Kejadian 35

1Aminyan talak ara, Allah arye, Yakub ati nyabuk. “Anda amutuku batakuka, Betel mutuku binuka unamlyame. Betel mutuku biminyopura, na si erena ati, keil pala dobuka, keil duk yangabuka deipmince, nati kam ning obuka, arenamnilyame. Ance, ‘Na du koproba Esau opnilyak do?’ tenen, bikbik abuka, bisik balalum talak ara, narye an dam yanuka panabuka tikilyasiba, eipnulume. Na si erena ati, pala keil yangap deipnamnilyame.” Allah arye, Yakub biti nyabuk.

2Nyabuka ati, Yakub birye, el mapu ap, kilapu nirya ap, el neika ulamik ninye nirya ap ati, nyabuk. “Anggunce talilulum isa si erena ap, malye winin ning nirya ap, batakmunce, diksukumuk unamlulume. Tonda, wini talak ongopmalum baju, kwiriplobuka winiryuk ninguk ongoplulume. 3Anyapmasin touk, akunum winipmunyopura, na ap Betel mutuku bibirye, Allah el si erena ati, keil pala dobuka yangapdeipnirye, kam ning obuka elti, arepnamne. Allah ara, na kanye imun wamnuk talak nirya, morolamsiba, kekebuka meliamnuke. Tonda, yata mutuku do nirya, na balamsirye ulamse mutuku nirya, el ap neika balamnumuba, melilamnuke.” Yakub birye, el aik ninye nirya ati, nyabuk.

4Yakub birye nyabuka ati ara, el mapu silip nirya, sik yuk mutuku ninye arye arebikba, isa si eren ning taleamik ning ap, isa mer si erena ati, sik amul pum potokuka dongolamik ning cincin ap, Yakub arebikba, dobuka Sikem mutuku noutamak, weik yo amu tam tuku palibuka sinipdongobuk. 5Winibukopura, sik nirya ara, bisik banmek. Bisik banmek noutam ara, Allah arye, amutuku dana-dana tam ulamik ninye ati, ilil una deiyok ning arebukba, Yakub el mapu silip nirya ati, ilil ubukba, tonoknye babye, sik aminyan kum dobolbiyik.

6Yakub el ap banmek ninye nirya, Kanaan noutam bukni, mutuku si Lus mutuku biyik. Amutuku ara, si bitinye nyalamika anya arye, Betel mutuku ton nyalamik. 7Sik nirya, Betel mutuku biyikopura, Yakub birye, Allah el si erena ap, arena ap ati, keil pala dobuka yangapdeibuk. Ura, amutuku ara, minop talak Yakub birye, ‘Na du koproba Esau birye, opnilyak’ tenen, bikbik abuka biyuk talak ara, Allah arye, Betel mutuku noutam panabuka tikukce, yupu nyapdeibukba, Yakub kekebuka anya arye, Yakub birye amutuku si ara, El-Betel nyabuka si dobuk. 8Anoutam talak ara, Ribka el melin kil, Debora dibukba, el nong bobuka, Betel mutuku bukni, asukum tikamuk yo amu tam, tuku palibuka weibikce, engebike. Engebika ati, ayo si ara, Allen-Bacut nyabuka, si dobuk.

9Ura, Yakub bira, Padan-Aram mutuku batakuka, Kanaan mutuku noutam tamubuka biyukopura, Allah arye, el dam panabuka tikukce, teleb yupu nyapdeibuk. 10Allah arye Yakub biti, nyabuk. “An si ara, Yakub nyakinyak bukni, wini talak ara, Yakub tuba kum nyanamkiyake. Asi batakuka, winiryuk si Israel nyabuka, si nyanamkiyake,” nyabuka, Allah arye, Yakub el winiryuk si ara, Israel nyabuka sisibuk. 11Tonda Allah arye, Israel biti nyabuk. “Nara aning-aning nirya ara, deice tam unirye, malye kinanye unune. Na mikip ara, pia weike. Ance mapu weik deipra balaminya ani, an yala nang weik, upnin banamake. Ance deipminyeba, dadeipdanin balamica ani, deibikiba, unamak ninye ara, ayala-ayala weik upnin banamake. Tonda, an yala ninye noutamak arye, ninye deiyok nang ton tikikirye unamake. 12-13An apu yapu Abraham ap, Isak ap ati, areamse mutuku nirya ara, anti arepnamkine. Aning atonun, ance deipminyeba, dadeipdanin balamikca ani, dounamak ninye babye, amutuku nirya arepneba, talibuka unamake,” Allah arye, Yakub biti nyabuk. Allah arye, ayupu nyabukura, amutuku tamubuka, im deice welebuk. 14-15Welebuka biyukba, Yakub birye, weik cang keil dobuka deibukce, dinmek anggur ap, minyak ap, akeil deice dikeibuk. Ara, sik yupu talipmareka ani, Allah el si erena ati, aning dikeibuk. Dikeibukce, el Yakub ap, Allah ap, yupu talipdarik mutuku si ati ara, Betel mutuku nyabuka sisibuk.

