Lukas 10

Yesus arye, ‘Na yupu dobuka peterepra banamak’ tenen, yupa weik 70 nang wipdeibuk yupu

(Lukas 9:3-5; Matius 11:21-27; Matius 13:16-17)

1Yesus arye, ‘Na aminyan peterelbanamne mutuku nirya ara, sik minop peterepra banamake,’ tenebukce, el mapu yupa weik, 70 nang wibuka dopdeibuk. Anang ara, bitinye-bitinye kibuka, weik asik dolamikak, weik kota ap, tonda ninye mitik ulamikak ap, dopdeibuk. 2Anang dopdeibuk talak ara, anang ati adomon yupu nyabuk.

“Kwaning nong ara, pia weik akunum wisibuk bukni, kwaning lin nang ara, pia mitik anya arye, awa deiyoknye ‘Allah arye el wa win dam lin nang ton wibuka dopkwetepnamle’ tenen, moronamlume.” Yesus arye, ayupu nyabukopura, ayupu ton nyabuk.

3Ara, anggun anang ara, akunum wibuka deipmasina ati, anggunda yuk mutuku weik dapeterelbinamlume. Domba basam dobuka bai kam kan-kan dongobiceura, adiparyuk domba olamle touk, narye dopkwetepsin ak, peterepra banamlum mutuku nirya ara, malye nang arye opsikcak ati, anggun kanye moudoplulume. 4Anggun peterepra banamlum talak ara, anggun nun ‘Na’ tenen ning lina ati, wasia ap, aling lina ap, yan ongon ning ap, kum libuka banamlume. Ton bisik banmamunya noutamak yuk ninye ton eibdamunyopura, ‘Telebe,’ nyabuka, anang ap yupu nyana meme. Anggunda, mambul pil dolbanmaluma anya arye, talya kirikuka pola banamlume.

5Bisik banmamunya ani, asik dolamikcak bimunce, tonok aikuk wekmunyopura, minop ayupu nyapnamlulume. ‘Allah weika arye lyesilibuk, anyaik nang nirya teleb kanyeuk bobuka unamlum’ tenen, Allah moropsiape, nyanamlulume. 6Nyapmunyopura, anyaik deiyoknye birye, Allah yupu kekepturye, ‘Allah arye melipnilibuk, na diksukumuk unamne’ tenen, pataplinye aulyopura, Allah arye anyaik ninye nirya ati teleb ulinamle.

Bukni, anyaik deiyoknye birye, ‘Allah yupu ara nun like. Allah arye lyepnilyeura, telebuk uptinye,’ kum teneplyopura, anyapnamlum ning ara, ila tamubuka doplopmunce, anggun nong deiceuk upnamsile. Atonok aikuk ulamice ninye ati, Allah arye teleb kum ulinamle. 7Anggun akunum wekmunye aik ara, anyakuk din ning ap, mek ap, sik arepsice ninguk dobuka dinamlume. Ara, sik pil dobice ninye dekna dololamaka atonun ati, anyasik nang arye arepsice ninguk dobuka dinamlulume. Winina ara telebe. Or aik mapmana, ei aik mapmana, utam aik mapmana kina meme. Aik talye sakaldana meme.

8Sik asik dolamicak wekmunyeura, telebe nyabuka, yukubdobsicopura, sik arepnamsiak ninguk dobuka dinamlume. 9Amutuku uk dilamlye ninye kwetepnamlulume. Tonda, “Allah ninye weik lyeplirye, sik kanye talima talinamsil talak ara, akunum dam upsile,” nyabuka peterenamlume.

10Bukni, yata mutuku do nirya, asik domicak bimunyopura, telebe nyabuka kum kipsikirye, anggun yupu kum kekepsicopura, winipnamlulume. Sik asik dolamicak bimunce, amutuku tuku anggun yan tatang palipmasilye ning ara, mining damuk kilibuka batakmunce, amutuku batakuka yukak binamlulume. Winipmunyopura, sik amutuku nang arye, ‘Se Allah yupu batakmaba ati, nun yan tuku yanibuka, kiliplopmasiyaka atonun, Allah arye nun amutuku unyap ninye ati wenebuka bataknamsile, tenepnamake’ tenen, winipnamlulume. Yesus arye nyabuk.

