Lukas 11

Yesus arye Allah morona ati, peterebuk yupu

(Matius 6:9-13; Matius 7:7-11)

1Tonok sum ara, Yesus arye Allah moronmoka ani, el mapu arye kekenmek. Kekenmekura, Yesus akunum morobuka sirya daknuyuk karin ara, el mapu kan-kan tonoknye birye, Yesus ati nyabuk. “Naio, Yohanes Pembaptis arye, el yupu kekelamik nang peterelamuk touk, ance ton nunti, ‘Allah morona ara, winibuka moroplulume,’ nyabuka peterepsutume,” nyabuka morobuk.

2Anye birye ayupu asipdeyuk anya arye, Yesus arye el mapu nirya ati tamubuka ayupu nyabuk.

Anggun Allah moronamlum talak ara, nyabuka moronamlume.

Nun ni Allah, im deice ulyamnye, ‘Nun babye, yuk nang nirya babye, an siuk erebuka unamap’ tenen, moropkiayabe. ‘Minpola yamince, ninye mutuku-mutuku nirya talibuka unamsilam’ tenen, moropkiayabe. Tonda, ‘Ance mutuku-mutuku nirya ap, nun tukwak nang nirya ap, talipsimince, nun Weik Deiyoknye an tonok unamsilam’ tenen, moropkiyabe. 3Asum-asum nirya nun kwaning ap, yuk ning ap, patasilye touk, ‘Melibuka arepsiminyeura, dobuka dinamabe’ tenen, moropkiyabe.

4‘Yuk nang arye, nunti malye winipsikibuk, namin kinyap touk, ‘Ance ton, nun malye wininyap ning ara, namin kibuka, kum kipdeipnamsilame’ tenen, moropkiayabe. ‘Malye winipnyak do?’ tenen, ‘Weik ikin winilen ning kum arepnamsilam’ tenen, moropkiayabe. Tonda, pia Malye Winin Ning Deiyoknye, Isa Mutuku Dongonye birye, malye updeipsilyeura, malye ubibyak’ tenen, ‘Ance kalikuka disimince melinamsilam’ tenen, moropkiayabe.

“Ayupu atonun nyabuka Allah moronamlume,” Yesus arye el mapu ati nyabuk. Nyabukce, ayupu winipmanto ning ton nyabuk.

5-6Anggun kwit el aik aunmatubuk, tonok sum pia lukunyan noutamak, el aik dam bitumce, “Kao, na ninye asiknye yuk mutuku arye yanmanilbuk, na din ning kum ati, ance kwaning winilye arepnutume,” nyabuka moroptume. 7Moroptumopura, anyasiknye birye el atamubuka, “Kume, na bulina bataknio. Bublan akunum tirikdongopmanurye, na ap, na mapu ap, neika mapmaba anya arye, an moropmanilam ning ara, kum arepnukine,” nyaptue.

8Anye bira, pia maplukmaturye wi dukunmatu anya arye, ‘Na kwit koprop’ tenen, kum arepkutubuk, pia batakna kumce, moronauk unmatumopura, ‘Yata ati pia nyanmanil do?’ tenen, lik upturyuk, an patapkutu touk weik arye arepkutue.

9Aning ati ara, narye nyapsine, anggun patapsilye ning moropmunyopura, Allah arye aninguk arenamsile. Anggun patapsilye ning ati, ‘Danaka eipnamap do?’ tenen, elsusumunyopura, eipnalume. ‘Anyaik wektinye’ tenen, lourum-lourum abuka piripmunyopura, Allah arye buplan kukeipnamsile. 10Wininamluma ara, talye ati kume. Na dipkoprop nyapsine. Yata nang do nirya, Allah ati morolulnye bira, Allah arye areplyeura, dopropnamle. Elsusululnye bira, Allah arye meliplyeura, eipnamle. ‘Anyaik wektinye’ tenen, lourum-lourum abuka pirilulnye bira, Allah arye abuplan pakeipsilyeura, weknamlume.

