Kejadian 32

1Ura, Yakub babye, ‘Na ni asik, Kanaan mutuku binun’ tenen, bisik banmok. Bisik banmok talak ara, Allah el im deice pil don nang malaikat ara, bisik noutamak epdayik. 2Epdayikura, Yakub eibukce, “Se, amutuku ara, Allah el tia ulyak atia,” nyabukce, amutuku si ati, Mahanaim mutuku nyabuka sisibuk. 3Yakub el du koproba Esau bira, atalak Edom mutuku bukni, mutuku si ara, Seir mutuku ulamuk. 4Seir mutuku ulamuka anya arye, Yakub birye ninye ton wibuka dodeibukba, anang arye, el du koproba Esau dam laka nyalbiyik. Yakub birye, sik yupu laka nyalbinamik nang ak, “Na du koproba, na deiyoknye Esau biti, winibuka-winibuka nyapnamlulume,” nyapdeibuk yupu ara, ani. “Na du koproba, nara an amu tamnye unune. Anoutamak nirya ara, Laban ap neika ulamnume ani, wini talak ara, el mutuku batakuka yanganmane.

5Wini talak ara, narye talinun ning, yala-yala weik ulule. Ara, sapi basam ap, keledai basam ap, domba basam ap, kambing basam ap, weinune. Tonda, na pil melin nang ton, kilapu ton weik unyakba talinune. Bukni, winira, na deiyoknye atonun ulama ati, an dam yanganmana anya arye, ‘Ance nati kanye deipnutum’ tenen, ayupu nyapdeipmakine.” Yakub birye, ayupu nyapdeibukba, el wipdeipmok nang arye, Esau dam laka nyalbiyik.

6Binuka laka akunum nyabikce, Yakub dam tamubuka yayikopura, nyabik. “Nunda Esau dam laka nyapmap bukni, wini talak el ap, unyak nang yupa weik, 400 nang arye, ‘Yakub bisik dipnuyap’ tenen, bisik yanganmake,” nyabik. 7Nyabikopura, Yakub kekebukce, ilil pia weik ubukba, mambul kanye weik bobuka unmok. Wininmoka ati, el ap neika unmek ninye nirya noutamak, bokukabukce, ninye yupa bitinye deibuk. Aning atonun, el weilamuk ning, boyanganmok kam ning, ayala-yala nirya ap, unta basam ap, noutam bokuka, bitinye deibuk.

8Winibuka deiyok ara, ani. Ara, Yakub bira, ‘Esau birye olyanilyopura, tonok yupa ara, opnamake. Bukni ton yupa ara, bai sakuka bikbik abuka bindopnamake,’ tenebuk. 9Utenebukce, ‘Allah melipnutu’ tenen, Allah ati morobuk. Elce morobuk yupu ara, ani. “Se, na ni Allah, na apu yapu Abraham ap, Isak ap, an siuk erebuka, si erelamkirik Allah ulyame. Na nie, anda Yahweh arye nyapnulume, ‘An mutuku koproba tamubuka biminyopura, an yala nang ap neika unamlume. Winipminyopura, narye melikiniba, telebuk unalame,’ nyapnulume.

10Na nie, nara mambul kum, malye ninguk wininuna anya arye, ance bico tenyamnulumce, weika arye meliamnulum ning ap, tonda ance, ‘Winipnamkine,’ nyapdeipnulum touk, batakna kum, pia tuba pil melibuka dolamnulum ning ara, kum doproptinye bukni, urdemuk arenilyame. Minop talak amek koubuka, otam mutuku binamse talak ara, na kamauk taleamse bukni, wini talak ara, aning-aning weik upmanilba, bokuka yupa bitinye kipdeipmane.

11‘Na du koproba Esau birye, yanuka opnilyak’ tenen, tonda, ‘Na kilapu ap, sikce deiamrik mapu ap, Esau birye oploplyak’ tenen, na ilil weik upmanile. 12Ilil upmanil bukni, ance nyapnulume. “Na dipkoprob nyapkine. Weik arye melipkinyebuk, an unalam ning nirya ara, telebuk winipdeipnamkine. Tonda, narye melipkinibuk, ance deipminba, dadeipdanin banamak ninye ara, weik laut kup-kup keil wininga nukmanto kum ulamle touk, an yala nang babye atonun unamake. Nyapnuluma anya arye, anti moropmakine.” Yakub birye, Allah ati nyabuka morobuk.

