मर्कुस 5
5
मासान खोअ्का द्याङ
(मत्ति ८:२८-३४; लुका ८:२६-३९)
1इसु चात्यागेलाइदोफा गालिल चावान्दिको ओदोइपार गेरासेनसको माउजाता लोहि। 2इसु नाउसो खुअ्तेङसाङ तोमसो मासान खोअ्का एमि द्याङ वासेहेङ दुसुहि। 3इङको तोमभारि हिघाहि। हासु बुङ वासेहेङ झिन्झिरिहोइ धेउलि मादोघाहि। 4हाइपानु इङकोहेङ हेन्जाङ खेप खुर रो खोकोइता झिन्झिरिहोइ धेउतेङ ताअ्लाउ बुङ वा इङको धोअ्पाघाखे। हिदिङ द्याङ बुङ इङकोहेङ हैकमता ताअ्लि दोका मान्थुघाहि। 5इङको न्हिसिङ रो नितिङ दिनाङ तोमगेलाइ रो आरदाङगेलाइता र्हिकाइतेङ ताइमि ताइमहेङ उन्ठुइहोइ चेतेङ हिगिल्घाहि।
6जेलाउ वा इसुहेङ दुरेसोङ तिङहि कोलाउ धाअ्तेङ लोहि रो वासेहेङ सेउपाहि। 7कालाउ बारा गालापातेङ र्हिकाइतेङ दोअ्हि, “ओइ परमेस्वरको चान इसु, नाङको कासेहेङ हाइ पारबाहा? का परमेस्वरको मिङ ल्होतेङ केराचातेङ नासेहेङ बिनइ पाखा, ना कासेहेङ तु: मापि।” 8हाइपानु वा इङकोहेङ दोअ्का हिघाहि, “ओइ मासान आत्मा, इङको द्याङसो ओल्हेतेङ लोउ।” 9कालाउ इसु इङकोहेङ हिअ्हि, “नाङको मिङ हाइ?” इङको दोअ्हि, “काङको मिङ फाउज एइ, हाइपानु केलाइ हेन्जा हिन्हाहि।” 10इङको मासानगेलाइहेङ इङ को माउजाबाहार माओल्हेपागिल दोअ्तेङ वा इसुहेङ बिम्ति पाहि।
11इन्ता भेर्पाङको आरदाङता पायाको ए जेर चारेदोङ घाहि। 12इङको मासानगेलाइ एसा दोअ्तेङ इसुहेङ बिम्ति पाहि, “केलाइहेङ पायागेलाइकोता हानेलि पि रो केलाइ इङकोलिअ्ता दुलाङ।” 13कोलाउ वा एम्बालाइहेङ हानेलि दोअ्हि रो इङको मासानगेलाइ बाहार ओल्हितेङ पायागेलाइलिअ्ता दुल्हि। दुल्तेङसाङ न्हे हाजार झोको पायाको इङको जेर वाङखाराकासो हुल्तेङ चावान्दिता दुबितेङ सिहि।
14इदोइ तिङतेङ पाया घोकालाइ खाअ्हि रो इदोइ काथा पुर रो देरादेराता हिङपागिल्हि। ओदोङघरि हाइ जेङहि दोअ्तेङ खाङलि द्याङगेलाइ इन्ता लोहि। 15कोलाउ एम्बालाइ इसुकोता लोहि रो इङको मासान खोअ्का द्याङ एल्तेङ धाबा लागाइतेङ इसुदोफाङ योम्तेङहिघाहि। इदोइ तिङतेङ एम्बालाइ थिहि। 16कालाउ जाइ इदोइ तिङका हिघाहि, एम्बालाइ मासान खोअ्का द्याङ रो पायागेलाइहेङ हाइ जेङका हिघाहि इङको दोअ्पिहि। 17इसिका काथा हिङतेङ द्याङगेलाइ केलाइको माउजासो हानेपि दोअ्तेङ इसुहेङ बिम्ति पाहि।
18इसु नाउता धोल्लि तोम्लाउ इङको मासान खोअ्तेङ एल्का द्याङ वाकोदोफा हिलि बिम्ति पाहि। 19कालाउ बुङ इसु इङकोहेङ ताइमिदोफा लोलि मापिहि रो एसा दोअ्हि, “ताइको साअ्ता हाने रो प्रभु नासेहेङ तिम्पाका दाया रो वाको पाका गोताङ काम नाङको ताइको द्याङगेलाइहेङ हिम्पा।” 20कालाउ इङको द्याङ हानिहि रो इसु इङकोको भाअ्सिङ हेथे बाराका काम पापिका हिघाहि इङको डेकापोलिसको गोताङ थामेगेलाइता हिङपागिल्लि तेङहि। झाराङ द्याङगेलाइ भारभुसाइ हि।
याइरसको सिका चामिन्दि रो मेसाधुअ्का बेबाल
(मत्ति ९:१८-२६; लुका ८:४०-५६)
21जेलाउ इसु आरोङ नाउता धोल्तेङ चावान्दिको ओदोइपार हानेहि। इन्ता हेन्जाङ द्याङगेलाइ वाको कोरबितिङ जोम्हि। वा चाहिँ चावान्दिको काम्बेताङ हिघाहि। 22कचहरिसाअ्को हाकिमगेलाइता याइरस मिङ हिका एमि इसुकोता लोहि रो वासेहेङ तिङतेङ तिर्हो थोतेङ वाको खोकोइता सेउपाहि 23रो एसा दोअ्तेङ बिम्ति पाहि, “काङको आतुइका चामिन्दि सिलि तोम्का हि, लोतेङ इङकोर्हुता नाङको खुर पाअ्पि रो इङको एलाको रो बानच्याको।”
