Yohanes 18

Yahudi yala deiyok nang arye, Yesus tapu koubuka bobiyik yupu

1Yesus arye Allah akunum morobukopura, elce wipdeiamuk nang, sik 12 nang ap, sik unmek asik batakuka, bai tam biyik. Asik dam biyikce, mutuku si Kidron tam banmekce, otam ara ninye arye yo kouamikak, ayo kan-kan wekelbiyik. 2Sikda, yo kan-kan biyik mutuku ara, Yesus ap, el yupu kekelamik ninye ap, amutuku uk bulumekba, Yesus arye asukumuk peterelamuk mutuku anya arye, Yudas Iskariot ababye amutuku akunum kel bikamuk.

3Yudas ara, ‘Malye nang arye Yesus opdeipnamniyak’ tenen, ninye yupu akunum laka nyalilbinmokba, kekepmeka anya arye, Yudas arye, “Bisik ani,” nyabuka menekuka biyukba, sik anang arye, Yudas el aminyan tam yanganmek. ‘Yesus tapu koupnuyap’ tenen, yanganmek ninye ara, yin talin nang ap, Allah arena ati, weik deiyok nang sik amu tam nang ap, Farisi nang ap yanganmek talak ara, weisa ap, lampu pelita ap, yin ap, parang ya ap talibuka boyayikce, yupa weik yanganmek.

4Yayik talak ara, Yesus arye aminyan winipnamik ning nirya akunum kel bikamuk bukni, sik anang yanganmek bisik noutamuk binuka eibukce nyabuk. “Yatanye biti, elyalum do?” nyabuka asipdeyuk. 5Asipdeyukura, sikce, “Nasaretnye, el si ara Yesus ati, dilyanmabe,” nyabikura, Yesus arye, “Na aunmane,” nyabuk. (Ayupu nyabuk talak ara, Yudas, ninye yupu laka nyalbinmoknye babye, anang ap asukumuk tikmok.) 6Yesus arye, “Na aunmane,” nyabukopura, anang nirya arye, ilil ubukba, mitik otam memeprobikce, tukwak poubik. 7Winibikura, Yesus arye tuba tamubuka tonap asipdeyuk. “Yatanye biti, elyanmalum do?” nyabuka asipdeyuk. Nyabukura, sikce, “Kume, Nasaretnye el si ara Yesus ati dilyanmabe,” nyabik.

8Nyabikura, Yesus arye tamubuka nyabuk. “Nara, aunmane akunum nyapmasine. Anggunce nati, elyanmanulum anya arye, na ap aunmak ninye ara tomona kume. Sikda talye daunamake,” nyabuk. 9Yesus arye ayupu nyabuk ning deiyok ara ani. Ara atalak ara, “Na mapu tonok nang babye, kume kum danamake,” nyapmok yupu, ‘Yesus arye nyapmok touk, nong dipkoprop winipnamle’ tenen, “Aninye ara tomona kume. Sik daunamake,” nyabuk.

10Nyabukura, Simon Peterus asukumuk tikmoka anya arye, el parang ya lin ning pum bisik danerye ya dobukabukce, Allah arena deiyoknye, el pil melinanye biti, el sirik tam amul sekwetebuk. Amul sekwetebuknye, el si ara Malkus. 11Peterus arye winibukura, Yesus arye Peterus ati nyabuk. “Winina bataklyame. An parang ya tuba tamubuka liplyame. Na Ni Koprop Allah arye tenyamnuk ning arepnilibuk, batakuka kum dopropnamne do? Kume, sikce dawinipnamakca,” Yesus arye nyabuk.

