Kejadian 24

Abraham el mi Isak birye, tonok kil el si Ribka dobuk yupu

1Ura, Abraham bira, pia daulamuka ani, pia wisi akunum dayuk. El ulamuk talak noutamak nirya, Allah el si Yahweh weika arye meliamukba, el winilamuk ning nirya ap, el taleamuk ning nirya ap, pia telebuk uamuk. 2Tonok sum ara, Abraham el aik pil don nang, sik deiyoknye ap, tonda anye birye, Abraham taleamuk ning nirya, kalikuka melina deiyoknye elti, Abraham arye nyabuk. “Kao, na abukmanak, an taruk na keil amu tam deipnilyame.#24:2 keil amu tam Ayupu nyabuk ara, sik Israel ninye arye, ‘Na nyapnun yupu dipkoprob winipnamap’ tenen, minop talak winilamik ati, nyabuk yupu. Ara, weik mambul nyalin yupu nyapnunilam ati, aning nyapkine. 3Nun ni koprop Allah, el si Yahweh ara, aning-aning nirya, im deice ap, tukwak mutuku nirya ap talilule. Allah el tonok ulirye, nun weik deiyoknye ulula anya arye, el si deice arye, nyalin yupu nyapnunilame. Ara, na mi Isak arye dopnamle kil ara, sik Kanaan tam ninye arye deiamice kilmapu noutamak arye, pia kum dopnalame.

4Ura, sik Kanaan mutuku ninye kan-kan unun bukni, na mi Isak birye, dopnamle kil moropnamana ati ara, Kanaan mutuku kum bukni, na mutuku koproba tamubuka bimince, na tam nang damuk morolbinalyame. ‘Aning ara, dipkoprob winipnamne,’ nyabuka yupu nyapdeipnilyame,” Abraham arye nyabuk.

5Nyabukura, el pil melina deiyoknye birye, tamubuka asipdeyuk. “Ati na nio, an mutuku kil moropneba, arepnicopura, akil arye nun aunmap mutuku tamubuka yangana ara, ‘Na like, na kum binamne,’ nyapnilyopura, yata wiripnamne do? Winiplyopura, an mi Isak dobuka, an min yuma ulalum mutuku bobinamne do, kum do?” nyabuka asipdeyuk. 6Asipdeyukura, Abraham arye nyabuk. “Kume, winina meme. Na mi dobuka, na ulamse mutuku bobana meme.

7Nun ni koprop Allah, el si Yahweh, elda im deice nirya talilula deiyoknye birye, na deiamnik mutuku noutamak arye dopropnukce, elce nyapnuk deice arye, na ni koproba asik bataksirye, amutuku Kanaan mutuku yase. Allah el si Yahweh arye, nyalin yupu nyapdeipnuk ara, nyapnukine. Ara, ‘Ance deipminba, ami elce deipliba, dadeipdanin balamica ani, aminyan talak unamak ninye ati, Kanaan tam amutuku-amutuku nirya arepnamne,’ nyapdeipnuke. Ati elce, el im deice pil donanye dopdeipliba, an melin ati menekuka banmalyebuk, melipkiliba, na ulamse mutuku noutamak arye, na mi Isak dopnamtu kil eipnalame.

8Eipdarumunyeura, akil arye, ‘Kume, nara Kanaan mutuku obana ara, na like, na kum binamne,’ nyabuka, yupu seklyopura, teleb uka. Winiplyopura, ance wini talak anyanmanilam nyalin yupu bataknalame. Kum tenipdenalyame. Aning nirya teleb bukni, na mi dopraka bimince, na minop ulamse mutuku bobana pia kume,” Abraham birye nyabuk.

9Nyabukura, sik amutuku ninye winilamik touk, el aik pil melina deiyoknye birye, el taruk Abraham el keil amu tam dongobukce, “Dipkoprop anyapmalam touk, batakna kumce winipnamne, yuk ton kume,” nyapdeibuk. 10Nyapdeibukopura, anye bira Abraham arepmok unta basam ap, pia teleb ning ayala-yala nirya ap, bobuka bisik panabuka banmok. Ara mutuku si, ‘Aram Naharaim binaman’ tenen, bisik banmoka ani, abisik noutamak ara, anyasik si ara, Nahor mutuku biyuk.

