मर्कुस 4
4
चालाइ बिअ्काको तुलना
(मत्ति १३:१-२३; लुका ८:४-१५)
1इसु आरोङ गालिल चावान्दिको काम्बेता बिद्या पिलि तेङहि। वाको कोरबितिङ हेन्जाङ द्याङगेलाइ जोम्नाङसिङ वा इनता हिका नाउता धोल्हि रो इन्ताङ योम्हि। द्याङगेलाइचाहिँ चावान्दिको काम्बेता दोङ योम्हि।#लुका ५:१-३ 2कालाउ इसु द्याङगेलाइहेङ तुलनाता हेन्जाङ काथा धिरपाहि। वा ताइ बिद्याता एम्बालाइ एसा दोअ्हि: 3“हिङसु, एमि द्याङ चालाइ बिअ्लि ओल्हेहि। 4कालाउ चालाइ बिअ्लाउ आधे चालाइ दामाता बिअ्न्हाहि रो इङको चालाइ जिह्याँ जुइल्हेङ लोतेङ चाहि। 5आधे चालाइ उन्ठुइहिका थामेता बिअ्न्हाहि, जेता हेन्जा भोनो मान्थुघाहि रो भोनो लेता थिकापा मान्थुनासिङ इङको मारफाङ योहि। 6साने हेन्जा चेरेङगाकान्हुअ्सो योका चालाइ जारि माजोनाङसिङ इङको ओलोमन्हाहि। 7आधे चालाइचाहिँ चुइगेलाइको माझाता बिअ्न्हाहि। चुइगेलाइ बारातेङ योका चालाइगेलाइहेङ मुअ्पापिहि कालाउ उब्जा दोङ माजेङहि। 8कालाउ बुङआधे चालाइ रेम्का भोनोता बिअ्न्हाहि रो योतेङ, बारातेङहानितेङ एकुरिते गुना, सुमकुरि गुना रो नाकुरि गुना आनाज सेपाहि।” 9कालाउ इसु दोअ्हि, “जाइको हिङका न्हातोङ हि, वा हिनाको।”
10जेलाउ इसु एकालाङ हिघाहि, कोलाउ तेन्हे मि चात्यागेलाइ रो वाको कोरबितिङ हिकालाइहेङ वा तुलनाको बारेता हिअ्हि। 11इसु एम्बालाइहेङ दोअ्हि, “परमेस्वरको सारभिको भेद नेलाइहेङ पिकाहि, कालाउ बुङ बाहारकोलाइहेङ गोताङ काथा तुलनाता दोअ्खे,
12एम्बालाइ खाङनु ते खाङखे, कालाउ बुङ मातिङखे,
हिङनु ते हिङखे, कालाउ बुङ मागेखे।
माकुनु एम्बालाइ कुकरम मानेधावा
रो एम्बालाइको कुकरम माफ जेङधावा।”#यसैया ६:९-१०
13इसु एम्बालाइहेङ दोअ्हि, “नेलाइ इदोइ तुलनाको माने मागेसुखेना? एन्सानु बो गोताङ तुलनागेलाइको माने हेसापा गिस्वाना? 14चालाइ बिअ्का कथन बिअ्खे। 15हेथे द्याङगेलाइ दामाभारि बिअ्न्हाका चालाइभाइकाङ हि। जेलाउ एम्बालाइ कथन हिङखे दियाबलस ओदोङघरि लोतेङ कथन चुमपुखे। 16एन्साङ पातेङ उन्ठुइहिका थामेता बिअ्न्हाकालाइ इदोइ दोङ हि, जाइ जेलाउ कथन हिङखे कोलाउ लेङचातेङ ओदोङघरि ताइ मनता र्हुखे। 17कालाउ बुङ एम्बालाइको ताइको जारि माजोनाङसिङ इङको आतुइसा खिनिङ हिखे। जेलाउ कथनको खातिर तु: रो सान्ताइका लोखे, कोलाउ एम्बालाइ ओदोङघरि लाअ्खे।
18“चुइगेलाइको माझाता बिन्हाका इङको दोङ हि, जाइ कथन हिङखे, 19कालाउ बुङ इदोइ दुनियाको पिर रो टाका काउरिको इन्ताना रो बो थोकको लालच पातेङ कथनहेङ थुमन्हापापिखे रो हिदिङ फल मासेपाखे। 20कालाउ बुङ रेम्का भोनोता बिअ्न्हाका चालाइचाहिँ इङको हि, जाइ कथन हिङखे रो र्हुखे, एम्बालाइ एकुरिते गुना, सुमकुरि गुना रो नाकुरि गुना फल सेपाखे।”
गेसाको तुलना
(लुका ८:१६-१८)
21इसु एम्बालाइहेङ दोअ्हि, “हाइ हासुङ गिसा जोलाइतेङ पाथिलेता रो थारान्चालेता ताअ्लि दोअ्तेङ लिअ्ता चुमाखे? हाइ गेसा दानिर्हुता ताअ्लि दोअ्तेङ माको कुनु?#मत्ति ५:१५; लुका ११:३३ 22हिदिङ म्होअ्तेङ ताअ्का सामान जेथे हि, इङको गोताङ तिङपावा। गेलि मादोका सामान हेथे हि इङको गोताङ गेलि द्वावा।#मत्ति १०:२६; लुका १२:२ 23जाइको हिङका न्हातोङ हि, वा हिनाको।”