11Tonda, nyabuk. “Ara, ‘Anang kekepnyak’ tenen, ayupu ton nyapnamlulume. ‘Amutuku tuku nun yan tatang palipmasil ning ara miningdam anyuk kilibuka batakmabe. Aning atouk anggunce, ‘Allah el yupu nun like,’ nyapmasulum ati, Allah arye anggun babye, bataknamsile. Ati amutuku batakuka yuk mutuku banamabe. Anggun batakmasulum ati binuyap bukni, anggun dipkoprop moubuka tenenululume. Allah arye ninye weik lyeplirye, kanye talima talinamsil talak ara, akunum dam upsile,’ nyapnamlulume,” Yesus arye nyabuk. 12Ayupu nyabukopura, ayupu ton nyabuk. “Na dipkoprop nyapsine, Sodom mutuku ulamik nang pia malye ulamikura, Allah arye ninye nirya obuka wenebuk talak ara, Sodom mutuku ulamik nang pia malye ulamikura, Allah arye amutuku ninye obuka kum daneibuk bukni, Allah arye ninye nirya bokuka wenepnamle talak, sirik talak ara, Sodom mutuku ulamik nang ara, mitik weik mambul arye wenepnamle. Sik bataknamsiak mutuku nanguk ara, weik arye wenebuka opnamle ati, sik weik ikin upnamle,” Yesus arye nyabuk.

13Nyabukce, ayupu ton dukdongobuka nyabuk. “Anggun Korasin mutuku umunye nang ap, Betsaida umunye nang ap, Allah arye opnamsile ati, anggunce, ‘Se,’ tenebuka, mambul kanye bopnamlume. Anggun dilamlum talak ara, anggun mutuku noutamak ninye winipman kum pil dolamsa ara, Tirus mutuku ap, Sidon mutuku ap, noutamak pil dolamtinyetoura, sik amutuku ulamik nang nirya arye, mambul kanye bobukatingce, sik malye ning batakra kanye tamubuka, nati diba tenelamnitinge. Bukni, aning nirya kum elilamika ati, diba kum tenelamike.

14Bukni, na dipkoprop nyapsine. Anggunda aning-aning nirya elilulum nang anya arye, Allah arye ninye nirya ati, bokuka deiplirye, wenepnamle talak ara, sirya talak ara, Tirus mutuku nang ap, Sidon mutuku nang ap, mitik kanam arye wenepnamle. Anggunce nati, ‘Anye bira nun like’ tenen, batakanululum nang ara, pia ikin weik arye wenepnamsile. Anggunda, pia ikin arye wenepnamsile.

15Anggun Kapernaum mutuku nang ara, ‘Nun teleb nang anya arye, Allah arye erebuka im deice deipnamsile,’ tenelamlum do? Kume, Allah arye wenebuka uku din mutuku dongopsilibuk, uku arye dibuka, sirya daknamsile.” Yesus arye nyabuk.

16Nyabukce, el mapu 70 nang ati nyabuk. “Aning ati ara, na dipkoprop nyapsine. Anggunce na yupu dobuka peterepra banamlumbuk, kekenamak nang ara, nati kekenamake. Aning atouk, anggun peteremunyebuk kekebikirye, yaniltanamak nang ara, nati yanibuka batakanamniake. Tonda, na yanibuka bataknamiak nang ara, natibuk kume. Na dopkwetepnuknye Allah ati, yanibuka bataknamake.” Yesus arye wipdeibuk nang 70 nang ati, nyabuk.

17Nyabukura, sik anang arye peterepra balamika ani, tamubuka Yesus dam yayikce, weik kanye deibikura, ayupu nyabik. “Se, naio ninye talyamuk isa babye, nunce an si deice arye yupu nyalamubu ura, kekelamikce, nun nyapne touk winibike. Nun mikip arye nyabupu ura nun yupu kekebuka nun amutamuk kipdobike,” nyabik.