Yesus tapu koubuka, Hanas dam bobiyik yupu

12Yesus arye nyabukba, sik yin talin nang ap, sik deiyoknye ap, sik Yahudi yala deiyok nang ap, sik nirya arye Yesus tomobikce, tapu koubuka bobiyik. 13Akiting tamun ara, Yahudi yala ninye, sik Allah arena ati, weik deiyoknye el si ara Kayapas ulamuk.#18:13 Kayapas bira, imamnye ulamukce, Yahudi yala ninye sik malye ning yok pununa ati, kam ning arel yangalamiba, Kayapas arye, aning dobuka opnakarye, Allah el si eren aik pum tam arye arilamuk. Ati, elda imam pil dolamuk. Kayapas el yamal koprop si ara, Hanas. Yesus tomobik nang arye Yesus talibuka tapu koubikce, anye bira Hanas el asik minopce bobiyik. 14Kayapas bira, talinye kume. Elda, ‘Roma mutuku deiyok nang arye, nun Israel ninye nirya ati yu upliba, opsikirye sirya daksikcak’ tenen, “Nun nong pununa ati, teleb ning ara, tonoknye binyuk optinge,” nyabukura, Yahudi yala deiyok nang nirya arye kekebik.#18:14 tonoknye diptue – Kayapas arye, ayupu nyabuk ning ara, talye mankau arye nyabuk bukni, Allah arye tenyamuk touk, Yesus el tonok obikcopura, ninye lyena deiyok ning kintinip deipnamuka ati, Allah arye, Kayapas el talima noutamak pil dobukba, ayupu nyabuk.

Simon Peterus arye, “Yesus ara, na walwale,” nyabuk yupu

15Anang nirya arye, Yesus tapu koubuka bobanmekba, Simon Peterus ap, Yesus arye wibuka deiamuknye, tonoknye tonap#18:15 tonoknye – Yohanes arye ayupu sekelulnye bira, elce el bidamnye ati sekelule. Ara ‘Na babye si kum nyapnun’ tenen, ‘tonoknye’ binyuk sekelule. aminyan melibuka banmarik. Yahudi yala nang sik Allah arena ati, weik deiyoknye Kayapas arye, Yesus mince wipdeiamuknye akunum bikamuka ati, ‘Anyasik wekna meme,’ nyabuka yupu kum sekukba, Yesus el yupu kekelamuknye, anye bira tonok, imam Kayapas el aik dam wekelbiyuk. 16Anye bira wekelbiyuk bukni, Peterus ara, Kayapas arye kum kel bikamuknye binya arye, elda bai tam poka buplan damuk unmok. Daunmoka ani, Yesus el mi yuknye ton tuba tamubuka buplan dam yayukce, abuplan kalekna kil ati yupu nyabukce, Peterus bobuka, aik dam tam boyayuk.

17Asik dam boyayukura, buplan dam unmok kil Peterus eibukce, nyabuk. “Se, an babye, tapu koupmangunye, Yesus, el yupu kekebuka dobolbalyamnye ulyam do?” nyabuk. Nyabukura, Peterus arye akil ati nyabuk. “Na kume,” nyabuk. 18Alukunyan ara, arukna ubuka anya arye, anyasik melinang ap, sik deiyok nang ap, uku sekmekak dana-dana tamuku pikinmek. Peterus babye, aninye sikuku sekuka pikinmek akuk, asukumuk tikuka, el babye uku pikinmok.

Allah arena ati, weik deiyoknye birye, Yesus ati asipdeyuk yupu

19Anang nirya bai tamuk uku pekinmek bukni, Yahudi yala nang sik Allah arena ati, weik deiyoknye birye, Yesus ati yupu weik arye asipdeyuk. Anye birye asipdeyuk yupu ara Yesus el yupu kekebuka melilamik nang ap, Yesus arye peterelamuk yupu ap ati, asipdeyuk. Asibukura, Yesus arye nyabuk. 20“Kume, amutuku noutamak nirya ara, ninye mutuku-mutuku nirya ati, yupu laka aryuk peterelamse. Narye yupu dungnubuka kum peterelamse. Anggun Yahudi yala ninye bulubuka weklamlum aik pum peterelamsise. Ara, anggun Allah yupu keken aik ap, Allah yupu peterena aik ap, Allah arena ati, weik aik domik, anyasik dam ap, laka aryuk peterelamse.

21Narye yupu kum dungnubuka peterelamsise ati, anggun yata ning deiyok ati, ‘Malye winibuk ning ani’ tenen, asipdenmanulum do? Narye peterelamsibuk, na yupu kekelamnik ninye weik arye, daunyaka anya arye, na nyapse yupu ara, sik kele. Na yupu kekelamnik ninye ati asipdelulume.” Yesus arye nyabuk.

