Kejadian 22

Allah arye Abraham biti, ‘Pia dib tenelul do, kum do?’ tenen, asipdeyuk yupu

1Abraham bira, amutuku pia daulamuka ani, aminyan talak ara, Allah arye, ‘Abraham bira nati, pia dipkoprob tenelamnil do? Na nyapnye touk aninguk winipnamnil do, kum do?’ tenen, asipdeyuk. Asipnamok ati, yukubuk. “Abraham, Abrahamo,” nyabuka yukubukba, Abraham birye, “Naie, na aunmane,” nyabuk. 2Nyabukura, Allah arye nyabuk. “Ura, ance deiplumce, ‘Na mi koprop’ tenen, pia bico tenelyam mi, an mi tonok Isak bobuka, Moria mutuku dup bobinulyame. Bobiminyeura, narye, ‘Amutuku dup asukumak,’ nyapnamkin sukumuk, na si erena ap, na arena ap ati, an mi opmince, arepnamnilyame,” nyapdeibuk.

3Nyapdeibukba, Abraham mapmoka, berekukopura, ‘Abasam deice buknirye, mutuku dup binaman’ tenen, el keledai basam balye tam bung ning deibukce, kintinibuk. Kintinibukce, el pil melin nang bitinye ap, el mi ton Isak ap banmek. Tonda, ‘Na mi opnyopura, Allah el arena ati, uku seknirye, na mi el nong uku dapniba, uku dipnamale’ tenen, uku seknamuk yo ton, wiribuka kwangnibuka deibuk. Yo kwangnibuka kintinibukopura, ‘Allah arye nyapmanilak binamap’ tenen, el ap, anang ap, Isak ap, neika bisik panabuka banmek.

4Panabuka bisik mapnin banmeka ani, like winilye sum arye, Abraham mabuka dipdeyukce, Allah arye nyapmok sukumuk, akunum eibuk. Otam mitik pera arye eibuk. 5Eibukopura, el pil melin nang bitinye ati nyabuk. “Anggunda, na keledai basam kalikuka asukumuk unmarumunye buk, na ap, na mi ap, nun yuk omutuku binuname. Obinimirye, Allah el si erepnimnyopura, tuba tamubuka asukumuk yanamaname,” nyabuk.

6Abraham birye nyabukba, wiribuka, boyanmik yo arebukba, Isak birye takubuka boprobuk. El Abraham ara, parang ap, uku ap, bobuka banmok. Sik bitinye arye, bisik banmarikce, Isak birye el li biti, asipdeyuk. 7“Naie, nun uku ap, yo ap bobuka banmanam bukni, Allah el si erena ati, obuka kwalipnamanam domba mi ara, dan do? Uku sekuka uku dapnamanam domba mi ati nyapne,” nyabuka asipdeyuk.

8Asipdeyukura, Abraham birye tamubuka nyabuk. “Yo, na mio, Allah el si erena ati, uku dapnamanam domba mi ara, nun ni koprop Allah, elce arepnamasile. Aning ara, tenena kume, na mio,” Abraham arye, Isak biti nyabukce, sik tuba bisik banmarik.

9Allah arye Abraham biti, “Asukumuk binamalyame,” nyabuka, lak nyapdeipmok sukumuk birik. Birikopura, Abraham birye, ‘Allah el arin ning adeice deipnamane’ tenen, keil dobuka, yangabukce, kintinibuk. Kintinibukura, sik boyanmarik yo ton dobuka, akeil yangapmarik deice deibukura, el mi Isak dobuka, tapu koubukce, Isak babye akeil yangapmok deice mapdeibuk. 10Mapdeibukce, ‘Na mi Isak opnun’ tenen, topnong dobuka, taruk ereptalibuk.

11Taruk ereptalibuk bukni, Allah el si Yahweh arye, im deice pil donanye, Malaikat tonoknye dopdeibukba, im deice arye, Abraham biti yukubuk. “Abraham, Abraham,” nyabuka yukubukba, Abraham birye tamubuka, “Na aunmana atia,” nyabuk. 12Nyabukura, Allah arye Abraham biti, nyabuk. “An mi ona meme. An mi ara, tonok ulul ati, ance, ‘Kume, elda na mi koprop ati, Allah arye nyapnila babye, kum arepnamne’ tenen, kum batakmalamce, ‘Ami opnun’ tenen, kintinipmalam deice arye, pia moubuka dipkoprob kel bikmakine. Anda, ‘Allah ara, weik mambulnye anya arye, el siuk erebuka, el nyanilye yupu nirya kekenamne,’ tenenilyamnye ulyama ak, kel bikmakine,” Allah arye, Abraham biti nyabuk.

