Lukas 12

Yesus arye, talima kwa dina yupu ap, wenena yupu ap ati, nyabuk yupu

(Matius 10:26-33)

1Yuk talak ara, ninye yupa weike pia kum nukmanto Yesus dam yanmek anya arye, lipmokce min nang nong deicauk yanildanmekura, Yesus arye el mapu 12 nang ati nyabuk. “Sik Farisi nang ara, sik malye unyak ning ara, nong bol ati teleb unyak bukni, dipkoprop sik talima noutamak ara malye ning weik atupa aulule. ‘Farisi nang winiyak touk, nun babye aning malye wininyap’ tenen, pia kalikuka dilanamlulume. Winipmanto yupu nyapnusine. Roti nena deiyok ning mitik anunuk, roti bun noutam aupmalibuk, weik upnin balamle atonun, sik Farisi nang malye wininyak ning ara weik upnin balamlyeura, ninye weik malye wininyake. Ati sik Farisi nang wininyak ning ati pia kalikuka dinamlulume,” nyabuk.

2Ayupu ton nyabuk. “Ninye nirya, ‘Yuk nang arye kel biksicak’ tenen, talima noutam tenebuka duknulamak ning nirya ara, Allah arye lak kipdeipnamle. Lak noutam arye laka nyanamle. 3Ninye nirya ‘Yuk nang arye kekepsicak’ tenen, lukunyan noutamak duknubuka sisiklamak yupu nirya ara, aminyan ara Allah arye keting noutam arye, laka lebuka laka nyaplyeura, kekepnamake.#12:3 Lak noutam laka nyana – Ninye mutuku-mutuku nirya, sik dungnubuka wininyak ning ap, dungnubuka nyanyak ning ap ara, sirya talak ara, ‘Allah arye, lakak kiplirye, aning nirya leke kipnamle,’ lak nyapnamla ati, Yesus arye, ayupu nyabuk. Tonda, sik aik pum bisik arye duknubuka murmur nyalamak yupu nirya ara, Allah arye laka kiplirye, asik deice ak ninye nirya kekenmakcak arye laka nyapnamle,” nyabuk. [Yesus arye, ‘Ninye mutuku-mutuku nirya, sik duknubuka unyak ning ap, duknubuka nyanyak ning ap, Allah arye lak kipdeipnamle’ tenen, nyabuk.]

4Nyabukce, ayupu ton nyabuk. “Aning ati ara, nati ara, malye yupu nyabuka, anggun nong deice ikin ning deipnamsiak nang ati, ilil una meme. Anggun nong akunum opsikcopura, yuk ikin ning ton kum upsitinge. Anggun kanye kum opsitinge anya arye, anang ati, ilil una kume. 5Bukni, anggun kwaranamlumnye bira, nyapnusine. Ninye nong ap, kanya ap obuka, sirya daksilirye, uku din mutuku dongopnamsilnye bira Allah ati ilil unamlume. ‘Allah arye pia opsilyak’ tenen, elti, ilil kanye bonamlume.” Yesus arye nyabuk.

6Nyabukce ayupu tonap nyabuk. “Kukalima maka ara, pia mitik keil uang deice arye pamubarye dekenyakbuk, amaka babye, Allah arye, ‘Diptue,’ kum teneplyopura, tonok ning babye, dipturye tukwak kum saktue. Mitik maka ababye, anggun ni Allah arye kum luba kilule. 7Kukalima maka ara, weik uptu ura, mambul pia kume. Bukni, ninye nirya yuk-yuk ara, weik mambul anya arye, Allah bicoe tenepsukce, ‘Na’ tenen, anggun gisok potong nirya babye, akunum nukuka kel biksuke. Aning ati ara, ilil una kume. Anggun patapsilye ning nirya ara Allah arye kum luba kinamsile,” Yesus arye nyabuk. Nyabukura, ayupu ton nyabuk.

8“Yata ning do nirya, ninye yuk nang dam bikirye, ‘Yesus ara, dipkoprop na deiyoknye ulule. Narye el yupu kekebuka unune,’ nyanyak nang ara, na Yesus arye, na ni Allah el nyapdeiblye pil dolbana nang, malaikat sik kekena ati, ‘Anye bira dipkoprop na mi ulule,’ nyapnamne. 9Bukni, yata nang do nirya, ‘Yuk nang arye akutupsicak do, opsicak do’ tenen, ‘Na Yesus mi kum unune,’ nyabice nang ara, narye na ni el nyapdeiblye pil dolbana nang, malaikat sik dam, ‘Anang ara, nati diba kum tenenyaka ati, na mapu pia kum unyake,’ nyapnamne.

