Yohanes 20

Yesus kam bukukce, keil deiya pum bisik batakuka, biyuk yupu

1Sik nirya damapra unmeka ani, Sabat sum akunum ubukopura, Minggu sum beren tam bereklamle talak arye, Maria Magdalenarye, Yesus el nong dobuka weipmek keil deiya dam biyuk. Biyukce, keil deiya buplan bisik noutamak kurukuka siknipmek keil, otam akunum kuruklopmokak eibuk. 2Aning eipmoka ati, Simon Peterus ap, Yesus el yupu kekelamukba, kanye deiyamuknye#20:2 kanye deiyamuk – Yohanes arye ‘kanye deiyamuknye’ sekuk ning ara, el bidamnye ati sekuk. ap, sik dam bik-bik abuka biyuk. Biyukura, nyabuk, “Se, nun deiyoknye Yesus, el nong ara yuk nang arye ubula dobuka bobinmaka anya arye, el nong weipmongak ara nun walwale,” nyabuk.

3Nyabukura, Peterus ap, Yesus el yupu kekelamuknye, yuknye ap, ‘Yesus el nong weipmekak dilbinunam’ tenen, bik-bik albirik. 4Sik bitinye bik-bik abuka banmarikbuk, Peterus kum bukni, el ap binmariknye bira minopce keil deiya dam biyuk. 5Anye birye nong ganupdongobuka, keil deiya pum bisik bita dipdeyukce, Yesus el nong kitipmek ning, namin baju uk aupmokba, eibuk. Eibuk bukni, akeil deiya pum bisik kum biyuk.

6-7Asukumuk tikuka dinmokbuk, Simon Peterus arye aminyan bik-bik abuka yayukce, adiparyuk Yesus el nong weipmek, keil deiya pum bisik wekuka dilbiyuk. Dipdeyukce, Yesus el nong kitipmek namin cang kain ap, el kisok kitipmek kain ap, aupmokak eibuk. Yesus el urasin singnipdongopmek cang kain ara, dobuka kitipmek ning, mitik otam yuk upmokak eibuk. 8Anirya eibukba, aminyan ara, Peterus ap bukni, minopce keil deiya dam yayuknye birye, el babye keil deiya pum bisik biyuk. Yesus weipmekak wekuka dipdeyukce, dib tenebuk.

9(Atalak ara, Yesus el wipdeiyamuk nang ap, el yupu kekelamik ninye nirya ap, Allah yupu noutamak nabi nang arye sekamik ning ara, moubuka kum kel bikamik. Ati, kel bikamika deice arye, ‘E, Yesus dipnamle bukni, tuba tamubuka tonap kam buknamle’ tenen, moubuka kum bikik. Aning ara min kum tenebik.)

Yesus arye, Maria Magdalena dam laka tikilyayuk yupu

10Aning nirya akunum eiprikopura, sik asik tamubuka yuk-yuk birik. 11Sik birik bukni, Maria Magdalena nyalamik kil ara, Yesus weipmek keil deiya dam bai tam tikuka engenauk unmok. Engenmok talakuk, nong ganupdongobuka akeil deiya pum bisik dipdeyuk. 12Dipdeyukbuk, Yesus el nong weipmeka ara, Allah el im deice pil don nang, malaikat bitinye bukmarikak eibuk. Ton malaikat ara, Yesus weipmekak kisok tam bukmok bukni, ton malaikat ara, yan tam bukmoka ak eibuk.

13Maria arye eibukba, amalaikat bitinye arye elti, asipderik. “Akilo, anda yata deiyok ati engenmalam do?” nyabuka asipderik. Asipderikbuk, Maria arye, “Kume, na deiyoknye Yesus, el nong asukumuk weipmangu bukni, winira yuk nang arye dobuka, yukak bobinuka weipmakak ara, na walwale,” nyabuk.

