Yohanes 21

Yesus arye nyabukba, el mapu mekwen ikan pia weik tomobuka doprobik yupu

1Yesus arye, el mapu dam akunum laka kibukce, anyaik batakuka biyukba, sik nirya daunmeka ani, aminyan talak ara, Yesus tuba tamubuka tonap, el mapu dam talye karin arye panabuka tikilyayuk. Panabuka tikilyayuk mutuku ara, weik mekwen si ara, Tiberias Mekwen#21:1 Tiberias – Amekwen ara, si bitinye bukni, tonok akuk ulule. El si ton Galilea Mekwen nyalamik. dam tikilyayuk. Atalak winipmek ning ara laka nyapnusine. 2Asum ara, sik neika unmek nang ara, Simon Peterus ap, Tomas (tonda Didimus nyalamiknye) ap, Galilea tam bukni, Kana mutukunye Nataniel ap, Zebedeus el mapu ap, yuk bitinye nang ap, sik nirya neika unmek.

3Unmekura, Simon Peterus arye, “Nara, mekwen ikan yakuka dongolel binune,” nyabukura, sik nirya arye, “Ati, nun ap binuyabe,” nyabik. Nyabik ati, sik nirya arye mek lia yo bukuka, mekwen deice binuka, mekwen ikan dongolenmek bukni, alukunyan noutamak nirya ara, sik mekwen ikan yangabuka don ning, jaring ara, mekwen ikan tonok ning babye, kum wekmok.

4Talye demuk dayanmeka ani, beren tam talak kibukura, amekwen lilkwa uk, Yesus panabuka tikilyayuk bukni, sik nirya arye, ‘E, atikmalanye bira, Yesus aunmale’ tenen, moubuka kum kel bikmek. 5Talye kanye bobuka unmeka ani, Yesus arye sikti, weik yupu arye, “Na kayapu, mekwen ikan min kum dopmalum do?” nyabuka asipdeyuk. Asipdeyukura, sikce, “Kume, kabula,” nyabik. 6Nyabikba, Yesus arye, “Ati anggun mekwen ikan yangabuka don ning, jaring ara, mek lia yo sirik tam dongopmunyopura, mekwen ikan weik weknamale,” nyabuk. Elce ayupu nyabuk touk, mek lia yo sirik tam, sik jaring mekwen pum bisik dongobikopura, mekwen ikan yupa pia weik arye wekuk. Ati, ajaring ara, mekwen pum tam arye, sik mek lia yo deice kum tongopmanto ubik.

7Winibukopura, Yesus wipdeiamuknye, el kanye deiamuknye bira, Peterus ati nyabuk. “Amio, otikmalamnye bira, nun Deiyoknye Yesus aunmal atia,” nyabuk. Nyabukura, Simon Peterus ayupu kekebukce, adiparyuk el atalak ara, kwiriptalipmok deice baju dobuka, el nong kwatipmokce, mek lia yo deice mekwen pum bisik minopce sakuk. 8Sakukce, ‘Mek kwen kup-kup binun’ tenen, mek keknin banmokba, Yesus el mapu, sik yuk nang nirya arye, mek lia yo deice aminyan yanganmekce, mekwen kup-kup biyik. Sikda, pera weik kum, mekwen kup-kup arye, otam 90 meteruk unmeka ati, yanuka tukwak lukuka deibik.

9Mekwen kup-kup mek lia yo lukuka deibikce, Yesus sekmok uku ap, kalum ap, mekwen ikan dapmok ning ap, roti din ning kintinipdeipmok ning ap, aupmokak eibik. 10Eibikura, Yesus arye, “Anggun winiryuk dopmalum mekwen ikan kan-kan arye, ton ning ara, dobuka diplulume,” nyabuk. 11Nyabukura, Simon Peterus tuba tamubuka tonap mek lia yo pum bisik welebuka biyukce, mekwen ikan yangna aling, el si ara jaring talibukabukce, mekwen pum tam arye libuka doprobukce, mekwen pum delilbiyuk. Mek kwen kup-kup deipmokbuk, amekwen ikan nong nukikura, yupa weik, mekwen ikan ara, 153 ubuk. Dinge weik winipmoka babye, sik mekin bal tomon ning, jaring tapu ara, kum bulub sakuk.

12Aning nirya eibikba, Yesus arye, “Na mapu, anggun dilyalulume,” nyabuk. Ayupu nyabuk talak ara, el wipdeiyamuk nang nirya arye, yata ati, “Anda, yatanye unmalam do?” nyabuka kum asipdeyik. Dipkoprop sik akunum bikik. ‘Anye bira, nun Deiyoknye Yesus atia’ tenen, akunum bikik. 13Yesus arye, roti kintinipdeipmok ning ap, mekin ikan uku kalum deice dapmok ning ap dobuka, el mapu ati bokuka aribuk. 14Atalak ara, Yesus kam bukuk talak arye diprongobuka, el mapu dam panabuka tikilyayuk ning, like winilye ning akunum kibuk.