11Anggun tenipdelulume. Anggun awekmalum nang kan-kan, yatanye el mi arye el li biti, mekin bal moroplibuk kwatimauk arepnamlum do? 12Tonda, el mi arye maka duk moroplibuk ninye si ton tanga arepnamlum do? Kume, anggun mapu arye moropsice ninguk arilulume. 13Anggunda, talima noutamak malye ulalum nang ara, anggun mapu ati, teleb ning arena ara, akunum kel biklume. Winilalum ning ara, mitik teleb, mitik arilulum bukni, anggun ni Allah, im deice ululnye birye, elti, morobikce ning arenamsil ning ara, weik arye el Dib Kanye arenamsile. Yesus arye el mapu ati nyabuk.

“Yesus ara Isa Mutuku Dongonye el mikip deice arye pil dolule,” nyabik yupu

(Matius 12:22-29, 43-45; Markus 3:23-27)

14Tonok sum ara, yuk nang arye, lubnye tonok Yesus dam boyayik. Anye bira, isa el talima talyamuka deice arye, lubnye ulamuk. Keting tamun weik isa talyamukura, luba ulamukbuk, Yesus arye aisa kwetebukura, atalak aryuk, anye bira yupu teleb ubuka nyanmok. Yupu teleb ubuka nyanmokura, abulubuka wekuka kekenmek nang arye, ‘Se’ tenen, ngalukunmek.

15Ngalukunmek bukni, ton nang arye ayupu nyabik. “Kume, aisa yakalula ara, isa nirya, sik deiyok Isa Mutuku Dongonye arye, el si ton Belesebul,#11:15 Belesebul – Isa Mutuku Dongonye el si bitinye anya arye, ton ning ara elti, Belesebul nyanyake. el mikip deice arye, Yesus arye isa nirya yakalule,” nyabik. 16Ton nang ara, ‘Yesus ara, dipkoprop Allah el Mi Koprop kum ulule,’ tenebika ati, Yesus asilena ati ayupu nyabik. “Im deice noutamak arye, ninye winipmanto kum pil dopsutumopura, nunce anti, ‘E, diba Allah el mikip deice dib pil dolule,’ tenepkitibye,” nyabuka asipdeyik.

17Ayupu nyanmeka ati, Yesus arye anang sik talima noutamak tenebik ning bikmoka ati, Yesus arye, anang ati nyabuk. “Dan mutuku do nirya, tonok weik deiyoknye birye talilul kili sal noutamak bokikirye opdacopura, sirya dakdanamake. Akili sal nirya arye opdacopura, tonoknye birye, yata wiribuka taliptu do? Neika kum uptinge bukni, yuk-yuk bindoptinge. Aning atonun, yata yala nang do nirya, sikce opdacopura, sirya dakdanamake. Yata wiribuka neika upting do? Akunuma bokuka yuk-yuk bindoptinge. Ati anggunce, ‘Yesus ara, Isa Mutuku Dongonye el mikip deice arye, isa mer yakalule,’ nyanululum ning ara, kum winipmanto anye arye, talye yupu uk nyanululume.

Isa si eremunya ara, Allah El Dib Kanye mikip deice aryuk yakanune. Yata pil do nirya, Isa Mutuku Dongonye, el mikip deice arye pil kum donune.” Yesus arye nyabuk. Nyabukopura, Yesus arye adomon yupu deice arye anang ati ayupu nyabuk.

18Anyapman ning atonun, Isa Mutuku Dongonye ap, Isa Mutuku Dongonye arye el mapu koprop, isa mer ap, sik mamun oldatingce, Mutuku Dongonye el mapu koprop ati, yakuka dopkweteptopura, sik mikip pia kum uptue. Isa Mutuku Dongonye el mikip kum uptuopura, ninye ton kum taliptue. Aning ati ara, isa mer yakanyak ara, Belesebul el si ton Isa Mutuku Dongonye, el mikip arye kume, Allah El Dib Kanye mikip deice aryuk apil donune. Anyapmasina ara, ‘Isa Mutuku Dongonye el mikip deice arye isa mer dolkwetelule,’ nyalamnuluma ati, ayupu nyapsine. Anggunda, talye yupu nyanmalume.