18Nyapmekura, Yesus arye tamubuka anang, 70 nang ati nyabuk. “Anggunce aning elilamlumce, ‘Se aning ara weik mambule,’ tenelamlum bukni, nara im deice minop bebeya lingum alamle touk, mutuku-mutuku nirya balul Isa Mutuku Dongonye arye, minop im deice arye sakuka eiamse. 19Na mikip ap, deiyok ning ap arepsisibuk, ninye si ton kwatima ap, tanga ap, yaniptum ababye, ton kum si tonamsile. Aning atouk, narye kalikuka melisinyeba, Mutuku Dongonye isa arye, el pia malye ulamle ning mikip deice arye, malye kum updeipsutue. 20Anggunce yupu nyapmunyeura, isa mer nirya kekebuka kutuksakuka bura banyak ning ati, ‘Se aning ara weik mambule’ tenen, kanye kum delinamlulume. Dipkorop weik mambul ning ara, Allah arye anggun si dobuka im deice bukuu noutamak akunum sekeipsuka ati, aning ara kanye delinamlulume,” Yesus arye, sik 70 nang ati nyabuk.

21Yesus arye ayupu nirya nyabukopura, Allah El Dib Kanye arye, el kanye talima lukdanuka talibukura, pia weik arye kanye deibuk. Kanye deibukce el li Allah ati morobuk deice arye ayupu nyabuk.

“Naio, anda im deice ap, tukwak mutuku nirya ap, talipluma deiyoknye ulyama ati, narye anti, ‘Telebe,’ nyabuka, an si erepkine. Tonda, an nyasilyam yupu noutam ning ara, kel bikna kanam nang ap, weik kel nang ap ati, duknulyam bukni, mitik mapu atonun unyakce, talima mitanga arye unyak nang ati, lake kibuka nyasilyame. Diba na nie, winilyam ning ara, ‘Winipnamne,’ tenelyam touk ati, aning arye an talima kanye deilikunune. Ati telebe nyapkine.” Yesus arye, Allah morona deice ara, ayupu nyabuk.

22Allah morobukopura, el yupu kekenmek nang ati, ayupu ton nyabuk. “Aning-aning nirya ara, na ni Allah arye akunum arepnuke. Ninye nirya tonoknye ton, Allah el Mi Koprop arye, el kanye talima noutamak tenelul ning ara, kum kel kiptinge. Allah el Mi Koprop kanye talima ulul ning ara, Allah elcuk kel kilule. Ninye nirya tonoknye ton, na ni Allah el kanye talima noutamak tenelul ning ara, kum kel biktinge. Na ni Allah, el kanye talima noutamak tenelul ning ara, nara, el Mi Koprop arye kel bikinune. Bukni, yuk nang ton kum biktinge. Tonda, ‘Narye laka nyabuka peterenyeura, na ni kel kipnamak’ tenen, wibuka deipse nanguk, na ni Allah arye tenelul ning kel biktinge.” Yesus arye nyabuk.

23Yesus arye ayupu nyabukopura, elce wipdeibuk mapu, sik 12 nang ati, ayupu tonap nyabuk. “Na mapu anggunda, ne wininun ning, anggun asing arye teleb kubuka elinululume. Anggun wini talak umunce, na donye pil nirya elinululum ninye ara, anggunce aning-aning nirya, pia mambul ning elilaluma ati, anggunda pia mambule. Ati, pia teleb kanye bobuka unamlume.

24Ara urdem ati kum nyapne, na dipkoprop nyapsine. Minopce Allah yupu lak nyalamik nang, sik nabi nang weik ap, lipsisikuka ulamik nang weik ap, wini talak anggun elilulum ning ara, pia patalamukura, ‘Se aning eiptibye,’ tenelamik bukni, kum elilamik. Tonda, wini talak anggun kekelulum yupu ara, pia patalamukura, ‘Se aning kekeptibye,’ tenelamik bukni, kum kekelamike. Ati, wini talak anggun teleb ubuka kekena ap, dina ap, umunye nang ara, anggunda, pia mambul anya arye, pia teleb kanye bobuka unamlume. Allah arye teleb ulinamsile,” Yesus arye nyabuk.

