मर्कुस 6
6
नासरतता इसुहेङ इन्कार पाका
(मत्ति १३:५३-५८; लुका ४:१६-३०)
1इसु इङको थामे लाअ्तेङ ताइमि हुर्किका पुर नासरतता घुरिहि। वाको चात्यागेलाइ बुङ वाकोङदोफा हानेहि। 2वा माइसाका दिनाता कचहरिसाअ्ता बिद्या पिलि तेङहि। हिङकालाउ झाराङ भारभुसाइतेङ दोअ्हि, “या इदोइ काथागेलाइ हितासो धिरहि? हिसिका आकिल निङहि! हेसापा इसिका भारभुसाइका कामगेलाइ पालि दोखे? 3हाइ या मरियमको चान मिस्त्रि माको कुनु? हाइ या याकुब, योसेफ, यहुदा रो सिमोनको दादा माको कुनु? हाइ याको बेजान ओनेगेलाइ बुङ केलाइ दोफाङ मान्थु कुनु?” एसा दोअ्तेङ एम्बालाइ वाकोदोफा चेरताम्पाहि। 4कालाउ इसु एम्बालाइहेङ दोअ्हि, “आगाधुइकाको चारपाहाङ मान जेङखे, कालाउ बुङ ताइको देरा साअ्को इद्याङगेलाइ खिनिङ बास्ताङ मापाखे।”#युहन्ना ४:४४ 5इङकोभाअ्सिङ इसु इन्ता आधे माअ्साअ्धेकालाइता ताइको खुर ताअ्तेङ एम्बालाइहेङ एल्पाका बिना बो हिदिङ सरबङ हिका काम पालि मादोहि। 6एम्बालाइको अखान्धुर तिङतेङ वा भारभुसाइहि।
कालाउ वा देरादेराता बिद्या पिकाताङ हानेहि।
इसु चात्यागेलाइहेङ पारचार पालि दिङगिल्का
(मत्ति १०:५-१५; लुका ९:१-६)
7इसु तेन्हेमि चात्यागेलाइहेङ ताइमिकोता काइहि रो एम्बालाइहेङ न्हेमि न्हेमिपा दिङगिल्हि। एम्बालाइहेङ मासान ओल्हेपाका सरबङ रो खाबारा बुङ पिहि। 8एम्बालाइहेङ दिङगिल्लाउ वा एसा दोअ्हि, “दामाको भाअ्सिङ हाइदोङ माचुम्सु, ना चाका आम्का, ना गुजिता टाका, कालाउ बुङ एलोङ लाठि खिनिङ चुमसु। 9जुता लागाइसु, कालाउ बुङ बो हेन्जा लोखोन माचुम्सु।”
10वा एम्बालाइहेङ दोअ्हि, “जेलाउ नेलाइ हिदिङ देराता थुकालाउ जेदोङ साअ्ता दुलस्वाना, इङको देरा मालाअ्पाधाउ इङकोङ साअ्ता दोङ हिसु। 11हिदिङ थामेता थुकालाउ नेलाइहेङ मान मापानु रो द्याङगेलाइ नेलाइको कथन हिङलि माकिअ्नु, इङको थामेसो नेलाइ ओल्हेलाउ नेलाइको बिरुदता दासिको भाअ्सिङ ताइको पाइतालाको धुला थिपिधिसु#६:११ पाइतालाको धुला थिपिधिसु यहुदि चलनता पाइतालाको धुला थिपिधिनु, परमेस्वरको कथन हिङलि इन्कार पाका जेङखे। रो इङको देरा लाअ्सु।”#साल्तेङ दिङगिल्का १३:५१; लुका १०:४-११
12इङकोन्हुअ्सो एम्बालाइ ओल्हेतेङ हानेहि रो द्याङगेलाइ “कुकरमगेलाइ मानितेङ परमेस्वरभारि घुरिसु” दोअ्तेङ पारचार पालि तेङहि। 13एम्बालाइ हेन्जाङ मासानगेलाइहेङ ओल्हेपाहि रो हेन्जाङ रोगाइकालाइहेङ चुइति लाइपितेङ एल्पाहि।#याकुब ५:१४
