लूका 12
12
परमेश्वरताङ छ्याःङ बात बोङा मुथुबो
(मत्ती १०:२६-२७)
1थेजीन ङोला ङ्वा मुथुप्च्या मि येशू खादु जम्मा ओङगीन ओतान। थे दोन्दुराङ ड्वाप सिन थेबा आउदी खाला च्येपा च्येप खिन ओतान। थेमे गोमाचेन येशूकी चेलातेबाताङ बात खिन “फरिसी पाटी मिओनताङ च्याङबो खिसा है। थेबाताङनी स्योबेनला लुच्येते सोडा ओत। थेबाताङ सोडा ओत साबाते च्यि सासीन थेबेकीनी खेकीकामा लेमुते बात खिओ। सेमगी नाङचेन मेलेबा मेलेबा बात ब्वाकीन ज्याक्पा ओङगो। 2ईन्दानी ज्येनताङ छ्यागीन ईप्कीन खाबाते कामताङ बादोङ ङीमा लेनज्यीक गाङेकी छ्या स्येक्यो। थोकराङ खाला ब्वाकीन ज्याक्पाते बादोङ तिरी दाक छ्या स्येक्यो। 3थोगी ख्योकोनगी दि बात छ्या स्येबा खि। च्यि सासीन नुप्ला खेराङकामा देत्कीन खाबाते बादोङ तिरी गाङेकी थोक्यो। थोकराङ खाला खाम्बे नाङ देत्जीन नामज्योकपा खाबाते बादोङ गाङेकी छ्या स्येस्यीत सिन थोच्या खाला लाःप्क्यो।
सुत्ताङ ज्यीबा खिता फाप्कीते
(मत्ती १०:२८-३३)
4थेमे र्वावे, ङा ख्योकोनला दि बादोङ सिओ। च्यि सासीन ख्योकोनला सेता छोल्कान्ते मिओनताङ ज्यीबा माकेत। थेबेकीनी ख्योकोन ज्यानकामा लिन्दा थुप्क्यो, ज्येनतोक छ्याःङ खिता मुथुबो। 5बरू ख्योकोन परमेश्वरताङचेन ज्यीबा खि। च्यिला सासीन थेकीनी सेता थुप्च्येतेकामा मेन, सेत्ला मिला नरककुण्डमाङ लुबा थुप्क्यो। थोगी मित्ताङ मेन, परमेश्वरताङकामा ज्यीबा खि। 6थेमे दि बात विचार खि। छ्यिल्बाक ङाजो सेत्कीन च्वासीन पैसा थोई ङेत्कीतेरो? पैसा ङिजोका ङेदोङ। मि लाईदु छ्यिल्बाक छ्याःङ च्योक मेन्सीनोङ परमेश्वरगीनी थे छ्यिल्बाकज्यीकला च्यि ओङगीका सिरच्येते बादोङ छ्या स्येक्यो। 7झन ख्योकोनतेनी गोःला दोस्यिक दोस्यिक टे केस्रा ओत सिरच्येते बात समेदोङ थेला छ्या ओत। थोगी थेकी माताता सिन ख्योकोन ज्यीबा माकेत। छ्यिल्बाक भन्दानी परमेश्वर लाईदु ख्योकोन खापान खापान छ्ये ईन।
8दि बात ङेन। ज्येनगी दोन्दु ङा येशूला विश्वास खित्कान्ते मि ईन सिन सिरकान्तेला परमेश्वर ओत्सादुई वाबाते मि ङाङ था तिरी परमेश्वर दूतओन दोन्दु दि ङे मि ईन सिन सिओ। 9मि दोन्दु ज्यीबेकी ङा येशूला विश्वास खित्कान्ते मि मेन सिरकान्तेलाचेन परमेश्वर दूतओन दोन्दु थेजीन ङाङ दि ङे मिराङ मेन सिन सिओ। 10सुइँदेकी परमेश्वर ओत्सादुई वाबाते मि ङे विरोध खाला मेलेबा बात खिदुक सासीन थेकी माफ ङेता थुप्क्यो। ईन्दा मेन्दा साकीन परमेश्वर आत्मे विरोध खासीन थोक्ते मिकीचेन नोमुङ माफ ङेता मुथुबो। 11थेमे ङे मि ईन्देकी खित्सादु ज्येनगी ख्योकोनला जुम्ला मिटिङ खित्च्येते खाम्बे छ्ये छ्ये मि थेमे गेल्बोताङ ज्येन छ्ये छ्ये मि दोन्दु बात ठाप्ला खेरग्यो। थोक खित्जीन च्यि सिरच्ये, चुक सिरच्ये सिन ख्योकोन ज्यीबा माकेत। 12बात ठा बेलाला च्यि सिरा फाप्कीते सिन थेजीनराङ परमेश्वर आत्मेकी ख्योकोनला छ्या स्ये ज्युत्क्यो,” सिन सिदुक।
