मर्कुस 7
7
लाम्फाको चलनको बारेता बिद्या
(मत्ति १५:१-९)
1यरुसलेमसो लोका फरिसिगेलाइ रो धरममास्टरगेलाइ इसुको कोरबितिङ जोम्हि। 2कालाउ एम्बालाइ इसुको आधेमि चात्यागेलाइहेङ खुर माझासिङ चातेङहिका तिङहि। 3हाइपानु फरिसिगेलाइ रो झाराङ यहुदिगेलाइ खालसोङ चलितेङलोका चलन मानितेङ एम्बालाइ खुर माझासिङ उम माचाखे। 4बाजारसो लोकान्हुसो बुङ एम्बालाइ चिउतेङ भुअ्तेङ ताइमिहेङ माचोख्याइसिङ एम्बालाइ हाइ दोङ माचाखे, कालाउ बो हेन्जाङ चलनगेलाइ बुङ मानिखे, जिसिकाङ: थालि, बाति, तासाला भान्दा बुङ मान्झेतेङ माचोख्याइसिङ माचालाइखे।
5कालाउ फरिसिगेलाइ रो धरममास्टरगेलाइ इसुहेङ हिअ्हि, “नाङको चात्यागेलाइ आबाखालको ताअ्पिका चलनहेङ मामानितेङ हाइपालि खुर माझासिङ चाखे?” 6इसु एम्बालाइहेङ दोअ्हि, “यसैया आगाधुइकाको लेखेका इदोइ काथा नेलाइ चिम्काटागेलाइदोफा जातिङकोङ मिलिखे:
‘इदोइ जात्यागेलाइ कासेहेङ नुइहोइ खिनिङ मान पाखे,
कालाउ बुङ एम्बालाइको कोन्धाङ कासो हेन्जाङ दुरे हि।#यसैया २९:१३
7एम्बालाइ बित्थाता काङको उपासाना पाखे,
कालाउ बुङ एम्बालाइको बिद्या द्याङगेलाइको धिरपाका बिधि खिनिङ हि।’
8“नेलाइ परमेस्वरको हुकुमहेङ लाअ्तेङ द्याङगेलाइको चलन कि मानेसुखेना।”
9इसु एम्बालाइहेङ आरोङ दोअ्हि, “नेलाइ ताइको चलन मानेलि हेथे जालपातेङ परमेस्वरको हुकुमहेङ आलटाल पासुखेना। 10हाइदोनु मोसा दोअ्का हि: ‘ताइको आबा आमाइहेङ मान पासु, जाइ आबा आमाइहेङ मारेम्का पाकालाइहेङ सेअ्लिदोङगोयाङ।’#दामालाअ्का २०:१२; २१:१७; नियम ५:१६; लेबि २०:९ 11हिदिङ द्याङ ताइको आबा आमाइहेङ ‘कासो निङलि गोइका भेटि इङको गोताङ परमेस्वरको मिङता पिहोइका माकुनु परमेस्वरहेङ चाराइहोइका’ दोअ्खे पानु, 12नेलाइ इङकोहेङ ताइको आबा आमाइको भाअ्सिङ आरोङ हाइदोङ पालि मापिसुखेना। 13एसापा नेलाइ ताइ चलितेङलोका चलनहेङ मानितेङ परमेस्वरको हुकुमहेङ बेकामको दोअ्सुखेना कालाउ एसापा दोङ नेलाइ इसिका बो हेन्जाङ कामगेलाइ पासुखेना।”
द्याङहेङ आखेका पाका सामानगेलाइ
(मत्ति १५:१०-२०)
14इसु द्याङगेलाइहेङ आरोङ ताइमिकोता काइतेङ दोअ्हि, “नेलाइ झाराङ काङको काथा हिङसु रो गेसु। 15इसिका हाइदोङ सामान मान्थु जाइ बाहारसो द्याङलिअ्ता दुल्तेङ इङकोहेङ आखेका पालि दोखे, कालाउ बुङ द्याङसो बाहार ओल्हेका चिजगेलाइसो दोङ द्याङहेङ आखेका पाखे। 16[जाइको हिङका न्हातोङ हि, इङको हिनाको।”]#७:१६ इदोइ दारजा आधे पुर्ना स्रोत बाइबलता मान्थु।
17द्याङगेलाइहेङ लाअ्तेङ साअ्लिअ्ता दुल्कान्हुअ्सो वाको चात्यागेलाइ इसुहेङ इदोइ तुलनाको बारेता हिअ्हि। 18वा एम्बालाइहेङ दोअ्हि, “हाइ नेलाइ एला बुङ गेका मान्थुसुन्हा? जे बाहारसो द्याङलिअ्ता दुल्खे इङको वासेहेङ आखेका पालि मादोखे दोअ्तेङ हाइ नेलाइ एला बुङ मागेसुखेना? 19हाइपानु इङको वाको कोन्धाङता माको, कालाउ बुङ हेमेङलिअ्ता दुल्खे रो बाहार ओल्हेखे। कालाउ इन्तासो बुङ बाहार ओल्हितेङ हानिखे।” (एसापा इसु गोताङ किसिमको चाकाचिज सुदो हि दोअ्तेङ दोअ्पिहि।)