चिभुअ्लि पिका युहन्नाहेङ सेअ्का
(मत्ति १४:१-१२; लुका ९:७-९)
14इसुको मिङ चारबितिङ चारचाराइनाङ राजा हेरोद बुङ वाको बारेता हिङहि। हेअ्मि दोअ्घाखे, “चिभुअ्लि पिका युहन्ना सिकासो सिन्हुहि, एन्साङ इङकोसो इसिका सरबङको काम जेङदोङखे।”#मत्ति १६:१४; मर्कुस ८:२८; लुका ९:१९ 15कालाउ बुङ बोगेलाइ दोअ्हि, “या एलिया#६:१५ एलिया आगाधुइका ल्वावा रो मसिहको दामा त्यार पावा दोअ्तेङ हेन्जाङ यहुदिगेलाइ आस पाघाखे। हि” दोअ्घाखे आधिमि चाहिँ “लाम्फरतिको आगाधुइकालाइ भाइका एमि ओल्हेहि” दोअ्घाखे। 16इदोइ काथा हिङकान्हुअ्सो हेरोद दोअ्हि, “या ते युहन्ना दोङ एइ। जाइको पुरिङ का पाल्लि लागाइघा, एला वा सिकासो सिन्हुहि।”
17हेरोद ताइको ओने फिलिपको बेअ् हेरोदियासको भाअ्सिङ युहन्नाहेङ रिम्लि लागाइतेङ वासेहेङ धेउतेङ थुनाता ह्वाअ्का हिघाखे। हाइदोनु वा हेरोदियासहेङ बेअ् बान्हाइतेङ ताअ्का हिघाहि।#लुका ३:१९-२० 18हाइपानु युहन्ना हेरोदहेङ एसा दोअ्का हिघाहि, “ताइको ओनेको बेअ् चुमातेङ ताअ्लि उचित माज्याङ।”
19एन्साङ हेरोदियास युहन्नादोफा इख ताङका हिघाहि रो वासेहेङ सेअ्लि भोघाहि, कालाउ बुङ दोका मान्थुघाहि। 20हाइपानु युहन्नाहेङ धरमाति रो पुनित द्याङ चिताइतेङ हेरोद वाकोदोफा थिघाखे। इदोइखातिर वासेहेङ बान्चेपातेङ ताअ्का हिघाखे। युहन्नाको काथा हिङलाउ हेरोद थिलाउ बुङ वाको काथा हिङलि मोन्दा ताघाखे।
21कालाउ बुङ हेरोदियासहेङ बादला र्हुलि सन्जोक मिलिहि। जेलाउ हेरोद ताइको जोलोम दिनाता ताइको भारदार, फाउजि कप्तान रो गालिलको बो बाबारका द्याङगेलाइहेङ बाराका भात्यार पिहि। 22इङको भात्यारता हेरोदियासको ताइकोङ चामिन्दि लिअ्ता लोतेङ न्हाहि रो वाको न्हाका तिङतेङ झाराङ लेङचाहि। कालाउ हेरोद इङको बेजानहेङ दोअ्हि, “नासेहेङ जे लाल्सा हि इङकोङ र्हे, का नासेहेङ प्याङका?” 23वा केरा चातेङ इङकोहेङ दोअ्हि, “ना कादोफा जे र्हेकाना का काङको आधा सारभिथिकापा बुङ नासेहेङ प्याङका।”
24कालाउ हेरोदियासको चामिन्दि बाहार ओल्हेतेङ ताइको आमाइहेङ हिअ्हि, “का हाइ र्हेकाङका?” आमाइ दोअ्हि, “चिभुअ्लि पिका युहन्नाको पुरिङ र्हे।”
25इङको ओदोङघरि लिअ्ता राजा हेरोदकोता हानेहि रो एसा दोअ्तेङ र्हेहि, “कासेहेङ एला दोङ चिभुअ्लि पिका युहन्नाको पुरिङ थालिता ताअ्तेङ पि।”