10Yata nang do nirya, nara Ninye Mi Koprop Atonunye nati, malye yupu nyapnice nang ara sik malye nyapnice ning ara, sik batakiceura, Allah arye kum kipdeiplirye, namin kipnamle. Bukni, sik anang arye Allah El Dib Kanye el pil dolye ning ati, malye yupu nyabuka, ‘Aning ara, Isa Mutuku Dongonye arye el mikip deice arye pil donyake,’ nyabiceura, Allah arye sik malye nyanyak yupu ara kum daneiplirye, namin kum kipnamle. Aning atouk, sik kanye talima noutamak ayupu pia tenebiceura, aning pia tuba aupnamle, Allah arye sikti, wenepnamle. Ayupu nyanyak nang ara, kum lyepmanto ning wininyaka ati, nyapsine,” Yesus arye nyabuk.

11“Anggunda, ‘Yupu talina deiyok nang arye wenebuka opnamak’ tenen, tapu koubuka arel binamsiake. Tonda, Allah yupu peterena aik noutamak bobinamsiak ap ura, nati diba tenepmanuluma ati, ‘Anang arye opnamak’ tenen, weik ninye deiyok nang, Gubernur nang ap, sisinanye weik ninye deiyok nang, Raja nang ap, sik dam bobinamsiak ap ati, ilil una meme. Yata talak do nirya, anggun tapu koubukapsikirye, yupu bokolin nang dam bobisikcopura, yupu kabul nyapnumunye talak ara, ‘Yata ubuka nyapnuyap do?’ tenen, mambul kanye kum bopnamlulume. 12Allah El Dib Kanye arye anggun talima noutamak atalak nyapsilye ninguk nyanamlulume. Ara, anggun ni Allah, El Dib Kanye mikip arepsilyeura, amikip deice arye anggun yupu nyapnamluma ati nyapsine,” Yesus arye el mapu ati nyabuk.

Bona weik talinanye ulamukbuk, walwal ubuk ati, Yesus arye nyabuk yupu

13Yesus arye ayupu nirya akunum nyabukopura, aninye weik wekmeka kan-kan arye, tonoknye birye ayupu nyabuk. “Naio, ance na du koprop ati nyapminyeura, na ni deibuk talak batakuk ning bokuka arepnamnila ati, moropkine,” nyabuk. 14Nyabukura, Yesus arye anye biti nyabuk. “Amio, ‘Yupu bokolina deiyoknye unamsil’ tenen, yatanye birye wibuka deipnuk ati, nyapmanilam do?” Yesus arye nyabuk. 15Nyabukopura, awekuka kekenmek nang nirya ati ayupu nyabuk.

“Anggun nirya, anggunce anggunti, ilil una ap, anun una ap, upsilya ati, kanye talima kalekuka dildanamlulume. Ninye kam una ap, ninye teleb una ati, mambul ning ap ara, aning-aning bona talinanye kina deice arye teleb kum updeipsute.” Yesus arye nyabuk.

16Asum nyapmok yupu ‘Teleb kum kel kipnamak’ tenen, tonda anyapmok yupu ara ‘Moubuka kel kipnuyak’ tenen, adomon yupu tonap nyabuk.

Tonoknye birye, wa wibuka kouamukura, pabukce nong weik ubukura, awa wina libukce aik boyayuk. 17Boyayukce, ‘Se na din ning delin aik lo kum ati, dan ak deipnun do?’ tenen, teniltonmok. 18Teneltonmokce, utenebuk. ‘Na minop arye domsirye din ning delilamse aik ara, mitik anya arye, ulubukapnirye pia weik aik dopnamne. Winipnyopura, na bona ning nirya ap, din ning nirya ap anyaik pum delinamne.

19Winipnyopura, na aik na yuk ati tenenamne. Ara, akunuma, aminyan upnamle talak nirya ara, aning-aning nirya pia weik akunum deipsa ati, din telebuk dipnirye, mek dibuka pia kanye deibuka, talye kanye bobuka unamne,’ tenebuk.