19Isa mer nirya yakuka dolkwetenya ara, ‘Isa Mutuku Dongonye el mikip deice arye dolkwetelule,’ tenepmanulum bukni, anggun Farisi nang, anggun milina nang babye, isa yakuka dolkwetenyaka anya arye, anang ara, yatanye mikip deice arye, isa mer yakuka dolkwetenyak do? Anggun yupu kekebuka milisinyak nang arye, isa mer yakuka dolkwetenyaka deice arye, akunum lake upmasile. Anggun kanye wililtona meme. Anggun mapu babye, na babye, atouk pil donyapa ati, Allah el mikip deice aryuk isa mer yakuka dolkwetenyabe. Anggunda tilila nyalalum nang anya arya.

20Kume, na isa mer nirya yakuka dolkwetenya ara, Mutuku Dongonye mikip deice arye kum dolkwetenune. Allah el mikip deice arye yakuka dolkwetenune. Aning ati ara, Allah ninye weik lyeplirye, sik kanye talima talinamle talak akunum deiyok uple. Anggun dam akunum yanmale. Na isa mer bisibuka dolkwetenuna deice arye, laka akunum eiplume. 21Anggun nyapmanulum ning kum winipmanto ati, winipmanto yupu ton nyapnusine, Yesus arye nyabuk.

Ninye tonok weik mikipnye birye, ‘Yuk nang arye na aik wekuka, na ning ubula doprobicak’ tenen, ninye on ning yin ap, parang ap, kintinipturye, el tenepce kaliktopura, yuk nang arye el ning ton kum doproptinge. 22Anyaik deiyoknye, weik mikipnye bukni, pia weik mikipnye ton yaturye, anye bira tapu kouploptopura, el ning ubula doproptue. Tonda, anyaik deiyoknye birye, ayin ap, parang ap deice arye, ‘Lyepdatinye,’ tenelamtu ning nirya, yuknye, pia weik mikipnye doproptuopura, anyaik el ning nirya dalubuka dopropturye, ubula doproptunye, el kayapu nang ati, bokuka areptue.

Aning atouk, Isa Mutuku Dongonye ara mikipnye ulul bukni, nara weik mikipnye kum ulamtinyopura, Isa Mutuku Dongonye, el mapu kum yakuka dopkweteptinye. Bukni, ninye tapu koulamak touk, Mutuku Dongonye bisipnirye, isa el mapu dolkwetenune. Yesus arye, Farisi nang awekuka nyanmek nang ati nyabuk.

23Nyabukopura, ayupu tonap nyabuk. “Na ap neika kum pil dolulnye bira, yupu sekuka bisbisibuka, yaniplobuka balamak atonun ulule. Tonda, kwaning yongobuka tonok ak bulubuka deibikce talak ara, el ap bulubuka kum delilulnye bira, yamubuka donokolamak atonun ulule. Na ap, anggun ap, neika kum pil dolbilyopura, wininyak nang atonun, na yupu yaniplobuka atonun ululume.” Yesus arye nyabuk.

24Ayupu nyabukopura, ayupu tonap, nyabuk. “Anggunda, kanye mouplulume. Isa nirya ninye talima noutam talyamlya ani, kutukuka balirye, ‘Dan dikdik septinye do?’ tenen, mek pia kumak balamlya ani, teleb ak kum eiplyopura, ila tamubuka el min talyamlinye dam yangalule. 25Yanuka dinmalirye, el min arye ulamlye aik noutamak ara, amsuna ap, delin ning nirya ap, teleb wamlirye, ninye ton una kum ati, ‘E, anyaik ara lo tuba upmala ati, anyakuk unamne,’ tenebuka ulule.

26Uteneplirye, elda mitik yubuk, weik yu isa tekbarye binuka dobolyalyopura, anye bira el talima noutamak wekuka unyake. Anye bira el talima talyamice ning, min arye mitikto malye ulamuk wini talak, ara, pia weik malye unamle. Ayupu nyapmasin touk, anggun babye, min arye malye ulamlum ning mitikto akunum bataklum bukni, talima lo upmasilye ning ara, Allah arye ninye nirya talinamle talak nyasinye yupu ara, kum talipmunyopura, aminyan ara pia malye unamlume,” Yesus arye nyabuk.

