Kejadian 31

1Atalak ara, Laban el mapu arye nyalamik. “Kume, nun ni talilul ning noutamak danirya ara, Yakub birye ubula dololirye, bona weik talinanye kibuka ulule. Bukni, nun ni, el ning ubula dololula arye winilulule,” nyalamikba, Yakub kekebuk. 2Tonda, Yakub birye utenebuk. ‘Se, wini talak ara, Laban arye nati kanye yuk tenenulule. Lik tenepmanila arye do?’ tenebuk.

3Utenebuk ati, Allah el si Yahweh arye, Yakub biti nyabuk. “Wini talak ara tamupmince, an ni yapu taleamik mutuku ap, tonda an yala nang unyak mutuku binuka unamlyame. Winipminyopura, na ap neika unimirye melinamkine,” nyabuk. 4Nyabukura, Yakub kekebukce, el kilapu Rahel ap, Lea ap ati, ayupu nyapdeibuk. “Anggunda bai tam, narye domba ap, kambing ap, weinun mutuku yarurume,” nyapdeibukba, yarik.

5El dam yarikura, nyabuk. Kume, winira anggun ni koprop Laban arye nati, teleb tenebuka, kanya delilamnuk bukni, wini talak ara, elce nati, yu kanye bopnile. Malye kanye bobuka tenenmanilba, na ni Isak birye taleamuk Allah ara, tuba melinulule. 6Anggun kele, narye anggun ni Laban biti, pia pi deibuka, mikip weika arye pil dolamsirye, tuba pil donune.

7Wininun bukni, anggun ni koprop arye, like yupa weik, keting tamun 10 talak arye, ubula dolamnuke. Ara, elce, ‘Winibuka arenamkine,’ nyabuka nyalilamnuk bukni, tuba tamubuka tonap, aning batakuka, yuk ninguk teneplirye, min arye nyapdeiamnuk touk kum bukni, “Yuk ning ton arenamkine,” nyabuka, tenepce aryuk nyanulule.

Winilul bukni, Allah melilnilya deice arye Laban birye, malye ning weik kum winipnuke. 8Ura, Laban arye nati, “Winira an pil ati dengna ara, nun weinyap ning noutamak arye, botbotokna ning doptume,” nyapnuk talak ara, akam ning kil ning nirya arye, sik mapu botbotokna ninguk, delilamikba dopropsi. Ton talak ara, elce, “Winira kikipna ninguk doptume,” nyapnuk talak ara, akam weinyap ning, kil ning nirya arye, sik mapu ara, kikipna ninguk delilamikba, dopropsi. 9Allah meilyamnuk deice apil dololamsiba, anggun ni taleamuk kam un ning ara, nati areamnuke. Yakub birye, el kilapu ati nyabuk.

10Nyabukopura, ayupu ton nyabuk. Ura, nun weinyap ning burum kwaklamuk talak noutamak arye, lengdar deice mapmasiba, eibsi ning nyapnusine. Ara, sik yim kambing arye, kil lamaklalamamikak nirya, sik urasin ara, kikipna ning ap, botbotokna ning ap, unmekba eipse. 11Eipseura, Allah el im deice pil dolulnye, Malaikat arye, ‘Yakubo,’ nyabuka yukupnukura, narye, ‘Aunmane,’ nyapsiba, Allah arye nyapnuke.

12‘Dipdelyame. Ayim kambing arye, kil kambing lamakmakce ning nirya ara, sik urasin ara, kikipna ning ap, tonda botbotokna ning ap, ayala ninguk unmake. Ara, talye ati kume. Deiyok ara, Laban arye, malye-malye ukulul ning nirya ara, dib elinune. 13Nara yuknye kume. Betel mutuku epdanumu Allah, na uka. Ara, ance Betel mutuku noutam, na si erena ati, pala keil yangapdeiplumce, na si erebuka, nyalin yupu nyapnulume. Wini talak ara, aulyam mutuku batakuka, adiparyuk an mutuku koproba tamubuka binulyame, nyapkine.’ Allah arye nyapnuke. Yakub birye, el kilapu ati nyabuk.

14Nyabukura, Rahel ap, Lea ap arye nyapdik. “Kume, nun ni koproba dipliba, aminyan talak, el taleamlye ning bokelilamak ning ara, nun ton kum dopropnaname. Nun bitinye ati, diba kum tenesulule. 15Tonda elce nunti, ‘Sikda yuk mutuku kilapu, na yala kilapu kume,’ tenesulule. Ura, ance nunti dolona ara, akunum deksuke. Deksukce, nun pununa ati dolamuk ning nirya ara, akunum dibuk.