Musa sekamuk yupu peterena deiyoknye birye, Yesus ati asipdeyuk Yupu

(Matius 22:34-40; Markus 12:28-31)

25Yesus arye el mapu ati ayupu akunum nyabukopura, sik daulamika ani, yuk talak ara, Allah arye, ‘Aning winamlulume, aning ara kum wininamlulume,’ nyapdeibukura, Musa sekamuk yupu peterena deiyoknye tonok, Yesus dam biyukce, ‘Yesus malye nyaptu’ tenen, Yesus ati asipdeyuk akarye ayupu nyabuk. “Anda peterena telebnye ulyame. Bol koplobuka pia kam una ati, narye yata teleb pil doptinirye deice arye, pia kam una deiyok ning doproptinye do?” nyabuka asipdeyuk. 26Asipdeyukura, Yesus arye tamubuka nyabuk. “Bol koplobuka pia kam una dolona ati aning ara, Allah arye, ‘Aning wininamlulume, aning ara kum wininamlulume,’ nyapdeibuk yupu noutam arye, ance kel bikamluma ati, yata tenepmalam do?” nyabuka asipdeyuk.

27Asipdeyukura, anye birye tamubuka nyabuk. “Allah arye nyapdeibukura, Musa sekamuk yupu noutamak arye, pia kam un ning dolona ati ara, ‘Wininamlulume,’ nyapsuke.”

‘Allah arye nyabuke. Anggun ni Allah ara, el tonok ulule. Anggun kanye bokoltona kumce, anggun kanye talima, Allah el nong deice delinamlulume. Tonda, Allah el deicauk, anggun kanye deibuka unamluma ati, anggun nong nirya ap, anggun mikip deice pil dolulum ning ap, anggun kanya ap, anggun kanye tenen ning ap, anirya ara, Allah ati arepmunce, el piluk donamlume. Tonda, anggun dam unyak nang ati ara, bico tenebuka melinauk unamlulume. Anggunce, anggun bidamang ati, kanye deipdamunce melilalamlum touk, anggun dam unyak nang, yuk nang ati bico tenebuka kanye deipmunce, melinamlulume.’ Allah arye nyabuk. (Imamat 19:18)

28Anye birye nyabukura, Yesus arye tamubuka nyabuk. “Anda dipkoprop teleb ning akunum nyapmanilama ati, anyapmanilam touk winipminyopura, Allah arye bol kobuka pia kam una deiyok ning arepkilyeura, kam pia unamlame,” nyabuk. 29Yesus arye nyabuk bukni, anye bira, ‘Yesus arye nati, el malye ulule,’ tenepmanila ati, ‘Na malye wininye ning kum biknilirye, telebnye uk, tenepnunile’ tenen, ayupu tamubuka nyabuk. “Yo, deiyok ara, Allah yupu deice arye, ‘Anggun bidamang unyak nang,’ nyalulul ara, dipkoprop ara yatato nang ati nyalul do? Yata nang ati bico tenebuka kanye deipnamne do? Yata nang ati, melinamne do?” nyabuka asipdeyuk.

30Nyabuka asipdeyukura, Yesus arye Allah yupu deice, ‘Anggun dam unyak nang, yuk nang nyalula deiyok ara, laka nyapnun’ tenen, tamubuka winipmanto yupu deice arye nyabuk. Ayupu ara ani.

Tonok Yahudi yalanye bira, ‘Yerusalem mutuku arye Yeriko mutuku binun’ tenen, bisik noutamak banmokbuk, ubula don nang bisiktikmeka arye, tomobikce bokuka obik. Onmek talak ara, el ongobuk baju nirya tarakuka batakikce, bokuka onmeka ani, dipmanto ubukopura, abatakuka biyik. 31‘Akunum dipmala’ tenen, bindobik talak ara, Yahudi yalanye, Allah ati arena deiyoknye bira, abisikuk aminyan banmoka arye eibuk. Eibuk bukni, anye bira, arup oplopmake tenebukce, eibukcuk leibuka biyuk. 32Aning atouk, yuk Yahudi yalanye ton, elda Allah arilbalamik aik noutamak pil dolamuknye tonok, Lewi yalanye abisikuk yanganmoka ani, aoplopmeknye eibuk bukni, eibukce, el babye leibuka biyuk.