27Yesus arye ayupu tuba nyanmok talak ara, awekmek ninye kan-kan arye tonok kil yupu weik arye nyabuk. “An deipkukce, moum dinyamkuk kil ara, pia mambule. Akil ara, Allah arye pia teleb ulinamle,” nyabuk. 28Nyabukopura, Yesus arye akil ati tamubuka nyabuk. “Kume, yata ninye do nirya ara, Allah yupu moubuka kekebikirye, diba tenebuka, diksukumuk unyakce Allah ati dobolbanyak ninye ara, sikda pia mambule. Aninye ara, Allah arye teleb ulinamle,” Yesus arye nyabuk.

‘El ninye winipman kum pil dopsutubuk, diba teneptibye’ tenen, tenepce, Yesus asipdeyik nang ati, Yesus arye nyabuk yupu

(Matius 12:39-42)

29Ninye pia weik tonap, Yesus dam yanganmekopura, Yesus arye abulubuka yanganmek nang ati nyabuk.

Anggun wini talak ululum nang ara, Allah yupu yaninauk ululum nang anya arye, ‘Ninye winipmanto kum pil dopsutubuk, adeice aryuk diba teneptibye’, nyabuka moronululume. Bukni, ninye winipmanto kum pil, tonap kum pil dopnamsine. Nati, diba kum tenepnulum nang anya arye, anggun winilulum ning atonun ning nyapnusine.

Ara, anggun malye nang arye, pia malye ninguk talibuka winilulume. Anggunce bataknuluma ati, nyapsine. Allah yupu laka nyalamuknye, nabi Yunus ulamuk talak winibuk ning ara, awinibuk ning atonun ning ara, aminyan winipnamle ning ara, eipnamlume. Yuk pitin kin ning ton kum arepnamsine. 30Ayupu ara, talya ati kum nyapsine. Deiyok ara ani. Weik mekin bal arye, Yunus amkorokukura, mekin bal mun pum bisik, like winilye daulamoka ani, amekin bal arye, Yunus el nonge duklobuk.

Awinibuk ning nirya eibikce, Niniwe mutuku ulamik ninye, diba tenyamik touk, nara Ninye Mi Koprop Atonunye, wininye ning deice arye, wini talak unyak ninye diba tenenamake. Yunus ulamuk talak winibuk touk, nara Ninye Mi Koprop Atonunye opnikceura, tuku pum bisik mapmanya, like winilye akunum uplyopura, tamubuka kam buknamne.

31Weik ninye deiyok kil, Seba mutuku talyamuk kil arye,#11:31 Seba mutuku talyamukce, weik deiyok kil, el yupu ara, 1 Raja-Raja pasal 10 noutamak dipdelulume. Seba mutuku nyalamik ning ara, wini talak amutuku bukni, yuk si Yaman mutuku nyanyake. ‘Raja Salomo weik kel arye nyalul yupu ara, na ton kekeptinye’ tenen, pia yuk mutuku bukni, Salomo dam kekelyayuk. Winibuk ati, sirya talak, Allah arye ninye nirya bokuka wenepnamle talak ara, akil arye tikukaplirye, anggun atalak umunye nang ati, ‘Anggunda, pia malye ulalum nang,’ nyapnamsile. Na dipkoprop nyapsine. Dipkoprop Salomo ara, mitik kelnye ulamuk bukni, nara, weik kelnye akunum yasi bukni, tuba nati, diba kum tenenululume.

32Aning atouk ton, Niniwe mutuku nang ara, Yunus mitik mambulnye bukni, Allah yupu peterebukura, kekebikce, sik malye ulamik ning batakik. Winibuka anya arye, Allah arye ninye nirya bokuka wenepnamle talak ara, Niniwe mutuku nang arye tikuka, anggun atalak umunye nang ati, ‘Anggunda, pia malye ulalum nang,’ nyabuka lak akarye nyapnamsiake. Yunus mitik mambulnye peterebuka deice arye Niniwe mutuk ulamik nang diba tenelamik bukni, wini talak ara, weik mambulnye bira, na akunum yase bukni, tuba diba kum tenenululume. Yesus arye abulubuka wekmek ninye ati nyabuk.