24कालाउ इसु याइरसदोफा हानेहि रो हेन्जाङ द्याङगेलाइ वासेहेङ पिताइहि। द्याङगेलाइ वाको कोरबितिङ गुल्सुमुल्सुलि तेङहि। 25कालाउ तेन्हे बाअ्सार लाम्फासो हिति होका बेथा हिका एमि बेबाल इन्ता हिघाहि। 26इङको हेन्जाङ बोइद्यागेलाइको खुरसो पिर निङचातेङ ताइमिदोफा हिका गोताङ टाकाकाउरि दोपातेङ बुङ एल्लि दोअ्का मान्थुघाहि। वाको बेथा एल्का खान्तेङ झनझन बारातेङ हानेका हिघाहि। 27वा इसुको बारेता द्याङगेलाइसो हिङका हिघाहि रो चेअ्सुमेअ्सुकाको न्हुअ्पाहासो लोतेङ वाको धाबा साइहि। 28हाइपानु इङको मनमनताङ दोअ्हि, “वाको धाबा खिनिङ साइलि निङलाउ बुङ का एलाङका।” 29कालाउ ओदोङघरि इङकोको हिति होलि लाअ्हि रो ताइको जिउसो रोग एल्का वा गेहि। 30ताइमिसो सरबङ बाहार ओल्हेका ओदोङघरि गेतेङ चेसुमेसुकाता न्हुअ्पाहा घुरितेङ हिअ्हि, “हासु काङको धाबा साइहि?” 31चात्यागेलाइ वासेहेङ दोअ्हि, “चेअ्सुमेअ्सुतेङ ढाकालाइतेङ हिका ना तिङकाङ हिन्हा रो बुङ ना दोअ्खेना, ‘हासु कासेहेङ साइहि?’” 32कालाउ बुङ इसु ताइमिहेङ हासु साइहि दोअ्तेङ इसो ओसो खाङलि तेङहि। 33इङको दोअ्का हिङतेङ बेबाल थिहि रो फिरतेङ लोतेङ इसुको आगाता तिर्हो थोतेङ गोताङ काथा वासेहेङ दोअ्पिहि। 34कालाउ वा इङकोहेङ दोअ्हि, “ओइ चामिन्दि, नाङको खान्धुरसो नासेहेङ एल्पाका हि। रेम्फा हाने, नाङको रोग एलाको।”
35इसु धुइकाताङ पालाउ, कचहरिसाअ्को हाकिम याइरसको साअ्सो आधेमि द्याङगेलाइ लोतेङ वासेहेङ दोअ्हि, “नाङको चामिन्दि ते सिलिदोहोइ, एला मास्टरहेङ हाइपालि तु: प्याना?” 36कालाउ बुङ एम्बालाइको पाका काथागेलाइहेङ माखान्सिङ इसु याइरसहेङ दोअ्हि, “माथि, खान्धुर खिनिङ पा।” 37कालाउ वा पत्रुस, याकुब रो याकुबको ओने युहन्नाहेङ बिना बो हासुहेङ बुङ ताइदोफा लोलि मापिहि। 38ओबालाइ कचहरिसाअ्को हाकिमको साअ्ता थुकालिलोहि, कालाउ इन्ता वा खलबल पाकालाइ, खारकालाइ रो बारा गालाता बिलाप पाकालाइहेङ तिङहि। 39इसु लिअ्ता दुल्तेङ एम्बालाइहेङ दोअ्हि, “नेलाइ हाइपालि खाइला बाइला पासुखेना? रो खारसुखेना? इदोइ बेजान ते सिनाङ मान्थु, निन्धातेङ खिनिङ हि।” 40कालाउ बुङ एम्बालाइ इसुको काथा हिङतेङ लेङहि। कोलाउ वा एम्बालाइ झाराङहेङ बाहार ओल्हेपागिल्हि। बेजानको आबा, आमाइ रो वाकोदोफा हिकालाइहेङ दोसा चुमपुतेङ बेजान हिका कोठालिअ्ता हानेहि। 41कालाउ बेजानको खुर चातेङ इसु वासेहेङ दोअ्हि, “तालिता कुमि#५:४१ तालिता कुमिइदोइ “आरामिक” राउ इस्राएलता धुइघाहि। ” जाइको माने “ओइ बेजान, का नासेहेङ दोअ्खा, ल्हो।” 42कोलाउ बेजान ओदोङघरि ल्होहि रो इसोउसो हिगिल्लितेगिल्लि तेङहि। इदोइ तिङतेङसाङ एम्बालाइ झाराङ भारभुसाइहि। वा तेन्हे बाअ्सारको हिघाहि। 43इङकोन्हुअ्सो इसु एम्बालाइहेङ इदोइ काथा हासुहेङ बुङ मादोसु दोअ्तेङ हुकुम पिहि। कालाउ इदोइ बेजानहेङ आतुइसा चालि पिसु दोअ्तेङ एम्बालाइहेङ दोअ्हि।
Currently Selected:
मर्कुस 5: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
