Yohanes 19

Yahudi yala deiyok nang arye, “Yesus ara, wanwanun yo deice arye opdeipsilyame,” nyabik yupu

1Abulupmek ninye arye, “Yesus lolina kume,” nyabikura, Pilatus arye nyapdeibukura, el yin talin nang arye Yesus dobuka, el nong deice kama arye weikto onmek. 2Onmekce, tace weik ning dobuka, kwanipdongobuka, Yesus el kisok deice koupdongobik. Tonda, atalak ara, weik ninye deiyok nang arye, dekna weik mirin baju ongolamaka atonun, Yesus el nong deice acang baju, er si juba ongopdeipmek. 3Winibikce, abulubuka wekmek yin talin nang arye, Yesus dam yanuka nyanmek. “Se, anda weik mambulnye. Yahudi yala ninye sik weik ninye deiyoknye, Raja ulyame,” nyabuka, Yesus el urasin deice taruk arye onmek.

4Anang arye, Yesus ati nalibuka akutubuka bokonmek talak ara, Pilatus ara, anyaik pum arye bai tam, Yahudi yala deiyok nang ap, talye abulupmek ninye ap, unmeka, sik dam binuka nyabuk. “Anggun nirya asukum dilulume. Anye Yesus ara, ‘El malye winibuk ning ara, ani, ani’ tenen, kum kel kipmana ati, ‘El malye winina ati wenebuka opnuyabe,’ kum nyaptinye. Ninye olamak deiyok ning ton kum ubuka ati nyapsine,” nyabuk. 5Pilatus arye, ayupu nyanmok talak ara, el yin talin nang arye, Yesus boyayik. Yesus ara, taice ning kwanibuka, el kisok deice koupdongopmek ning ap, mirin cang baju, el si juba, el nong deice ongopdeipmek ning ap, tuba upmok. Yesus boyanmekba, Pilatus arye el aik dam wekmek ninye nirya ati, “Anye bira aunmale. Anggun dipdelulume,” nyabuk.

6Nyabukba, sik Yahudi yala nang, Allah arena ati, weik deiyok nang ap, sik amu tam pil dolamik nang ap, Yesus eibikce, nyabik. “Yesus ara, wanwanun yo deice deibuka opdeipsilyame,” nyabuka, weikto arye nyanmek. Nyanmek bukni, Pilatus arye, “Nara, ‘El malye winibuka deice arye, ninye olamak deiyok ning anye’ tenen, kum kel kipmana ati, deiyok kum upmala ati, narye anye bira, kum opdeipnamsine. Anggun bidamnye aryuk, anye bira bobuka olbilulume,” nyabuk. 7Nyabuk bukni, sik Yahudi yala deiyok nang, weik arye nyanmek. “Kume, nun apu Musa birye sekeiyamsuk yupu, amem yupu noutamak nyasilye yupu ara, anye birye yanipsuka ati, adiparyuk opdeipsilyame. Elce, ‘Nara, Allah el Mi Koprop unune,’ nyabuka deice arye, nun mem yupu yanipsuka ati, opdeipsilyame,” nyabik.

8Nyabikba, Pilatus kekebukce, ilil weik unmok. Ilil weik ubukba, el weik aik pum bisik tamubuka biyuk. 9Biyukce, Yesus ati asipdeyuk. “Yesus, an mutuku koprop ara, dan mutuku do? Dan mutuku arye yanamlum do?” nyabuka, asipdeyuk bukni, Yesus arye yupu ton tamubuka kum nyabuk. 10Yesus yupu tunim abuka tikukba, Pilatus arye, “Anda yupu kum nyapnamanilam do? Nara, weik ninye deiyoknye, yupu bokolina deiyoknye ununa anya arye, narye, ‘Oplulume,’ nyapnyopura, wanwanun yo deice arye opkitinge. ‘Lopdeiplulume,’ nyapnyopura, lopdeipkitinge. Aning ara moubuka kum bikmanilam arye, talye tunimapnilam do?” nyabuk.

11Nyabukba, Yesus arye tamubuka nyabuk. “An dem aryuk yupu weik nyapnutuma babye, nong kum uptu bukni, Allah arye na ona ati, lo ap, deiyok ap akunum arepkil ati, ayupu nyapminba, winipnamniyake. Bukni, ‘Opnuyak’ tenen, nati ninye yupu delilbinmoknye bira, elce pia malye winipmoa ara, weik mambule. An Pilatus arye malye winipnilam ning ara, mitikto malyeuka,” Yesus arye nyabuk.

