Kejadian 27

1Isak bira, pia wisi akunum dayukba, el asing malye ubukba, teleb ubuka eipmanto kum ulamuk. El asing akunum kuamuka anya arye, ninye urasin kum elilamuk talak, elce min yubuka deibuk mi Esau biti, yukubukba, Esau yayukba, “Na mio,” nyabukba, Esau birye, “Naie, na unmane,” nyabuk. 2Nyabukura, Isak birye nyabuk. “Se, wini talak ara, na pia wisi akunum dase ati, na dipnamne talak ara, na walwale.

3Ati, anda bai kalikilbana kelnye ulyama ati ara, an yin ap, mal ap, bopmince, bai kalikil binmaminya ani, bai ulye ning kapang do, yuk ning do, obuka boyanilyame. 4Na dina ati, kanye delinun ning, an kele anya arye, ance obuka boyaminye ning kalibuka, na patanilye touk, yubuka deipnimince, boyanamnilyame. Ara, na dipnamne atia. Akunum dipnyopura, na dipnamne talak arye dopropnalam ning ati, laka nyapkinirye, ‘Teleb unamlam’ tenen, teleb yupu ton nyapdeipnamkine,” Isak birye, Esau biti nyabuk.

5Ura, Isak birye, el mi Esau ati, ayupu nyanmok talak ara, Ribka mining dam tikmokce kekenmok. Esau arye, ‘Na ni koproba, el patana ati, bai kalikil binmanya ani, bai tam kam ulye ning obuka, na ni biti, tamubuka boyanaman’ tenen, bai tam biyuk. 6Biyuk talak ara, Ribka arye, el mi Yakub biti nyabuk. “Na mio, anyapce an ni koprop arye, an du koproba Esau biti nyanmo yupu kekepmanue.” 7Ara Isak birye, “Bura tam ulye ning opmince, boyaniminyopura, na patanilye touk, teleb kibuka yupnimince, arepnamnilyame. Arepniminba dipnyopura, na min kum dipmanye talak, Allah el si Yahweh arye dinmasil ak, teleb yupu nyapdeipnamkine,” nyanmoba, kekepmanue. 8“Ati na mio, na nyapnukin yupu moubuka kekepmince, na nyapkinye touk winipnulyame. 9Ara ani. Nun kambing basam weinyabak bimince, kambing mi, pia teleb ning bitinye wibuka dopmince, boyanilyame. Ara, an ni koproba, weik arye kanye deibuka patalye touk, ‘Akambing tup yupnirye, an ni koproba ati arepnaname’ tenen, ati nyapkine. 10‘An ni koprop arye, teleb yupu an deiceuk nyapdeipkutu’ tenen, adin ning bobuka, an ni dam arelbiminba, dipnamale. Elda wisi anya arye, minopce dipnamala ati, minopce anyapmano touk winipnulyame.” Ribka birye, Yakub biti nyabuk.

11Nyabukura, Yakub birye, el lin biti nyabuk. “Nongo, winiptinye bukni, na du koproba Esau bira, el nong bol deice ara, potong weik tikuke. Nara, nong bol deice potong pia kumnye binya arye, aning arye, na ni biknilyake. 12Ara, na ni birye, na nong talipdenilirye, elce utenepnilyake. ‘Kume, na mi Yakub birye, adin ning arepmanila ara, duknubuka arepmanile,’ tenepnilirye, teleb yupu kum nyapdeipnamnil bukni, malye yupu nyapnilirye, malye winipdepniliba, ikin ning weik, na nong deice upnamnile.” Yakub birye, el lin Ribka biti nyabuk.

13Nyabukba, el lin birye, tamubuka nyabuk. “Na mio atenena bataklyame. Isak birye, malye yupu nyaplirye, anti supkilyopura, ikin ning na nong deiceuk upnamnile. ‘Aning ara, telebuk,’ tenenuna ati, narye nyapmakin touk, kambing mi bitinye opmince, bobuka boyanilyame,” nyabuk.

14Nyabukura, elce nyapmok touk, Yakub birye, kambing mi bitinye dobuka arebukba, Ribka birye, Isak patapmok ninguk, atup dobukabukce, yupdeibuk. 15Tup yubuka kintinbukabukce, el minopce deibuk mi Esau, el pia teleb baju anyaik uamukak, dobuka el aminyan deibuk mi Yakub ongopdeibuk. 16Winibukopura, asum opmok kambing bola koblopmok ning dobuka, Yakub el taruk nakub ap, el ngang dam ap kitipdongobuk. (Ara, Esau el nong bol deice potong weik tikamuknye biti winibuk.)

