Kejadian 25

Abraham dibuk talak ati, nyabuk yupu

1Abraham el kil Sarah akunum dibukba, daulamuka ani, tonok kil el si ara, Ketura dobuk. 2Dobukura, daulamdika ani, akil deiamuk mapu si ara, ani. Min yuma ara, Simran deibuk, aminyan deibuk mapu si ara, Yoksan ap, Medan ap, Midian ap, Isbak ap, deiamukce aminyan sirya koprop ara, Suah deibuk.

3Bitinye ning deibuk mi si ara, Yoksan deibuk, ami nebukce, aminyan talak el mapu Seba ap, Dedan ap deibuk. Dedan birye deibukba, danirye deiamik nang si ara, Asyur yala nang ap, Letus yala nang ap, Leum yala ninye ap ulamik. 4Ketura birye deibuk mi Midian birye, aminyan talak nebukce, deiamuk mapu sik si ara, Epa ap, Eber ap, Henok ap, Abida ap, Elda ap ulamik. Aninye si ap, yala si ap nirya ara, sik capu kil ara, Ketura ulamuk.

5-6Abraham bira, kam tuba ulamuk talak arye, elce domuk kilapu, sikce deiamik mapu nirya ati, elce taleamuk ning ton bokukabukce, sik yuk-yuk ati urdem arebuk. Arebukce, amapu nirya ati, “Anggunda amutuku batakuka, otam keting yangan tam binuka unamlulume,” nyabuka bokeibuk. Ara, ‘Na mi Isak birye talinamle mutuku noutamak, neika kum unamak’ tenen, yakalamuk ati, sik nirya balolamik.

7Abraham kam ulamuk talak ara, keting tamun yupa weik, 175 tahun ulamuk. 8Winibuka ulamuk bukni, pia wisi dayukura, dibuk. El dibuk talak ara, pia wisi akunum dayukce dibuk. Dibukopura, Allah arye Abraham el kanye dobuka, el apu yapu dam bobinuka deibuk. 9Abraham dibukba, el mapu bitinye arye, Isak ap, Ismael ap, el nong dobuka weilbirik. Ara, Mamre tam bukni, ninye si Epron birye taleamuk wa win dam noutamak, awamuk keil deiya, el si ara, Makpela keil deiya pum bisik dongoprik. Epron bira, Het yalanye, el si ara Zohar birye deiamuk mi atia.

10Keil deiya likamukak wa ara, Abraham birye, ‘Na kil Sarah dipmala ati, el nong bobuka dongopnaman’ tenen, dekamukba, sik Het yala nang arye, areamik wa ara, ani. Isak ap, Ismael ap arye, sik ni koproba Abraham dibukba, el nong bobirikce, akeil deiyok, Sarah weiamik sukumuk, weilbirik. 11Abraham akunum dibukopura, Allah arye Abraham el mi Isak binyak, kanye deiamukce, teleb-teleb kibuka melilamukba, telebuk winilamukce, mutuku si Ber-Lahai-Roi mutuku dam ulamuk.

Abraham el mi Ismael birye deiamuk mapu ati, nukuka sekeibik yupu

12Ura, ayupu ara, Sarah el melibuka pil don kil, Mesir mutuku kil, el si ara Hagar birye deibuk mi, Ismael biti nyapne. Ara, Abraham ap, Hagar ap arye, deiprik mi atia. 13Ismael nebukce, aminyan talak deiamuk mapu, elce dukdongobuka dadeipnin balamik nang sik si ara, ani. Ismael birye, min yuma koprop deibuk mi el si ara, Nebayot deibuk. Asukum ara, sik si Kedar ap, Adebel ap, Mibsam ap, 14Misma ap, Duma ap, Masa ap, 15Hadad ap, Tema ap, Yetur ap, Nafis ap, amapu nirya tonok-tonok deipnin balamuka ani, sirya koprop ara, el mi Kedema deibuk.

16Aninye sik si nyapmasin nang ara, Ismael birye deiamuk mapu atia. Amapu nirya ara, ninye yala deiyok nang ulamikce, sik asik ap, sik mutuku yuk-yuk talibuka ulamik. 17Ismael bira, keting tamun yupa weik, 137 tahun kam ulamuka ani, pia wisi akunum dayukopura, dibuk. Dibukba, Allah arye Ismael el kanye bobuka, el apu yapu dam bobiyuk.

18Ismael birye deiamukba, dadeipdanin yangalamika ani, aulamik nang, el mapu ara, Mesir mutuku dam bukni, mutuku si ara, atam Hawila mutuku, otam Asyur mutuku asukumak ulamik. Ara, Asyur mutuku bana ati, abisik banmana arye eilinyap mutuku atia. Sikda keting yangan tam ulamik bukni, sik du yapu do, sik yala nang bukni, sik yuk nang nirya ara, keting wekelbalamle tam ulamikce, ‘Lik’ tenen, yu kanye bolanauk ulalamik.

Isak birye deibuk mapu bitinye, sik si ara, Yakub ap, Esau ap ati, nyabuk yupu

19Ura, anyapnusin yupu ara, Abraham birye deibuk mi Isak, elce deibuk mapu ati lilipnamsine. 20Abraham birye Isak deibukba, Isak nepnin balamuka ani, keting tamun 40 tahun akunum ukopura, el kil Ribka dobuk. Ribka bira, Aram tamnye el si ara, Betuel birye deiamuk kilmu. Elda Aram yalanye bukni, mutuku si Padan-Aram ulamuk. Ribka el du koproba si ara, Laban ulamuk.

