Kejadian 26

Isak ap, Pilistin ninye sik ninye deiyoknye Abimelek ap ati, nyabuk yupu

1Abraham bira, Kanaan mutuku tam ulamuk talak ara, sik din nirya kum danin balamukba, kwaning bulang, din dina kum urdem ulamikba, ikin weik uamuk. Awinyamuk atonun, Isak babye amutuku uk, tuba ulamuk talak noutamak ara, sik din kum dayukba, talye din si tebuka bulang ulamik. Ati, Isak bira Abimelek dam biyuk. Abimelek bira, Gerar mutuku ulamukce, Pilistin yala ninye, sik ninye deiyoknye ulamuk. 2Isak biyukopura, Isak lengdar mapmok deice arye, Allah el si Yahweh yayukce nyabuk. “Anda, ‘Mesir mutuku binun,’ tenepmalama ara, bataklyame. Mesir mutuku kum binulam bukni, narye anti, ‘Amutuku unalam,’ nyapkinye mutuku uk unalyame.

3Ati, Gerar mutuku, asukum unmalamakuk, mitik anun ton tuba unamalyame. Narye melipkinya deice arye, telebuk unalame. Deiyok ara, narye an ni koproba Abraham biti, ‘Dipkoprop winipnamkine,’ nyabuka, nyalin yupu nyapdeipse touk, dipkoprob winipnamne. Ara, an ap, ance deipminyeba, dadeipdanin balamica ani, dortalak nirya unamak ninye ati, mutuku-mutuku nirya arepnamsine.

4Tonda, ance deipminyeba, dadeipdanin balamica ani, donirye deipnamak ninye, an yala ninye ara, narye melipniba, ninye yupa pia weik upnin banamake. Ara, lukunyan noutam kurya pia nukman kumto tiklamle atonun, an yala nang yupa pia weik upnin banamake. Im sirya, mutuku sirya nirya arepsiniba, an yala nang arye talinamake. An yala nang ara, mambul ning#26:4 Mambul ning wininamak deice arye nyabuk ning deiyok ara ani. Ara, aminyan doryanamle talak, el yala nang arye, Yesus deipnamika ati nyabuk. wininamak deice arye, mutuku sirya, im sirya unyak ninye nirya ara, teleb kipdeipnamne.

5‘Aning-aning wininamsine,’ nyapmakin yupu nirya ara, talye ati kum wininamne. Deiyok ara, an ni koproba Abraham bira, narye, ‘Aning winipnamlyame, aning ara, kum winipnamlyame,’ nyapdeiamse yupu ap, ‘Aning winina mem, aning winina telebe,’ nyalilamse yupu ara, an ni Abraham bira, ayupu nirya moubuka kekelamukce, talibuka dobolbalamuk. Na yupu ara, kum yaniptamnuke. Ati, el mi anti weika arye melinamkine,” Allah arye, Isak biti nyabuk. 6Nyabuk ati, Isak bira yuk mutuku kum biyuk. Asukum Gerar mutuku noutamuk ulamuk.

7Isak ap, el kil Ribka ap, amutuku noutam ulamdik talak ara, Gerar mutuku nang arye, el kil Ribka eibikce, “Yata kil do,” nyabuka asilelamikba, Isak birye, “Kume, akil ara, na makal kil binya,” nyalamuk. Nyalamuka ara, ‘Ribka bira, urasin pia teleb kil ati, akil doptibye’ tenebikirye, ‘Amutuku nang arye, na mining kil ati opnicak,’ tenebukce, ‘Akil ara, na kum dopse nyaptinye’ tenen, ilil ubuka ati, ayupu dungnubuka nyabuk. 8Ura, winibuka ulamukce, sik nirya neika daulamika ani, tonok sum ara, sik Pilistin yala nang, sik ninye deiyoknye Abimelek bira, el alip aik unmokce, yuk aik utam dipmokba, Isak birye el kil Ribka iribuka bukmokak, eibuk.

9Eibukce, aminyan ara, Abimelek birye Isak biti, “Na dam yalyame,” nyabuka yukubukba, el dam yayukopura, ayupu nyabuka wenebuk. “Akil Ribka bira, an kil koproba bukni, anda yata deiyok ati, ‘Akil ara na makal kil binya,’ nyalyamce, kunusa dosilyam do?” nyabuka wenebuk. Wenebukba, Isak birye tamubuka nyabuk. “Kume, na tenenya ara, ‘Amutuku nang arye, akil doproptibye,’ tenebikirye, ‘Na nong opnicak’ tenen, ayupu nyanune,” Isak birye nyabuk.

10Nyabukba, Abimelek birye tamubuka nyabuk. “Se, aning ara, yata ati kunusa dosilyamce, tililauk nyasilyam do? Nun amutuku nang arye, an kil ati dopmatingce, neika maptingura, pia malye winiptinge. Mangkau kanye bobuka, malye winiptingba, nun ikin weik upsutue. Aning ara mambul weike,” nyabuk. 11Nyabukce, ‘Na mutuku nang arye, mangkau kanye bobuka, malye winibicak’ tenen, ayupu nyabuka, sik nirya ati nyapdeibuk. “Yatanye do, yata kil do nirya, el kil atonun ton, anggunce sik bitinye ati, malye winipmunyopura, narye nyapniba, na mapu arye opnamsiyake. Ati anggun kanye mouplulume,” nyabuk.

