Rasul 1

Allah arye Yesus dobuka, im deice bobiyuk yupu

1-2Telebe, na kwit Teofilus, na minopce sekse buku noutamak ara, Yesus el winilamuk ning ap, el peterelamuk ning ap nirya, el deiyok koubuka akarye, pil dopranin balamuka ani, sirya wibuka dopdeibukura, el yupu dobuka peterelbalamik Rasul nang ati, Allah El Dib Kanye mikip deice arye, “Wininamlulume, wininamlume,” nyabuka akunum nyabukopura, im deice akunum welebuk ning nirya ara, akunum sekse. 3Yesus el kanye ikin ning akunum doprobukopura, Yesus elce wipdeiyamuk nang ati, ‘El dipkoprop kam bukmale, tenepnamniak’ tenen, sik dam panabuka tikra balamuk akarye, ‘Yesus ara, dipkoprop kam bukuke,’ tenebikirye, ‘Sik kanye kum boktopnamle’ tenen, el dipkoprop ninguk winilamuk. Ara, ‘Dip do, tilila do, kum tenepnamak’ tenen, dipkoprop ninguk weika arye winilamuk. Winilamuk akarye, el wipdeiamuk nang dam yanuka nyalamuk. Ton sum arye, ton sum arye, yupa weik like 40 talak ulamukce sik kan-kan yangalamuk akarye kutukuka tikilyangalamuka ani, Allah elti, dib tenenyak nang lyepsilirye, talisulul yupu, el mapu ati laka nyalamuk.

4Yesus ap, el mapu ap, neika tuba unmek akarye, din dibik talak, tonok sum arye, ‘Dipkoprop wininamak’ tenen, anang ati ayupu nyabuk. “Anggunda, Yerusalem batakuka yuk mutuku kum benamlume. Na ni birye, ‘Aning dipkoprop talye arepnamsine,’ nyapdeibukura, na peterelamsibuk kekelalum ning ara, ‘Dipkoprop arepnamsil’ tenen, dinauk unamlume,” nyabuk. 5“Ura, Yohanes arye ninye dobuka mek sirika dongolamuk bukni, aminyan talak, Allah arye El Dib Kanye dopkwetepsilyopura, anggun kanye talima ak weknamsile nyapsine,” Yesus arye nyabuk.

6Yesus ap, elce wibuka deiamuk nang, tonok sum neika unmek akarye, anang arye Yesus ati asipdeyik. “Naio, atalak aryuk nun Israel ninye arye mutuku-mutuku nirya ninye talipnamapa deiyok nang adiparyuk tonap tamubuka arepsiminye akarye nun kan-kan arye tonoknye, ‘Weik ninye deiyoknye unamsil’ tenen, erepdeipnamsilam do, kum do?” nyabuka asipdeyik. 7Asipdeyik buk, Yesus arye anang ati tamubuka nyabuk.

“Na ni el mikip deiyok ap, el talibuka deiyok ap, aning aryuk, ‘Atalak winipnamne, asum winipnamne’ tenen, min arye tenebukce, akunum wibuka deibuk ning ara, aning ara, anggun deiyok kum ati, kum kel kiptume. Elce anggunti kum laka nyapnamsile. 8Bukni, Allah El Dib Kanye anggun talima ak yanuka weksilirye, mikip weik arepsilyopura, dopropnamlume. Dopropmunyak arye, Yerusalem unyak ninye ap, Yudea tam unyak ninye ap, Samaria tam unyak ninye ap, mutuku sirya im sirya unyak ninye ap, na winilamse ning ap, peterelamsibuk kekelamlum ning ap, dobuka peterepra banamlume,” Yesus arye nyabuk.

9Yesus ayupu akunum nyabukopura, sik adinmek talakuk, Allah arye Yesus dobuka im deice welenmoka ani, dua kan-kan wekukopura, dua arye singnipdongobukura, sik kum eibik. 10Kum eibik bukni, el tuba welenmok talak ara, sik tuba urasin erebuka dinmekbuk ninye bitinye kurun baju ongamrik nang bikna kum talak talye karen arye minopce anang dam tikilyarik.

11Tikilyarikura, ayupu nyaprik, “Anggun Galilea mutuku nango, anyaka tuba yata ati im tam pia dinmalum do? Anggun dam Allah arye Yesus dobuka im deice welepmalanye bira, anggun asing arye eipmalumbuk, welepmala atonun, aminyan ara, eluk tamubuka yanamle,” nyaprik.

Yudas pununa ati, Matias wibik yupu

12Yesus akunum welebukopura, zaitun yo duk moulamuk mutuku ati, mutuku si Zaitun mutuku nyalamik mutuku arye, el mapu tamubuka Yerusalem mutuku biyik. Ara, Zaitun mutuku arye Yerusalem mutuku bana ati, tonok Sabat sum#1:12 Sabat sum – Sik Yahudi yala nang ara, ‘Sabat sum ara, dikdik sen sum anya arye, pil dona atonun ning kum winiptibye. Pil dobibyopura, Allah arye derepsilyak,’ tenenelamik. Ati, sik dikdik sen sum ara, Sabat sum nyalamik sum noutam ara, ‘Bisik bana ara, 1.100 meteruk bitibye. Pera mutuku kum bitibye,’ tenelamik. arye mening dam mutuku balamik touk, asum ara, sik babye, atonun biyik. 13Yerusalem asik dolamikak sik ulamik aikuk tamubuka akunum biyikura, siktia unmek aik anyuk, alip aik#1:13 Alip aik nyalamik ning ara, lak nyan yupu, nomor 27 dipdelulume. Ara sik aik ara, kat tuku ap, kat keil ap arye domika ati, tonok aik aruma deice tam, alip tam ton, yuk aik ton domik. Winilamika ati, sik aik ara, bertingkat bitinye ulamuk. welebik. Atalak unmek nang si ara, ani. Peterus ap, Yohanes ap, Yakobus ap, Anderias ap, Pilipus ap, Tomas ap, Bartolomeus ap, Matius ap, tonda, Alpeus el mi Yudas ap, Simon Patriot nyalamiknye ap, Yakobus el mi Yudas ap, anang nirya unmek. 14Anang nirya ap, Yesus el lin Maria ap, Yesus el weit yapu ap, ton yuk kilapu tonap, sik nirya asum-asum nirya bulubuka Allah pia moronauk ulamik. 15Winilamika ani, atalak noutamak arye, Yesus dib tenelamik nang, yupa weik 120 nang, sik wekmek kan-kan ak Peterus tikuk akarye ayupu nyabuk.