16Ati ara, nun kanye ara, ‘Yata ning do nirya, Allah arye, Laban el taleamuk ning noutamak dolamuk ning, an Yakub biti areamkuk ning nirya ara, an ap, nun ap, nunce deiamubu mapu ap ati, areamsuke. Ati ara, Allah arye nyapmakil touk, aninguk winipnulyame.’ ‘Nunda, teleb uka’, tenyame.” Rahel ap, Lea ap arye, Yakub biti nyapdik.

17Nyaprikba, Yakub birye el kilapu ap, el mapu ap nirya bobuka, unta basam balye tam deibukce, amutuku batakuka, bisik banmek. 18Elce taleamuk kam un ning, ayala-yala nirya, el urasin tam menekuka bayikura, elda aminyan tam yukuprobukba, banmok. Tonda, amutuku si Padan-Aram mutuku noutamak ulamuk talak dobuka, taleamuk ning ayala-yala nirya, libuka bobiyik. Bisik banmika ara, ‘Na ni Isak, Kanaan mutuku noutamak, el dam bindopnamap,’ tenebukce, biyik.

19Bisik min kum binmek talak ara, Laban arye, ‘Na domba basam potong kolbinaman’ tenen, yuk mutuku biyukba, Rahel birye, el li koprop arye, el aik pum deiamuk isa si eren ning, ubula doprobuk. 20Tonda, Yakub birye, el yamal koproba Laban, Aram mutuku ulamuknye biti, “An mutuku batakuka, na mutuku koproba tamubuka binamne,” nyabuka, laka kum nyabukce, talye duknubuka biyuk ati ara, awinibuka deice arye, tilila yupu nyana atonun winibuk.

21Bisik banmeka ani, amutuku noutamak, weik mek balamuk mek el si ara, Efrates mek koubuka, otam bisik banmekce, ‘Nunda mutuku kon uamuk mutuku, el si ara, Gilead mutuku noutamak bindopnamap’ tenen, biyik. 22Yakub ap, el mapu silip ap, nirya bisik banmikba, yuk nang arye, Laban biti nyabik, “Yakub ara, nun mutuku batakuka, bikbik abuka el mutuku banmale,” nyabuka laka nyabikba, kekebuk. 23Kekebukce, el yala nang ap bulubukabikce, ‘Yakub omutuku bisik noutamak seknamap’ tenen, sik abisikuk aminyan bikbik abuka, dobolbanmek. Bikbik abuka, dobolbanmeka ani, like tek sum arye banmeka ani, Gilead mutuku noutamak, mutuku kon uamukak noutamak, kam sengnelbiyik.

24-25Gilead mutuku kon uamuka noutamak ara, Yakub birye, el cang kain tenda aik akunum dobukba, sik asukumuk unmikba, Laban ap, el yala nang ap, amutuku yayikce, sik babye cang kain tenda aik, asukumuk dobik. Dobikce, mapmika ani, alukunyan noutamak Allah arye, Aram mutuku anye Laban biti, lengdar mapmoka deice arye nyabuk. “Anda kanye moubuka tenepnulyame. Ance Yakub biti, teleb yupu babye, malye yupu babye, nyana kume. Kanye moubuka unamlyame,” nyabuk.

26Nyabukba, berekukopura, Laban arye, Yakub biti nyabuk. “Anda yata wiripmalam do? Duknubuka banmalama ara, kunusa dona atonun winipdeipmanilame. Tonda, ninye olakirye, kilapu ubula doprobikirye, bobalamak touk, ance na kilmapu bitinye bobanmanilame. 27Yata deiyok ati, kunusa kibuka, na batakuka duknupmalamce binmamu do? Yata ati, ‘Binamane,’ nyabuka, laka kum nyapnulum do? Aning nyapmanutum toura, nun nirya arye anggunti, “Telebe dabilulume,” nyabuka, dopdeipsitinye. Tonda, kanye deibuka, mot sebuka, bung-bung ana, el si ara kecapi arye, mot sebuka bokdeipsitibye.

28Aninguk kum bukni, ton malye winipnulum ning ara, lo kum arepnulumba, na kilmapu ap, sikce deiamdik mapu ap ati, “Telebe dabilulume,” nyabuka kum kipse. Aning nirya akunum winiplum ning ara, kanye bona kum arye, walwal arye winiplume.