17Anirya akunum winibukce, el Yakub biti, akambing tup dapmok ning ap, winiryuk dapmok roti ap, bobinuka arebuk. 18Arebukura, Yakub birye, aning bobuka, el li koproba dam biyukce, “Naie, ayanmane,” nyabukura, Isak birye, “E, na mio, ayanmalam bukni, anda dan mi arye, yanmalam do?” nyabuka asipdeyuk. 19Asipdeyukura, Yakub duknubukabukce, “Nara ance min yuma deipnulum mi Esau unune,” nyabuka tilila nyabuk. Nyabukopura, ayupu ton nyabuk. “Naie, ance nyapmanumu touk, bai kalikil binmanurye, an patakilyeto ninguk kintinipmakine. Ati bukmince, aning dipminyopura, na aminyan talak dopropnamne ning ap, teleb yupu nyabuka, teleb kipdeipnamnilam yupu ap, nyapdeipnutume,” nyabuk.

20Yakub arye, nyabukba, Isak arye, nyabuk. “Na mio, aburu tam kam ulye ning ara, yata wiribuka arye, pola minopce kalikil binmaumce, aning eipmalam do?” nyabuk. Nyabukba Yakub arye, “Kume, na nio, ance pia si erelyam Allah, el si Yahweh arye, melipmanuba, minopce aning eibuka opmanurye, yubuka boyanmakine,” nyabuk. 21Nyabukba, Isak arye, nyabuk. “Na mio, mining dam yaminyeba, an nong talipdenukine. Na asing kupmanila anya arye, taliplilipdekinirye, ‘E, ara na mi Esau ani. Akumopura, anye bira, na mi Esau kume,’ tenen, kel biknukine ati nyapkine,” nyabuk.

22Nyabukura, Yakub bira, Isak bukmokak, mining dam biyukba, el li koprop arye, el nong taliplilipdeyukce, nyabuk. “Ance nyanmanilamba, kekepmakina ara, Yakub el yupu atonun kekenman bukni, an taruk talipmakin ara, na mi Esau taruk atonun talipkine,” nyabuk. Isak arye, ayupu nyapmoka deiyok ara, ‘Anye bira, na mi Esau kume, Yakub do?’ tenen, moubuka kum bikmok ati nyapmok. 23Ara, Yakub el taruk deice kambing bola ongopmoka anya arye, Esau el taruk deice potong weik palamuk touk winipmok. Isak arye, moubuka kum bikukce, kum tenebuka ati, talye mangkau asa, teleb yupu nyabukce, Yakub deice deibuk.

24Isak birye, nyabuk. “Anda dipkoprob na mi Esau ulyam do?” nyapdeyukura, Yakop birye, “Diba, na unmane,” nyabuka, tilila yupu nyabuk. 25Nyabukopura, Isak birye, “Ati na mio, bai tam arye, kalikuka opmanilam ning, dabuka kintinipmanilam ning ara, bobuka arepniminyeba, dipnune. Dipnyopura, teleb yupu an deice nyapkinirye, teleb kipdeipnukine,” nyabuk. Nyabuk touk, Yakub arye, akambing tup dobuka arebukba, dibuk. Tonda, anggur mek ton kwebuka arebukba, aning babye dibuk.

26Dibukopura, el li koproba Isak arye, nyabuk. “Na mio, na dam yamince, mutupnilyame,” nyabuk. 27Nyabukura, Yakub arye, el li dam biyukce, Isak ara Yakub arye, Esau el baju ongopmok ning nintong kekebukce, teleb yupu nyabuk. Ara, ‘Allah arye, na mi Yakub ati, melibuka teleb kipdeipnamle’ tenen, ayupu nyapdeibuk.

E, na kanye deipkine. Allah el si Yahweh#27:27 Yahweh – Allah el si koproba ara, Yahweh ulule. Indonesia Alkitab noutam ara, Allah el si Yahweh ulul sukum ara, TUHAN sekenyake. Ayupu bikna ati ara, laka nyan yupu nomor 49 dipdelulume. arye, buru tam noutamak wa tuku teleb kipdeipliba, nintong teleb lelamle touk, na mi el baju deice ara, anintonguk panapmalba, kekepmane. 28Allah arye anti, melinamkila ara, im deice arye, tukwak tam mok puru saklamle touk, elce melipkiliba, an wa winamlamak nirya ara, pia teleb tuku upnamla deice arye, an kounamlam ning weika arye, palamliba, weika arye, linamlame. Tonda anggur tapu duk weik moulamliba, duk purupminba, anggur din mek weik unamkilca.