20Anye bira, utenebuk bukni, Allah arye anye biti nyabuk. ‘Kume, awinilyam ning ara, pia walwal winilyame. Alukunyan aryuk an kam una deiyok ning tamubuka dopropkinyeura, dipnalame. Dorketing tamun ati ‘Na mutan’ tenen, aning-aning nirya bulubuka deiplum ara, akunum dipminyopura, yatanye birye dopropnamle do?’ Allah arye anye biti nyabuk. Yesus arye nyabuk.

21Yesus arye adomon yupu nyabukopura, akekenmek ninye ati ayupu tonap nyabuk. “Anyapmasin ning ara, ‘Na mutan’ tenen, aning-aning weike deiamuk bukni, kum dopromok cuk dibuk touk, yata nang do nirya, Allah arye mambul tenelye ning delina ap, kintinina ap una kum arye, sik babye, sik un ning atibuk deililamak nang ara, atonun unamake,” nyabuk.

Yesus arye kanye imun una ati, nyabuk yupu

(Matius 6:25-33)

22Yesus arye ayupu ton nyabuk.

Anggun unamlum ning nirya ati, ‘Se yata wiripnuyap do?’ tenen, kanye imun una kume. Anggun din ning ap, ongon baju ap ara, mitik mambul bukni, anggun nong ap, kam una ap ara, weik mambul anya arye, Allah arye anggun patapsilye ning ati melinamsile. Aning ati ara, ‘Se, nun yata mek ap, yata din ning ap, dinamap do? Nun ongon baju, yataton cang baju, el si juba ongopnamap do?’ tenen, kanye imun kum unamsile.

23Ninye kam una ap, ninye teleb una ati, mambul ning ap ara, aning-aning nirya, din ning dina deice arye, teleb kum updeipsute. Tonda, ninye nong teleb una ara, teleb baju ongona deice arye, teleb kum updeipsute. Din ning ap, baju ap, patapsilye ning, aupmalyeura, aning ara, mambul kume. Weik mambul ara, teleb una atia.

24Sik maka unyaka nirya ara, tenenamlulume. Maka ara yala kouna ap, nong lina ap, din ning deilinak ‘Na’ tenen, delina ap, pia kum unyak bukni, sik ni Allah arye amaka sik din ning tuba arilibuk, dinyake. Maka ara, mitik mambul bukni, ninye nirya ara weik mambul anya arye, Allah arye anggun patapsilye ning nirya ati melinamsile. 25Anggun awekmalum nang noutamak yatanye birye, el kanye imun uptu deice arye, liki tonok talak tonap kam uptu do? Ara kum winipmanto. 26Apia mitik piluk ara anggunce kum pil doptuma ati, weik mambul ning ara, ‘Yata wiripnamap do?’ tenen, mambul kanye bomlum ning ara, yata ati do?

27Anggunda, moubuka teniplulume. Mutmuta kan-kan arye ulamle kurun ning ara, tenenamlulume. Akurun ning urasin ara, pia teleb ululbuk, aning ara, pil dona ap, baju ongona ap, kum ulule. Apil kum dolulbuk, weik ninye deiyoknye, Raja Salomo ongolamuk cang baju, el si juba ara, urasin mitik teleb bukni, akurun ning urasin ara, pia weik telebe.

28Mutmuta noutamak talye ulul kurun ning ara, arup arye kita popmalya ani, ambusum ara keting deiplirye, kuluplyeura, uku dongonyak bukni, Allah arye urasin pia teleb ubuka kwelilule. Aning ara, mambul kum bukni, anggunda weik mambul anya arye, Allah arye anggun baju patapsilyopura, arenamsile. Bukni, anggunda Allah ati, weik arye dib kum tenelulume. Anggunda, ‘Nun patapsilye ning Allah arye arenamsile,’ tenelalum ning ara, mitikuk usulule. 29Allah arye dipkoprop melinamsila anya arye, anggun unamlum ning ati, ‘Se’ tenemunce, ‘Nunda, yata ning ap, mek ap, dinamap do?’ tenen, kanye imun kum unamsile. Anggun talima ap, kanye ap, aning talye-talye ning deice kum delinamlulume.

30Ayupu ara, talya ati kum nyapsine. Tukwak ulye ning ati, ninye nirya patalul ning ara, Allah ati ‘Diba’ tenena kum nang arye, ‘Aninguk dopropteipye,’ tenebikirye, sik kanye talima aning deiceuk deilinyake. Wininyak bukni, anggun na mapu ara, anggun patapsilye ning nirya, anggun ni Allah arye, akunum tenepsilirye, arenamsil ati, talye tukwak ning ati, kanye imun kum unamsile. 31Aninguk tenebuka, kum unamlum bukni, weik mambul ning ara, Allah arye ‘Wininamake,’ tenesilye touk, diksukum una ap, lyepsilirye, nun kanye talima talibuka unamsil ning ap, aninguk minopce tenepmunyopura, pia moubuka talipmunyopura, yuk yala ning nirya babye, elcuk arenamsile.