33Sik abitinye Yahudi yala nang ara winiprik bukni, tonok Samaria mutukunye, ara Yahudi yala kumnye bira, abisikuk yanganmoka ani, oplopmeknye bira eibuk. Eibukce, ‘Anye bira Yahudi yalanye anye arye, ne like,’ tenena kumce, ‘Se’ tenen, bouku sukubukce, pia bico ubuk. 34Bico tenebukce, opmeknye dam biyukce, el suse kitibuka kweten ning, suse deice deibukopura, anirya kitibuka teleb updeibuk. Winibukopura, oplopmeknye bira tomobuka, el keledai basam balye deice deibukce bobanmoka ani, bisik noutamak ninye asik nang tia malamik aik binuka deibuk. Binuka deibukura, anyaik mapmarik.

35Mapmarika berekukopura, aSamaria mutukunye birye, weik keil uang peraknye bitinye dobuka, aninye asik nang malamik aik talibuka ulamuknye biti aribuk. Aribukce ayupu nyabuk. “Ance anye biti melibuka kwetenmaminya ani, aminyan na tamubuka yanyopura, el kwetena ap, el manak ap ati, an yo bok weik tonap areaminyopura, narye yo bok tonap punupnamkine.” Yesus arye winipmanto yupu deice arye nyabuk.

36Nyabukopura, Musa sekamuk buku peterena deiyoknye biti asipdeyuk. “Narye nyapmakin yupu noutamak arye, sik oplopmeknye winilye nang arye eibikura, Allah yupu noutamak, ‘Anggun bidamang unyak nang, yuk nang ati bico tenebuka melinamlulume,’ nyapdeiamuk touk, danye birye aning dipkoprop winibuk do?” nyabuka asipdeyuk. 37Yesus arye asipdeyukura, Musa yupu peterena deiyoknye birye tamubuka nyabuk. “Kume, aopmeknye ati, Samaria mutukunye birye, bouku sukubukce bico tenebuka, kwetebuka melipmoknye, el uka,” nyabuk. Nyabukopura, Yesus arye anye biti tamubuka nyabuk. “Aning ati ara, an babye, atonun yuk nang ati bico tenebuka melinauk unamlyame,” nyabuk. Nyabukopura, Yesus ap, el mapu ap, ‘Yukak binuyap’ tenen, bisik banmek.

Marta ap, Maria ap, Yesus sik aik unmokce nyabuk yupu

38Ara, atalakuk ara, Yesus ap, el mapu ap, bisik banmeka ani, tonok asik dolamikak biyikopura, anyasik ulamuk kil el si Marta arye, yukupdobukce, “Na aik yalulume,” nyabukura, biyik. 39Wekuka bulbiyik talak ara, Marta el weit kil Maria ara, Yesus el yan dam bukmokce, el peterenmok yupu pia moubuka kekenauk unmok. 40Maria wininmok bukni, el dukul Marta ara, ‘Yesus el yupu kekeptinye,’ tenenmok bukni, ‘Se, ninye asik nang na aik yanmaniyaka atia,’ tenenmok akarye, kintinin pil weik donmok deice arye, Yesus yupu kum kekenmok.

Wininmokce, ‘Na weit kil kum melipmanilce talyeuk bukmale’ tenen, lik ubuka ati, Yesus ak ayupu nyabuk. “Naio, na weit kil Maria ara, nauk batakmanilura, pil donmana ara, kum melipmanila ati, ‘Aning mambule,’ kum tenepmanilam do? Ance nyaptumura, na weit kil arye melipnunile,” nyabuk. 41Nyabukopura, Yesus arye Marta ati tamubuka nyabuk. “Marta, Martao, pil weik donmalamce, aning-aning nirya ati, ‘Se, yata wiripnun do?’ tenen, kanye bokoltonmakil akarye, kanye imun deice arye nyapnilame. 42Bukni, weik mambul patasilye ning ara, tonok ulule. Maria arye weik mambul ning, Allah yupu keken ning akunum wibmalce, na nyanmane yupu kekebuka unmala ati, aning yupu sekuka kum dopropnune.” Yesus arye nyabuk.

Currently Selected:

Lukas 10: EIPA

Highlight

Copy