मर्कुस 3
3
खुर सेङका द्याङ एल्का
(मत्ति १२:९-१४; लुका ६:६-११)
1इसु भेनेङ दिना आरोङ कचहरिसाअ्ता दुल्हि। इन्ता सेङका खुर हिका एमि द्याङ हिघाहि। 2वा वासेहेङ माइसाका दिना एल्पाङ बे दोअ्तेङ वासेहेङ फतुर लागाइलि द्याङगेलाइ वाको चेवाता हिघाहि। 3इसु खुर सेङका द्याङहेङ दोअ्हि, “इता लोउ रो झाराङको आगाता जाअ्।” 4वा एम्बालाइहेङ दोअ्हि, “माइसाका दिनाता रेम्का पालि ना मारेम्का पालि, बायु बान्चेपालि ना मुअ् पालि, हिदोइचाहिँ मुनासिप हि?” कालाउ बुङ एम्बालाइ सिकापा हि। 5इसु एम्बालाइ झाराङहेङ पेलेङगापा मिँहोइ खाङहि रो इङको द्याङहेङ दोअ्हि, “नाङको खुर सोझापा।” वा खुर सोझापाहि रो वाको खुर एल्हि।
6इदोइ तिङतेङ फरिसिगेलाइ कचहरिसाअ्सो ओल्हेतेङ इसुहेङ हेसापा सेअ्लि द्वाङ दोअ्तेङ हेरोदिगेलाइदोफा साल्हा पालि तेङहि।
7इङकोन्हुअ्सो इसु ताइको चात्यागेलाइदोफा चावान्दिभारि हानेहि रो गालिलसो हेन्जाङ द्याङगेलाइ वासेहेङ पिताइहि। 8यहुदिया, यरुसलेम, इदुमिआ, यर्दन ओदोइपारसो, टुरोस रो सिदोनको कोरबितिङसो हेन्जाङ द्याङगेलाइ इसुको भारभुसाइका कामगेलाइ पाका हिङतेङ वाकोता लोहि। 9द्याङगेलाइको चेप्रेचेअ्कासो ताइमिहेङ मामिच्याको दोअ्तेङ वा चात्यागेलाइहेङ ताइको भाअ्सिङ एलोङ नाउ चुमालि लागाइहि।#मर्कुस ४:१; लुका ५:१-३
10इसु हेन्जाङहेङ एल्पानाङ सिङ रोगाइकालाइ झाराङ वासेहेङ साइलि भाअ्सिङ नाद्वाना ना का द्वाङका पादोङघाहि। 11जेलाउ मासान वासेहेङ तिङघाखे, कोलाउ वाको आगाता तिर्हो थोतेङ एसा दोअ्तेङ र्हिकाइघाखे, “ना परमेस्वरको चान हिन्हा।” 12कालाउ बुङ वासेहेङ मातिङपासु दोअ्तेङ एम्बालाइहेङ वा हुकुम पिहि।
इसु तेन्हे साल्तेङ दिङगिल्कालाइहेङ साल्का
(मत्ति १०:१-४; लुका ६:१२-१६)
13इङकोन्हुअ्सो इसु आरदाङता ताङहि कालाइ वा ताइ मनचाका झोकोहेङ काइहि रो एम्बालाइ वाकोता लोहि। 14ताइमिदोफा हिलि रो पारचार पालि दिङगिल्लिको भाअ्सिङ वा तेन्हेमिहेङ साल्हि रो साल्तेङ दिङगिल्का दोअ्तेङ मिङ ताअ्पिहि। 15कालाउ एम्बालाइहेङ मासान ओल्हेपालि खाबारा बुङ पिहि। 16इङको तेन्हे साल्तेङ दिङगिलाकालाइ एबालाइ दोङ हि: सिमोन, जाइको मिङ वा पत्रुस ताअ्पिहि। 17जब्दियाको चान याकुब रो याकुबको ओने युहन्ना। वा एम्बालाइहेङ बोअनर्गेस#३:१७ बोअनर्गेस जाइको माने मेघ जेङखे। ताअ्पिहि। 18कालाउ अन्द्रियास, फिलिप, बारथोलोमाइ, मत्ति, थोमा, अल्फायसको चान याकुब, थेदियस, मुलुकभक्त हुलको सिमोन 19रो इसुहेङ रिम्पाका यहुदा इस्करियोत।