12Nyabukura, sik daunmeka ani, aketing tamun noutam arye, Isak birye wa wiamukce, koun ning ap, din yala nirya kouamuk ning ap, yala-yala weik koubukura, papnin balamuka ani, yupa pia weik pabukce, pia teleb ubuka nong ubuk. Tonda duk weik moubuk. Ara, elce koubuk ninguk kum bukni, tabakuka seratus kali weik tonap nong ubuk. Ara, talye ati kum bukni, deiyok ara, Allah el si Yahweh arye, weik meliamuka deice arye, wa wibuka kouamuk ning nirya, pia teleb ubuka moubuk. 13Winibukopura, Isak birye taleamuk ning, ayala-yala nirya weik upnin balamukba, bona weik talinanye ulamuk.

14Isak bira, bona pia weik talinanye ulamuka anya arye, sik Pilistin yala ninye arye elti, ‘Se, el ulye touk, nun babye atonun winipsutue’ tenen, talima wilildalamikce, elti, malye kanye bolamik. Ara, el domba basam ap, el sapi basam ap, elti, pil melin kilapu ap, sal ap, pia weik ulamika ati, sikce elti, malye kanye bolamik.

15Sikce Isak biti, ‘Nun lik’ tenen, Isak el li koproba Abraham, el pil don nang arye, ‘Mekwen deipsutue’ tenen, tuku lukamikak, mekwen deiamukba, mek kwelamik ning nirya ara, malye kipdeibik. Ara, sik Pilistin nang arye, tuku palibuka, sik bona nirya tuku pum bisik dongobikce, singipdongobikba, mek kwepmanto kum kibuk. 16Sikce winibikba, sik deiyoknye Abimelek birye, Isak biti nyabuk. “Kao, wini talak ara, anda bona weik talina ap, mikip weik ap, unmalam bukni, nunda, mitik amu tam nang unyaba ati, nun dam neika unyabak batakuka, yukak binuka unalame,” nyabuk.

17Nyabukura, Isak birye el ning nirya bobuka, sik neika ulamik mutuku batakuka, yuk mutuku si Gerar, lyu weik mutuku binuka ulamuk. 18Amutuku noutam binuka ulamuk talak ara, el li koproba Abraham birye, minop talak tuku lukamuk mekwen anyak nirya, tuba tamubuka tonap palibukce, asukumuk mek kwelamuk. Ara, Abraham akunum dibuk talak, sik Pilistin nang arye, Isak biti yu ubukba, tuku palibuka abisik-abisik nirya dongobikce, tuku singipdongamik ning ara, Isak birye, tuba tamubuka tonap palibukba, mekwen deibukura, mek kwelbalamik. Winibukce, el li koproba Abraham birye, minop talak, “Amekwen si ara, ani, amekwen si ani,” nyabuka, si siamuk touk, Isak babye, amekwen siuk silamuk.

19Tonda, Isak el pil melin nang arye, Gerar lyu mutuku noutam tuku lukdeyikba, pia teleb mek, kwebuka din mekwen ton eibik. 20Eibikce, amek kwelamik bukni, sik Gerar lyu mutuku domba basam wein nang arye, Isak el domba basam wein nang ati, yu ubukba, yupu weika arye walanmek. Walanmekce, sik Gerar lyu nang arye nyabik. “Kume, amekwen ara, nun ninguk ulule. Ati, anggunce ton amekwen ara, kume,” nyalamik. Nyalamik ati, Isak birye amekwen si ara, ‘Esek mekwen,’ nyabuka si domuk. Ara, amutuku nang arye, el mapu arye, yupu nyalameka ati, asi domuk. (Ibrani yupu deice arye, Esek nyabika deiyok ara, ‘Yupu walana’ ati nyabuk ning.)

21Ura, aminyan talak ara, Isak el domba basam wein ninye arye, mekwen ton tuku lukik bukni, aning babye, sik Gerar nang ap, el mapu ap yupu walanauk ulamik. Winilamika ati, amekwen si ara, Sinta mekwen nyabuka si domuk. (Ibrani yupu deice arye, Sinta nyabuka deiyok ara, ‘Olana’ ati, nyalamik.) 22Walanauk ulamika anya arye, Isak birye amutuku batakuka yukak biyukce, el melin nang arye, ‘Mek ton kwepnuyap’ tenen, tuku lukikba, mekwen ton deibuk. Mekwen deibukba, mek kwelamikba, el mapu ap, Gerar lyu ninye ap, tuba tamubuka tonap amekwen ati, yupu kum walalamika ati, amekwen si ara, “Rehobot mekwen,” nyabuka si domuk. (Ibrani yupu deice arye, Rehobot nyabuka deiyok ara, ‘Lo teleb ulula’ ati nyanyake.) Asi dobukce tenebuka ara, ani. Ara, ‘E, winira nun ni koproba Allah, el si Yahweh arye, lo telebak akunum arepmasila ati, asukumuk teleb kibuka unamap,’ tenena ati, asi dobuk.