32Aning ati ara, na mapu, Allah arye kanye akunum deipsuk ati, el lyesilirye, kanye talima talinamsil ning ap, el pil donamlum ning ap, anggun patapsilye ning ap, dipkoprop elce arenamsil anya arye, anggun kanye imun una ap, ilil una ap meme. 33Anggun taliplum ning ara, dekukapmunce, yo bok doropmunyeura, talye bona utotoa talina kumnye ati arenamlume. Anggunce anggun ning ati wasia, malye upmanto kum ning kintinilinamlulume. Ara, Allah arye mambul tenelye ning ara, im deicauk moubuka deilinamlulume.

Anggun mambul ning ara, tukwak mambul ninguk bulubuka, ‘Na’ tenen, kum deilinamlulume. Tukwak mambul ning nirya ara, sisilya rang ap, sing arye dina ap, yuk nang arye dolona ap deice arye, malye kiplyeura, kum danalule. Tonda, upula don nang arye, sik buplan kukuka wekikirye, ubula dolonyake. Bukni, im deice moubuka deilinamlum ning ara, malye pia kum unamle. 34Ara talya ati kum nyapsine. Anggunce, ‘Mambul’ tenen, kanye delinamlumak ara anggun bona, dina anirya asukumuk unamle. Yesus arye nyabuk.

Yesus arye, “Anggunda kanye moubuka, kalekuka dinamlulume,” nyabuk yupu

(Matius 25:1-13; Markus 13:33-37; Matius 24:43-51)

35Yesus arye ayupu nyabukopura, adomon yupu ton nyabuk.

Aik deiyoknye birye kil tapua yuna ati, yunak binmalya, ara ‘Tamubuka talye karin arye yasilyak’ tenen, el melina nang arye teleb baju ongobuka, weisa ubuka, ‘Dan tam arye yanul do?’ tenen, kintinibuka dilamak touk wininamlume. 36Ara, ‘Nun deiyoknye yalirye, buplan lorum-lorum ablyopura, buplan adiparyuk kukibiceura, wektu’ tenen, wininyake. Anggun babye, atouk ‘Nun ni dan talak tamubuka yanamle do?’ tenen, dinauk unamlulume. 37Yata nang do nirya, ‘Nun deiyoknye yanul do?’ tenen, dinmakibuk, el yalyopura sik deiyoknye birye, anang ati kanye deiplirye, teleb ulilule. Anye birye el pil melina nang ati, kanye deiplirye, pil don ongon baju ongoplirye, el melina nang ati, ‘Dina dinak bulyalulume,’ nyaplirye, sik din ning ati arepnamle.

38Yata pil don nang do nirya, sik deiyoknye lukunyan yanamalye ning babye, elda upmalya ani, lukunyan dukduk alamle talak yanamalye ning babye, sikce ‘Nun deiyoknye dan talak yanamle do?’ tenen, kintinipdeibuka dinmakibuk yalyopura, teleb ulinamle. 39Bukni, na nyapnusin yupu ara, moubuka kekenamlulume. Aik deiyoknye birye, ‘Ubula donanye alukunyan noutamak ara, aketing deice arye ubula dolyanamanile’ tenen, kel kipmatu toura, mana kum arye pia kalekuka dinmatu toura, ubula donanye birye, el ning yanuka ubula kum doproptue.

40Aning atonun na babye, Ninye Mi Koprop Atonunye yanamne talak ara, anggun talye kanye bobuka unmamunye keting deice aryuk yanamna ati, kanye talima kintinubaka dimunce, kanye moubuka pia kalekuka dinamlulume, Yesus arye elti, diba tenelamik ninye ati nyabuk. 41Nyabukura, Peterus arye tamubuka asipdeyuk. “Naio, adomon yupu nyapsilam ning ara, nunuk ati, nyapsilam do? ‘Ninye nirya kekepnyak’ tenen, nyapsilam do?” nyabuka asipdeyuk.

42Asipdeyukura, Yesus arye tamubuka nyabuk.