13Morobukce, asukumuk el ap, el neika banmek ninye ap, mapmek. Mapmika, berekukopura, el bisik boyanmok ning noutamak arye, ‘Teleb ning ara, na du koproba Esau biti, urdem arepnaman’ tenen, wibuka kintinibuk. 14Yakub birye wipdeibuk ning ara, ani. Kil kambing ara, yupa weik 200 kintinibuk. Yim kambing ara, 20 wibuka kintinibuk. Aning atonun domba ara, kil domba 200 ap, yim domba 20 ap, kintinibuk.

15Tonda, unta kil basam ap, sik mapu ap, kil sapi 40 ap, yim sapi 10 ap, keledai kil basam 20 ap, yim keledai 10 ap, aning-aning nirya, ‘Esau el kanye teleb kina ati, urdem arepnaman’ tenen, kintinibuk. 16Winibukce, el melin nang ati nyabuk. “Angguncuk akam ulye ning, yala yuk-yuk aulye touk kintiniplulume. Anggunce min menekuka banmamunyebuk, na ap, na mapu silip ap, nun aminyan tam yanganamabe. Tonda, kam ulye ning ton yupa weik arye, menekuka banmakibuk, noutamak ara, lo batakuka, ton yupa ara, aminyan banamake. Atonun kibuka yuk-yuk bokuka banamalulume,” nyabuk.

17Yakub birye nyabukce, min menekuka banamoknye biti nyabuk. “Menekuka dabanmaminyeba, na du koproba Esau ap, bisik noutamak epdarumunyopura, elce, ‘Anggunda, yata deiyoknye birye talisiliba, ululum do? Tonda, akam ulye ning, anggun urasin tam menekuka boyanganmaluma ara, yatanye talilul ning do?’ nyabuka asipdesilyopura, anggunce nyapnamalulume. 18‘Kume, an amu tam atonye Yakub, el ninguk ulule. Bukni, anda el deiyoknye atonun ulama ati, elce anti, aning nirya urdem arepmakile. El Yakub bira, nun aminyan tam tuba yanganmale.’ Ayupu nyapnamlyame,” Yakub birye minopce binamoknye biti nyabuk.

19Yakub birye ayupu nyabuk touk, sik ding bitinye binamek nang ap, winilye ding binamek nang ap, tonda kam ulye ning, aminyan tam binamek nang ap nirya ati, “Ayupu uk nyapnamalulume,” nyabuk. 20“Tonda, anggun babye luba kilongona meme. ‘Esau an amu tam atonun ululnye, nun aminyan tam tuba yanganmale,’ nyapnamalulume.” Yakub birye, el pil melin nang ati nyapdeibuk. Yakub birye nyabuka, ‘Nyapnamlulume,’ nyapmok yupu nirya ara, deiyok ton aubuke.

Ara, elce, ‘Esau biti, aning-aning weik urdem arepnaman ning, minopce eiplyopura, nati kanye deipnamnile. Na aminyan talak yanyopura, eipnilirye, ‘Teleb uka,’ tenebuka, teleb kibuka taruk talepnamanile. Aning nirya ara, el kanye namin kina ati,’ Yakub birye tenebuk.

21Winibuka tenepce, Esau biti arepnamuk ning, menekuka dopdeipmokba, bobinmek bukni, elda, amutuku asukumuk mapmok. 22Alukunyan noutamak ara, Yakub bukukabukce, el kilapu bitinye ap, el melina kil bitinye ap, el mapu 11 nang ap, bisik deiyok koubuka banmeka ani, mek si Jabok mek koubuka otam biyik. 23Sik biyik talak ara, winibuk. Yakub birye, el mapu silip nirya dopdeipmokba, sik nirya arye, Jabok mek koubuka otam biyik buk, el libuka bisik boyanganmok ning, ayala-yala nirya ton, dopdeipmokba, sikce mek koubuka kup-kup otam bobiyik.

24Aninye nirya, mek koubuka otam akunum bindopmek bukni, Yakub el tonok aunmok. El yuk unmokba, tonoknye ton yayukce, Yakub biti mikip arye talipmokba, sik bitinye arye, talepkwinkwinikdarik. Apia talibuka pirilanmarika ani, beren tam kibuk.