29-30Nara mikipnye ununa anya arye, opkitinye bukni, ambusum lukunyan ara, an ni koprop arye, si erelul Allah, lengdar mapmanu deice arye nyapmanue. ‘Ance Yakub biti, teleb yupu babye, malye yupu babye, kum nyapnalyame. Kanye moubuka tenipdenalyame,’ nyapmanue. Anda, ‘Se, na ni dam tamubuka bitinye,’ tenepmalamce, bisik bikbik abuka banmalam bukni, yata deiyok ati, na isa si erenye ning, na aik pum tam danirye, ubula dopdopmanilam do?” Laban arye, Yakub biti nyabuk.

31“Aning ara winipse bukni, an dipdesimince, an isa si eren ning auplyopura, aning duknupmalinye bira, oplopnune. Winira, an yala ninye ap, na mapu silip ap nirya, aunmakak dipdenamasilame. 32Na ning noutamak epdemince, an bona awaplyopura, adiparyuk tamubuka dopropnulyame.” Yakub birye, Laban biti nyabuk. Yakub birye, ayupu nirya nyanmok talak ara, ‘Rahel birye, Laban el isa si erelamuk ning ubula doprobuke’ tenen, kum bikmok. ‘Talye mangkau kanye bobuka unmokce’, nyabuk.

33Yakub birye nyabukba, Laban birye, sik cang kain tenda aik pum nirya, wekuka epra banmok. Min yuma, Yakub el tenda aik, anyapce, Lea el ning, asukum noutam ara, sik pil melin kilapu, sik tenda aik wekuka dipdeyuk bukni, el ning tonok ning babye, kum eibuk. Sirya ara, Rahel el tenda aik wekuk. 34Wekukura, Rahel birye, Laban el isa si eren ning dobuka, el unta basam balye tam deice bukmok ning, amu tam dongobukce, aning deice tam bukmok. Laban el ning deice bukmoka anya arye, Laban arye, atenda aik pum bisik nirya dipdeyuk bukni, aning kum eibuk. Kum eibukura, Rahel el li koproba ati, nyabuk.

35“Na nio, anda na deiyoknye, ance nati uapniminyake. Narye tikuka, anti teleb kum nyapmakine. Anda akunum na aik wekmalamce, an isa si eren ning ara, kum eipmalame bukni, tuba atalye bukmane ati ara, ‘Yata ati do?’ tenen, kume. Deiyok ara, atia. Na ining ban wala upmanila atia,” nyabuka, kwinisa dobuk. 36Ura, Laban arye, el enmok ning kum eibukura, Yakub birye elti, yu ubukba, wenebuk. “Nara, yata malye ning winipman do? Nara, yata malye ning winipmanuba, ance, ‘Elda malinye,’ tenepmanilamce, kalikuka olyanmanilam do?

37Na ning nirya noutamak akunum dipdenmalamba, an aik koprop ning ara, eipmalam do? Nunce an ning dungnupmap ning ara, aupmal do? Auplyopura, dobuka anyaka deipminyeba, an yala nang ap, na yala nang ap, sik nirya arye, nun bitinye ati, yupu nyapdeipnusiyake. 38Nara, keting tamun yupa weik, 20 tahun deice arye an pil dolamkise. Atalak nirya ara, an domba ap, kambing ap, weilamkise bukni, sikce wangana pia kume. Tonda, an yim kambing obuka kum dilamse.

39Bura yu kam arye, an kam un ning olamik talak ara, sik nong dobuka, an dam kum boyase. Na weilamse ning noutamak bokuka, sik nong punulamse. Tonda, keting noutam do, lukunyan noutamak do, yuk nang arye, an kam un ning ubula dopropnopura, ance nati, ‘Dekna arepnilyame,’ nyalamnulumba, punubuka arelamkise. 40Ura, aninguk kum bukni, na nong arye winilamse ning ara, nyapnune. Keting noutamak ara, keting tin arye olamnuke. Lukun yan noutamak ara, moul weik aruklamnukba, pia bai bulamse. Teleb ubuka kum malamse.

41An amu tam kibuka, pil dolamkise talak, keting tamun 20 tahun deice arye winilamnuke. An kilmapu bitinye ara, keting tamun 14 tahun pil dolamse deice arye dopse. Domba ap, kambing ap, arepnulum ning ati ara, keting tamun 6 tahun deice arye pil dolamse. Apil dolamse ning, aning pununa ati, ‘An menenga dekna ning ara, winibuka arepnamkine,’ nyapdeipnulum bukni, tonap tuba, aning batakuka, yuk ning teneplumce, nati arin ning ara, tagu barye diamuk, yuk-yuk arepnulume. 42Ura, na apu koproba Abraham arye, si erelamuk Allah, tonda na ni koproba Isak arye, ‘Elda weik mambule’ tenen, si erelamuk Allah ara, elce kum meliamnutu toura, na kele. Ance nati, “Talya urdemuk bilyame,” nyapnutumba, talye urdemuk winiptinye. Aning-aning nirya kum winipnutue. Bukni, Allah arye, na ikin ulamnuk ning ap, na babye taruk arye, weik pil dolamse ning ap, dinulule anya arye, ambusum lukunyan noutamak elce anti wenepmakile.” Yakub birye Laban biti, yu ubukba, nyabuk.