Aik deiyoknye tonok arye, yuk mutuku binuyuk talak ara, el pil donanye tonok ati, ‘Pil winibuka donamlume. Na pil milina nang nirya ati, sik din pataplye talak ara, bokuka arenamlume,’ nyabuka bokdeibuk. 43Anyaik deiyoknye tamubuka yanamle talak ara, el pil donanye ati yupu nyapdeibuk touk, pil dolamlyopura, anye biti teleb updeipnamle. ‘Na ning nirya talipmince, deiyoknye atonun kibuka, na pil donamnilame,’ nyabuka adeiyoknye birye el pil donanye dobuka ereipnamle. 44Na dipkoprop nyapsine. Anyaik deiyoknye birye, ‘Wininamlulume,’ nyapsuk touk, el pil donanye birye, diksukumuk pil dolamlyopura, adeiyoknye el talyamlye ning nirya anye biti areplibuk, elce taliplirye, deiyoknye atonun unamle.

45Akumopura, apil deiyoknye birye nyaplyeura, kekebuka pil dolinye bira malye uplirye, malye uptopura, ‘Kume, na deiyoknye akunum biyukce daulula anya arye, sik asa okiting tamunuk yanamle,’ teneptue. Utenepturye el ap pil donyak nang ap, kilapu ap ati, bokuka oplirye, kanye wangalamak mek din nang ap, neika dibuka utopura, ‘Na deiyoknye, el aketing yanamle,’ kum tenepturye, talye kanye boblye sum ara, el deiyoknye tamubuka yanamle.

46Adeiyoknye tamubuka yalyopura, amalye upmalinye el nong oplirye, sekuka mitik-mitik kalipsingipnamle. Winiplirye, anye bira el kanya ara, Allah diba tenena kum nang unamakak, uku din mutuku dongopnamle. Yesus arye nyabuk. 47Nyabukce ayupu tonap nyabuk.

Yata pil don nang do nirya, sik deiyoknye birye pil diamlye ning akunum kekebikirye, bita kekamikiryuk bukni, el nyalamle touk kum winilamiceopura, sik deiyoknye yalyopura, pia weika arye weneplirye, nong bol deice dem opnamle. 48Bukni yata pil don nang do nirya, sik deiyoknye birye pil diamlye ning moubuka kum kekebikirye, bita kum kel kiyamikce deice arye walwal arye, malye winilamiceopura, sik deiyoknye yalye talak ara, mitika arye wenebuka nong bol deice dem opnamle.

Ara talye ati kume. Allah arye aning-aning nirya ap, kel kina deiyok ning ap, weika arye areamuk ninye ati, ‘Na pil weika arye dolamik do, kum do?’ tenen, asiplirye, weik winipdenamle. Aning atonun, Allah arye tia talak ‘Na pil dopnamniak’ tenen, aning-aning nirya areamuk ninye ara, aning deice arye, ‘Na pil dipkoprop dolamik do, kum do?’ tenen, asiplirye, weik winipdenamle. Ati, anggun nirya arye kanye moubuka unamlume. Yesus arye nyabuk.

Yesus arye, “Na ti diba tenepnikce nang ati, mal pinamake,” nyabuk yupu

(Matius 10:34-36)

49Yesus arye nyabukopura, adomon yupu tonap nyabuk.

Na pil donyak deice arye, ‘Mutuku-mutuku sirya, im sirya nirya, uku dinamle’ tenen, uku boyasi. ‘Tuba akunum iptinyeura, dinmatu’ tenen, kanye imun upnile.#12:49 kanye imun upnile – Yesus arye, “Mutuku-mutuku nirya, ‘Uku dipnamle’ tenen, yase,” nyabuk upu deiyok ara, ani. Ara, uku arye maningtoa diliba, anirya kum danalilamle touk, Yesus arye, ‘Malye winin ning nirya, kum daneipnutuura, tukwak mutuku nirya, telebuk uptue’ tenen, nyabuk. 50Nara, weik kanye imun ning upnamak ning ara,#12:50 Kanye imun ning – Yesus arye, ‘Kanye imun ning upmanile,’ nyabuk deiyok ara, malye nang arye, wanwanun yo deice opnamik ning ati nyabuk. aupmala bukni, min sirya kum dakdongopman talak ara, pia kanye imun unulule. 51Anggunce nati, ‘E, Yesus ara ninye mutuku-mutuku nirya tonok kanyeuk bobuka, kanye deipdakirye talye tunim abuka, talye-talyeuk unamake tenen, yayuke,’ kum tenepnamnulume. Na yupu dobuka yuk nang ati peterepra bamunyopura, sik kanye yuk tenenyak nang arye ayupu ati, ‘Nun lik’ tenen, yu uplyeura, waldana ap, oldana ap wininamake. Winibikirye, yuk-yuk bokuka unamake.