12Yesus arye ayupu nyabuk talak arye diprongobuka, atalak noutamak nirya ara, Pilatus ara ilil ubukba, ‘Yesus lopdeiptinye’ tenen, lo talak dipdeyuk bukni, sik Yahudi yala ninye deiyok nang arye weik arye nyabik. “Kume, ance anye bira Yesus lopdeipminyopura, Roma mutuku nirya talilul weik deiyoknye Kaisar#19:12Kaisar – Roma mutuku ninye sik weik deiyoknye. Laka nyana yupu nomor 41 dirume. arye, anti, ‘Anye bira na ka koprop,’ kum tenenamkile. Aning ara talye kum nyapkiyabe. Yatanye do nirya, ‘Nara, ninye deiyoknye,’ nyabuka, si ereldanyak ninye nirya ara, Roma mutuku weik ninye deiyok talibuka, ulul Kaisar ati, yanina atonun ninye unyake. Ati, ayupu atonun nyabuknye Yesus kum lopdeiptume,” nyabik.

13Nyabikba, Pilatus arye ayupu kekebukce, Yesus dobuka sik anang dinmek akuk deibuk. Deibukce, el Pilatus ara, yupu bokolina deiyoknye bulamak ning deice bukuk. Ara anyaik dam ara, amutuku el si ara Keil bisik, tonda Aramaik yupu deice arye, Gabata nyalamikak bukuk. 14Pilatus arye aning deice bukuk sum ara, Kaplina ati Kwalina kintinin sum nyalamik. Keting ara, keting dukduk arye nyabuk. Pilatus, yupu bokolina deiyoknye bulamak ning deice bukukce, nyabuk. “Anggun Yahudi yala ninye, anggun weik ninye deiyoknye, Raja Yesus aunmala atia,” nyabuk.

15Nyabukba, sik awekmek nang nirya arye nyabik. “Kume, anye bira dobuka bobilulume. Bobimunce, wanwanun yo deice deibuka opdeipsululume,” nyabik. Nyabikura, Pilatus arye, “Anye bira, anggun weik ninye deiyoknye, anggun Raja opnun do?” nyabukba, sik Allah arena ati, weik deiyok nang arye, “Kume, nun weik ninye deiyoknye, nun Raja ara, Kaisar el tonok ulule. Yuknye ton kum talisulule. Anye Yesus ara, nun kume,” nyabik.

16Sik nirya aunmeka ani, aminyan ara, Pilatus arye Yesus dobuka, ‘Aninye arye wanwanun yo deice deibuka opnamak’ tenen, aninye aribuk.

Yesus dobuka, wanwanun yo deice arye, obik yupu

17Pilatus arye, anang ati, Yesus aribukba, sik yin talin nang arye Yesus bobiyik.

Bobiyikce, Yesus el wanwanun yo arebikba, Yesus elce bobuka biyuk. Yesus ap banmeka ani, mutuku si Golgota mutuku welebiyik. (Aramaik yupu deice arye Golgota nyalamik ning ara, amutuku urasin ara ninye kisok yok atonun uamuk mutuku ati, amutuku si ara, Golgota nyalamik.)

18Amutuku deice welebikce, Yesus dobuka, awanwanun yo deice deibikce, el yan ap, taruk ap paku dakik. Winibikce, atalakuk Yesus el dana-dana tam, yuk nang bitinye ap, yuk wanwanun yo deice deibikce, paku dakuka ikuka erepdeibik. 19Pilatus arye nyabukura, yo lakase deice ayupu sekuka, Yesus el kisok deice tam, pakuk dakdeibik. Ayupu ara ani. ‘Yesus ara Nasaret mutukunye. Yahudi yala nang sik weik ninye deiyoknye Rajanye,’ nyabuka, ayo lakase deice sekdeibik.

20Ayupu sekdeibik ning ara, yuk-yuk mutuku yupu ap, amutuku yupu ap deice arye, tabakuka sekdeibik. Ara Aramaik yupu ap, Latin yupu ap, Yunani yupu ap deice arye sekdeibik. Yesus wanwanun yo deice deipmek mutuku ara, Yerusalem weik asik dolamikak dam anya arye, amutuku ulamik Yahudi yala ninye weik arye, sekdeipmek yupu eibik.

21Eibikce, sik Yahudi yala ninye, Allah arena ati deiyok nang arye, Pilatus ati malye kanye bobuka, yupu weik arye nyanmek. “Se, ‘Yahudi yala ninye, sik weik ninye deiyoknye binye,’ nyabuka, sekdeipmalama ara, yata ati do? Winibuka sekena ara kum bukni, teleb ning ara, anye birye, ‘Nara, Yahudi yala ninye sik weik ninye deiyoknye unune,’ nyalamuk. Nun nyanmap yupu ara winibuka sekmatume,” nyabik. 22Nyabik bukni, Pilatus arye aninye ati, “Kume, na akunum sekman yupu ara, akunum sekmana anya arye, akunuma aupnamle,” nyabuk.