11Biyuk talak ara, inilongon talak, amutuku kilapu arye, ‘Mek puak mek kwebnamap’ tenen, yangalamik keting anya arye, tonok mek pu dam bulbiyuk. Ninye sik asik mitik otam bukni, elda buru tam mek pu damak, el boyanganmok unta basam 10 ton, asukumuk bukeibuk.

12Winibukce, Allah el si Yahweh ati, morobuk.

Na ni Allah, an si Yahweh ati moropmakine. Anda na deiyoknye Abraham arye si erekulul Allah, ance melipnutumba, ‘Isak dopnamtu kil eiptinye’ tenen, moropmakine. Tonda, na deiyoknye Abraham biti, ‘Bico tenebuka meliptume’ tenen, moropmakine. 13Ance dinmanilambuk, amek pu dam tikmance, amutuku nang arye deiamik kilmapu, ‘Mek kwepnuyap’ tenen, yanganuyake.

14Aning ati, winibuka moropmakine, na nio. Na teneipmana ara, ani. Narye amutuku kil ati, ‘An mek makau arye, mek kwebuka arepnutumba, diptinye,’ nyapnyopura, na ni Allah ance meliptumba, akil arye nati, ‘Telebe, akwepman mek diplyame,’ nyapnute. Tonda, ‘An boyanmalam unta basam babye ati, mek kwepdeipnukine,’ nyapnutue. Na nie, ayupu atonun ton nyapnutu ura, narye bikeiptinye. Ara, ‘E, akil tonok Allah arye, Isak dona ati, akunum wibuk kil ara, anye’ tenen, moubuka biktinye. Na ni Allah, anyapman touk, winipnutum toura, adeice arye, ‘E, na deiyoknye, na ni Abraham ati, bico tenepmalce, melipmale’ tenen, biktinye.

15Abraham el aik pil dona deiyoknye birye Allah ati, ayupu nyabuka, tuba moronmok talak ara, tonok kil el si ara, Ribka yayuk. Ara, amutuku ninye arye, mek kwelamik mek makau weik ning, el si ara buyung, el takunya deice takubuka boyayuk. Akil Ribka bira, Abraham el weit koproba, Nahor birye domuk kil, Milka birye deiamuk mi, el si ara Betuel birye, deiamuk kilmu bira ara, ani. 16Ura Ribka bira, urasin pia teleb koprop kil ulamukce, ninye min kum domika anya arye, el ap, sal ap, min neika kum malamik. Wel kil koprop ulamuk. Ribka arye, amelinanye bukmokak, duknubuka biyukce, mek pu dam binuka mek kwebukce, tuba tamubuka welenmok.

17Welebanmokbuk, apil melinanye birye, minopce obinuka eprapdarikce, nyabuk. “Akilo, ance kwepmalam mek mitik anun arepnutumba, diptinye do?” nyabuka morobuk. 18Morobukba, akil arye nyabuk. “Telebe, na nio. Ur diplyame,” nyabukce, el weik mek makau el takunya deice deipmok ning dobuka, el taruk arye talibukce, anye biti mek arebuk.

19Arebukopura, ayupu ton dukdongopbuka nyabuk. “Na nie, an boyanmalam unta basam, sik dina ati, mek tonap kweipnirye arepneba, sik patapmala ati diptinge,” nyabuk. 20Nyabukce adiparyuk, el weik mek makau dobuka, unta basam dipnuyik ati, mekwen deipmantoak dikdongobuk. Winibukce, tuba tamubuka mekwen dam, bikbik abuka biyukce, ‘Unta basam nirya weika arye dipnamak’ tenen, mek weik tonap kwebuka boyayuk.

21Mek kwebuka dikilyanganmok talak nirya ara, anye birye yupu tana kum talye kanupdongobuka bukmokce, akil ati dinmok. Ara, ‘Na ni koproba Allah, el si Yahweh arye melipmanilba, akil ara, Abraham el mi Isak dopmanto kil akunum do?’ tenen, dinmok.