मिकी सम्पत्ति लोभ खिता मेङगो
13येशू दोक खाला बात खिनराङ ओतान। थेमे थे हूलगी नाङ मिज्यीगी थेला “गुरू, ङे ङेता फाप्च्येते ङ्योकोन आबे अंश ङाला बो ताङला बिन सिन ङे आज्योला सिना,” सिन सिदुक। 14थेकी थोक सिरजीन येशूकी “ए होइ, ङे काम अंशे बात डिक्पा खाला तेरच्येते मेन। थोगी ङाला दि बात मासेर,” सिन सिदुक। 15थेमे थेकी थेरू ओताते मि गाङेला “ख्योकोन च्याङबो खि। ख्योकोनगी लोभ सिराते छ्याःङलाङ माकेत। सम्पत्ति थुप्रो ओत्जीनमेईराङ मिकी लेमु खाला जुनीकाल्बा क्योङा थुप्च्येते मेन,” सिन सासुङ।
16थोक सानामेई थेकी थेबाला दोक सिन कथा लाःपाला स्यूसुङ। थेकी च्यि सिका सासीन “ठाउँज्यीक्तु आउदी छ्युक्पुज्यीक मि ओताक्वालो। बाजिई थे स्यीङला आउदी खाईन अन्न लेदुक्लो। 17थेमे थे मिकी था ङा दि अन्नतेबा ज्य्वाबाला च्यि खिता ईन्ताका। ठाउँ मादाङच्या ओङगीन सिन्सुङ। 18ए ङा दोक खितामीन। थरिङसाक अन्न ज्याक्पाते ठाउँ राम्ला खाम्बा च्योकराङ जोदाई ठाउँ जोला ओताते जति अन्न थे नाङराङ ज्य्वाबामीन। 19ङे भाग्येकी खित्सादु था ङाला जुनी खाङ साच्या थुङच्या वालछ्येल ओङच्या ओङसुङ। था ङा छ्याःङ पीर मिक्किता खाला स्यीम्बुराङ सोला लेमुराङ खोन्ला किम्मु खाला देतामीन सिन विचार खादुक्लो। 20थेमे थे मिला च्यि ओङसुङा छ्या ओत? परमेश्वरगी थेला ‘खो चुक बुद्धि मेताज्यीक ईन्दाका। खो थरिङ ग्वाकाराङ स्यिइओ। खो स्यिनामेकी खुई साकीन ज्याक्पाते सम्पत्ति ज्येनगीका सेइओ,’ सिन सादुक्लो। 21थोगी बुद्धि मेताते मि सिरातेचेन होथोक्ते मि ईन। तिरी बो माताबा खाला थोक्तेकीचेन सम्पत्ति लाक सम्पत्ति साला छ्युक्पु डुइओ। परमेश्वर दोन्दु धनी ओङच्येतेचेन दोक खाला मेन। दोक्ते सम्पत्ति ओत्ला तिरी छ्याःङ फाइदा मेङगो,” सिन सिदुक।
पीर खिता माफाप्च्येते बात
(मत्ती ६:२५-३४)
22थेरूकी येशूकी चेलातेबाला “बात दोक ईन्देकी च्यि साच्ये थेमे च्यि खोन्च्ये सिन ख्योकोन पीर माकेत। 23च्यिला सासीन मि जुनी छेत छ्ये साप थुङा मेन। थोकराङ खाला जीउ भन्दा छ्येचेन खोन्च्येते मेन। 24खादाकलाराङ ताला विचार खि। च्यि थेबेकी कहिलेबा खेतीपाती लै खाबातेताङ अन्ने भकारी काङाते ख्योकोनगी थोङा ओत? थोक माक्यासीनोङ परमेश्वरगी थेबाला साप थुङा बिन्लाराङ दुक। छ्योज्युङमा जाबालानी परमेश्वरगी साप थुङा बिन्ला दुक सासीन ख्योकोनला झन मेतेरोतरो? छ्योज्युङमा भन्दानी परमेश्वर लाईदु ख्योकोन खापान खापान छ्ये ईन याङ। 25थेमे च्यि ख्योकोनगी पीर खाला खेराङ आयु टिक्पीई रीम्बु ओङगोतरो? 26पीर खाला थोकस्यिक कामनी मेङच्या दुका सासीन झन ज्येन बातकी लाईदु थाराङ च्यिला पीर खित्च्ये?