43Nyabukura, Laban birye tamubuka nyabuk. “Kume, ance doplum kilapu, na kilmapu ururake. Sikce deiamrik mapu ara, na mapu unyake. Akam ulye ning ayala-yala nirya ara, na ninguk ulule. Wini talak elinmalam ning nirya ara, dipkoprob na ninguk ulule. Bukni, na kanye ara, asum anyuk akilapu ap, sikce deiamrik mapu ap ati, yata winiptinye kum ati, dauaplye. 44Ati ara, an ap, na ap arye, ‘Winibuka-winibuka wininaname,’ nyabuka, nyalin yupu nyapdeipnimirye, ayupu ara, nun bitinye ati, yupu lipsisikuka bokolina deiyok ning, pia unamsile.” Laban birye, Yakub biti nyabuk.

45-46Nyabuka ati, Yakub birye, cang weik keil dobukabukce, asukum tikdeibuk. Ikdeibukce, el yala nang ati, “Anggun ton keil bulubuka asukumak delilyanamalulume,” nyabukba, keil bulubukabikce, asukumuk deibik. Winibikce, akeil bulubuka deipmek sukumak anyuk, din neika dibik. 47Amutuku si ara, Laban birye, ‘Yegar-Sahuduta’, nyabuka sisibuk bukni, Yakub birye amutuku si ara, ‘Galed mutuku,’ nyabuka sisibuk.

48-49Laban birye, “Na yuk, an yuk, nun mutuku yuk-yuk unamnam talak noutamak ara, ‘Malye winipdanimnyak’ tenen, Allah el si Yahweh#31:48 Yahweh – Allah el si koproba ara, Yahweh ulule. Indonesia Alkitab noutam ara, Allah el si Yahweh ulul sukum ara, TUHAN sekenyake. Ayupu bikna ati ara, laka nyan yupu nomor 49 dipdelulume. arye kalikuka dinamsile,” nyabuka anya arye, amutuku tonok bukni, el si ton, ‘Mispa mutuku,’ nyalamik.

50Tonda Laban arye nyabuk, “Yakubo, Allah arye, ‘Malye winipdanimnyak’ tenen, pia kalikuka dinamsile anya arye, luba kilongona meme. Ance na kilmapu bitinye ati, malye winipdeipminyopura, Allah arye elinamkile. Tonda, na kilmapu bitinye, akunum doplume anya arye, yuk kilapu ton dopminyopura, Allah arye dinamkile. Ati, aning winina meme. Yuk nang ap, nun ap, neika bukuka, ayupu kum talipmanam bukni, Allah elcuk pia dinamsila ara, luba kilongona meme.” Laban arye, Yakub biti nyabuk.

51-52Nyabukce, ayupu ton dukdongopbuka nyabuk. “Winira, acang keil ikdeipmalamak ap, akeil weik bulupdeipmanguak ara, eipmalame. Ara, nun yupu lipsisikuka bokolina deiyok ning ati, aupnamsile. Nara, na mutuku otam arye yanuka, akeil deipmapak bisibuka, an tam kum olyanamkine. Aning atonun, an babye, an mutuku atam arye yanuka, akeil deipmapak bisibuka, na mutuku otam kum olyanamsine. 53Ayupu ati ara, nun bitinye arye, “Telebe,” akunum nyapmanama anya arye, Allah arye, ‘Diba winipnamrak do, kum do?’ tenen, pia kalikuka dilirye, yupu lipsisikdeipnamsile. Ara, Abraham arye, si erelamuk Allah, tonda Nahor arye, si erelamuk Allah ati nyapne,” nyabuk.

54Nyabukce, Allah el si erena ati, kam ning obuka Allah ati arebuk. Arebukce, kwalin ning kwalibukabikce, el ap, el mapu silip ap, el yala nang nirya ap, neika din dinmekce, amutuku kon uamukak mapmek. 55Mapmika, berekukopura, Laban birye, el kilmapu ap, sikce deiamrik mapu ap ati, mutubukce, “Dabilulume,” nyabukce, ‘Allah arye teleb kipdeipnamle’ tenen, teleb yupu ton nyabuka, sik deice deibukce, amutuku batakuka, el asik koproba tamubuka biyuk.

Currently Selected:

Kejadian 31: EIPA

Highlight

Copy