23Sik yin talin nang arye, Yesus dobuka wanwanun yo deice paku dakik talak ara, el nong deice ongopmok baju nirya kwiripdobikce, ‘Nun dumbarye nang nirya neika atonun doproptibye’ tenen, dumbarye bokuka doprobik. Yesus el nong deice baju bokrobik bukni, nunukna baju ara, pia teleb ubuk. Ara, ngang amu tam sekdongobuka, utam nirya wibra balamik ati, wilamak bisik laka kum ubuk.

24Abaju tonok ning ara, pia teleb ubuka anya arye, sikce nyabik. “Acang baju, el si juba, kum kwiliknamabe. Nun kil-kil nyan ning ara, darikal dobuka, dekna dolon ning el si undi#19:24 Undi nyalamik ning ara, ani. Arikal dolamak ning ara, ani. Mitik yo tinggul dobukabikce, ninye si ayo deice sekuka kintinibuka deibikce, ayo nirya tuku deice deiplobikba, ninye si laka ubuknye birye, menang kibuk. deice aryuk, doproplinye laka upnamasile,” nyabuka, kil-kil ning dobikce, acang baju tonoknye birye doprobuk. Aning winibuka winibik ning ara, talye kanye bobuka winibik bukni, dipkoprop ara, Allah yupu noutamak, minop talak nabi nang arye sekeiyamik ning ara, ‘Nong upnamle’ tenen, winibik. Mazmur deice sekamik yupu ara ani.

‘Na cang baju nirya bokrobikce, doprobik. Na baju dolona ati ara, dekna dolona ati olamak ning, el si undi donmekce, doprobike.’ (Mazmur 22:18)

Ayupu minop talak, nabi nang arye sekamik atonun, sik yin talin nang arye winibik.

25Yesus wanwanun yo deice opmek damuk, Yesus el lin koprop tikuk. Tonda, asukumuk el lin el weit kil, ara tonoknye el si ara Kelopas, el kil Maria ton tikuk. Tonda, Magdale mutuku kil, el si babye, Maria Magdalena mutuku kil, asukumuk tikuk. Sik nirya neika tikuka dinmek. 26Sik nirya tikmeka noutamak arye, Yesus el lin Maria ap, Yesus wipdeiamuknye, el kanye weik arye deiyamuknye ap, neika tikrikba, Yesus arye eibuk. Eibukce, el lin biti nyabuk. “Nongo, an mi atia,” nyabuk. 27Nyabukopura, el kanye deiyamuknye, el kwit koprop#19:27 kwit koprop – Yohanes arye, ayupu sekuk ning ara, ‘Na babye si kum seknun’ tenebuk bukni, el bidamnye ati, Yohanes nyabuk. tonok ati nyabuk. “Amio, an nin tikmal atia,” nyabuk. Yesus arye nyabuka ati, el kanye deiyamuknye kekebukce, atalak arye diprongobuka, doyanamuk talak noutamak nirya ara, anye birye, Yesus el lin yukubukba yayukura, el aikuk neika ulamukba, anye birye akil melilamuk.

Yesus dibuk ati, nyabuk yupu

28Yesus daunmoka ani, ura, ‘Aning-aning nirya akunum winipmaniake,’ tenebukce, tonda, ‘Minop talak nabi nang arye, Allah yupu sekamik ning ara, atalak nong upnul’ tenen, ayupu nyabuk. Yesus arye, “Na mek patapnile,” nyabuka morobuk. 29Atalak ara, anggur mek ap, yu mek, el si ara cuka mek ap, tabakuka kintinipmek ning dam ubuka anya arye, aunmek ninye arye, aubuk ning mek tuldongon ning dobuka, anggur mek sik min-min ning burupdongobuka, ‘Yesus dipnul’ tenen, cang yo kama arye, el si ara, hisop yo lumupdongobikce, erebuka Yesus si bam bol dam arepdeyik. 30Arebikbuk, Yesus arye, aning akunum mitik anun dibukopura, ayupu nyabuk. “Winira akunuma,” nyabukce, adiparyuk el ngang yalyaling apsakukce dibuk.

31Ura, Yesus dibuk sum ara, talye sum kume. Asum ara, sik Yahudi yala ninye arye, weik Kaplina ati Kwalina sum ati, Kintilin Sum nyalamik. Ambusumto ara, weik mambul Sabat sum upnamuk anya arye, utenebik. ‘Kume, wanwanun yo deice deipmangu nang kum dibicopura, sik nong ara, nun mambul sum, Sabat sum noutamak ara, wanwanun yo deice tuba una ara, pia malye,’ tenebik.

