Kejadian 34

1Ura, Yakub ap, el mapu silip ap nirya, anyakauk daunmeka ani, Lea ap, Yakub ap arye deiamrik kilmu, el si ara, Dina birye, amutuku noutam ulamik kilapu ap, neika mana ati dilbiyuk. 2Biyukura, Hewi mutukunye bukni, amutuku taleamuknye el si ara, Hemor, elce deibuk mi el si ara, Sikem birye, Dina eibukce, ubula dobuka, neika maprik. 3Ubula dobuka neika maprik bukni, akil ati kanye deibukba, Yakub el kilmu Dina biti, kanye deibukce, akil ati nimalya arye, teleb yupu nyapdeibuk. 4Winibukopura, Sikem birye el li koproba Hemor biti nyabuk. “Kume, na nio, ‘Akil doptinye’ tenen, pia ‘Se’ tenenuna anya arye, morolbinilyame,” nyabuk.

5Yuk nang arye, Yakub biti nyabik, “Tonoknye birye, an kilmu ubula dobuka neika mapmarake,” nyabuka, laka nyabik talak ara, elce delilamuk mapu nirya ara, domba el talilamuk ning weina ati, bai mutuku tuba unmeka anya arye, Yakub birye utenebuk. ‘Kume, na mapu ara, bai tam arye tamubuka, aik kum yanmace talak ara, talye urdem namin kipnirye, dinauk unmanye buk,’ tenebuk. “Sik yacebuke,” nyabuk. 6Atalak ara, Sikem el li koproba Hemor birye, ‘Yakub ap yupu talipnamanam’ tenen, Yakub dam yayuk.

7Yayukopura, yuk nang arye, Yakub el mapu ati, asum arye Sikem birye, malye winipmok ning laka nyabikba, kekebikce lukdanuka, yu weik ubuk. Ara, talye ati kum bukni, Sikem birye, Yakub el kilmu dobuka, ubula neika mapmarik deice arye, alye una ap, pia ninye kum winipmanto ning, akunum winibuka ati, malye kanye bobuka, yu weik ubuk.

8Winibuka daunmek bukni, Hemor birye, Yakub biti nyabuk. “Na mi Sikem bira, an kilmu Dina biti, kanye akunum deibuka anya arye, ‘An kilmu na arepnutume’ tenen, moropmakine. 9Anggun kilmapu ara, nun mapu dona ati, arepsutume. Aning atonun, nun kilmapu ara, anggun mapu dona ati, arenamsiyabe,” nyabuka morobuk. “Kilapu ap, sal ap dolanauk wininamabe,” nyabuka morobuk. 10Nyabukopura, ayupu ton nyabuk. “Nun unyap mutuku noutam nirya ara, nun ap, anggun ap, neika una ap, dekna ap, pil dona ap, nirya ara, teleb uka. Neika ubibiba, anggun patasilye ning ara, dekenamlume. Aning babye teleb uka,” nyabuk.

11Nyabukura, el mi Sikem birye, Dina el li Yakub ap, el kwit capu nirya ati nyabuk. “Anggunce nati, kanye deipnutum toura, anggunce moropnutumopura, aning nirya urdem arenamsitinye. 12Kil tappua ap, anggun si erena ati, urdem arena ning ap ara, anggun tenepmunye touk, weik arye moropnutuma babye, teleb uka. Anggunce nyapnutum touk, aning ara arenamsine. Bukni, tonok ninguk ara, moropsine. ‘Akil arepnutumba doptinye’ tenen, moropsine.” Sikem birye, Yakub ap, el mapu ap ati, nyabuka morobuk.

13Nyabuka morobuk bukni, Sikem birye, sik makal kil ubula dobuka neika mapmarik ati ara, Yakub el mapu arye, Sikem ap, el li koproba Hemor ap ati, tenepce kunusa dobuka, tilila yupu nyabik. 14Sikda nyabik. “Se, ‘Akil arepnuse,’ nyanmasilama ara, kum winiptibye. Deiyok ara, anda den bam bol mouse ning kum sekik ati ara, nun makal kil kum doptume. Antonye birye, nun makal kil doptumopura, nun alye upsutue.

15Bukni, ance moropmasilam ning ara, nun tenepye ning winiptumopura, ‘Telebe,’ nyabuka, akil arepkitibye. Kumopura, kume. Nun tenepye ning ara, ani. Nunda den bam bol mouse ning sekesinyaka atonun, an ap, anggun tam kam nang nirya ap, seksitingopura, anggunda nun wininyaba atonun winitumopura, nun makal kil arepkitibye.

16Tonda, anyapmap touk winipmunyopura, nun nirya arye, anggun tam kilapu donamabe. Aning atonun, anggunce nun tam kilapu donamlume. Kil talye dolanauk unamabe. Winibuka daulamibirye, anggun umunya noutamakuk, aik dobuka unamabe. Neika ubirye, tonok yala nang atonun unamabe. 17Nunce nyanmap touk, ‘Den bam bol mouse ning sekna telebe’ tenen, sekmunyopura, teleb uka. Kumopura, nunce nun makal kil tuba tamubuka doprakuka binamabe,” nyabuka, tenepce arye nyapbik.