52Atalak arye dipdongobuka, dotalak nirya ara, tonok aik ninye ara, pamubarye unmakibuk, bitinye nang arye, ton winilye nang ati, waldana ap, oldana ap, winildanamake. 53Kume na nyanye yupu ap, nati diba tenepnamniyaka deice ap, tonoknye birye el li koprop ati, ‘El diba tenelula ati, na lik’ tenen, mal pinamle. Aning atouk, tonda el li birye el mi koprop ati mal pildanamake.

Tonda, tonok kilmu arye, el lin ati, tonok kil arye el kilmu ati, ‘El diba tenelula ati na like’ tenen, mal pinamle. Tonda, tonoknye el mi, el kil arye, el yamal kil ati, tonda, el yamal kil arye, el mi domlye kil, ‘El dib tenelya ati, na lik’ tenen, mal pinamle. Ara, talye ati kume. Ara, na ap, na yupu ap, ati talima mal pinamle. Yesus arye nyabuk.

Yesus arye, aminyan sirya talak kel kina ati, nyabuk yupu

54Yesus arye ayupu nyabuk.

Beren tam talak, im sukuplirye,#12:54 im sukuplirye, – Minop sekik buku ara, nyabik ning ara, “Keting wekelbalamle tam arye, dua weleplyopura, mok cepnamale,” sekik ning ara, Israel ninye ulamik mutuku ulamuka ati, nyabik. dua kunuklyopura, ‘Arup ap, ambusum ap mok deneplirye, cenamle,’ nyapmamunye touk, mok deneplirye, celule. 55Tonda, anggunda, sintam uplye talak im kunukuka kiplirye,#12:55 im tong-tonga oplirye, – Minop sekik buku noutamak nyabik ning ara, “Dabu mutuku tam arye, kum doplyopura, dou mapliba tin weik upnamle,” sekik. Asekik ning ara, Israel kili sal ulamik mutuku winilamuka anya arye nyabuka sekik. mutuku sirya-sirya kiplyopura, ‘Ambusum dou mapnamale,’ nyalamlum touk dou malule. 56Anggunda im deice ulul ning ap, tukwak ulul ning ap, eipmunce, ‘Winipnamale,’ tenebuka, nyalulum ara, anggunda, talima noutamak pia malye ning aupmasilibuk, ‘Teleb nang tenepnamsiyak’ tenen, nong bol deice ninguk teleb winin ning winilulum nang atia. Mok cena ap, dou mana ap ati aning ara, mutuku urasin eipmunce, kel kilulum bukni, na wininye ning ap, peterenye yupu ap, ‘Deiyok ani,’ tenebuka, atalak akunum upsilye ning pia dipkoprop kum bikilulume. Yesus arye nyabuk.

57“Anggun babye, ‘Diksukum winin ning ani,’ tenebuka kum kel kiluluma ara, yata ati do?” Yesus arye nyabuk. 58Nyabukopura, ayupu ton nyabuk. “Anggun deresice nang arye dobuka bobisikce talak ara, minopce anggun adiparyuk yupu talimunce, telebuk ulinamlulume.

Dobuka bobasikce talak bisik noutamak arye, teleb kum kipdeipmunyopura, derepsilinye birye, yupu bokolina deiyoknye arepsilyeura, anye birye wenebuka, yin talin nang arepsikcopura, wenena aik dongopnamsile. 59Aning ara tenepnalume, ‘Yo bok winibukap arepnamsulume,’ nyasilya atonun, nirya min kum arepmamunye talak ara, wenena aik noutam arye kum loplopnamsiyake. Apia unamlume.

Ati, minop deresice ning ara, adiparyuk teleb kilinamlulume. Anyapsice atonun, ‘Allah arye wenebuka opsilyak’ tenen, anggun malye umunye ning batakuka, Allah el yupu kekebuka telebuk wininamlume. Lo tuba uplye talakuk, anggun malye ning lobuka batakmunce, diba tenenamlulume,” Yesus arye nyabuk.

Currently Selected:

Lukas 12: EIPA

Highlight

Copy