29Tonda Allah arye, melipkiliba, ninye yala-yala weika arye, an si erena ati, an dam kanupdongobikirye, an amu tam ubuka, an piluk melibuka donamkiyake. An nin koproba arye, deiamsuk mapu nirya ara, anggun nang susuk ulamdum bukni, an amu tam ubikirye, ance sik ninye deiyoknye unamlame. Yuk nang arye anti, ‘El malye winiptu’ tenen, malye yupu nyabuka, an nong deice delinamkiyak ninye nirya ara, Allah nyaplirye, sik bidamnye ati, malye winipdeipliba, ikin weik unamle.

Aning atonun, yata ninye do nirya, sikce anti, ‘Elda teleb uptue’ tenen, teleb yupu nyabuka, an nong deice delinamkiyak ninye ara, Allah arye, melipliba, sikda teleb-telebuk unamake. Allah arye, ‘Aning nirya winipnamle’ tenen, elti moropnirye, nyapdeipnamne. Isak birye, Yakub biti nyabuk.

30Nyapdeibukura, Yakub el li dam batakuka, bai biyuk talak ara, adiparyuk el du koproba Esau, anyaik yayuk. Elda bai kalikil binmoka ani, tamubuka asik yayuk. 31Wekukce pia teleb din ning kintinibukura, ‘Na ni koproba arepnun’ tenen, el li dam arelbiyuk. Biyukce nyabuk. “Naie, bukmince, na bai tam arye, obuka, yupmakin ning dipnulame. Dipminyopura, ‘Aminyan talak aning-aning nirya telebuk winiptue’ tenen, teleb yupu ton nyapdeipnamnilame,” nyabuka morobuk.

32Nyabuka morobukba, el li Isak birye, “Anda yatanye birye ayupu nyapmanilam do?” nyabuka asipdeyuk. Asipdeyukbuk, Esau birye, “Kume, na nio, nara ance min yuma koprop deiamnulum mi, Esau aunman atia,” nyabuk.

33Nyabukura, Isak kekebukce, mambul kanye bobuka, sirim talibukce nyabuk, “Se, aning ara, min talak ara, yatanye birye, bai tam ulye ning kunum obuka, yubuka boyanmanil do? Arup, an min kum yanmamu talak, aning dobuka dipmanue. Dipmanurye, anye biti, ‘Pia telebuk wininamle’ tenen, teleb yupu nyabuka, el nong deice deipmane. Winipmana ati ara, anyapmanu yupu, dipkoprob nong upnamle. “Allah arye melipliba, elda pia teleb unamle,” nyabuka, Isak birye nyabuk.

34Nyabukura, Esau birye el li birye nyapmok yupu kekebukce, pia malye kanye bobuka, weik arye, ngalukukce, el li biti nyabuk. “Se, na nio, ance nati, ton pia teleb yupu nyabuka, na deice ton deipnutume. Se, na babye, teleb yupu nyapnutume,” nyabuka morobuk. 35Nyabuka morobuk bukni, Isak birye, “Kume, arup talak ara, an weit koproba kunusa dopmauce, tenepce nyapmanilba, anti nyapnamatinye yupu akunum nyapmanuba, elcuk apia teleb ning ara, akunum ubula dopropmakile,” nyabuk.

36Nyabukura, Esau birye nyabuk. “Se, anggunce elti, si Yakub nyapruma ara, bita nyaprume. El deiyok ara, ‘Tenepce arye, tilila yupu nyalulnye,’ ulula atia. Winira like bitinye sum arye, el tenepce arye, tilila yupu nyapdeiamnukba, na teleb ning ubula dopropnukce. Min yuma talak, an dipminyopura, na min yuma deiamnulum mi ati arepnamnutum ning, ubula dopropnuke. Tonda, wini talak ara, ance teleb yupu nyapdeipnamnutum ning ara, ubula dopropmanile,” nyabuk. Nyabukce, ayupu ton nyabuk. “Se, teleb yupu ton kum upmakilba, nati ton, kum nyapnamnilam do? Teleb nyapdeipnamnutum yupu ara, akunum kum danmal do?” nyabuka asipdeyuk.