Winibuka tenebika ati, sikce Pilatus ati morobik. “Pilatuso, wanwanun yo deice deipmalum nang ara, tuba kam unmakiba, ambusum nun mambul sum, Sabat sum noutamak wanwanun yo deice tuba ubicopura, nun like. Ati, ‘Anang minopce dipnamak’ tenen, sik keil yok ceplyopura, minopce dipnamakca. Anang akunum dibicopura, sik nong dobuka, yukak deiptume,” nyabuka morobik.

32Nyabuka morobikura, Pilatus arye kekebuka anya arye, elce nyapdeibukura, el yin talin nang arye, ‘Anang, sik keil yok kat ning arye kulabikcopura, yok cepnul’ tenen, yayik. Yayikce, Yesus dana tam deipmeknye, minopce el keil yok oplobikba, yok cebukopura, Yesus otam deipmeknye babye, el yok atonun ubikba, yok cebuk. 33Winipmekce, ‘Yesus el yok ton cepnuyap’ tenen, Yesus dam yanmek bukni, Yesus akunum dipmoka anya arye, el yan keil yok kum bulakik. 34Aning kum bukni, tonok yin talinanye birye, cang yo dula arye dobuka, Yesus el yace yok lukuka obukba, Yesus el nong noutam arye, ining ap, mek ap, weik arye biyuk.

35Sikce winibikura, aning nirya eibuknye birye, akunum lakak laka nyapsuke. Elce, “Anang arye winibike,” nyabuka, laka nyapsuk yupu ara, dipkopropuk ulule. Anye birye, dib yupu nyapsuka ara, ‘Sik nirya kekebikirye, dib tenepnamak’ tenen, nyapsuke.#19:35 Anye Yohanes arye, ‘anye’ nyabuka ara, el bidamnye ati nyabuk.

36Ara, Yesus el yok kum bulakik ning ara, nabi nang arye, Allah yupu minop talak sekamik ning, ‘Nong upnamle’ tenen, winibuk. Anang ara, talye mangkau kanye bobuka, winibik bukni, Allah arye Yesus ati, tenyamuk touk winibik. Allah yupu Mazmur noutamak ara, ayupu sekamik.

‘El yok tonok ning babye, kum cepnamake.’ (Mazmur 34:20; Keluaran 12:46)

37Tonda, yuk buku Zakaria noutamak ara, ayupu ton sekamik.

‘El yace yok lukuka obiknye bira, eipnamake.’ (Zakaria 12:10)

Ati ara, Yesus el yok kum bulakik ning ara, nabi nang arye, Allah yupu minop talak sekamik ning ara, nong laka kibuk.

Yesus dibukura, el nong dobuka, keil deiya weibik ati, nyabuk yupu

38Ura, tonoknye el si ara, Yusuf, elda Arimatea mutukunye ulamuk. Yusuf ara, Yesus ati dib tenebuka, el yupu kekelamuk bukni, ‘Sik Yahudi yala deiyok nang arye, wenepnecak’ tenen, ilil ubukba, el dib tenyamuk ning ara, duknulamuk. Lak akarye kum nyalamuk. Anye Yusuf birye, Pilatus ati, “Yesus el nong dobuka weipnuna ati, arepnilyame,” nyabuka morobukba, Pilatus arye, telebe nyabuka deice arye, Yusuf arye, Yesus el nong dolyayuk. 39Yesus nong dolyayuk talak ara, tonoknye ap yarik. Anye bira, ara mince lukunyan noutamak, Yesus dam yanamuknye, el si ara, Nikodemus ap yarik. Nikodemus arye, ‘Yesus el nong lyuplyeura, tong nyaplyak’ tenen, el nong weinak kintinina ati, nintong teleb mek, el si ara, minyak mur ap, gaharu ap, 34 kilo libuka boyayuk.

40Sik bitinye, Yusuf ap, Nikodemus ap arye, Yesus el nong dobuka, anintong teleb ning, el nong deice likeiprikce, pia teleb namin cang kain kwilikukaprice, Yesus el nong kitipdongoprik. Winibuka, Yesus el nong weinak ati, apil kintinibuka deiprika ara, sik Yahudi yala ninye nirya arye, ninye weinak ati winilamik.

41Yesus wanwanun yo deice obikak ara, ninye arye urasin teleb yo kouamika ati, urasin teleb ubuk. Asukum noutam ara, ninye wein keil deiya winiryuk ning ton uamuk. Akeil deiya pum bisik ara, diamik ninye nong min ton kum weilamik. 42Sik Yahudi yala ninye weik kwalina sum ati, kintinina sum akunum ubuka anya arye, ‘Ambusum ara, apil ton kum doptibye,’ teneprikce, akeil deiya dam ubuka anya arye, Yesus el nong dobuka, asukumuk dongoprik.

Currently Selected:

Yohanes 19: EIPA

Highlight

Copy