26इदोइ हिङतेङ हेरोद हेन्जाङ मन तु:पाहि, कालाउ बुङ वा ताइको चाका केरा रो पिका कथन भात्यारता हिका बान्सालाइको भाअ्सिङ माको दोअ्लि मादोहि। 27इङकोङखातिर राजा हेरोद इङको पहर दोङ एमि पलटनहेङ दिङगिल्तेङ युहन्नाको पुरिङ पाल्तेङ चुमा दोअ्तेङ हुकुम पिहि। कालाउ वा थुनाता हानितेङ युहन्नाको पुरिङ पाल्हि, 28रो वाको पुरिङ थालिता ताअ्तेङ बेजानहेङ पिहि। बेजान इङको चुमपुतेङ ताइको आमाइहेङ पिहि।
29युहन्नाको चात्यागेलाइ जेलाउ इदोइ काथा हिङहि, कोलाउ एम्बालाइ लोतेङ वाको सिका जिउ तोल्हेतेङ तोमता चुमपुतेङ ताअ्हि।
इसु ना हाजारहेङ चापाका
(मत्ति १४:१३-२१; लुका ९:१०-१७; युहन्ना ६:१-१४)
30कालाउ साल्तेङ दिङगिल्कालाइ इसुकोता जोम्हि रो ताइमिको पाका, धिरपाका इङको गोताङ वासेहेङ हिम्पाहि। 31इसु एम्बालाइहेङ दोअ्हि, “नेलाइ ताइमि बुङ कादोफा हासुमान्थुका थामेता लोसु रो एघुरिङ माइसा चासु।” हाइपानु इन्ता लोकाहानेकालाइ हेन्जा हिघाखे रो ओबालाइहेङ चालिथिकापा बुङ फुरसद मान्थुघाहि। 32कालाउ ओबालाइ नाउता धोल्तेङ एलोङ हासु मान्थुका थामेता हानेहि। 33हेन्जाङ द्याङगेलाइ ओबालाइ हानिकाताङपाका तिङहि रो हेन्जाङ नाल्हि। इङकोन्हुअ्सो गोताङ पुरगेलाइसो धाअ्तेङ इन्सो हानेहि रो ओबालाइखान्तेङ लाम्फा थुकाहि। 34जेलाउ इसु काम्बेता नाउसो खुअ्हि रो इन्ता हेन्जा द्याङगेलाइ जोम्तेङ हिका तिङतेङ वा एम्बालाइहेङ रेम्फा खाङहि। हाइपानु एम्बालाइ घोकालाइ मान्थुका भेरागेलाइभाइका हिघाखे। कालाउ वा एम्बालाइहेङ हेन्जा काथा धिरपालि तेङहि।#गान्देका २७:१७; १ राजा २२:१७; २ इतिहास १८:१६; इजकिएल ३४:५; मत्ति ९:३६
35जेलाउ बेला दुबिलि तोम्हि कोलाउ वाको चात्यागेलाइ इसुकोता लोतेङ दोअ्हि, “इदोइ हासुमान्थुका थामे हि रो एला बेला बुङ दुबेलि तोम्होइ। 36इदोइ द्याङगेलाइहेङ दिङगिल रो एम्बालाइ कोरबितिङको देरागेलाइता हानितेङ ताइको भाअ्सिङ हाइदोङ चाकाआनेमाने चोलाको।” 37कालाउ बुङ इसु एम्बालाइहेङ दोअ्हि, “नेलाइ दोङ एम्बालाइहेङ हाइदोङ चालि पिसु।” एम्बालाइ वासेहेङ दोअ्हि, “हाइ केलाइ न्हेसाइ रुपाको टाका#६:३७ न्हेसाइ रुपाको टाका इङको पहरको येअ् माहिनाको बनि झोको जेङघाहि। को तोले चोलतेङ एबालाइहेङ चालि पिलि कुनु?” 38इसु एम्बालाइहेङ दोअ्हि, “नेलाइदोफा हेअ्लोङ तोले हि? हानितेङ खाङसु।” कालाउ खाङतेङ एम्बालाइ दोअ्हि, “ना लोङ तोले रो न्हे लोङ हाया हि।”