37Asipdeyukura, Isak arye, nyabuk. “Na mi Esauo, minop talak ayupu nyapmanua deice arye, an weit koproba Yakub ati, arepmanuba, elda an deice tam kibuka an weik deiyoknye atonun unamkile. Anda, el amu tamnye kibuka unalame. Tonda, el yala nang nirya ap, el mapu silip nirya ap ara, el amu tamto ukirye, el talye pil don nang atonun unamake. Tonda, ‘El pia teleb wininamle’ tenen, din ning yala-yala weik ap, anggur tapu duk purubuka kintininyak mek ap, ‘Weika arye, upnamle’ tenen, ayupu ton akunum nyabuka, el deiceuk kunum deipmane. Ati ara, yatato yupu ton tabakuka nyapkitinyeba, teleb upkutu do?” nyabuka asipdeyuk.

38Isak arye, nyabukba, Esau arye, el li biti nyabuk. “Se na nio, ‘Na mi teleb unamle’ tenen, teleb yupu tonok ning babye, kum nyapdeipnamnilam do? Se, na nio, ‘Allah arye, melipliba, teleb ning ton wininamle’ tenen, yupu tonokuk ton nyapnutume, na nio,” nyabuka weik arye, engenmok. Esau arye, engenmokba, Isak arye elti, ayupu nyapdeibuk. 39“Allah arye, melipkiliba, unamlame. An unamlamak ara, pia teleb tukwak kume. Ati, wa wibuka koulaminya ani, aminyan talak ara, mitik anunuk linamlyame. Im deice arye, mok duk tukwak sakliba, aning-aning teleb ulamle touk kum bukni, mok kum mutuku noutamak, aning-aning ikinuk ulamle touk unalame.

40Tonda, parang ya talibuka, ninye onanye danuka unamlame. An weit koproba, el amu tam umince, el piluk donamlam bukni, aminyan talak ara, lik weik upkiliba, ‘Yukak bitinye’ tenen, pia se tenebuka, ‘El ti na like,’ tenepmince, el batakuka yukak bindopnalame.” Isak arye, el mi Esau ati, nyapdeibuk.

41Ura, atalak nirya ara, Esau birye, el weit koproba Yakub biti, yu weik ulamukba, pia teninauk ulamuk. Deiyok ara, ‘Na ni koprop arye, pia teleb yupu nyabuka, Yakub el nong deice deibuka deice arya, telebuk unamle,’ tenelamukce, el weit koproba ati, yu tuba ulamuk. Ati ara, Esau birye, el babye talima noutamak ara, ‘Na ni koproba dipliba, el si erena ati engen talak akunum uplyopura, na weit koproba Yakub oplopnamne,’ pia tenelamuk.

42Aninguk tenelamukba, Ribka arye, aning kel kibukce, el sirya talak deiamuk mi, Yakub yukubukba, yayuk. Yayukura, Ribka arye, Yakub biti nyabuk. “An du koproba Esau arye anti, yu weik ubukba, ‘Anye oplopnamne’ tenen, pia teninauk ulula deice arye, an ona ati kanye tenelule. 43Ati ara, na mio narye nyapnukin touk, aninguk kekebuka winipnamlame. Na du koproba Laban bira, Haran mutuku noutam ulyak, minopce pola binulyame.

44El mutuku binuka daulaminya ani, an du koproba, yu weik ulye ning ara, akunum kum dalyopura, amutuku tamubuka yatume. 45Ara, oyanamla talak noutamak ara, an du koprop arye anti, yu weik ulye ning kum kiplibuk, ance elti, malye winiplum ning ton luba kiplibuk. ‘Na weit koproba talye optinye’ teneplye talak ara, narye yupu lak nyapdeipkiniba, kekepminyopura, Laban el mutuku batakuka, amutuku tamubuka yatume. Aning kum winibipyopura, tonok sum aryuk anggun bitinye babye, diprumunyeba, ikin kanye weik upnilyake. ‘Aning ara, yata ati do?’ tenen, nyapkine,” nyabuk.

46Nyabukopura, Ribka arye, Isak biti nyabuk. “Amutuku noutam unyak kilapu, sik Het yala kilapu, na lik weik unulul ati, nun mi Yakub birye, amutuku kilapu noutamak arye, el kil doproplyopura, na lik weik ati diptinye babye, teleb uka. ‘Amutuku unyak Het kilapu malye winilamak touk, winilye kil doplyak’ tenena ati, nyapkine,” nyabuk.

Currently Selected:

Kejadian 27: EIPA

Highlight

Copy