22Dinmokba, el unta basam nirya arye, sik patanmok touk akunum dibikopura, ‘Akil arepnun’ tenen, pia teleb arin ning, dekna weik ning, emas arye puturubuka memamik ning ara, dobuka talibuk. Ara, akil ati arepneba, ‘El upurya dongopnamle’ tenen, kintinibuka talibuk. 23Talibukce, akil ati asipdeyuk. “Anda yatanye birye deipkuk kilmu ak, ulyam do? Tonda moropnukin do? An ni koproba aik ara, lo aupmalyopura, na maptinye do, kum do? Tonda, na unta basam keriknamtinyak ara, lo ton aupmal do?” nyabuka asipdeyuk.

24Asipdeyukbuk, Ribka arye nyabuk. “Kume, na ni bira Betuel ulule. Elda, Nahor birye dobuk kil, Milka arye deiamuk mi anya,” nyabuk. 25Nyabukce, ayupu ton dukdongobuka nyabuk. “Na ni el aik ara, lo aupmala anya arye, anda el aik malbana telebe. Tonda, an unta basam kirikmantoak ap, sik din ning ap, weik aupmala anya arye, aning babye teleb uka,” nyabuk.

26Nyabukopura, Abraham el aik pil melinanye birye, el kisok kanupdongobuka, Allah el si Yahweh ati, el si erebuka kibuk. 27Kibukce, ayupu nyabuk. “Na ni Allah, an si Yahweh ati, si erepkine. Anda na deiyoknye Abraham ara, an diamuk taliplumba, an si erekulule. Ance Abraham biti, ‘Winipnamle,’ nyapdeipmamu touk, pia teleb ubuka akunum wininmalame. Tonda, Abraham ati, bico tenepmince, elti, teleb kililyame. Tonda na nio, anda Yahweh arye melipmanilama deice arye, na deiyoknye Abraham, el tam ninye, sik aik akunum yanmane. Aning nirya ara, anca,” nyabuka Allah el si Yahweh#24:27 Yahweh – Allah el si koproba ara, Yahweh ulule. Indonesia Alkitab noutam ara, Allah el si Yahweh ulul sukum ara, TUHAN sekenyake. Ayupu bikna ati ara, laka nyan yupu nomor 49 dipdelulume. ati, el si erebuka kibuk.

28Anye birye, Allah si erenmok talak ara, Ribka bikbik abuka, el lin aik biyukce, anyaik ninye nirya ati, awininmok ning nirya laka nyabuk. 29Ura, Ribka el du koproba si ara, Laban ulamuk. Laban arye, anye mekwen dam bukmokak bikbik abuka dilbiyuk. 30Ara, anye birye asum arye, Ribka biti arepmok ning, el upurya ap, el taruk dongopmuk ning emas ap, eipmokce, tonda Ribka arye, laka nyapmok yupu ton kekepmokce, ‘Anye eipnun’ tenen, minopce el bukmokakuk biyuk. Biyukce, anye el unta basam dam tikmoka ak, eibukce, ayupu nyabuk.

31“Kao, anda Allah el si Yahweh arye, teleb kilikululnye ulyame. Yata ati, asukumuk tuba tikmalam do? Nun aik neika mapnamaba anya arye, na aik akunum kintinipmakine. Tonda, an boyanmalam unta basam kiriknamalamak ton kintinipmakine,” nyabuk.

32Laban birye nyabukba, anye sik aik biyukura, el ap yanganmek nang arye, bona weik kitibuka, unta basam balye tam koupdongopmek ning nirya, lopdongobikce deibikura, anyaik nang arye, sik unta basam manak ati, maning dobuka deibik. Tonda unta basam sik din ning ton libuka boyanmek ning, deibik. Ura, anye ap, el melin nang ap, bisik pera weik yanganmeka ati, anyaik nang arye, ‘Sik yan bene dupmok ning, mek iliknuyak’ tenen, mek ton kwebuka arebik.

33Aning nirya akunum winibikopura, anang sik dipnuyika ati, din ning boyayikce, sik bukmekak urasin dam kintinibuka deibik. Deibikura, Abraham el pil melinanye birye nyabuk. “Kume, amapo. Min yuma na yupu akunum nyapnyopura, aminyan ara, din ning dipnamne,” nyabukura, sikce, “Telebe, ati an tenepmalam yupu ara, nyapsiminyeba, kekepnuyabe,” nyabik.