Yesus arye, “Anggun nong upna atonun ning ara, asing upsuke,” nyabuk yupu

(Matius 6:22-23)

33Yesus arye ayupu nyabuk. “Anggun nirya kele, ninye nirya ara, sik weisa ubukabikirye aik pum boyangalamaka ara, ‘Kau pum bisik singipdongopnamap’ tenen, ubuka yangalamak do? ‘Yuk nang arye aweisa kum eipmanto akuk deipnuyabe’ tenen, do? Tonda, amsuna dangabuka, ‘Weisa singipdongopnamap’ tenen, ubuka yangalamak do? Aning ara, kumde. Weisa ubukabikirye, abilinga taram ak deibiceura, dirina weik uplirye, anyaik wekmakce ninye nirya elinyake. ‘Ninye nirya eipnamake’ tenen, upna deililamake.

34Anggun nong upna atonun ning ara, asing upsuke. Asing teleb upsutopura, bisik teleb ninguk eibuka bitume. Bukni, asing malye upsutopura, asing kubuka dengkepdanin, malye bisikuk bitume. Aning atonun, anggun kanye talima noutamak, malye ning atibuk dib tenepmunyopura, aminyan unamlum ning nirya malye unamsile. Anggun asing noutamak dirina kum weksutopura, kunauk binamlume. Atouk, anggun kanye talima noutamak malye ning atibuk tenepmunyeura, malye ninguk wapsilyopura, anggun pia malyeuk unamlume.

35‘Anggun talima noutam dirina usul ning ara kunuksilyak’ tenen, anggunce moupropmunce unamlulume.

36Anggun kanye tenena, ap, anggun talima noutamak ap, dirinauk upsilirye, tonok ak babye, pia dirinauk upsilyeura, telebuk unamlume. Wininamsil ning ara, upna ubiceura, dana-dana nirya ap, sik nong deice ap, dirina weik ulamlyeura, teleb bisikuk balamak touk, anggun kanya talima noutamak, dirina upsilyeura, telebuk unamlulume.” Yesus arye nyabuk.

Yesus arye Farisi nang ati, ‘Se,’ tenebuka, “Ikin kanye bopnamlume,” nyabuk yupu

37Yesus arye ayupu nirya akunum nyabukopura, Farisinye tonok arye, na aik din dilyalyame, nyabuka morobukura, Yesus arye el aik binuka bukukce din, dinmok. 38Dinmokura, Yesus el taruk mek kum likmokcuk dinmoka ati, aFarisinye dinmokce ngalukunmok. (Ara, sik Farisi nang arye, ‘Kume, taruk mek likna ara, mem ning ato ning ati, aning kum winibibyopura, Allah arye derepsilyak ati, kum bataktibye’ tenen, taruk mek likna ning weika arye peterelamik touk, sik babye, ton winilamik.) 39AFarisinye ngalukun moka ati, Yesus arye anye biti nyabuk.

Se, anggun Farisi nang ara, anggun kanye talima noutam malye ning aupmasilyebuk, ‘Teleb nang tenepnamsiyak’ tenen, nong bol deice ninguk teleb winilalume. Anggun mek makau ap, piring ap, ‘Malye upmasilye mangkau arye dipnyak’ tenen, bol deice tam ara teleb-teleb ubuka mek likilulum bukni, anggun kanye talima noutam ara, pia malye wini ning ap, yuk ninye ning ubula dona ap, awabsilibuk, aning tenena kum aryuk talye kanye bobuka ulalume.

40Anggun pia walwal nang ululume. Lakak ulul ning ap ninye asing arye kum eipmanto ning ap, aning-aning nirya kwepdeibuknye bira, Allah uka. Ati ara, nong bol deice ning babye, ninye talima noutamak ulye ning babye, kwepdeibuka ati ninye talima noutam ulye ning nirya ara disulule. Aning tenilena kum arye malye tuba winilulum do? 41Anggun mek makau ap, anggun piring ap, noutamak dimunye ning ara, bokuka talye kankan unyak ninye ati, areamtumtoura, anggun un ning nirya ara, diksukumuk unamlume. ‘Nong bol deice atibuk tuba’ tenena, meme. Dipkoprop winin ning ababye, winamlulume. Awinipmunyopura, Allah arye kanye deipnamsile.

