Kejadian 33

1Yakub bisik banmoka ani, bisik noutamak binuka dinmokba, Esau ap, el yin talin nang yupa weik, 400 nang ap yanganmekba, eibuk. Mitik pera tonun arye, eibuka anya arye, el mapu nirya bokukabukce, ton mapu ara, Lea tam bokdeibuk, ton mapu ara, Rahel tam bokdeibuk, tonda yuk mapu ara, el kilapu koprop, sik melin kilapu ara, bitinye kibuka bokdeibuk. 2‘Narye yuk-yuk bokdeipne touk binuyake’ tenebukce, sik melin kilapu ap, sikce bobirik mapu ap, minopce dopreibuk. Sik aminyan tam ara, Lea ap, el mapu ap dopdeibuk. Sirya ara, Rahel ap, Yosep ap dopdeibukba, birik. 3El Yakub bira, bisik minop menekuka banmok bukni, el mapu silip nirya ara, aminyan tam dobolbanmeka ani, el du koproba Esau unmok dam yayuk. Yayukce, el si erena ati, el nong kanupdongobukce, like tek barye kibuk.

4Yakub birye winipmok bukni, Esau birye, el weit koproba Yakub eibukce, bikbik abuka yayuk. Yayukce epdarikura, Esau birye, Yakub biti iribukce, mutubuk. Kipdarikce, sik bitinye nang engepdarik. 5Winiprikba, Esau el urasin erebuka dinmokba, Yakub el kilapu ap, el mapu ap, yanganmekak eibukce, asipdeyuk. “Weito, an ap aminyan tam yanganmak ninye ara, yata asik nang do?” nyabuka asipdeyuk. Asipdeyukura, Yakub birye, “Kume, Allah el kanye aryuk, bico tenebuka meilyamnukba, deipse mapu ara, atia,” nyabuk. 6Nyabukura, Yakub el melin kilapu ap, sik mapu ap, Esau dam yayikce, el si erena ati sik nong kanupdongobikce elti, kibik. 7Winibikbuk, aminyan talak ara, Lea ap, el mapu ap yayikce, Esau el si erena ati, sik nong kanupdongobikce, elti kibik. Sirya ara, Yusup ap, Rahel ap, yarikce si erena ati, sik nong kanupdongoprikce, elti kiprik.

8Winiprikba, Esau birye, Yakub biti asipdeyuk. “Weito, sapi basam ap, domba basam ap, keledai basam ap, yupa weika arye boyanganmalama ara, yata deiyok ati do?” nyabuka asipdeyukura, Yakub birye, “Kume, anda na deiyoknye atonun ulama ati, narye anti arepkineba, na kanye deipnamanilam ati boyakine,” nyabuk. 9Nyabuk bukni, Esau birye “Kume, na weito. Nara aning-aning nirya, weik akunum talinune anya arye, an talilyam ning ara, an ning uka. Na kume,” nyabuk. 10Esau nyabukba, Yakub birye tamubuka nyabuk. “Kume, na du koproba, ance nati kanye deipniminyopura, na kintinipmakin ning doproplyame. Anyapmakina ara, urdem ati kum nyapkine. Deiyok ara, ance nati kanye deibuka telebe nyapniminba, na babye weik arye kanye deipnamkine. An urasin eipkina arye, kanye deipnamkina ara, Allah el urasin eipnamtinye touk, na du anda nati, teleb kipdeipmanilamak eipmakine,” nyabuk. 11“Nun ni Allah bico tenyamnukce, weika arye meliamnukba, aning-aning weik talinune. Na 'Se,' tenenye ning nirya aupmanila anya arye, anti, ‘Arepnamakine’ tenen, boyanmakin ning ara, talye mangkau asa arye doproplyame,” nyabuk. Yakub birye, Esau biti mikip arye, “Doproplyame,” nyabuka, weika arye nyanmoka ati, Esau arye aning-aning nirya doprobuk. 12Dopropce nyabuk. “Wini talak ara, nun nirya neika binuyabe. An ap, na ap, neika bisik binuyabe,” nyabuk.

13Nyabuk bukni, Yakub birye nyabuk. “Kume, na du koproba, anda na deiyoknye atonun ulyame. An kele. Na mapu nirya ara, sik mikip kum anya arye, nimalya aryuk banyake. Tonda, kil domba ap, yim sapi ap, sik mapu ati moum tuba dininmaka anya arye, sikti moubuka kaliknirye, aminyan nimalya aryuk, bisik mapnin yanganamne. ‘Mikip arye binyopura, like tonok sum arye dibicak’ tenen, nyapne. 14Ati aning ara, anda na deiyoknye atonun ulama ati, anda menekuka banmaminye buk, na ap, na weinun ning ap, aminyan tam yanamabe. Na weinun ning ap, na mapu ap, nimalyap banmace touk, na babye nimalya arye yanganamne. Yanganmanya ani, aminyan ara, an dam Seir mutuku yanamabe,” nyabuk. 15Nyabukura, Esau arye nyabuk. “Ati, na melina nang dopreipkineba, anggun ap yanamalulume,” nyabuk bukni, Yakub birye tamubuka nyabuk. “Kume, na du koproba, anda na deiyoknye atonun ulyame. An mapu silip dolina ara, malye kilina anya arye, teleb ning ara, ance nati, kanye deipmanilama ara, akunuma. Yuk ning ton kum patapmasile,” nyabuk.

16Yakub birye, nyabukaura, asum aryuk Esau tamubuka, ‘Seir mutuku binaman’ tenen, deiyok koubuka bisik banmok. 17Bukni Yakub bira, Sukot mutuku biyuk. Sukot mutuku biyukopura, el aik ap, el weilamuk ning, sik aik ap dobuk. Aik yuk-yuk nirya, bai aik dobuka ati, amutuku si ara, Sukot mutuku nyanyake. 18Yakub bira, Mesopotamia mutuku batakuka, bisik balamika ani, Kanaan tam noutamak bukni, mutuku si ara, Sikem mutuku dam yanuka, el cang kain tenda aik, tia aik ara, asukumuk dopdeibuk. El aik dopdeibuka anya arye, Sikem mutuku asukumuk aik dobuka aulamik.

19Asukumuk ulamuka ani, aminyan talak ara, el tenda aik domuk sukum tuku ara, dekuk. Ara, dekna weik ning, el si ara perak, yupa weik 100 deice, Hemor el mapu ati arebukce, atuku dekuka doprobuk. Hemor bira, el mi tonok ton, el si ara, Sikem deiamuk. 20Yakub birye, el tenda aik dopdeibuk mutuku ara, pala keil arye dobukce, keil duk yangapdeibuka, Allah el si erena ati, kam ning obuka delinak mesba kintinibukura, obuka delilamuk. Atuku ati el si ara, El Elohe Israel nyabuka sisibuk.#33:20 El Elohe Ibrani yupu deice ara, El Elohe Israel ninye nyabuka deiyok ara, ‘Israel ninye arye si erenyak Allah ara, el mikip pia weik ulule’ tenen, ayupu nyalamik.

Currently Selected:

Kejadian 33: EIPA

Highlight

Copy