34Nyabikopura, anye birye ayupu nyabuk.

Kume, amapo, nara Abraham, el aik pil melinanye unune. 35Allah el si Yahweh arye, na deiyoknye Abraham biti, pia weika arye meliamukba, wini talak ara, Abraham arye aning-aning weik talilule. Elda bona talinanye ulule. Allah arye elti, areamuk ning ara, ani. Domba basam ap, sapi basam ap, dekna weik ning perak ap, emas ap, pil melin nang ap, kilapu ap, unta basam ap, keledai basam ap, weik areamuk.

36Na deiyoknye birye domuk kil ara, pia wisi akunum danamuk bukni, sal mi tonok deibuk. Abraham arye taleamuk ning, ayala-yala nirya, el mi tonokuk arebuk. 37Tonda, na deiyoknye birye, nati nyapnuke. “Nyalin yupu nyapnunilyame. Ara ani. ‘Na mi dopnamle kil morolbinamnilam bukni, na Kanaan mutuku noutamak ununak, Kanaan nang arye deibik kilmapu, asukum ara kum moropnalyame. 38Ara kum bukni, na mi dopnamle kil ati morolbinalamak ara, na ni el tam nang, tonda, na yala nang koprop, sik dam morolbinamnilyame,’ nyapnukce, ‘Dipkoprop winipnamne,’ nyabuka nyapnilyame,” nyapnukba, narye nyapse.

39“Na nio, an mi arye dopmanto kil moropneba, teleb nyapnicopura, akil arye, ‘Kume, an Kanaan mutuku kum binaname,’ nyapnilyopura, yata wiripnamne do?” nyabuka asipdesibuk, Abraham arye, nyapnuke. 40“Na ni koproba Allah, el si Yahweh, el yupu moubuka bikamsirye, dobolbalamse Allah ara, el im deice pil donanye, malaikat dopdeipliba, an ap melibuka binamdume anya arye, amalaikat arye melipkiliba, na mi el kil morolbinalam ning ara, telebuk upnamkile. Ara, ance na mutuku yala nang koprop ap, na ni el tam nang ap ati, kil moropminyopura, Malaikat arye melipkiliba, telebuk upnamle.

41Anyapmakin touk, na tam nang dam bimince, moropminba, sikce, ‘Kume, kil kum arepnusiabe,’ nyabice babye, telebe. Narye, ‘Winipnalyame,’ nyapmakin touk, akunum piripdenmalyama anya arye, aning ara teleb uka. Winibuka nyapkicopura, nyalin yupu nyapdeipmanilam ning ara, tenena kume, dauaplye.” Abraham birye, nyapnuke.

42Ura arup ara, anggun mek kwelulumak, mekwen dam yanmanurye, na ni Allah, el si Yahweh ati nyapmanue. Winipnurye, Allah ati moropnue. “Na ni Allah, anda na deiyoknye Abraham arye, si erekulul Allah, ance melipnutumba, ‘Isak dopnamtu kil eiptinye’ tenen, moropmakine. 43Ance dinmanilamba, amekwen dam tikmance, amutuku nang arye deibik kilmapu, ‘Mek kwepnuyap’ tenen, yanganuyake. Aning ati, winibuka moropmakine, na nio. Na teneipmana ara, ani. Narye amutuku kil ati, ‘An mek makau arye mek kwebuka arepnutumba, diptinye,’ nyapnyopura, na ni Allah, an si Yahweh arye meliptumba, akil arye nati, ‘Telebe, akwepman mek diplyame. Tonda, an boyanmalam unta basam babye ati, mek kwepdeipnukine,’ nyapnutue.

44Na nio, ayupu atonun nyapnutu ura, narye kel biktinye. Ara, ‘E, akil tonok, Allah el si Yahweh arye, Isak el kil dona ati, akunum wibuk kil ara, ani’ tenen, bita biktinye. 45Allah ati, na talima pum tuba moronmanu talak ara, anggun kilmu Ribka arye, el weik mek makau takunya deice takubuka yanmoe. Yanmonye, mekwen dam koulukuka, mek kwebuka tuba tamubuka yanmoba, narye, “Dipnaman mek arepnilyame,” nyabuka moropmanue.

