Kejadian 23

Abraham el kil Sara dibuk yupu

1Sara bira, keting tamun yupa weik, 127 tahun kam tuba ulamuka ani, dibuk. 2El dibuk mutuku si ara, Kanaan mutuku noutamak bukni, Kiryat-Arba mutuku, tonda amutuku bukni, si ton Hebron mutuku ton nyalamik. Dibukba, Abraham arye, ‘Se, na kil dipmanile,’ tenebukce, ikin kanye bobuka, engenmokce, malye yupu nyanmok. 3Malye yupu nyabuka engenmoka ani, akunum engebukopura, Abraham arye, el ulamuk mutuku taleamik ninye, sik si Het ninye ati nyabuk.

4“Kume, na ni kayapo, anggun mutuku noutamak unun bukni, nara yuk mutukunye, ninye asik nang ununa anya arye, na tuku kume. ‘Na kil tuku luknaman’ tenen ati, anggunce, “Asukumak luklyame,” nyapnutumba, anggun tuku dektinirye, na kil tuku luknamane,” nyabuka morobuk.

5-6Nyabuka morobukopura, sik Het ninye arye, tamubuka nyabik. “Kume, na nio, anda nun noutamak neika unyaba ara, ‘Elda weik deiyoknye bitonun,’ tenekinyabe. Ati, nun ninye tuku luknak do, keil deiya pum bisik ninye weinyabak do, pia teleb ning babye, ‘Aning ara, telebe,’ nyapmalam touk, talye mangkau arye doplyame. An kil dipmala ati, luknamalama ara, nun aunyab ninye noutamak nirya, tonoknye babye anti, ‘Kume,’ kum nyapkitibye. Ance tenepmalama ara, teleb uka,” nyabik. 7Nyabikopura, Abraham tikukce, aHet ninye sik si erena ati, el kisok kanupdongobuka, ayupu nyabuk. 8“Anggunce nati, ‘El dipmo kil, el nong weinak ara, nun mutuku noutamak teleb uka,’ tenepmanulum ati, na nyapnusin yupu kekepnululume. Ara, Soar el mi Epron biti moroptumopura, na tenepsak ara, nuknutuba dektinye. 9Ara Epron birye, talilul wa kup-kup tam ara, tonok keil deiya el si ara, Makpela keil deiya aubuke. Akeil deiya tenepse ati, anggunce, ‘Epron, ance yo bok abarye tenepmalam touk, nyapdeiptumba, Abraham arye deknamkile. Mitik anun babye kum bataknamkile, nirya arepnamkilca,’ nyabuka, na melin ati morolbitume,” nyabuka, Abraham birye, sik Het ninye ati morobuk.

10Nyabuka morobukba, sik nirya, Epron el mutuku biyikce, morobikba, Epron bira, sik mutuku poka bublan dam, el ap el mutuku nang ap, neika bukmekce nyabuk. Ara, sik Het ninye kekenmekak arye, ayupu tamubuka nyabuk. 11“Kume, na nio. Ance na deiyoknye tenepmalam keil deiya ap, tonda, ataleamse wa nirya ap, urdem nukine. Anyapmakina ara, na mutuku nang nirya babye, sik ton kekenmaniyaka ati ara, an tenepmalam touk, an kil tuku luknulyame,” nyabuk.

12Nyabukura, Abraham birye tuba tamubuka tonap, ‘Amutuku ninye si ereipnun’ tenen, el nong kanupdongobuka, ayupu nyabuk. 13Ara, amutuku ninye nirya kekenmekak arye, elce Epron biti nyabuk. “Kume, amio. Na nyapnun yupu kekepnutum do? Awa tuku nirya, el dekna aupmal touk arepkinirye, dekitinye. Na arepnukin yo bok doproptumopura, narye na kil dipmala ara, akeil deiya pum tam weipnamne,” nyabuka morobuk.

14-15Nyabukura, Epron birye tamubuka nyabuk. “Naie, ance na deiyoknye ulyame. Na nyapnukin yupu kekepnilyame. Awa tuku el dekna ara, dekna weik ning perak, 4.5 kilo nukuka arepnamniting bukni, na ap, an ap ara, kanye talima dukdongobuka, melilan nang unyama anya arye, adekna ning ara, ‘Mambul,’ kum tenepnulame. Aning arepnimince, atuku dopropmince, an kil dipmala, deipmalama dopropmince, ur weilbana teleb uka,” nyabuk.

16Nyabukura, Abraham birye, Epron nyapmok touk, dekna weik ning, el si ara perak kiplipdebuka, 4.5 kilo kibukopura, arebuk. Ara, sik kekenmek ninye nirya arye kekepmek touk, tonda atalak, amutuku dekna deiyok nang arye, nukuka delilamik touk, 4.5 kilo nukukabikce, libuka Epron biti arebuk.

17Winibuka arebukaura, Mamre mutuku noutam bukni, Epron birye taleamuk wa ap, awa noutam uamuk keil deiya ap, awa kup-kup tikamuk yo nirya ap ara, ‘Aning nirya, Abraham el ning tenenamap’ tenen, sikce surat sekuka, Abraham bak arebik. 18Asurat deice, Abraham el si ap, sekdeibik ning ara, duknuna kumce, amutuku nang yanuka, antanabuka domik poka bublan dam bukmekce, kekenmek ninye nirya arye eibik.

19Anirya akunum winibikopura, Abraham arye, el kil Sara, el nong dobuka, Makpela mutuku noutam, wa noutamak uamuk, keil deiya pum tam weibik. Amutuku ara, Kanaan tam noutam bukni, mutuku si ara, Mamre mutuku, tonda Hebron mutuku si nyanyake. 20Anirya winibuka anya arye, sik Het ninye arye, Abraham biti awa ap, akeil deiya ap arebikce, ‘Abraham el kil weina ati talipnamle mutuku’ tenen, surat ap (akte hak) sekuka arebikce, el si ton sekdeibik.

Currently Selected:

Kejadian 23: EIPA

Highlight

Copy