14Maria arye nyabukopura, tamubuka el donga tam dipdeyukce, Yesus eibuk. Yesus atikmokak, eibuk bukni, ‘Yesus dipkoprop aunmale’ tenen, moubuka kum bikuk. 15Yesus arye elti, “Akilo, yata deiyok ati engenmalam do? Yatanye biti elyanmalam do?” nyabuka asipdeyuk. Asipdeyukura, Maria arye, ‘Ayupu nyapmalamnye bira, ayo kan-kan noutam ninye weinak pil dona deiyoknye,’ tenebukce, nyabuk. “Amio, Yesus el nong dobuka yukak akunum deipmarumunyopura, el nong weipmarumunyak laka nyapnutumtoura, narye el nong dolbitinye,” nyabuk.

16Maria arye nyabukba, atikmoknye Yesus arye akil ati tamubuka el siuk, “Maria,” nyabuk. Maria ara, keil deiya damuk dinmoka anya arye, Yesus arye el si nyabuka deice arye, adiparyuk Maria moubuka tenebukce, tamubuka Yesus tikmokak eibuka, amutuku yupu Aramaik deice arye, “Rabini (Guru), na peterena deiyoknye,” nyabuk.

17Nyabukura, Yesus arye nyabuk. “Na ni Allah dam tamubuka min kum binmana anya arye, na nong kum talipnunilame. Ance tamubuka, na weit yapu nang nirya ati, ayupu laka nyalbinulyame. Ara, ‘Na Yesus ara, na ni dam, Allah el un dam tamubuka binirye unamne. Na ni bira, anggun ni uka. Na si erenun Allah ara, anggun si erelulum Allah uka. El tonoka,’ nyalbinulyame.” Yesus arye nyabuk.

18Yesus arye Maria Magdalena ati nyabukba, akil Maria arye adiparyuk bik-bik abuka biyukce, Yesus wipdeiyamuk nang, sik dam minopce biyukce, “Nara, Yesus akunum eipmanue,” nyabuka laka nyabuk. Tonda, Yesus arye elti, nyapmok yupu nirya laka nyabukura, anang kekebik.

Yesus arye, el wipdeiyamuk nang, sik dam laka tikilyayuk yupu

19Asum bukni, akunum inibukba, Yesus el wipdeiyamuk nang nirya, tonok aik bulubuka unmek. Sikce, ‘Se, Yahudi yala deiyok nang arye wenebuka opsicak’ tenen, ilil weik ubuka ati, anyaik buplan tirikdongobikce, kunci dakik. Anyaik pum daunmeka ani, Yesus ara sik kan-kan noutamak talye karin panabuka tikilyayuk. Panabuka tikilyayukce, anang ati nyabuk. “Anggun mambul kanye bona kume. Ilil asa una kumce, kanye deibuka telebuk unamlume,” nyabuk.

20Nyabukopura, ‘Na mapu kel biknuyak’ tenen, el taruk tatang paku dakuka opmek ning ap, el yace yok lukuka opmek ning ap ara, amubukura, sik nirya arye eibik. Yesus wipdeiyamuk nang eibikce, ‘Nun deiyoknye Yesus dipkoprop aunmale’ tenen, kel kibikce, kanye deibuka pin-pin asa arye unmek. 21Yesus arye sikti, tuba tamubuka tonap nyabuk. “Anggun mambul kanye bona kume. Ilil asa una kumce, kanye deibuka telebuk unamlume,” nyabuk. Tonda, “Na Ni Koprop Allah arye, ‘Na yupu dobuka peterelbinamle’ tenen, dopdeipnuk touk, narye anggunti, ‘Na laka teleb yupu ninye lyen yupu dobuka peterelbinamak’ tenen, dopdeipsine,” Yesus arye el wipdeiyamuk mapu ati nyabuk. 22Nyabukopura, Yesus arye el mapu deice si puto pubukce, ayupu nyabuk.

