोई ग्याप्ला सेत्कीदुक। थेमे दुरू वाकीन ङेङ ख्योकोनला छ्योमुकी छ्यिर्बुकला स्योक्पे चावादु उप्ला ज्य्वाबा च्योकराङ खाईन पालोताङ पालो लेमु खिता चालाप। ईन्सीनोङ ख्योकोनगी माङेन्देईराङ ङे ख्योकोनला छ्याःङ खिता माथुप्सुङ। 35थोगी था परमेश्वरगी ख्योकोनला ताराङ माताओ। थेमे ख्योकोन थोकराङ बाँझा गाल्ला तोरला डुइओ। ‘थेला प्रभु परमेश्वरगीराङ ताङाते दुका, थेते जय जय ओङस्यीत,’ सिन मासाथुप ख्योकोनगी था ङाला थोङाराङ मेङेदो,” सिन सिदुक।
Currently Selected:
लूका 13: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