27थेमे पाङगी नाङला फोङा ओताते लिली मेन्दोकलाराङ तो। दि मेन्दोकतेबा थोई लेमु दुका। मिकी दुक्पा खाला खोलाक खोन्दाच्योक लेमु ओङाला दि मेन्दोककी छ्याःङ खिता माफाबो। थेमे दि बात छ्या ओत? थाङबो सोलोमन गेल्बो थोक छ्युक्पु ओत्कीन आउदी लेमु लेमु खोलाक खोन्जीनोङ होदोक्ते मेन्दोकज्यीक छेदोङ लेमु थोङा मेतान। 28थरिङ दोक लेमु खाईन फोङा ओत्सीनोङ ङारो दि मेन्दोक सोताङराङ ङाला काम्ला दाक स्येइओ। थोक खित्च्ये जालानी परमेश्वरगी होदोक लेमु थोङच्या जोला दुक सासीन च्यि ख्योकोनला खोन्च्येते मेतेरोतरो? दाक्पोनला गोच्येते गाङे परमेश्वरगीराङ तेरग्यो सिन ख्योकोनगी पत्ते खाबाते खोइ? 29थोगी च्यि खोन्च्ये, चुक खाला साप थुङा ङेदोङा सिन पीर खिन देता थोङ। 30परमेश्वरला छ्या मेस्येकान्ते मिओनगीकामा खालि साच्या थुङच्याताङ खोन्च्ये विचारकामा खिन देत्क्यो। ख्योकोनला साप थुङा थेमे खोन्दा गोक्यो सिननी ख्योकोन आबा परमेश्वरला दाक छ्या ओत याङ। 31थोगी ख्योकोनगी पीर खिते साटोला खेराङ सेम पूरो खाला परमेश्वर राज्य छ्य्वापा लै खि। थोक खासीनराङ ख्योकोनला गोच्येते जति गाङे परमेश्वरगी तेरग्यो।
स्वर्गे सम्पत्ति बात
(मत्ती ६:१९-२१)
32थेमे ख्योकोन टिक्पीईराङ ओत्सीनोङ ज्यीबा माकेत। च्यिला सासीन ख्योकोन आबा परमेश्वरगी ख्योकोनला थे खोरोङ राज्यदु देत ज्युत्क्यो सिन साबा ओत। 33खेराङताङ ओताते सम्पत्ति च्वाला दुक्पा ङेताते मिओनला गोला बिन। दुरू सम्पत्ति सोक्पा साटोला ख्योकोनगी स्वर्गने दाक्पोन मिनला सम्पत्ति स्वा। स्वर्गे सम्पत्तिचेन दुरूते च्योक घटेङ मिक्किओ, चोरगीङ क्वा मुथुबो थेमे बुईकीङ मास्साओ। 34बात च्यि सासीन ख्योकोनते सम्पत्ति जहाँ दुक, सेमोङ थेरूराङ ओङगो। दुरू ओत्सीन दुरूराङ थेमे स्वर्गने ओत्सीन स्वर्गनेराङ।
परमेश्वर काम खित्कान्तेबा चुक ओङा फाप्कीते
(मत्ती २४:४२-५१; मर्कूस १३:३२-३७)
35थेमे ख्योकोनचेन जुन बेलालाङ काम खिताला ठीक ओङगीन देताते मि च्योक ओङला देत। नुप्ला सुइँदा मि ओङकान ओत्सीन बत्ती पारगीन गुकीन देताच्योक खाला ख्योकोन गुला देत। 36ख्योकोनचेन फाङमाला गालाते मालिकतेकी नुप्ला वाला गो फेत सिरासात्तु गो पेत्ला तेरकान्ते मि च्योक ओङा फाप्क्यो। 37माङ्याला खाला मालिकते ओङ ओङसाक गुलाराङ देत्कान्ते मिओनला मालिकतेकी च्यि खिते छ्या ओत? थेकीनी थेबाला छ्याःङ काम खित मुज्युता खाला थे खोरोङगीराङ गाङेला साप थुङा गोला तेरग्यो। 