13Nyabukopura, Abraham eibukce, tonok domba basam yim tikmokak eibuk. Ara, domba basam yim ara, el kisok deice yang belyamuk ning arye, tirmangka weiyang-weiyang kan-kan kwarepdongobukba, binmanto kum ati, atikmokak eibuk. Aning eibukopura, obinuka, adomba basam yim dobuka, obukce, Allah el si erena ati, keil pala deice deibuka, uku dabukba, uku arye sirya dibuk. El mi Isak ara, lopdeibuk. 14Aning nirya winibuka ati, Abraham birye, amutuku si ara, “Allah el si Yahweh arye, nun patasulul ning aresulule,” nyabuka si dobuk. Abraham birye nyapdeibuk touk, wini talak babye ninye nirya arye tuba nyanyake. Ara, “Nun ni koproba Allah, el si Yahweh, el mutuku ara, nun patasulul ning aresulule,” tuba nyanyake.

15Ura, Abraham birye, amutuku tuba pil dolamuk talak ara, Allah el si Yahweh arye, im deice pil donanye Malaikat dopdeibuknye birye, tonok talak arye, Abraham biti yukubukce, nyabuk. 16Nara Allah, na si Yahweh arye nyapkine. “Na nong ap, na si deice ap arye nyapkine. An mi tonok ulul bukni, ance, ‘Na mi ara, tonok ati kum opnamne,’ kum tenepmomce, na yupu batakana kumce, na nyapmakin touk akunum winipmalama ati, ayupu ton nyapkine.

17Ara, pia dipkoprob nyapkine. Narye anti, pia teleb kipdeipkiniba, ance deipminyeba, aminyan elce deipliba, dadeipdanin, balamica ani, aminyan talak unamak ninye ara, yupa pia weik unamake. Ara, lukunyan talak im deice kurya, pia kum nukmanto tikilamle touk, tonda weik laut mek wininga, pia weik tonok-tonok nukmanto kum ulamle touk, an mapu pia weik upnin banamake. An deipkirik danin binamak ninye ap, ara an yala nang, aminyan talak unamak ninye arye, yuk asik nang obuka sirya dakikirye, amutuku alubuka dopropnamake. Ara, yuk mutuku nang arye, ‘Abraham el deipkirik danin binamak ninye ara, obuka sirya daknamap,’ tenepnamak ninye ati, sik asik nirya, an deipkirik danin binamak ninye arye, dopropnamaka ati, nyapkine.

18Tonda, ance deiplum mi arye deipliba, dadeipdanin balamica ani, pia dodeipdanin binamak nang ati, narye teleb kipdeipnamne. Teleb kipdeipnyopura, anang arye dodeipdanin balamica ani, aminyan deipnamak nang deice arye, mutuku sirya, im sirya nirya, unamak ninye ati, teleb kipdeipnamne. Deiyok ara, narye nyapmakunuba ance, na yupu kekemomce, aninguk winipmalam ati, ayupu nyapkine,” Allah arye, Abraham biti nyabuk.

19Nyabukura, Abraham kekebukce, sik bitinye amutuku batakuka, Abraham el pil melin nang bitinye, talye daunmarikak tamubuka birikura, sik nirya arye, Bersyeba mutuku tamubuka banmek. Biyikopura, Abraham bira, Bersyeba mutuku noutamak ulamuk.

Abraham el weit koproba Nahor birye, deibuk mapu ati, nyabuk yupu

20Ura, sik daulamik bukni, aminyan talak ara, yuk nang arye Abraham biti, el dam yanuka laka nyabik. “Naie, an kwit el kil Milka birye, mapu akunum deibuke. Ara, an weit koproba Nahor dobuk kil atia. 21-22Sik amapu si ara ani. Min yuma deibuk mi, el si ara Us, aminyan arye, el weit koproba Bus deibuk. Tonda winilinye bira, Kemuel ap, (ara Aram deipnamuknye) Kesed ap, Hazo ap, Pildas ap, Jitalap ap deiamukce, sirya koprop ara, Betuel deibuke,” nyabuka laka nyabik.

23Ura, Milka birye, Abraham el weit koproba Nahor dobukce, neika ulamdika ani, amapu nukuka, pinbarye deiamuk. Betuel nebukce, aminyan talak el kilmu, el si ara Ribka deibuk. 24Tonda, Nahor birye, yuk kil ton dobukura, akil el si ara, Reuma arye mapu ton deiamuk. Akil el mapu si ara ani. Tebah ap, Gaham ap, Tahas ap, Makha ap deiamuk.

Currently Selected:

Kejadian 22: EIPA

Highlight

Copy