25Beren tam kibukba, ayanmok malaikat arye, ‘E, narye, Yakub biti, malye kibuka kum kiptinye’ tenen, bikmokce, bikmoka anya arye, Yakub el keil yok dukulongonak talipnurupmok arye, el yok kotoklobukba, uk weik dibuk. 26Sik bitinye arye, pia talepkwinik-kwinik winikdarika ani, bereknamoka, akunum dam kibukopura, ayanmoknye malaikat birye nyabuk. “Winira, na batakdongopnilyame. Keting akunum purupnamala atia,” nyabuk. Nyabukba morobukba, Yakub birye tamubuka nyabuk. “Kume, na kum batakdongopnamakine. Na nio ance nati, ‘Allah arye weik ning melipnamkil’ tenen, teleb yupu nyapnutumba, kekeptinyopura, bataknamakine. Ayupu kum nyapniminyeura, kum bataknamakine,” nyabuk.

27Nyabukura, amalaikat arye asipdeyuk. “An si ara, yatanye do?” nyabuka asibukba, “Na si ara, Yakub,” nyabuk. 28Nyabukura, malaikat arye, Yakub biti nyabuk. “Wini talak ara, winiryuk si arepnukine. Wini talak arye dipdongobuka, doryanamle talak ara, an si ati ‘Israel,’#32:28 Israel Ibrani yupu deice arye, ‘Israel’ nyanyaka ara, el deiyok ara, ‘Anye bira, Allah ap, pia pi dobuka piripdeyuk’ tenen, nyanyake. nyanamkiake. Deiyok ara, ance Allah ap, yuk ning ap ati, pia pi dobuka piripdenmalamce, an mikip arye akunum malye kibuka bisipmalama ati, an winiryuk si ara, ‘Israel’ arepmakina ati ara, dorunamle talak ara, asiuk nyanamkiake,” malaikat arye, Yakub biti nyabuk. 29Nyabukura, Yakub birye amalaikat ati, asipdeyuk. “Amio, an si ton laka nyapnilyame,” nyabuka morobuk. Morobuk buk, amalaikat arye, “Kume, anda yata deiyok ati, na si asipdenmanilam do? Lake kum nyapnukine,” nyabuk. Nyabukce, ‘Aminyan dorunamle talak nirya, Allah arye Yakub biti, teleb kibuka winipnamle’ tenen, Yakub deice teleb yupu nyapdeibuk.

30Malaikat arye, Yakub biti, teleb yupu nyapdeibuka ati, Yakub birye amutuku si ati, ‘Peniel,’#32:30 Peniel Ibrani yupu deice arye, ‘Peniel’ nyanyaka ara, el deiyok ara, ‘Allah el urasin ani’ tenen, nyanyake. nyapdeibuk. Tonda ayupu nyabuk. Amutuku si ati, ‘Peniel,’ nyapmana deiyok ara, ani. Ara, na ni Allah el urasin mining dam eipmanubuk, kum oplopnuk ati ara, amutuku si, ‘Peniel,’ nyapne.

31Aning nirya akunum winibukura, berekuk ati, Peniel mutuku batakuka bisik banmok. Bisik banmok talak ara, el yan camdipdanin banmok. Deiyok ara, malaikat arye, Yakub el keil yok, yok dukulongolamlak, talepmok arye, kotoklobukba, uk weik dinmoka ati, atalak arye doryanamle talak nirya ara, pia camdipdanin balamok. 32Ati ara, Yakub birye deibukba, dadeipdanin banyak ninye nirya, sik Israel ninye nirya, kam ulamle ning obikirye, kalibuka dilamak talak ara, keil yok, yok dam ulul milmil ara, pia kum dinyake. Deiyok ara, amalaikat arye, Yakub el keil yok, yok dukulongolamlak talepmokba, kotoktalibuka ati, uk weik dibuka ati, minop talak arye dipdongobuka, wini talak ap, noutam nirya ap, ara Israel ninye domba do, kambing do, yata kam ulul ning do, obikirye kalibuka dinyak talak ara, keilyok yok dam ulul milmil, pia kum dinyake.

Currently Selected:

Kejadian 32: EIPA

Highlight

Copy