“Anggunda, Allah El Dib Kanye arepsin ati, doproplulume. 23Yata nang do nirya, sik malye tenenyak ning ap, malye wininyak ning ap ati ara, Allah akunum lyebukce, kum kipdeibuk anya arye, na mapu anggunce aninye ati, ‘Sik malye winin ning ara kum danmale,’ nyapmunyopura, dipkoprop Allah arye amalye winin ning ati, tuba tamubuka tonap kum tenenamle. Ton ninye ara, sik malye tenenyak ning ap, malye wininyak ning ap ati ara, Allah kum lyebukce, kum kum daneibuka anya arye, na mapu anggunce anang ati, ‘Anggun malye winin ning ara, anggun deice tuba upsile,’ nyapmunyopura, dipkoprop aninye, sik malye wininyak ning ara, sik nong deiceuk tuba unamle. Allah arye kum kilipnamle,” Yesus arye el mapu ati ayupu nyabuk.

Tomas arye, Yesus el nong eibukce, dib tenebuk yupu

24Ara, Yesus arye el wipdeiyamuk nang neika anyaik pum unmeka ani, Yesus arye panabuka tikilyayukba, eibik talak ara, tonoknye el si bitinye ara Tomas, ton Didimus nyalamiknye, el ap kum unmeka ati, Tomas arye Yesus kum eibuk. 25Yesus el mapu sik 11 nang arye, “Yesus kam bukuka yanmalba, eipmabe,” nyabuka lak nyabik bukni, Tomas arye nyabuk. “Nyapmanulum bukni, Yesus el taruk tatang deice paku dakikba, dila upmalye ning ap, el yace yok yo dula arye, lukuka opmek ning ap, kum eipnirye, na taruk arye, el taruk tatang dila ap, el yace yok lukik dila ap, kum talipnyopura, dib kum tenepnamne,” nyabuk.

26Tomas arye, nyabukba, sik nirya minggu tonok talye daunmeka ani, like tekbarye sum akunum ubukura, sik mince ulamik aik pumuk bulubuka wekmek. Wekmek ak arye, buplan tirikdongobuka kunci dakmek. Tomas ap, sik nirya anyaik pum neika unmeka ani, buplan tirikdongopmeka babye, Yesus arye sik kan-kan noutamak panabuka tikilyayuk. Panabuka tikilyayukce, nyabuk. “Anggun ilil kanye bona kume. Ilil asa una kumce, kanye deibuka telebuk unamlume,” nyabuk.

27Yesus arye nyabukopura, Tomas ati nyabuk. “Tomaso, na taruk tatang dila ara, an taruk arye talipdenilyame. Na nong dipdenimince, na yace yok luknika dila deice talipdenilyame. ‘Dip do, telela do?’ tenen, kanye teniltonauk unmalama ara, bataklyame. Diba teneplyame,” Yesus arye Tomas ati nyabuk. 28Nyabukura, Tomas arye, “Se, Naio, anda na Deiyoknye, Allah ulyame,” nyabuk.

29Nyabukura, Yesus arye Tomas ati nyabuk. “Ance eipmanilam deice arye dib tenepmalam bukni, yata ninye do, asing arye kum eipmaniyak nang ababye, dib tenepnikcopura, Allah arye aninye ati meliplibuk, telebuk unamake,” nyabuk.

30Ara, Yesus ap, el yupu kekebuka melilamik nang ap, neika unmek talak noutamak ara, Yesus arye ninye kum winipmanto ning weik tonun tonap pil donmok bukni, na Yohanes arye asekmasin buku noutamak ara, aning-aning nirya kum sekuka deipne.

31Bukni, abuku noutamak sekuka deipse yupu nirya ara, talye ati kum sekse. Ayupu nirya kekebikirye, ‘E, Yesus ara, dipkoprop Ninye Lyena Deiyoknye, Kristus ulule. Elda, Allah el Mi Koprop dipkoprop ulule’ tenen, dib tenebiceura, ‘El si deice arye kam pia unamlum’ tenen, abuku sekeipsise. Na Yohanes arye nyapsine.

Currently Selected:

Yohanes 20: EIPA

Highlight

Copy