Yohanes 17

Yesus arye, el li Allah ati, morobuk yupu

1Yesus arye ayupu nirya akunum nyabukopura, el urasin erebuka im deice tam dipdeyukce, Allah morobuk deice arye ayupu nyabuk.

Naio, winira, na tenyamnulum talak akunum upmale. Ance an Mi Koprop nati, ‘Ninye nirya arye, na si erepnamak’ tenen, mambul pil dopnamnilyame. Winipniminyopura, ninye arye na si erenamniyake. Winipniminyopura, ‘Ninye tukwak nang nirya arye, an pia teleb winiminya kel bikikirye, anti kibuka si erebikirye, an si pia erenamkiyake’ tenen, narye mambul pil donamne. Na mambul pil dopnaman deice arye, an si erepdeipniba, yuk nang eibikirye, sikce an si erenamake. Ati ance nati teleb kipdeipnamnilame. Winipniminyopura, an Mi Koprop na pil dopnaman deice arye, ‘Ninye nirya an si weik arye erepdeipkikirye, si erenamak’ tenen, moropkine.

2Ance nati, Weik Ninye Deiyoknye winina deiyok ning arepnulum deice arye, ninye mutuku-mutuku nirya ati, sik deice tam upniba, sikda na amu tam unyake. Winibdeipnuluma ara, talye ati kume. Ara, ance, ‘Na akunum wipdeiyamse ninye, na mi ati areamse ninye nirya ati ara, bol koplobuka pia kam una deiyok ning arenamle’ tenen, ance nati, ninye deiyok ning areamnulume.

3Ura, bol koplobuka pia kam una ara, talye winina kum bukni, ara na areamnulum ninye ap, an ap, ance dopdeipnulumnye Yesus Kristus ap, nun nirya talima dukdongobuka neika una ati nyapne. Aninye nirya arye, nunti diba tenepsikirye, nun bitinye ap, aninye ap, talima dukdongobuka neika ubibya deice arye, pia kam unamake. 4Ance, nati mambul pil areamnulumba, apil dopra balamse ani, sirya akunum dakdongopnin banman deice arye, an si weik arye erepdeipkiniba, ninye nirya eibikirye, sikce an si ati, weik arye erebikirye, anti, ‘Allah ara weik mambule,’ nyabuka kibuka si erenamkiyake.

5Wini talak, na ni Allah, pia teleb kipdeipniminba, an dam noutamak ara, pia dirina weik ap, teleb winina ap, akunum wininyopura, na si erebuka kinamniyake. Ara, tukwak mutuku nirya min kum kwepdeialum talak, pia teleb ap, dirina weik ap, ulamsibuk, na si weik arye kibuka si erelamnik touk, wini talak babye, ‘Ance pia teleb kipdeipniminba, na si erebuka, weik arye kinamniyak’ tenen, na ni anti moropkine. Yesus arye ayupu nyabuka, el li Allah ati morobuk.

Yesus arye el mapu, sik melina ati, Allah morobuk yupu

6Yesus arye nyabuka Allah ati morobuk.

Naio, tukwak mutuku noutamak bukni, ance wibuka areamnulumba, narye wibuka deiamse ninye ati, narye an si ap, an winiminye ning ap, sik kel bikna ati, laka nyalamsiba, akunum kel bikamkike. Ance aninye nirya talyamlume. Talyamlumce, aninye dobuka nati areamnulume. Aninye ara, an yupu kekebuka dobolbanyake. 7Wini talak ara, na mapu anang ara, akunum kel bikinyake. Ara ance areamnulum ning nirya ara, an dam arye, ancuk areamnulume. Tonda tuba arinilyame. Na mapu ara, aning akunum kel bikinyake.

8Aning ara, talya ati kum bukni, naio, ance areamnulum yupu nirya ara, narye dobuka na mapu ati peterelamsibuk, sikce ayupu kekebuka diba tenyamikce, akunum dolonyake. Na mapu ara, sik kanye teniltona kumce, akunuma, ‘Yesus ara, Allah arye dopdeibukce, tukwak dokwetepsuk anya arye, Allah el un dam arye yasuk’ tenen, akunum kel bikuka unyake.

9Naio, narye talye tukwak ninye nirya, diba tenena kum ninye nirya ati ara, anti kum morokunune. Aning kum bukni, ance areamnulum ninye ati moropkine. Aninye ara, an na tenen ninye, ance taliplum ninye anya arye, anang ati moropkine. 10Na talinun ning ap, ninye ap nirya ara, dipkoprop an ninguk ulule. Aning atonun, na ni Allah ance talyamlum ning ap, talyamlum ninye ap nirya ara, na ninguk unulule. Na mapu, sik wininyak ning deice arye, yuk ninye na si kibuka si erenamake.