16Ura, aminyan talak, Betel mutuku ton batakikce, bisik banmek. Bisik banmeka ani, Efrata, mutuku min kum binmek bukni, bisik noutamak ara, Rahel mi deiya deiyok koubuka, uk dinmokba donmokce, ‘Mi deipnun’ tenen, piripdeyuk bukni, ikin weik ubuk. 17‘Mi deipnun’ tenen, pirinmoka ani, ikin unmok talak ara, el mi delina melin kil arye, nyabuk. “Anda ilil una meme. Mi tonok akunum deipmalame,” nyabuk. 18Uk dinmokba, donmoka ani, dipmanto ubukce, isin dakropmanto ubuk talak ara, winiryuk deipmok mi, el si ara, Ben-Oni nyabuka, sisibuk. Sisibukce, adiparyuk dibuk. Akil arye, asi nyapdeipmok bukni, ami el li koprop arye, “Kume, el si ara, Benyamin nyanamabe,” nyabuka sisibuk.

19Rahel bira, Efrata mutuku bana ati, bisik noutamak banmek talak dibukba, tuku palibik. Efrata mutuku ara, amutuku si bitinye ara, Betlehem ton nyalamik. 20Rahel akunum tuku palibuka weibik deice ara, Yakub cang keil dobukabukce, tikeibuk. Acang keil tikeibuk ning ara, tuba eilinyabe. Ara, Rahel tuku lukik sukumak aubuke. 21Israel bira, (ara Yakub biti nyalamik) amutuku batakuka, bisik banmeka ani, mutuku si Migdal-Eder mutuku kirikuka, mitik anun otam binuka ulamik. 22Israel ap, el mapu silip ap, amutuku noutamak ulamik talak ara, el mi Ruben birye, el li domuk kil ton, el si ara Bila, duknubuka ubula yobuk. Winibukba, yuk nang arye kekebuka, laka nyabikopura, Israel kekebukce, malye kanye bobuk.

23Ura, Yakub birye delilamuk mapu ara, 12 nang ulamik. Yakub ap, Lea ap arye, delilamrik nang ara, sik si ani. Min yuma ara, Ruben deiprikce, aminyan talak Simeon ap, Lewi ap, Yehuda ap, Isakar ap, Zebulon ap, deiamrik. 24Yakub ap, Rahel ap arye, delilamrik mapu, sik si ara ani. Yusup ap, Benyamin ap, deiprik. 25Tonda, Rahel el melin kil ap, Yakub ap arye, deiprik nang, sik si ara ani. Dan ap, Naftali ap deiprik. 26Tonda Yakub ap, Lea el melin kil, el si ara, Silpa ap arye, deiprik nang sik si ara, Kat ap, Aser ap, deiprik. Aninye si nirya ara, Yakub Padan-Aram mutuku noutamak ulamuk talak arye, delilamuk.

27Yakub bira, Migdal-Eder mutuku batakuka, tuba tamubuka, el li dam biyuk. Ara, Mamre mutuku bukni, yuk mutuku si, Kiriat Arba dam binuka ulamuk. (Amutuku tonok bukni, mutuku si ton Hebron mutuku nyanyake.) Amutuku ara, el apu Abraham ap, el li Isak ap, ulamdik mutuku. 28Isak bira, keting tamun yupa weik, 180 tahun deice arye ulamuk. 29Daulamuka ani, sirya talak ara, dibukce, isin dakrobukba, el mapu Esau ap, Yakub ap arye, tuku lukuka, sik ni el nong weiprik. Isak dibuk talak ara, akunum pia wisi dayukce dibuk.

Currently Selected:

Kejadian 35: EIPA

Highlight

Copy