46Moropmanuba, akil arye nyapmanue. “Telebe, na nio. Ur diplyame,” nyapnurye, el weik mek makau, el takunya deice takubuka bobanmoe. Tonda, el taruk arye talipmonye, nati mek arepnue. Arepnurye, ayupu ton dukdongopbuka nyapnue. “Naie, an boyanmalam unta basam, sik dina ati, mek tonap kwebuka, arepneba, sik patapmala ati ara diptinge,” nyapmoe. Ati narye mek dipmanue. Tonda, na unta basam nirya arye dipmangue. 47Sirya winipnopura, narye elti, asipdenmanue. “Anda yatanye birye deipkuk kilmu, ulyam do?” nyabuk. Nyabuka asipdenmanuba, Ribka birye nyapmoe. “Kume, nara Betuel el kilmu ara, Nahor dobuk kil Milka arye deiamuk mi na ni ulule,” nyapnue. Winibuka nyapnua ati ara, narye emas ap, upurya dongolamak ning ap, taruk duk dongolamak ning cincin ap, akil ati arepmanue.”

48“Nyapnuba, narye, ‘Allah el si Yahweh, elti, kibuka si ereipnun’ tenen, nong kanupdongopnurye, na deiyoknye Abraham arye si erelul Allah, el si Yahweh ati, kibuka si erepmanue. Ara, ‘Yahweh arye melipmanuba, Abraham el weit koprop arye deiamukba, deiamik kilmu eipsirye, winira Abraham el mi arye dopnamle’ tenen ati, na kanye deipne. 49Ati ara, anggunce na deiyoknye Abraham ati, ‘Telebe, el patalye touk, bico tenepmunce, akil arepnuyabe,’ tenepmunyopura, aninguk laka nyapnululume. Akumopura, ‘Kume, nun kilmu kum arepnuyabe,’ tenepnumunya babye, aninguk nyapnululume. Nyapnumunyopura, tuba tamubuka tonap teneipnirye, ‘Abisik binaman do? Yuk bisikuk binaman do?’ tenenamna atia,” nyabuk.

50Abraham el pil melinanye birye nyabukba, Ribka el du koproba Laban ap, el li koproba Betuel ap arye, nyaprik. “Kume, nun kanye ara, aning laka nyapmasilam nirya ara, dipkoprob Allah, el si Yahweh arye melipmakilaba, el tenyamuk touk akunum kiplipmasila ati, nunce yata nyaptinimnye do? ‘Aning teleb, aning malye’ tenen, kum wibuka nyapnuname. Allah el kanye arya. 51Nun kilmu Ribka aunmal atia. Allah el si Yahweh arye tenyamuk touk, ance dopraka bimince, arepminba, Isak arye dopnamle. Aning ara teleb uka nyapname,” nyaprik.

52Nyaprikba, Abraham el pil melinanye birye, sik nyapmarik yupu kekebukce, adiparyuk, ‘Allah ati, si ereipnun’ tenen, el nong kanupdongobukce, Allah el si Yahweh ati, el si erenmok. 53Winibukopura, elce kitibuka boyanmok ning, sikti urdem arena ati, dekna weik ning emas ap, perak ap, pia teleb baju ap dobukce, Ribka ati urdem arebuk. Arebukce, aning atonun, Ribka el du koproba ap, el lin ap ati, dekna weik ning urdem arebuk.

54Arebukura, sik mutuku arye yanmek nang, el ap, el melin nang ap arye, din mek ning ara, sirya dibikce, anyaikuk alukunyan mapmek. Mapmeka, berekukopura, elce anyaik nang ati, “Telebe, ‘Na deiyoknye, el asik tamubuka binun’ tenen, kintinipmana anya arye, ‘Telebe,’ nyapnumunyeba, binune,” nyabuk.