11Na mapu ara, tukwak mutuku tuba unamak bukni, nara tukwak mutuku batakuka, an dam yanamne. Naio, anda pia malye ning ton winina kumnye ulyame ati, anda Pia Telebnye ulyame.#17:11 Pia Telebnye – Ayupu nyabuka deiyok ara ani. Yesus ara, malye winin ning tonok babye pia kum ulule. Tonda, Allah arye Yesus ati, ‘Pia Telebnye ulule,’ tenelula ati, Yesus wibuka deiamukce tukwak mutuku dopkwetebuk. Adeiyok bitinye ati ara, ‘Yesus bira Pia Telebnye,’ tonda ‘Yesus ara malye winin ning pia kum ulule,’ nyanyabe. An si weik mikip weik ukilya deice arye, ‘Na mapu ati kalikinamlam’ tenen, moropkine. An si ara, ance areamnulum si ati nyapkine. An areamnulum si mikip deice, pia kaliklaminye bukni, ‘Sik aminyan talak tonok kanye tenebuka, kanye talima dukdongobuka nong tonok atonun unamak’ tenen, moropkine. Tonda, na ni Allah, an ap, na ap, kanye talima dukdongobuka tonok unyam touk, ‘Sik babye atonun nong tonok atonun unamak’ tenen, moropkine.

12Ura, na ap, na mapu ap, tukwak mutuku noutamak neika ulamubu talak noutamak nirya ara, weik mambul si arepnuluma deice arye, ‘Malye ning arye, na mapu malye uplyak’ tenen, narye na mapu ati kaliklamsiba, tuba teleb unyake. Sik anang nirya ara, tuba telebuk unyake. Tonoknye babye kume kum danike. Bukni, minop ulamik nabi nang arye, Allah yupu sekamik noutamak nyalye touk, ‘Nong upnamle’ tenen, tonoknye bira, na ap neika balamnumunye bukni, malye ubuka deice arye, el nong kum danamle. Bukni, an kele, minop talak tenyamlum touk, anye bira kum danamle.#17:12 kum kum danamlanye – Yesus arye, “Kum kum danamlanye,” anye bira nyabuka ara, Yudas Iskariot ati nyabuk.

13Wini talak ara, Naio, an dam yanamne. Bukni, narye na mapu ati arenun ning, kanye pin-pin asa una deiyok ning, na ning dobuka sikti, arepnibuk, kanye pin-pin asa weik arye uptopura, ‘Kanye deibuka telebuk unamak’ tenen, wini talak tukwak mutuku tuba unye talak noutamak, ayupu nirya nyapmane. 14Naio, narye na mapu ati, an yupu areamsibuk, dolonyake. Sik diba tenena kumce, tukwak mutuku talye unyak ninye arye, na mapu ati, ‘Nun lik,’ tenenyake. Ara talye ati kume. Nara, atukwak mutuku ninye malye-malyeuk winilamak touk kum wininune. Na wininye touk, na mapu babye, talye wininyak ninye atonun kum wininyaka anya arye, diba tenena kum ninye arye, na ap, na mapu ati, ‘Anang ara nun lik,’ tenesinyake.

15Ati, naio, narye anti, ‘Na mapu ikin uplyak’ tenen, ‘Na mapu dobuka tukwak mutuku noutamak arye yukak bobitum’ tenen, kum moropkine. Aning kum bukni, ‘Malye Winina Deiyoknye, Isa Mutuku Dongonye arye na mapu ati, malye updeipliba, sikce malye winibicak’ tenen, “Ance na mapu ati, melibuka kalikinamlyame,” nyabuka moropkine, naio. 16Nara, tukwak mutuku ninye arye malye ning tenebuka malyeuk winilamak touk, pia kum wininune. Aning atonun, na mapu ababye, talye tukwak ninye tenebikirye, malye-malye winilamak touk kum wininyake.

17Naio, an yupu ara pia dipkoprop yupu uk ulule. Ati, ‘Ance na mapu ati, an dipkoprop yupu deice arye, sikti, teleb kipdeiptumce, an bidamnye na tenen ninye unyakbuk, ance aninye ati pia talilyamba, sikda an mapu kopropa na tenen ninye#17:17 na tenen ninye – Yuk Allah yupu buku noutamak ara, ‘Khuduskan,’ nyalamik bukni, ayupu deiyok ning ara, akunum lak kibuka sekupu. Ara, Allah arye, ‘Aninye ara, talye-talyeuk kum wininamake. Na amu tam ukirye, na piluk dobuka, telebuk unamak’ tenen, wibuka deililul ninye, tenena ati ayupu nyabuk. uk teleb unamak’ tenen, moropkine, naio. 18Ance na dobuka, tukwak mutuku noutamak dopdeipnulum touk, narye na mapu ati dobuka, ‘Tukak mutuku noutamak, mutuku-mutuku nirya na laka teleb yupu, ninye lyen yupu nyalbinamak’ tenen, dopdeipne. 19Wininuna deiyok ara, ‘Na mapu nirya ara, pia telebuk utingce, na ni Allah, an na tenen ninyeuk unamak’ tenen, wininune, na ni Allah. Naio, na Yesus arye na bidamnye ati, ‘An na tenenanye unamne’ tenen, na kanye talima nirya ara, an deiceuk delikunune. ‘An amu tam unirye, an piluk pia donamne’ tenen, nyapne. Yesus arye nyabuka Allah ati morobuk.