23Ura, aminyan ara, Isak birye Gerar mutuku batakuka, Bersyeba mutuku welebiyuk. Amutuku binuka mapmok. 24Alukunyan noutam ara, lengdar mapmok deice arye Allah el si Yahweh arye yanuka nyabuk. “Anda ilil una kume. Nara, an ni koproba Abraham birye, si erebuka kilamnuknye Allah unune. Nati, pil dolamnuknye Abraham biti, kanye deiamsirye, nyalin yupu nyalamsa ati, narye melipkineba, ance deipminyeba, dadeipdanin balamikca ani, aminyan dortalak nirya unamak ninye, an mapu pia weik unamake. Tonda, anti teleb kipdeipkiniba, telebuk unalame,” Allah arye, Isak biti nyabuk.

25Allah arye nyabukba, Isak bira, ‘Asukumuk Allah el si erebuka kipnirye, el arena ati, kam ning obuka uku dongopnamane’ tenen, pala keil dobuka, yangapdeibukce, Allah el si Yahweh ati, el si erenmok. Tonda, amutuku, Isak arye el tia aik, tenda cang kain dobuka, asukumuk deibuk. El melin nang arye, ‘Mekwen dipliba kwepnamap’ tenen, amutuku tuku lukikba, mekwen deibuk.

26Ura, aminyan talak, Abimelek yukak ulamuk bukni, Gerar mutuku arye, Isak dam yayuk. Ara, Abimelek ap, el pil dolamuk ning nirya ati, yupu talilalamdikce, “Winina teleb, winina meme,” nyabuka yupu melinanye, elda Ahusat ap, Abimelek el yin talin nang, sik deiyoknye Pikol ap, sik nirya Isak dam yayik. 27Yayikopura, Isak birye asipdeyuk. “Min talak ara, anggunce nati yu upsukba, ‘Nun mutuku batakuka, yukak bilyame,’ nyabuka yakwecamnuluma anya arye, wini talak ara, yata deiyok ati, na dam yanmalum do?” nyabuka asipdeyuk.

28Asipdeyukbuk, sikce tamubuka nyabik.

“Kume, nunce an winilyam ning nirya dilenyaba ara, Allah el si Yahweh arye, weika tonun melikiliba, eipkuburye kel bikinyaba ati, winibuka tenepmabe. ‘Kume, teleb ning ara, an ni Isak ap, nun tam nang ap, yupu talipdabirye, nyalin yupu nyapdatibye,’ tenenyabe. Ara, ‘Nun tam ninye ap, an tam ninye ap, olana pia kum diparyuk, telebuk winilanamabe,’ nyabuka, ‘Nyalin yupu nyapdatibirye, ulamtibye,’ tenenmabe.

29An tam nang arye, nun tam nang ati, pia malye kum winilinamsulume. Anda nun mutuku noutamak ulalum talak nirya ara, nunce an yala nang ati, malye kum kipdeipsupu bukni, telebuk neika ulamuburye, sirya talak ara, ‘Teleb, kanye bobuka binamlyame,’ nyapkupu. Nunce anggunti winilamsupu touk, ‘Isak, an yala nang arye, nunti wininamsulum’ tenen, nyapkiyabe. Wini talak ara, Allah el si Yahweh arye, pia teleb-teleb kibuka melikiliba, telebuk winilyame,” Abimelek ap, el mapu silip arye, Isak biti nyabik.

30Nyabikopura, Isak birye, ‘Anang kibuka si erepnirye, sik nyapmaniyak touk wininamne’ tenen, weik kwalina kwalibukce, arebukba, sik nirya arye neika dibik. 31Dibikura, mapmeka berekukopura, sik nirya arye, “Teleb winilanauk unamabe,” nyabuka, nyalin yupu nyalanmikba, Isak birye anang ati, “Telebe, teleb kanye bobuka dabilulume,” nyabukce, taruk talibukura, sikda el dam batakuka, sik mutuku koproba tamubuka bindobik.

32Sik kwalipmik sum anyuk, Isak domba wein nang arye, el dam yanuka nyabik. “Naie, nun mek dina ati, winiryuk mekwen ton palipmap, mek mekwen deipmasile,” nyabuka laka nyabikba, 33Isak birye amek mekwen ati, “El si Ziba,” nyabuka sisibuk. Atalak bukni, wini talak babye, amutuku si ara, Bersyeba mutuku nyanyake.

34Ura, Isak el mi Esau bira, keting tamun 40 tahun akunum ubukba, kil dobuk. Ara, Het yalanye el si ara Beri, elce deiamuk kilmu el si ara Judit, Esau birye dobuk. Tonda, el kil bitinye ning ara, Het mutukunye, el si Elon, elce deiamuk kilmu Basemat, Esau birye dobuk. 35Sik nirya ara, sik malye winilamika deice arye, Isak ap, el kil Ribka ap, ikin kanye bobuka ulamdik.

Currently Selected:

Kejadian 26: EIPA

Highlight

Copy