55Nyabuk bukni, Ribka el du koproba ap, el lin ap arye, “Kume, nun kilmu ap, nun ap, tagu sum tonap neika unamabe. Atalak akunum uplyopura, anggun bana ara, teleb uka,” nyaprik. 56Nyaprikba, anye birye tamubuka nyabuk. “Se, amapo. ‘Na ni koproba, el dam adiparyuk binun’ tenen, akunum kintinipmana ati, tonda Allah el si Yahweh arye melipmanuba, el tenyamuk touk, akunum winipmasila ati, ‘Telebe dabilyame,’ nyapnutum toura, adiparyuk binune,” nyabuk. 57Nyabukura, Ribka el du koproba ap, el lin ap arye nyaprik. “Ura, ati akil yukubibiba, yalyopura, elce teneplye touk, teleb uka,” nyaprik. 58Nyabuka yukuprikba, yayukopura, asipderik. “Akilmuo, anye ap binamarum do?” nyabuka asipderikba, Ribka arye, “Telebe, na ap, nun binamanama ara, teleb uka,” nyabuk. 59Nyabukura, sik amutuku nang arye, Ribka ati dopdeibikba, el melina kil ap, Abraham el pil melinanye ap, elti melibuka yanamik nang ap, neika biyik.

60“Telebe, dabilyame,” nyanmek talak ara, el Ribka biti, ‘Allah arye teleb kipdeipnamle’ tenen, ayupu nyapmek. “Nun kilmuo, nun kanye ara, ance deipminyeba, dadeipdanin balamica ani, daunamak ninye weik, yupa pia weik, beribu-ribu unamake. Anti ara, ‘Nun capu kil,’ nyanamak ninye weik upnin bakirye, sikti, ‘Opnamak ninye nirya ara, obikirye, sik asik nirya dopropnamaka’ tenen, patasulule. Ara, an mapu arye wininamak ati nyababe,” nyapdeibik. 61Ribka el tam nang arye nyabikopura, Ribka ap, el melin kilapu ap, kintinibikce, sik unta basam balye tam welebuka bukikce, Abraham el pil melinanye ap, bisik panabuka banmek. Ati anye birye, Ribka bobuka, ‘Abraham ulamuk mutuku binuyap’ tenen, amutuku batakuka bobiyuk.

62Ura, Atalak ara, Isak bira Negeb tam noutamak ulamuka anya arye, el li dam tuba tamubuka biyukce, mutuku si, Ber-Lahai-Roi mutuku batakuka bisik banmok. 63El li dam yanuka unmoka ani, tonok sum sintam ara, ‘Na yuk Allah ati tenenamne’ tenebukce, tonok wa win dam binuka bukmok. Bukmokce, kisok erebuka otam dildeyukce, unta basam bisik noutamak yanganmokba, eibuk.

64Ura, asukumuk bukni, Ribka babye, unta basam balye deice bukuka yanganmokce, kisok erebuka Isak bukmok tam dipdeyukce, Isak eibuk. Eibukce, el unta basam deice bukmokak arye, sakwetebuk. 65Sakwetebukce, Abraham el pil melinanye biti asipdeyuk. “Kao, omutuku noutamak arye, nun tam yanganmalanye bira, yatanye do?” nyabuka asipdeyukura, apil melinanye birye, tamubuka nyabuk. “Kume, anye bira talinye kume. Elda, na deiyoknye unulule,” nyabuk. Nyabuka laka nyabukura, amutuku kilapu arye winilamik touk, Ribka arye, ‘Na dopnamnilanye birye, min kum dopmanilye talak ara, na urasin eipnilyak’ tenen, Ribka el kisok deice kalupmok baju arye, el urasin lelipdongobuk.

66Sik nirya akunum epdayikopura, Abraham el pil melinanye birye Isak biti, anoutam wininmok ning nirya laka nyabuk. 67Aminyan talak ara, Isak birye Ribka dobukce, el lin aik ton neika biyik. Isak birye, Ribka akunum dobukopura, pia bico tenebukce, kanye deibuk. El lin Sarah diamuka ati ara, mambul kanye bopmuk bukni, Ribka dobuka deice arye, el kanye kwa dibukba, kanye deibuk.

Currently Selected:

Kejadian 24: EIPA

Highlight

Copy