42Anggun Farisi nang ara, anggun talima noutamak malye ning aupmasilabuk, ‘Teleb nang tenepnamsiyak’ tenen, nong bol deice ninguk teleb winilulume. Anggun bicoe, Allah arye wenebuka opnamsila ati, ilil kanye bobuka unamlume. Anggun malye winimunye ning ara ani. ‘Aning-aning nirya ara, Allah elcuk aresulul’ tenen, pia mitik ning bukni kuma ap, babok ap, erica ap bokuka, Allah ati ton arilulume.

Winilulum bukni, weik mambul winin ning ara, batakalulume. Anggun batakalalum ning ara, Allah arye ninye nirya bico tenepsilirye, melisulul touk, ninye bico tenebuka kanye talima arena ara, anggun batakalalume. Tonda, ninye awinipmakce touk yupu lipsisikuka nyana ap, yupu bokolina ap anirya ara, Allah yupu noutamak aubuka bukni, batakalulume. Amitik ning Allah ati arimunya ara, teleb bukni, aning batakna kum arye, weik mambul ning babye, winipnalulume.

43Anggun Farisi nang ara, ‘Se’ tenebuka, imun kanye bobuka unamlume. Ton malye winilaluma ara, Yahudi yala nang Allah yupu peteren aik, Allah yupu peteren talak ara anggunda, ‘Yuk nang eipsikirye, teleb nang tenepnamsiyak’ tenen, weik nang bukmantoak, ninye urasin dinakuk bulbalulume. Tonda, ninye nirya din ning deibuka dekenmakcak, ‘Pasar noutam arye banmabikuk, ninye nirya arye kinamsiyak’ tenen, kil-kil kanye arye bobuka balalulume.

44Se, anggunda, pia malye ulalume. Ninye arye dipne ninye weina ati, tuku palibuka ninye baya yo akunum deibikceura, tuku singnina kum arye, bataktingopura, yuk nang mangkau arye yanibuka atuku pum bisik sakuka opdatinge. ‘Winibikcak’ tenen, bata delilamak ning kum deibikcopura, aminyan ara yuk nang mangkau kanye bobuka banmakce ani, aweipmakce ning mangkau arye yaninyake. Aning atonun, anggun babye winilulume. Ara, anggun malye winimunye ning ap, tenepce arye peteremunye ning ap deice arye peteremunyebuk, yuk ninye arye talye mangkau kanye bobuka, malye winin ning kel bikuka unyake. Yesus arye Farisi nang ati nyabuk.

45Yesus arye nyabukura, el ap neika din dinmek nang, tonoknye birye nyabuk. “Na ni Guruo, atonun yupu nyapsiminyopura, ‘Nun tibuk nyapsil’ tenen, malye kanye bonyabe,” nyabuk. Ayupu nyabuknye bira, Allah arye, ‘Aning wininamlulume, aning ara kum wininamlulume,’ nyapdeibukura, Musa arye sekeiamuk yupu peterna deiyoknye birye, Yesus ati nyabuk.

46Nyabuk bukni, Yesus arye dukdongobuka ayupu tonap nyabuk.

Allah arye nyapdeibukura, Musa sekamuk yupu peterena deiyok nang ara, bicoe. Allah arye wenepnamsila ati, kanye imun asa unamlume. Anggunda, anggun kanye tenena deice anyuk tabakuka, ‘Winipnamlulume,’ nyabuka, mem yupu petereluluma deice arye, ninye nirya sik nong deice ikin ning weik deililulume. Ikine pia weik anya arye, ayupu kekebuka kum dobol binmanto unyake. Ninye nong deice ikin ning weike deililulum bukni, ninye ikin uplye ning ara anggunce, ‘Nun arye anggunti melipnuyabe,’ tenepmunce, tonok mitik pil babye, anggunce ton pia kum melilulume.

47Allah arye wenebuka opnamsile ati, anggun, ‘Se,’ tenebuka, imun kanye bonamlulume. Deiyok ara ani. Allah yupu laka nyabuka, laka nyalamik nang, nabi nang ara anggun apu yapu arye olamikce, weilamikak ara, wini talak ara anggunce anabi nang kina ati, ninye wein aik, urasin teleb aik dolulume. Anggun teleb ninye wein aik dolulum bukni, anggun apu yape arye anang olamike.