16“Na kayapu, minop talak arye Allah El Dib Kanye arye, Daud, el kanye talima pum tam wekukura, utenebukce, ‘Winipnamle,’ nyabuka sekamuk yupu ara, atalak ara, Yudas kum bikamuk bukni, ayupu ara, el Yudas ati nyalamuk. Ayupu ara, kum batakmanto yupu ati, akunum winipmasile. Ara, Yesus tapu koupnamik nang dam inibuka dobuka yayukce, ‘Yesus ani,’ nyamuknye, Yudas ati Daud arye ayupu nyamuk. 17Yudas ara, Yesus arye nun 11 nang wibdipsuk touk, el babye, wipdeibukura, neika ulamuburye, nun Allah ati donyap pil ara, el ap arye, apiluk neika dolamubu.” Peterus arye nyabuk.

18Yudas, el pia malye winibuka deice arye, sik yo bok arebikura, aning doprobuk akarye, wa wiamikak akunum dekukopura, yupdayukak seksakuk akarye, el mun palubukce, el deilyu nirya yoksakuke. 19Winibukura, Yerusalem mutuku ulamik ninye nirya kekebikopura, awa wiamikak si ara, sik Aramaik yupu arye “Akeldama” nyalamik. (‘Akeldama,’ nyalamik ara, ining wa#1:19 Ining wa nyalamik ning ara, atonun ati. Yudas el bidamnye youpdayukura, el mun cobukce, deilyu yamupsakukce, el ining awa win dam biyuk ati, awa win dam si ara, ‘ining wa,’ nyalamik. ati nyalamik.)

20Peterus arye ayupu ton nyabuk. Buku Mazmur noutamak Daud sekuk yupu ara, ani.

‘El ululak sik nirya batakuka binamake. Tonoknye babye, el ululak kum unamlume.’ (Mazmur 69:25)

‘El dolamuk pil pununa ati, yuknye birye dolbinamle.’ (Mazmur 109:8)

Peterus arye nyabuk.

21-22Nyabukura, ayupu ton nyabuk. “Aning ati ara, kum batakdongopnamabe. Dipkoprop tonoknye wipdeipnuyabe. Ara, Yohanes arye deiyok koubuka mek dongolamuk talak arye Yesus ap, nun ap, neika upnin yangalamupa ani, Yesus im deice welebuk talak babye, neika ulamubu nang, anang kan-kan anyuk tonoknye wipdeipnuyabe. Ara, anang kan-kan bukni, tonoknye akunum wibibyopura, el ap, nun nirya ap, arye yuk nang ati, ‘Yesus akunum kam bukmale,’ nyalbinamabe. Ara, Yesus ap, neika ulamubu talak, anirya nun asing arye elilamubu ati, ‘Yesus akunum deiamuk bukni, tamubuka kam tuba bukuke,’ nyabuka laka nyalbinamabe.” Peterus arye awekmek nang yupa dumbarye ubuka keprop nakupdikin nang (120) nang ati nyabuk.

23Nyabukura, sik nirya arye, Allah arye wipdeipnamlanye bira, ‘Anye do, anye do?’ tenen, ninye bitinye nang sik si sibik. Abitinye nang si sibik. Tonoknye el siuk winilye si nyalamiknye ara, Yusuf Barsabas, ton Yustus nyalamiknye si sibik. Ton, tonoknye Matias si sibik. 24Si akunum si sibikopura, Allah morobikce ayupu nyabik. “Naio, anda nun talima noutamak tenenyap ning nirya ara, an kele ati ara, abitinye nang bukni, Yudas el pil dolamukak pununa ati, ‘Anye Yesus yupu dopdoplirye, peteren piluk donamle’ tenen, akunum wipdeiplumnye bira, lakak wipdeipsilyame.

25Yudas apil dolamuk bukni, malye winibuka ati, apil batakuka el wenena ati malyeto wenen ak binmale,” nyabik. Ara, ‘Allah arye ninye wenen ak malye ak bita deipnamimilca,’ tenebik akarye, nyabik 26Allah akunum morobikura, mitik keil telen arye doprobikce, anang bitinye, sik si sekdeibikce, makau pum bisik dongobuka singnipdongobuka, amakau lorom-lorom anmekbuk, keil duk minopce sakuk ninguk dobuka, dipdeyikbuk, Matias si upmoka eibikce, eluk wipdeibik. Wibdeibikopura, el ap, Yesus wipdeiamuk nang, sik 11 Rasul nang ap, tabakuka deiyok koubikce, adiparyuk deiyok koubuka, pil dopnin balamik.

Currently Selected:

Rasul 1: EIPA

Highlight

Copy