इसु रो बालजिबुल
(मत्ति १२:२२-३२; लुका ११:१४-२३; १२:१०)
20[इङकोन्हुअ्सो इसु आरोङ साअ्#३:२० साअ्कफर्नहुमता हिका इसुको ताइ साअ्।भारि हानेहि। आरोङ इन्ता हेन्जाङ द्याङगेलाइ जोम्नाङसिङ इसु रो वाको चात्यागेलाइ चालि फुरसद बुङ मानिङहि। 21जेलाउ इसुको ताइ द्याङगेलाइ इदोइ काथा हिङहि, कोलाउ वासेहेङ नानि एम्बालाइ ओल्हेहि, हाइपानु वाको मन ठेगानता मान्थु दोअ्तेङ एम्बालाइ दोअ्घाखे।]
22यरुसलेमसो लोका आधे धरममास्टरगेलाइ दोअ्हि, “इङकोता बालजिबुल#३:२२ बालजिबुल दियाबलसको भेनेङ मिङ। मासान ताङका हि रो मासानको मालिकसो दोङ इङको मासानगेलाइ ओल्हेपाखे।”#मत्ति ९:४; १०:२५
23कालाउ बुङ इसु एम्बालाइहेङ ताइकोता काइतेङ तुलनाता दोअ्हि, “दियाबलस दियाबलसहेङ हेसापा ओल्हेपालि द्वावा? 24हिदिङ मुलुकता ताताइमिता मिलाप मान्थुनु इङको सारभि हिलि माद्वावा। 25हिदिङ साअ्ता ताताइमिता चेरसुनु इङको साअ् हिलि माद्वावा। 26एन्साङ पातेङ दियाबलस दियाबलसहेङ खाङलि माकिनु इङको हिलि माद्वावा रो इङको बुङ ताइमिङ मुअ्तावा। 27हासुङ बोल्याका द्याङको साअ्ता दुल्तेङ वाको टाकाकाउरि खुलि माद्वावा, जेलाउथिकापा इङको बोल्याका द्याङहेङ माधेवावा। कालाउ कि इङको वाको साअ् खुलि द्वावावा।”
28“जातिङकोङ का नेलाइहेङ दोअ्खा, द्याङगेलाइको गोताङ कुकरम रो परमेस्वरहेङ पाका बादनामि माफ पाप्यावा। 29कालाउ बुङ पुनित हाङसाहेङ पाका बादनामि हेअ्लाउ माफ माज्यावा रो इङको हेअ्लाउ मानासाका कुकरमको फतुर फुतेङ ह्यावा।”#लुका १२:१० 30वा इदोइ कथन दोअ्हि, “हाइपानु एम्बालाइ, वाकोता मासानको हाङसा हि दोअ्तेङ दोअ्का हिघाहि।”
इसुको आमाइ रो ओनेगेलाइ
(मत्ति १२:४६-५०; लुका ८:१९-२१)
31इङको पहर इसुको आमाइ रो ओनेगेलाइ इन्ता लोहि रो बाहार जाअ्तेङ वासेहेङ काइलि दिङगिल्हि।
32इन्ता इसुको कोरबितिङ हेन्जाङ द्याङगेलाइ योम्तेङ हिघाहि रो एम्बालाइ वासेहेङ दोअ्हि, “मास्टर, नाङको आमाइ रो ओनेगेलाइ नासेहेङ दुसुलि बाहार र्हुम्तेङ हि।” 33वा एम्बालाइहेङ दोअ्हि, “काङको आमाइ रो काङको ओनेगेलाइ हासु?” 34कालाउ इसु ताइको कोरबितिङ चारपाहाङ खाङतेङ दोअ्हि, “खाङसु, काङको आमाइ रो ओनेगेलाइ एबालाइ दोङ हि। 35हाइपानु जाइ परमेस्वरको हुकुम मानिखे वा दोङ काङको वाजान रो बेजान ओने रो काङको आमाइ हि।”
Currently Selected:
मर्कुस 3: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