48Nabi nang olamik ning ara, ninye wein aik urasin teleb ning domunya deice arye, ‘Nun apu yape arye Allah yupu laka nyalamik nang olamika ara, telebe uka,’ nyalulume. Ara, anggun apu yape arye, anang olamikbuk, anggunda anang sik wein aik, teleb aik doluluma ati, nyapne.

49Allah el weik kel arye nyalamuk. “Allah yupu lak lebuka laka nyan nang, nabi-nabi nang ap, Allah yupu dobuka peterepra banamak Rasul nang ap, sik Yahudi ninye dam dopkwetepnamne. Dopkwetepnyeura, ton nang ara, olonamake. Ton nang ara, ‘Optibye’ tenen, sik nong deice ikin ning weike delinamake,” nyalamuk. Allah arye minop talak nyalamuk touk, anggun wini talak akunum winilulum akarye, akunum winilulume.

50Winiplum ning ap, wininamlum ning ap ati ara, Allah arye wenebuka opnamsile. Ara yata nang do nirya, Allah arye tukwak mutuku kwepdeiyamuk talak arye dipdongobuka, minop talak arye dipdongobuka, danoutam talak arye oltakalamik nabi-nabi nang nirya, sik ining ara, anggun wini talak malye winilulum nang anggun deice upnamsile.

51Ara, sik diksukum ulamik bukni, Habel arye obik dipdongobuka opnin yangalamika ani, wini talak Zakaria Allah arena ati delilamak sukum obiknye ap, anang nirya sik ining ara, anggun wini talak ululum nang anggun taruk deice upnamsile.

Aolamik nang nirya ati, Allah arye wenepnamsile. Winipnamsila ati na dipkoprop nyapsine. Aoltaklamik nang, sik ining ara, anggun wini talak ululum nang, anggun taruk deice upmasila ati, Allah arye anggun wini talak ululum nang ati wenebuka opnamsile. Yesus arye Farisi nang ati nyabuk.

52Yesus arye ayupu nyabukopura, kirikuka ayupu tonap, Musa sekamuk yupu peterena deiyok nang ati nyabuk. “Allah arye wenebuka opnamsile ati, anggun bicoe. Anggun malye umunye ning ara, nyapnusine. Ninye arye, ‘Aik weknuyap’ tenen, aik buplan kukne ning, kunci arye buplan kukuka weklamak touk, ‘Allah diba tenena, kel bikna deiyok ning doproptibirye, kel kipnuyabe,’ tenenyak ning ati, kunci ato ning akunum ubula dopropmalume. Allah el yupu nirya kel kina ati, deiyok ning kum laka nyabuka laka nyalulume. Ati anang tuba walwaluk tuba unyake. Tonda anggun babye, Allah arye ninye lyeplirye, sik kanye talisilya ara, dib tenebuka kum wekmalumce, anggunce na bataknulume.

Tonda, yuk ninye arye, ‘Se, nun Allah kel kina deiyok ning kel kiptibirye, Allah talinamsilak weknuyabe,’ tenenyak nang ara, yupu sekeldongolulume. Tonda, ‘Nun dib tenebuka Allah talinamsilak weknamabe,’ tenenyak nang babye, anggun Yahudi yala deiyok nang arye, malye winimunya deice arye, yuk nang ati yupu sekeldongolulume.”

Yesus arye Farisi nang ap, Musa sekamuk yupu peterena deiyok nang ap ati nyabuk.

53Yesus arye ayupu nyanmokura, atalak dipdongobuka otalak nirya ara, sik Farisi nang ap, Musa yupu peterena deiyok nang ap arye, yu weik ubuk ati, ‘Yesus yupu yanibuka amu tam kiptibye’ tenen, asina weik asilanmek. 54Sik winilamik ning ara, ‘Yesus malye yupu nyaptubuk, anye bira, malye winilulnye nyapnamap’ tenen, asilamik.

Currently Selected:

Lukas 11: EIPA

Highlight

Copy