20वा दोअ्हि, “द्याङसो जे बाहार ओल्हिखे इङको द्याङहेङ आखेका पाखे। 21हाइपानु द्याङको कोन्धाङसो मारेम्का ठहर, दुराचार, खुका, सेअ्का, नाठोगिरि, 22दिअ्लि, आसाति, ठगेलि, छाराजेङलि, मिँतुपालि, बादनामि, ल्हाउलि रो मुर्ख काम पालि। 23इदोइ गोताङ आसाति काथागेलाइ लिअ्तासो ओल्हिखे रो द्याङहेङ आखेका पाखे।”
सामरि बेबालको खान्धुर
(मत्ति १५:२१-२८)
24इङकोन्हुअ्सो इसु इङको थामे लाअ्तेङ टुरोस रो सिदोनको सिमाभारि हानितेङ एलोङ साअ्ता दुल्हि। इदोइ काथा हासुङ माग्याको दोअ्का वा भोघाखे, कालाउ बुङ वा मातिङसिङ हिलि मादोहि। 25इङकोङ पहर एमि बेबाल इसुको बारेता हिङतेङ लोहि रो वाको आगाता तिर्हो थोहि। इङको बेबालको चामिन्दिहेङ मासान खोअ्का हिघाहि। 26इङको सिरियाको फोनिकेता जोन्मेका एमि ग्रिक बेबाल हिघाहि। इङको बेबाल ताइको चामिन्दिसो मासान ओल्हेपाप्याको दोअ्तेङ वासेहेङ बिम्ति पाहि। 27इसु इङको बेबालहेङ दोअ्हि, “लाम्फा चानचामिन्दिहेङ चालि पि, हाइपानु चानचामिन्दिगेलाइको तोले र्हुतेङ खियागेलाइहेङ थालपिलि मुनासिप माको।” 28कालाउ बुङ वा इसुहेङ दोअ्हि, “एइ प्रभु, कालाउ बुङ खियागेलाइ बुङ ते चानचामिन्दिगेलाइ चालाउ हुल्पाका पोङन्हाकागेलाइ चालि निङखे।” 29इसु वासेहेङ दोअ्हि, “ना एसा दोअ्का खातिरसो निस्फिकि जेङतेङ ना सिता हाने। नाङको चामिन्दिसो मासान ओल्हितेङ हानेलि दोहोइ।” 30वा घुरितेङ सिता हानेलाउ चामिन्दिहेङ सिदाउता जिम्तेङहिका तिङहि। इङकोसो मासान ओल्हेतेङ हानेलिदोका हिघाहि।
इसु बोइर्हा रो लाटा द्याङहेङ एल्पाका
31इसु टुरोस माउजासो ओल्हेतेङ वा सिदोन जेन्तेङ डेकापोलिस#७:३१ डेकापोलिस गालिल जाहादिको माहे रो नुहेँ माउजाता हिघाहि। जाइहेङ “ते पुर” बुङ दोअ्घाहि। सिमानाको माझासो जेङतेङ गालिल चावान्दिता हानेहि। 32इन्ता द्याङगेलाइ एमि बोइर्हा रो लाटा द्याङहेङ इसुकोता चुमाहि रो इङकोर्हुता खुर ताअ्पि दोअ्तेङ वासेहेङ बिम्ति पाहि। 33इसु वासेहेङ चेअ्सुमेअ्सुकासो आसा ओसो चुमपुतेङ ताइको आङगुलि इङकोको न्हातोङता ह्वाअ्हि। इङकोन्हुअ्सो थोअ्तेङ वाको देतोङ साइपिहि। 34कालाउ इसु सादेलभारि खाङतेङ र्हिङका हुसि र्हुतेङ इङकोहेङ दोअ्हि, “इफ्फाता”#७:३४ इफ्फाता जाइको माने “हेन्हा” जेङखे। इदोइ आमारिक राउ इसुको पालाता इस्राएलता धुइघाखे। जाइको माने “हेन्हा।” 35इसु एसा दोअ्तेसाङ इङको द्याङ हिङलि तेङहि कालाउ वाको देतोङ हेङघालाइन्हातेङ वा माजासो नुइ धुइलि तेङहि। 36इसु एम्बालाइ झाराङहेङ “इदोइ हासुहेङ मादोसु” दोअ्तेङ हुकुम पिहि। कालाउ बुङ जेथे वा मादोसु दोअ्तेङ हुकुम पिघाखे, झन एम्बालाइ हाउसितेङ द्याङगेलाइहेङ दोअ्गिल्घाखे। 37द्याङगेलाइ भारभुसाइतेङ दोअ्लि तेङहि, “वा गोताङ काम रेम्का पाका हि। वा न्हातोङ माहिङकाहेङ रो लाटाहेङ धुइलि दोका बान्हाइखे।”
Currently Selected:
मर्कुस 7: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