22Nyabukura, akekenmek nang kan-kan arye, tonok Yahudi yala deiyoknye, el taruk arye, Yesus el asok noutam bokukce, ayupu nyabuk. “Ance nyapmalamba, kekenmakilanye bira, Allah arena ati, weik deiyoknye ulula anya arye, ance elti, ayupu mikip arye nyanmalam ning ara teleb do?” nyabuka wenebuk. 23Anye birye Yesus ati bokuka wenebukba, Yesus arye tamubuka nyabuk. “Na nyanmanu yupu noutamak ara, malye yupu do, tilila yupu do, aublyopura, ance ‘El malye nyapmasil yupu anye,’ nyabuka laka nyapsutume. Bukni, na nyanmanu yupu noutamak ara, malye yupu kum upmalabuk, anda yata deiyok ati taruk arye bokmanilam do?” nyabuk. 24Yesus arye nyabukba, Hanas arye nyabukura, Yesus tapu koupmeka kipman, imam Kayapas el damak bobiyik. Kayapas ara, aketing tamun, Yahudi yala nang, sik Allah arena ati weik deiyoknye ulamuk.

Peterus arye, lik winilye deice arye, “Yesusda, na walwale,” nyabuk yupu

25Sik anang arye wininmek talak ara, Peterus ara anyasik damuku tuba pekinmok. Asukumuk tikuka, uku pekinmok talak ara, aunmek nang kan-kan tonoknye birye nyabuk. “Se, anda, anye bira Yesus, el yupu kekebuka dobolbananye ulyam darepe,” nyabuk. Nyabukba, Peterus arye, “Na kume,” nyabuka, pilibuk. 26Nyabukba, tonoknye ton kekebuk. Anye bira, Allah arena deiyoknye ati, pil melinanye kekebuk. Akekebuknye bira, Peterus arye atalak ara amul sekwetebuknye, el yalanye ulamuk. Anye birye, Peterus ati tamubuka nyabuk. “Ance, ‘Na gume,’ nyapmasilam bukni, minyuma ara, Yesus ap, an ap, anggunda Ara, yo kan-kan unmarum ak, eipmakune tenepkine,” nyabuk. 27Nyabukba, Peterus arye tuba tamubuka tonap, “Na kume, anye bira na walwale,” nyabuka pilibuk. Nyabuk karen ara, adiparyuk yim ayam arye yupu kamubuk.

Yesus bobuka, weik ninye deiyoknye, Pilatus dam bobiyik yupu

28Anirya akunum winibukura, sik Yahudi yala deiyok nang arye, Yesus dobuka bobikce, imam Kayapas el aik batakuka, amutuku talyamuknye, Roma mutuku weik deiyoknye Gubernur Pilatus dam bobiyik. Bobiyik bukni, Pilatus el weik aik kum wekelbiyik deiyok ara ani. Ara sik Yahudi yala ninye arye tenelamik. ‘Weik Kaplina ati Kwalina dipnamibye talak ara, sik Yahudi yala kum ninye ap, sik ning ap talibibyopura, nun talima noutam malye upsiliba, kwalina kum dibibyeura, Allah derepsilyak’ tenen, Pilatus el aik kum wekik. 29Wininmeka ati, Pilatus el aik pum arye bai tam yayukce, el aik dam bulubuka yanmek ninye ati ayupu nyabuk.

Bura tam yayuk talak ara, Pilatus arye anang ati asipdeyuk. “Anye Yesus ara, yata ning malye winibuka deiyok ati, na dam boyanmalum do?” nyabuka asipdeyuk. 30Nyabukba, sikce, “Kume, elda pia malye wininanye kum uptopura, tapu koubuka, an dam kum arel yakitibye. Talye ati kum yanmabe,” nyabik.

31Nyabikba, Pilatus arye, “Ati, anggun yuk anye bira bobuka, anggun Yahudi yala ninye mem nyalulum yupu deice arye, elti, yupu weneplulume,” nyabuk. Nyabuk bukni, sik Yahudi yala deiyok nang arye nyabik. “Aning nyapsilam bukni, nun bidamnye aryuk, malye winin ninye kum optibye. Anggun Roma ninye amutuku talipsulumce, ninye ona deiyok kum arepsuluma atia,” nyabik. 32(Ayupu nyabik ning ara deiyok ani. Ara, Yesus arye, “Winibuka, winibuka oplopnamniake,” nyabuk ning ara, nong upnamuka ati, ayupu mankau asa arye nyabik.)