21Ura, Isak el kil Ribka bira, you kil ulamuka anya arye, ‘Na kil ara, mapu ton deiptue’ tenen, Isak birye, el kil ati Allah morolamuk. Morolamukba, Allah el si Yahweh kekebukce, Ribka biti melibukba, mi bobuk. 22Ribka mi bomuk talak ara, kwa bitinye mapu bomuka anya arye, akwa bitinye mapu arye, el mun pum bisik pikibuka donmarikba, Ribka birye, ‘Se, awinipmanil ning ara, yata deiyok arye upmanil do?’ tenen, Allah el si Yahweh ati morobukce, asipdeyuk.

23Asipdeyukura, Allah el si Yahweh arye, nyabuk. “Kume, aning ara, talye ati kume. An mun pum tam ara, ninye yala bitinye, sik ninye deiyok nang unmarake. Deipminyeura, anang bitinye ara, sikce deipriceba, dadeipdanin balamica ani, yala yuk-yuk unamak ninye babye, bokuka yuk-yukak unamake. Tonye birye deipnamle yala nang ara, mikip weik unamak bukni, tonye birye deipnamle yala ninye ara, mikip kume, binan asa unamake. Min yubuka deipnamalam mi arye, aminyan deipnalam mi ati, el amu tam bukuka, el melinanye bitonun unamle. Aminyan deipnalam mi ara, el du koproba deice tam deiyoknye atonun unamle.” Allah arye Ribka biti, ayupu laka nyabuk.

24Allah arye ayupu nyapmok touk, Ribka birye kwa bitinye mapu deibuk. 25Amapu bitinye deilinmok talak, min yubuka deibuk mi ara, ining bi potong, el nong bol deice weik uamuk. Wamuka ati, el si Esau nyabuka sisibuk.#25:25 Esau Ibrani yupu deice arye Esau deiyok ara ‘nong bol potong weik’ tenen, nyalamik. 26Ribka birye, min yuma deibuk mi, Esau deipmok talak ara, el weit aminyan mi arye, el du yan talipmokbuk deibuk. Aminyan deibuk mi arye, min yuma deipmok mi, el yan talibuka yanganmoka anya arye, el si ara, Yakub#25:26 Yakub Ibrani yupu deice arye Yakub deiyok ara, bitinye ulule. Bukni ton ning ara, ‘Yan talilulnye’ tenen, nyanyak. nyabuka sisibik. Ribka birye akwa bitinye mapu deibuk talak ara, Isak bira keting tamun yupa weik, 60 tahun akunum ubukura, wisi dayuk.

27Ura, amapu bitinye ara, nepnin balamdika ani, Esau bira, buru mutuku bana ap, buru mutuku kam ulul ning ona ap, weik kel bikna ap, ulamuk. Winilamuk bukni, Yakub tonok ara, bana kumnye, sik asik dam talye mangkau asauk ulamuk. 28Sik ni koproba Isak bira, bai mutuku mana obuka dalamak ning anyak, kanye pia deibuka, patalamuka anya arye, elda Esau binyak kanye deiamukce, ulamuk. Ulamuk bukni, Ribka bira, el mi Yakub binyak, kanye weik deiamukce, ulamuk.

29Tonok sum ara, Yakub bira sik aik pum unmokce, din ning dabuka kentininmokba, el du koproba Esau arye, pia bai mutuku kalikil binmoka ani, asik yayuk. Esau bira, din pia weik patanmokba, aik yayuk. 30Yayukopura, Esau birye, el weit koproba Yakub biti nyabuk. “Se, na weito, din pia teleb tenepmana ati, ance yupmalam ning ara, lukuka arepnilyame,” nyabuk.#25:30 yupmalam ning Yakub arye nyabuk ning ara, ining bi uamuka anya arye, Esau el si ton Edom nyalamik. Ara, Ibrani yupu deice ara, asi ‘Edom’ deiyok ara, ‘ining ning’ tenen, nyalamik. 31Esau arye, din pia patana weik patabuka ati, morobukopura, Yakub birye tamubuka nyabuk. “Yo, ayupman ning arepkitinye bukni, min yuma ara, nun ni koprop arye dipnamle talak bokuka arepnamkil ning ara, ‘Arepnamkine,’ nyabuka, nyalin yupu nyapniminyeura, aning dekna ati, na yupman din ning lukuka arepnukine,” nyabuk. 32Nyabukopura, Esau birye, “Weito, din ara, weik arye patanmanilba, dipmanto upmana ati, na ni koprop arye aminyan talak arepnamnil ning ara, mambul kum tenepne. Dipnyopura, kum dopropnamtinye atia,” nyabuk.

33Nyabuk bukni, Yakub arye tamubuka, Esau biti nyabuk. “Aning arepnukin bukni, ance, ‘Dipkoprop nun ni koprop arye, bokuka arepnamkil ning ara, an dem aryuk dopropnalame,’ nyabuka, nyalin yupu nyapnilam deice arye, din ning arepnukine,” nyabuk. Yakub birye nyabuka ati, Esau birye, el weit koproba arye, ‘Nyaplyame,’ nyapmok touk, nyalin yupu nyapdeibuk.

34Nyapdeibukura, Yakub birye, din ning bi kacang (kacang merah) yupmok ning ap, roti ap, bokuka Esau biti arebukura, din mek ap, aupmok ning ap dibukce, anyasik batakuka bai biyuk. Esau birye, ‘Aning urdem arepnamkine,’ nyabuk deice arye, el li koproba dipnamuk talak arepnamuk ning ati, ‘Na lik’ tenen, batakukce, malye ubuk.

Currently Selected:

Kejadian 25: EIPA

Highlight

Copy