39कालाउ इसु द्याङगेलाइहेङ चाउरता सारिपा योम्लि लागाइहि। 40एम्बालाइ नाकुरि नाकुरि रो न्हेकुरिते न्हेकुरिते हुल पातेङ योम्हि। 41इसु इङको ना लोङ तोले रो न्हे लोङ हाया र्हुतेङ सादेलभारि खान्तेङ च्याबास पिहि रो इङको तोलेगेलाइ पेङतेङ चात्यागेलाइहेङ बाख्राइलि लागाइहि। एन्साङ पातेङ वा इङको न्हे लोङ हाया बुङ बाख्राइपिहि। 42कालाउ झाराङ घाइपा चाहि। 43चात्यागेलाइ चातेङ दाइका तोले रो हायाको टुकरा जोम्पालाउ तेन्हे डालो पोङघाहि। 44इन्ता चाका वाबालाइ खिनिङ ना हाजार हिघाखे।
इसु चिर्हुता तेगिल्का
(मत्ति १४:२२-३६; युहन्ना ६:१५-२१)
45कालाउ इसु इघुरिताङ ताइको चात्यागेलाइहेङ नाउता धोलपातेङ चावान्दिको ओदोइपार बेथसेदाता दिङगिल्हि। वा ताइमिखिनिङ द्याङगेलाइहेङ बेदाङगि पिलि इन्ताङ हि। 46एम्बालाइहेङ दिङगिल्कान्हुअ्सो वाचाहिँ पुकार पालि आरदाङता ताङहि। 47बेला दुबिलाउ नाउ चावान्दिको माझाता हिघाहि रो इसुखिनिङ एकालाङ तिकारता हिघाहि। 48भेर्मा भेनेङपाहासो लोनाङसिङ ताइको चात्यागेलाइहेङ नाउ चालाइलि मुस्किल जेङका इसु तिङहि। र्हिमाको मोचल माचोललाउ इसु चिर्हुता तेतेङ चात्यागेलाइ हिका थामेता लोहि। वा नाउहेङ पारातेङ हानेलि तोम्का हिघाहि। 49चात्यागेलाइ इसुहेङ चिर्हुता हिगिल्का तिङतेङ मासान लोहि दोअ्तेङ एम्बालाइ र्हिकाइलि तेङहि। 50एम्बालाइ झाराङ वासेहेङ तिङतेङ थिहि रो ओदोङघरि इसु एम्बालाइहेङ दोअ्हि, “साहास पासु, का हिघा, माथिसु।” 51कालाउ इसु एम्बालाइकोता नाउता धोल्हि रो भेर्मा बुङ गाङहि। इदोइ तिङतेङ एम्बालाइ झन भारभुसाइ हि। 52हाइपानु एम्बालाइ तोलेको बारेता काथा गेनाङ मान्थुघाहि। इङको पहर एम्बालाइको कोन्धाङ उन्ठुइ भाइपाङ थाङका जेङका हिघाहि।
53चावान्दि पाराकान्हुअ्सो ओबालाइ गनेसरेतको दोअ्का थामेता थुकालिलोहि रो एम्बालाइ नाउ काम्बेता ताअ्हि। 54जेलाउ ओबालाइ नाउसो खुअ्हि कोलाउ द्याङगेलाइ इसुहेङ नाल्हि। 55इदोइभाअ्सिङ एम्बालाइ देराभारि धाअ्तेङ हानितेङ इसु लोका बानाल हिम्पाहि। कालाउ द्याङगेलाइ मासाअ्धेकालाइहेङ सिदाउता ताअ्तेङ इसुकोता चुमालि तेङहि। 56देरा, पुर रो द्याङको हिका थामेगेलाइ जेता जेता इसु हान्हिघाहि, द्याङगेलाइ मासाअ्धेकालाइहेङ फुतेङ हातेता चुमाघाखे। कालाउ वाको धाबाको फेन्चा खिनिङ साइलि निनाको दोअ्तेङ एम्बालाइ इसुहेङ बिम्ति पाघाहि रो वाको धाबा साइका झोको झाराङ एल्घाहि।
Currently Selected:
मर्कुस 6: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