38मालिकते नुप फेतला वासीनोङ, साला नाम्दाक फोक्पे खालाकामा वासीनोङ थेबा गुकीनराङ देता ओत्सीन मालिकतेकी थेबाला झन लेमु खिओ। 39थेमे दि बादोङ ङेन। सुइँदा मिकी थरिङ चोर ओङगो सिन छ्या स्येसीन थे छोमु च्याङबो खाला जागोराङ देत्क्यो। थेमे थेते छ्याःङ क्वापराङ मुथुबो। 40परमेश्वर ओत्सादुई वाबाते मि ङाङ चोर च्योकराङ सुङगीङ छ्या मास्येबाते दिनगी छोमु दुरू ग्युरला ओङगो। थोगी थरिङनी मेङतासीन सिराच्योक मिक्किता खाला ख्योकोन ठीक ओङला ङाला गुलाराङ देत,” सिन सिदुक।
41थेकी दोक सानामेई पत्रुसकी “प्रभु, थाल्ला खुई खाबाते दि मालिकताङ काम खित्कान्ते मि बात ङ्योकोन लाईदुकामा ईन्दाना मि गाङे लाईदु ईन्दे?” सिन ठिसुङ। 42थेमे प्रभु येशूकी “मालिकतेकी कोत्कीन ज्याक्पाते ङेन्ला लेमु खाला काम खित्कान्ते मिलाचेन मालिकतेकी थे खोरोङ खइँसापा डोजीन थे खाम्बादुराङ काम खित्कान्ते ज्येनतेबाला लेमु खाला साप थुङा बिना सिन खाम्बे कामओन जिम्मा बिन्ला डुइओ। 43तिरी मालिकते ग्युरला ओङजीन थेकी साबा साबा काम खिन देता ओत्सीन थेला लेमु ओङगो। 44थेकी थोक लेमु खाईन काम खाबा थोङला मालिकते खुशी ओङला चुक खिते सासीन ओतातेबरी सम्पत्ति थेलाराङ तो सिन सोम्पे खिओ। 45तर मालिकते नाम ओङगो नाम ओङगो सिन थे खोरोङला खि साबाते काम खिता ताङगीन थेकी थेरू ज्येन योक्पो योङमुला थाप्सुङ दुसुङ थेमे सुबा दुला दुला सेइन छ्याङ रक्सी थुला मनपरी खिन देत्सुङ सासीन 46मालिक थाल्लाराङका च्यि वाओङा सिन विचार खाबे बेलालाराङ मालिकते लेप्क्यो। थेकी थोक खिन देता ओता थेप्सीन मालिकतेकी थेला च्यि खाओङा। मालिकतेकी थेला दुला दुला होथे च्योकराङ मालिकते बात मेङेन्कान्तेबाला तेरच्येते सजाय तेरग्यो।
47मालिकतेकी च्यि खि सिन साबा ओते सिरच्येते बात छ्या स्येला स्येलाङ खि साबा ओताच्योक मिक्किकान्ते मिलाचेन मालिकतेकी आउदी खाला दुङगो। 48तर खिता फाप्च्येते काम च्यि ईन्दे सिन छ्या मेस्येकान्तेकी खइँदा काम ङ्ये च्युत्सीन थोक्तेलाचेन मालिकतेकी ज्येनतेला छेतराङ मुदुङो। बातचेन दिराङ ईन। च्यि सासीन परमेश्वरगीङ जो जसला बात काल्बेई छ्या स्ये च्युत्कीन काल्बेई कामगी जिम्मा बिन्ला दुक थे थेकी जिम्मा लै खाबाच्योक खाईन काम खाकाना माक्याका सिन तिरी गाङे तेइओ। काल्बेई कामगी जिम्मा खुराते मिओनगी थेला थोजोराङ काम खाबाते तेन्दा फाप्क्यो।
येशूकी थे खोरोङ चुक खित वाबाते ईन्दे साबाते
(मत्ती १०:३४-३६)