Yesus arye Peterus ati, kanye talima mikip kipdeibuk yupu

15Sik nirya akunum dibikura, Yesus arye Simon Peterus ati, ayupu nyabuk. “Wisinye Yohanes arye deipkuk mi, anda Simon Peteruso, anang ara, kanye delininyak bukni, an dan do? Ance nati weik arye kanye delinilyam do?” nyabuka asipdeyuk. Asipdeyukura, Peterus arye, “Diba, naio, an kele. Narye anti, ‘Na du koprop’ tenen, kanye delikunune,” nyabuk. Nyabuk bukni, Yesus arye tamubuka domon yupu deice arye, “Ati, na domba ati, sik din arenamlyame,” nyabuk. 16Aminyan ara, Yesus arye tuba tamubuka, tonap Peterus ati nyabuk. “Yohanes el mi Simon Peteruso, ance nati, weik arye kanye delinilyam do?” nyabukba, Peterus arye, “Diba, naio, an kele. Narye anti, ‘Na du koprop’ tenen, kanye delikunune,” nyabuk. Nyabukura, Yesus arye, “Ati, na domba mapu ati deiyoknye kibuka tanamnilyame,” nyabuk.

17Aminyan ara, Yesus like winilye ning arye Peterus ati asipdeyuk. “Wisinye Yohanes arye deipkuk mi, anda Simon Peteruso, dipkoprop kanye delinilyam do?” nyabuka asipdeyuk. Asipdeyukura, Peterus arye, ‘Se, like winilye ning arye, tuba tamubuka tonap aninguk asipdenmanile’ tenen, bouku sukubuk. Mambul kanye bobukce, Yesus ati tamubuka nyabuk. “Naio, anda aning-aning nirya kel bikinanye ulyama anya arye, adinmanilama arye, moubuka kel bikmanilame. Narye anti kanye delikunune,” nyabuk. Peterus arye nyabukba, Yesus arye tamubuka nyabuk. “Ati, na bico tenenun domba ati, sik din arenamlyame,” nyabuka domon yupu deice nyabuk.

18Yesus arye nyabukopura, ayupu tonap dukdongobuka Peterus ati nyabuk. “Dipkoprop nyapkine. Min arye anda welnye ulamlum talak ara, an baju ongoplumce, ‘Asukum binune,’ tenyamlum mutuku uk balamlume. Bukni, anda wisi akunum daminyopura, an taruk bibikeipminyopura, yuk nang arye anti, baju ongopdeipkikcopura, ‘Asukum kum binune, na like,’ tenepnalam akuk dobuka bobinamkiyake,” Yesus arye nyabuk. 19Yesus arye ayupu nyabuka deice arye, ara aminyan talak Peterus dipnamuka ati nyabuk. Peterus dibukura, ninye eibikce, adeice arye Allah el si weik arye ereipnameka ati, Yesus arye ayupu nyabuk. Yesus arye ayupu nirya akunum nyabukce, Peterus ati, “Anda na aminyan pia melibuka dobolyanamnilyame,” nyapdeibuk.

20Nyabukura, Peterus ap, Yesus ap tikuka banmarika ani, Peterus arye tamubuka el aminyan tam dipdeyukce, Yesus kanye deiyamuknye aminyan yanganmokba, eibuk. Peterus eibuknye bira, ara Yesus opnamek sum lukunyan ara, din neika dinmek talak, Yesus mening dam bukukce, “Naio, yatanye birye ninye yupu delilbinamakil do?” nyabuka asipdeyuknye ani. 21Peterus arye ayanganmoknye eibukce, Yesus ati nyabuk. “Naio, oyangalanye bira, yatanye do? Anye biti aminyan talak yata wiripnamak do?” nyabuka asipdeyuk.

22Asipdeyukura, Yesus arye tamubuka nyabuk. “Kume, elti, tenena kume. Wini talak arye diprongobuka, otalak tamubuka yanamne talak danoutam nirya ara, narye anye biti, ‘Pia kamuk unamle,’ teneptinye babye, aning kum teneptinye ababye, anirya ara an deiyok kum ati, aning kum tenenamlyame,” nyabuk.

23Yesus arye ayupu nyabuka ati ara, Yesus elce wipdeiyamuk nang kan-kan arye dipkoprop kum bukni, ‘Aning deiyok ati nyabuk do?’ tenen, talye yupu nyalamik. Ara, “Yesus arye, ‘Anye biti tenena gume,’ nyapmoknye bira, kum dipnamle. Elda pia kam unamle ati, Yesus arye ayupu nyabuk do?” nyabuka teniltonauk ulamik. Bukni, Yesus arye, ‘Anye bira dipkoprop kum dipnamle’ kum nyabuk. Aning ara, laka arye kum nyabuk. Yesus arye nyabuk ning ara, “Wini talak arye diprongobuka, otalak tamubuka yanamne talak danoutam nirya ara, narye anye biti, ‘Pia kam unamle,’ tenepnyopura, an deiyok kum ati tenena kume,” nyabuk.

24Ara, ayupu noutamak “Anye,” nyapdeipmasinanye bira, na Yohanes ati nyapsine. Anyapmasin ning nirya ara, na asing arye elilamse. Na aryuk sekuka deipsine. Nun nirya kele. Narye sekeipmasin yupu ara, Yesus arye nyalamuk yupu ap, winilamuk ning nirya ara, dipkoprop ulule. 25Yesus winilamuk ning ara, abuku noutamak weik sekmasin bukni, elce pil dolamuk ning ap, yupu nyalamuk ning ap nirya ara, kum sekeipse. Yesus arye winilamuk ning nirya sekeiptinyopura, buku nong yupa weik, kum nukmanto uptue. Na kanye ara, tukwak mutuku noutamak mutuku-mutuku nirya, buku sekuka deiamtinga ababye, lo kum uptu ura, kum deipmanto uptue.

Telebe, na yupu akunum sekeipsene.

Na Yohanes birye nyapsine.

Currently Selected:

Yohanes 21: EIPA

Highlight

Copy