24इसु एम्बालाइहेङ आरोङ दोअ्हि, “नेलाइ जे हिङसुखेना, इङकोहेङ फोमपासु। हाइपानु जेदोङ दोङकाहोइ नेलाइ पिस्वाना, इङकोङ दोङकाता नेलाइ निङस्वाना रो नेलाइहेङ झन हेन्जा प्यावा।#मत्ति ७:२; लुका ६:३८ 25हाइदोनु जाइदोफा हि, इङकोहेङ आरोङ प्यावा रो जाइदोफा मान्थु, इङकोदोफा हिका बुङ इङकोसो घिनावा।”#मत्ति १३:१२; २५:२९; लुका १९:२६
चालाइ बिअ्काको तुलना
26इसु दोअ्हि, “सादेलको सारभि इसिका हि: हिदिङ एमि द्याङ बारिता चालाइ बिअ्खे 27रो वा निन्धालाउ बुङ, माजिम्सिङ हिलाउ बुङ दिलिमानितिमा इङको चालाइचाहिँ योकावा रो बारावा, कालाउ बुङ इङको हेसापा बाराखे, वा मागेखे।
28“भोनो ताइमिङ चालाइ योपाखे रो फल सेपाका बान्हाइखे। लाम्फा नोनो दोरखे, इङकोन्हुअ्सो सिसा रो सिसाता दाना लागेखे। 29कालाउ बुङ जेलाउ फल मिङखे, कोलाउ ओदोङघरि वा काच्याहोइ चेलि तेङखे, हाइपानु बालि तोल्हेका पहर जेङका हिखे।”#योएल ३:१३
पासाइ चालाइको तुलना
(मत्ति १३:३१-३२,३४; लुका १३:१८-१९)
30इसु आरोङ दोअ्हि, “सादेलको सारभि हाइदोफा दाज्याङका? हिदोइ तुलना दोअ्तेङ गेपाङका? 31या ते पासाइको चालाइ भाइका हि, जाइ भोनोता बिअ्न्हाखे। चालाइ गेलाइता आतुइका हिलाउ बुङ, 32जेलाउ इङको बिअ्न्हाखे, कोलाउ इङको बाराखे रो गोताङ सारसिङ खान्तेङ इङको धाङगातेङ बाबारका दालेङगेलाइ योखे, कालाउ आदेलको जिह्याँगेलाइ दालेङता भासा जोखे।”
33द्याङगेलाइ गेलि द्वाको दोअ्तेङ दोकाथिकापा इसु इसिकाङ हेन्जा तुलनागेलाइ पितेङ एम्बालाइहेङ कथन हिङपाहि। 34तुलनामाकोसिङ वा एम्बालाइदोफा माधुइहि, कालाउ बुङ ताइको चात्यागेलाइ वा सिपापा गोताङको माने गेपापिघाहि।
इसु दुमभेर्माहेङ गाङपाका
(मत्ति ८:२३-२७; लुका ८:२२-२५)
35इङको दिना बेला दुबिकान्हुअ्सो इसु चात्यागेलाइहेङ दोअ्हि, “लोसु, केलाइ चावान्दिको ओदोइपार हानाइने।” 36कालाउ द्याङगेलाइदोफा बिदा र्हुकान्हुअ्सो, चात्यागेलाइ इसुदोफाङ नाउता धोल्तेङ ओदोइपार हानेलि तेङहि। बो नाउगेलाइ बुङ ओबालाइ दोफाङ हानेहि। 37ओदोङघरि इन्ता बाराका दुमभेर्मा लोहि रो चिको लहरगेलाइ छाल्कातेङ नाउता चि पोङघालि तेङहि। 38इसु ताइमिचाहिँ नाउको न्हुअ्पाहा एलोङ खिम्सो खिम्तेङ निन्धातेङ हिघाहि। चात्यागेलाइ वासेहेङ एसा दोअ्तेङ ल्होपाहि, “मास्टर, केलाइ डुबिलि तोमन्हाहोइ दोअ्का हाइ नासेहेङ वास्ताङ मान्थु?” 39कोलाउ वा ल्होतेङ दुमभेर्माहेङ हाकाराइहि रो चिको लहरहेङ दोअ्हि, “सिकापा हि! रोकिन्हा!” कालाउ दुमभेर्मा गाङहि रो निचालाहि। 40इसु चात्यागेलाइहेङ दोअ्हि, “नेलाइ हाइपालि एसापा थिसुखेना? नेलाइता खान्धुर मान्थु?” 41एम्बालाइ हेन्जाङ थिहि रो ताताइमिता दोअ्लि तेङहि, “या हासु? दुमभेर्मा रो जाहादि बुङ याको दोअ्का साअ्खे।”
Currently Selected:
मर्कुस 4: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