49थेमे छापो लै खाबाते ठाउँदु मे लै खाला छापो कुराच्योक खाला दि सा लुङबा खाङगी मि न्याय खिताला ङा दुरू वाबाते ईन। बरू दि काम खाईन सिन्दा ओत्सीन लेमु ओङच्या ओतान। 50दि काम खाला सिन्दा खिताला ङे आउदी खाला पीरताङ दुक्पा भोगे खिता फाप्क्यो। थातासाकला थे दुक्पा भोगे खाईन सिन्दा ओता ईन्सीन लेमु ओङच्या ओतान। च्यिला सासीन दोक मायाङ थुपथुप ङे सेमला ढुक्क मेङगो। 51थेमे ख्योकोन ङा मिओनला डिक च्युत्ला किम्मु लोङाला दुरू वाबाते ईन्दासीन मासेर। अहँ, ङानी थोक खिताला मेनगी ठाल ज्युतालाका वाबाते ईन। 52च्यि सासीन ङे खित्सादु थाचेन खाम्बाज्यीगी मिङ छ्य्वा छ्य्वा लै खित्च्या गाल्ला मिडिगो। मेरा ङा ओताते खाम्बादु मेरा सुम छ्य्वाज्यीकपा लै खासीन ज्येन मेरा ङि थेबाताङ मिडिगो। थोकराङ खाला थेबे नाङ मेरा ङि छ्य्वाज्यीकपा लै खासुङ सासीन ज्येनतेबा सुमबो थेबाताङ मिडिगो। 53थोक ओङला आबातेबा फुज्युङतेबाताङ थेमे फुज्युङतेबा आबातेबाताङ मिडिगो। थोकराङ खाला आमातेबाताङ फुमुतेबा थेमे आबीतेबाताङ नामातेबे नाङोङ होदोकराङ ओङगो,” सिन सिदुक।
थोरूमोङ परमेश्वर सजायदुकी थारच्येते मौका ओत
54थेमे येशूकी थेरू ओताते मिओनलाङ “मिवे, ख्योकोनगी पश्चिम छ्य्वापेकी मुक्पा ओङा थोङसीन था छ्यार्बा देक्च्याक्वा सिन सिओ। साबा च्योकराङ छ्यार्बा देइओदोङ। 55थोकराङ खाला दक्षिण छ्य्वामेकी ल्हाबा चले खासुङ सासीन था ठोत बारच्याक्वा सिन सिओ। थेमे साँच्चीराङ थोकराङ ओङगो। 56मुक्पाताङ ल्हाबे बात विचार खाला च्यि च्यि ओङगीते सिन सिरा थुप्जीन परमेश्वरगी खेराङ मिगी दोन्दुराङ खिन ओताते कामओन थोङलाङ थेकी च्यि खिन दुका सिरच्येते बातचेन ख्योकोन च्यिला छ्याःङ माखोबा च्योकराङ खाला देत्कीते? ख्योकोन चुक्तेन्दे ईन्दाका। 57ख्योकोननी खेराङगी च्यि खिता फाप्च्या ईन्दाका सिन छ्या स्येलाङ छ्या मास्येबा च्योकराङ खाला देत्कीदुक। 58दि बात विचार खि। च्यि सासीन ख्योकोन सुइँदेकी ज्येनला मेलेबा खासीन थे नालिस तेराला अड्डाला ख्याम्ग्यो। थोक खाला खेराङ ङिकाराङ अड्डाला डोजीन ख्योकोनगी थेत्ताङ डिगी सिन लामलाराङ खेराङ बात डिक्पा खि। थोक माक्यासीन थेकी ख्योकोनला न्यायाधीश खादु केल्ग्यो। थेमे न्यायाधीशकीचेन जेलला ल्हुक सिन पुलिसला जिम्मा तेरग्यो। 59थोक ओङनामेकी जति पैसा छ्योल साला दुक थोस्यिकराङ माच्यालथुप ख्योकोन जेलदुराङ रूल्ला देता फाप्क्यो,” सिन सिदुक।
Currently Selected:
लूका 12: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