33Aninye arye ayupu nyabikura, Pilatus el weik aik pum tamubuka wekelbiyukce, “Yesus dobuka boyanululume,” nyabuka deice arye, Yesus dobuka el dam boyayik. Dopdeibikopura, Pilatus arye Yesus ati asipdeyuk. “Sik aninye arye, anti, ‘Elda Yahudi yala ninye, sik weik ninye deiyoknye, Raja ulule,’ nyakinyak yupu ara dib do? Telila do?” nyabuka asipdeyuk. 34Nyabukba, Yesus arye Pilatus ati tamubuka nyabuk. “An kanye teneplum deice aryuk ayupu nyapnilam do? Yuk nang arye, ayupu nyapkika ak, kekeplumce, winira nyapnilam do?” nyabuk.

35Yesus arye nyabukba, Pilatus arye nyabuk. “Ance, ‘Anye bira Yahudi yalanye ulule,’ tenepmanilamce, ayupu nyapnilam do? An yala nang ap, sik Yahudi ninye Allah arena ati, deiyok nang arye, tapu koupmakiyakce, an bobuka, nati arepmaniake. Ati ara, ance yata malye ning winipluma deice arye, boyanmakiyak do?” nyabuka asipdeyuk. 36Asipdeyukura, Yesus arye Pilatus ati, tamubuka nyabuk.

“Nara, weik deiyoknye unirye, na talinun mutuku ap, talinun ninye ap ara, atukwak mutuku uk kum ulule. Na talinun ning nirya ara, talye tukwak mutuku ninguk uptopura, na talinun ninye arye, ‘Yu nang arye, nun deiyoknye tapu koubicak’ tenen, Yahudi yala deiyok ninye ati olyatinge. Bukni, na talinun mutuku ap, ninye ap anirya ara, atukwak mutuku noutam akuk kum ulule. Na talinun ning nirya ara yukak arye yangalule.” Yesus arye nyabuk.

37Nyabukura, Pilatus arye, “Ayupu nyapmalam ati, anda ninye deiyoknye, Raja ulyame,” nyabuk. Nyabukba, Yesus arye, “Pilatus ance, ‘Anda Rajanye, weik ninye deiyoknye ulyame,’ nyapmanilam yupu ara, dib nyaplame. ‘Weik ninye deiyoknye, Raja unamne’ tenen, tukwak mutuku yase. Adeiyok ati deipnike. ‘Dipkoprop yupu nyanamne’ tenen, tukwak mutuku yase. Dipkoprop yupu kekebuka talinyak ninye ara, na yupu kekebuka diba teneninyake.” Yesus arye nyabuk.

38Nyabukba, Pilatus arye tamubuka, “Dipkoprop yupu nyapmalama ara, yata yupu ati nyaplam do? Dib yupu ara yatato yupu do?” nyaplobukce, anyaik batakuka, tuba tamubuka tonap, anyaik pum arye bai tam biyukopura, sik abulupmek Yahudi yala deiyok nang ati nyabuk. “Anye bira asipdenman bukni, ‘Elda amalye winibuk ning ara ani-ani’ tenen, kum bikmane. 39Bukni, aketing tamun, aketing tamun nirya ara, anggun weik Kaplina ati Kwalina talak ara, wenena aik dongobupunye tonok, anggun kanye deilina ati, lolinyabe. Wininyaba, anya arye, ‘Elda Yahudi ninye sik weik ninye deiyoknye, Raja ulule,’ nyanyaknye, Yesus ara, el lobuka arepnamsin do, kum do?” nyabuka asipdeyuk.

40Nyabukba, sik Yahudi yala deiyok nang nirya arye tamubuka, weik yupu deice arye nyabik. “Kume, anye bira Yesus lobuka kum arepnumsilame. Barabas si nyalamaknye anyuk lopdeipsilyame,” nyabik. (Barabas nyalamiknye bira, Israel ninye arye, ‘Roma mutuku deiyok nang arye talisinyaka ara, nun lik’ tenen, oldalamik talak ara, Barabas el ap arye Roma deiyok nang ati oldalamikba, kum winipmanto kibuka ati, Barabas tomobuka wenena aik dongamik. Anya arye, Barabas nyabiknye bira, anye biti nyabik.)

Currently Selected:

Yohanes 18: EIPA

Highlight

Copy