18Ura, Yakub el mapu arye nyanmek yupu kekenmekce, Hemor ap, el mi Sikem ap arye, ‘Anyapmasiyak yupu ara, teleb uka,’ tenebik. 19Hemor, el aik unmek nang, weik ton aulamik bukni, sik nirya arye Sikem biti, ‘Elda weik mambule,’ tenelamik. Sikem birye, Yakub el kilmu Dina biti, kanye weik deiamuka anya arye, sik anang arye nyanmek yupu kekebukce, ‘Aning ara, yuk talak kume, adiparyuk winipnune’ tenebuk.

20Aning ati ara, Hemor ap, elce deiamuk mi Sikem ap, ‘Nun tam nang ap, yupu talilbinuyap’ tenen, sik asik dolamik dana-dana tam, poka bublan dam birik. 21Birikura, awekmek nang ati nyaprik. “Anang arye, nun amutuku unyap nang ati, kanye deibuka telebuk tenesinyake. Ati nun nirya arye, ‘Telebe,’ nyabipyopura, sik anang arye, nun mutuku noutam neika una ap, pil dona ap, dekna ap nirya ara, neika wininamsiyaka ara, teleb uka. Nun mutuku ara, pala weik mutuku anya arye, lo weik aupsile. Nunce sik tam kilapu doptibye. Sikce nun tam kilapu doptinge. Winibuka, talye dolanauk unamabe.

22Bukni, sikce, ‘Aninguk winipnamlulume,’ nyapdeipmasiyak ninguk winibipyopura, nun nirya arye, tonok yala nang atonun kibuka, neika unamabe. Sikce nyapmasiyak ning kum winibipyopura, teleb kibuka, neika kum uptibye. Ara, sikce den bam bol mouse ning seklamak touk winibipyopura, teleb kibuka, neika akuk uptibye.”

23“Ura, anggun nirya tenipdelulume. Sik talikirye weinyak ning ap, sik tuku ap, wa ap nirya ara, aminyan talak, nun ninguk kipnamabe. Talya ati kum nyapmaname. Nun nirya arye, sik nyapmasiyak yupu ati, ‘Telebe,’ nyapmaso. Winibipyopura, nun noutamak talye unamake,” nyabuka laka nyaprik. 24Nyaprikba, anyasik domik mutuku ulamik nang nirya, poka bublan noutam bai binmek nang nirya arye, Hemor ap, Sikem ap nyaprik yupu ati, “Telebe winipnuyabe,” nyabik. Nyabika ati ara, amutuku noutam ulamik nang nirya ara, sik den bol mouse ning sekik.

25Sekikce, daunmek bukni, like winilye sum akunum ubukba, uk weik tuba dinmok talak ara, Yakub el mapu bitinye sik si ara, Simeon ap, Lewi ap, sik parang ya dobukaprikce, amutuku unmek nang olbirik. Amutuku nang talye mangkau kanye bobuka, abukmek talak ara, Dina el du yapu bitinye arye, amutuku ulamik nang nirya oploprik. 26Opra banmarika ani, Hemor ap, el mi Sikem ap oprikce, sik aik pum bisik danirye, sik makal kil Dina boprakuka, amutuku batakuka, biyik.

27Ura, sik makal kil Dina bira, amutuku asik noutamak, Sikem birye, ubula dobuka, neika mapmarik ati, amutuku nang du nang nirya oploprikopura, Yakub el mapu nirya arye, amutuku ninye taleamik ning nirya, dalubuka doprobik. 28Ara, sik domba nirya ap, sik sapi nirya ap, sik keledai nirya ap, sik aik delilamik ning ap, bai tam weilamik ning ap, koulamik ning ap, aning-aning nirya ubula dolonmek.

29Winibuka dololamikce, amutuku kilapu nirya ap, amutuku mapu nirya ap, sik dekna weik ning ayala-yala nirya ap, sik aik pum delilamik ning nirya ap dolonmek. 30Wininmeka ati, Yakub birye Simeon ap, Lewi ap ati nyabuk. “Se, anggun bitinye arye, malye winipmaruma deice arye, amutuku noutamak unyak ninye, sik Kanaan tam ninye nirya ap, sik Peres tam unyak ninye nirya ap arye, nati ara, ‘Tong welelamle ning atonun kipdeipniyake. Nun like,’ tenepnikirye, ‘Nun like,’ nyanamniyake. Ati, na nong deice ikin ning weik deipmanurume. Nun yala ninye ara, mitik anunuk unyap bukni, sikda pia weik unyaka anya arye, sik nirya bulubuka, neika olyasicopura, na ap, na mapu silip nirya ap, obuka malye kipsitinge,” nyabuka wenebuk.

31Yakub birye nyabukba, sik bitinye arye nyaprik. “Ayupu nyapsilam bukni, Sikem birye, nun makal kil ubula dobuka, neika mapmarak ning ati ara, ‘Aning ara, mambul kume. Nun makal kil ara, talye nang arye, yo bok dekuka talye nang arye, yopra balamakto kil atonun ulula anya arye, dauaplye’ tenen, ‘Mangkau arye, awinipmak’ tenen, talye bataktinimnye toura, teleb do?” nyaprik.

Currently Selected:

Kejadian 34: EIPA

Highlight

Copy