Yesus arye aminyan talak dib tenenamak ninye nirya ati, Allah morobuk yupu

20Yesus arye el mapu ati morobukopura, ayupu ton dukdongobuka morobuk.

“Na ni Allah anti moropmakin yupu ara na wipdeiyamse ninye, na mapu tonok kume. Tonda, na mapu arye na yupu dobuka peterelbikibuk, yuk mutuku ninye kekebikirye, nati dib tenepnamak ninye ap ati, Allah moropkine, naio. 21Naio, narye sik aminyan talak dib tenenamak ninye ati moropmakin ning ara ani. Ara, ‘Na ap, Allah an ap, nun talima dukdongobuka, tonok kanye bobuka unyam touk, sik dib tenenyak ninye ap, aminyan dib tenenamak ninye ap, sik nirya ababye atonun, talima dukdongobuka neika unamak’ tenen, moropkine.

Tonda, naio, sik nirya ap, nun bitinye ap, ‘Nun nirya ara talima dukdongobuka, tonok kanye bobuka neika unamap’ tenen, moropkine. Anyapman touk, sik dib tenepnamak ninye nirya arye winiptingopura, yuk talye ninye nirya eibikirye, ‘E, dipkoprop, ninye lyena ati, Allah arye Yesus dopdeipsuk’ tenen, kel biktinge. Utenen ati moropkine, naio.” Yesus arye nyabuk.

22Nyabukce ayupu ton nyabuk. “Naio, an ap, na ap wininyam touk, ‘Aninye nirya arye talima dukdongobuka, tonok kanye bobuka telebuk neika unamak’ tenen, ance pia teleb kipdeipnulum touk, narye aninye ati akunum teleb kipdeipse. 23An ap, na ap, kanye dukdongobuka unyame. Na ap, nati dib tenenyak ninye ap, dib tenepnamniak ninye ap, talima dukdongobuka unamabe. Naio, ance aninye nirya ati, ‘Teleb kipdeiptumba, talima dukdongobuka, tonok kanye bobuka, pia telebuk neika unamak’ tenen, moropkine.

Ara, sik talima wililana kum aniryuk, kanye yuk-yuk bobuka kum unamak bukni, nimalye arye teleb ubuka neika unamake. Winibuka winiptingeopura, dib tenena kum, talye tukwak ninye nirya arye kel kipnamake. Kel biknamaka ara, ani. Ara, ‘E, dipkoprop Allah arye Yesus dopdeibuk,’ tenena ap, tonda, ‘Allah arye Yesus ati kanye talima arelul touk, Allah arye adib tenen ninye ababye, sikti, talima arelule,’ tenena ap, ‘Aning nirya kel biknamak’ tenen, moropkine, naio.” Yesus arye nyabuka morobuk.

24Winibuka morobukopura, ayupu ton nyabuka morobuk. “Naio, ance aning-aning nirya ap, tukwak mutuku nirya ap, min kum kwepdeiplum talak ara, ance nati weik arye kanye talima areamnulume. Winibuka talima areamnuluma ati, weik mambulnye kipdeipnulumce erepdeipnulumba, na si weik arye kibuka si erenamake. ‘Aning nirya pia teleb kipdeipnulumnye bira, na mapu arye eipkitingce kel bikiting’ tenen, moropkine, naio. Ara, ‘Aning nirya eipnamak’ tenen, ance areamnulum ninye, ‘Na mapu nirya ap, na ap, na unamne mutuku neika unamap’ tenen, moropkine, naio.

25Se, Naio Allah, anda pia Diksukum Unanye ulyame. Malye ning tonok ning ababye kum winilyame. Diba tenena kumce, tukwak mutuku talye wininyak ninye arye, anti kum bikinyake. Sik ap, an ap, talima dukdongobuka kum unyake. Bukni, na bikamkise. An ap, na ap, talima dukdongobuka neikauk unyame. Ance na dobuka tukwak mutuku dopdeipnuluma ara, na mapu arye akunum kel bikamike.

26Narye na mapu ati an winiminye ning nirya peterelamsiba, kel bikinyake. Aning akunum winilamse touk, sikti, tuba unamne. Deiyok ara ani. Ara, ance nati, weik arye kanye deiamnulum touk, ance sikti, kanye weik arye delinamlyame. Tonda na ap, sik ap, talima dukdongobuka neika unamabe. Nara, sik talima ak unamne. ‘Aning-aning nirya, moropmakin ning nirya winipnamle’ tenen, akunum moropkine, naio.” Yesus arye ayupu nyabuka, el li Allah ati morobuk.

Currently Selected:

Yohanes 17: EIPA

Highlight

Copy