मर्कुस 2
2
कुज्या द्याङ एल्पाका
(मत्ति ९:१-८; लुका ५:१७-२६)
1आधे दिनान्हुअ्सो इसु कफर्नहुम घुरिहि, द्याङगेलाइ वा सिताङ हि दोअ्का हिङहि। 2कालाउ हेन्जाङ द्याङगेलाइ वाकोता जोम्लाउ लिअ्ता बाहार हिसो बुङ हिलि थामे माजेङहि। वा एम्बालाइहेङ परमेस्वरको कथन पारचार पादोङघाहि।
3इङकोङ पहर द्यामि द्याङगेलाइ खुर खोकोइ माचोलेका कुज्याहेङ फुतेङ इसुकोता चुमाहि। 4चेअ्सुमेअ्सुकाको भाअ्सिङसो एम्बालाइ इङको कुज्याहेङ इसुकोता थुकापालि मादोहि। एन्सा जेङलाउ एम्बालाइ इसु हिका थामेको र्हुताको चाल्हा र्हाअ्तेङ कुज्याहेङ वा जिम्का सिदाउसुदाङ लेता खुअ्पाहि। 5इसु एम्बालाइको खान्धुर तिङतेङ इङको कुज्याहेङ दोअ्हि, “ओइ सानाइति, नाङको कुकरमगेलाइ माफ जेङहि।”
6कालाउ बुङ इन्ता हिका आधे धरम मास्टरगेलाइ ताइको मनता एसा दोअ्तेङ ठहर पादोङघाहि, 7“इदोइ द्याङ हाइपालि एसापा धुइदोङखे? या ते परमेस्वरको निन्दा कि पाखे। परमेस्वर बिना बो हासुङ कुकरम माफ पालि द्वावा?” 8इसु एम्बालाइको मनको काथा गेतेङ एम्बालाइहेङ दोअ्हि, “हाइपालि नेलाइ ताइको मनता इसिका ठहर पासुखेना? 9इदोइ कुज्याहेङ ‘नाङको कुकरमगेलाइ माफ जेङहोइ’ दोअ्लि रो ‘ल्हो, सिदाउ फातेङ ते’ दोअ्लि हिदोइचाहिँ सुकाका हि? 10कालाउ बुङ का द्याङको चान#२:१० द्याङको चान इदोइ उपमिङ इसु ताइमिङ दोअ्का।हेङ सुमिङता कुकरम माफ पाका खाबारा हि दोअ्का नेलाइ गेसु।” कोलाउ वा इङको कुज्याहेङ दोअ्हि, 11“का नासेहेङ दोअ्खा, ल्हो, ताइको सिदाउ फा रो सिता हाने।” 12इङको ल्होहि रो ओदोङघरि सिदाउ तोल्हेतेङ झाराङको आगासो हानेहि। इन्ता हिका झाराङ भारभुसाइतेङ, “केलाइ इसिका ते हेअ्लाउ तिङका मान्थुघान्हाहि” दोअ्तेङ एम्बालाइ परमेस्वरहेङ बाखिन्लि तेङहि।
इसु तिरो ल्होपाका लेबिहेङ काइका
(मत्ति ९:९-१३; लुका ५:२७-३२)
13इसु आरोङ गालिल चावान्दिको काम्बेता हानेहि। इन्ता द्याङगेलाइको एलोङ बारा चेअ्सु वाकोता लोहि रो वा एम्बालाइहेङ बिद्या पिहि। 14इङकोन्हुअ्सो हानेकाताङ पालाउ वा अल्फायसको चान लेबि#२:१४लेबि जाइको माने “तिरो ल्होपाका” जेङखे। जाइहेङ “मत्ति” बुङ दोअ्घाहि (लुका ५:२७)।हेङ तिरो ल्होपाकालाइको थामेता योम्तेङहिका तिङहि रो वासेहेङ दोअ्हि, “कासेहेङ पिताइ।” वा ल्होतेङ इसुहेङ पिताइहि।
15इसु लेबिको साअ्ता चालि योम्लाउ तिरो ल्होपाकालाइ रो निठुरिगेलाइ बुङ वा रो वाको चात्यागेलाइ दोफाङ योम्तेङ हिघाहि। हाइपानु वासेहेङ पिताइकालाइ हेन्जाङ हिघाखे। 16इसु निठुरिगेलाइ रो तिरो ल्होपाकालाइदोफा चातेङहिका तिङतेङ फरिसि हुलको धरम मास्टरगेलाइ वाको चात्यागेलाइहेङ दोअ्हि, “वा हाइपालि तिरो ल्होपाका रो निठुरिगेलाइदोफा योम्तेङ चाखे?”
17इदोइ हिङतेङ इसु एम्बालाइहेङ दोअ्हि, “बोइद्या ते साअ्धेकालाइहेङ माको, रोकागाइकालाइहेङ कि गोइखे। एन्सा दोङ का धरमगेलाइहेङ माको, कालाउ बुङ निठुरिगेलाइहेङ काइलि लोका हिघा।”
म्हितुपाङ हिका बारेता हिअ्का
(मत्ति ९:१४-१७; लुका ५:३३-३९)
18युहन्नाको चात्यागेलाइ रो फरिसिगेलाइ म्हितुपाङ हिघाखे। द्याङगेलाइ लोतेङ इसुहेङ दोअ्हि, “युहन्नाको चात्यागेलाइ रो फरिसिगेलाइको चात्यागेलाइ म्हितुपाङ हिखे, कालाउ बुङ नाङको चात्यागेलाइ हाइपालि म्हितुपाङ माहिखे?” 19इसु एम्बालाइहेङ दोअ्हि, “हाइ, दारुवा नेलाइदोफा हितेङहिलाउ काल्ह्यागेलाइ म्हितुपाङ हिखे कुनु? जेलाउथिकापा दारुवा एम्बालाइदोफा हिखे एम्बालाइ म्हितुपाङ माहिखे। 20कालाउ बुङ पहर ल्वावा, जेलाउ दारुवा नेलाइसो खेनावा, कोलाउ एम्बालाइ इङको दिना म्हितुपाङ ह्यावा।
21“हासुङ पुराना धाबाहेङ नावा धाबाहोइ मातालायावा। माकोनु नावा धावा चुन्चालातेङ थेअ्तावा रो झन बाराका काना जेङपाप्यावा।
22“कालाउ हासुङ नावा अङगुरको निघार पुर्ना धालेको जाबिता माह्वाअ्खे। माकोनु इङको अङगुरको निघार धालेको जाबिगेलाइ भोइप्यावा, कालाउ अङगुरको निघार रो जाबि बुङ मुअ्तावा। कालाउ बुङ नावा अङगुरको निघारचाहिँ नावा जाबिताङ ह्वाअ्खे।”
माइसाका दिनाको बारेता हिअ्का
(मत्ति १२:१-८; लुका ६:१-५)
23एखे माइसाका दिना इसु गोहोम मिलिङगेलाइको दामा जेङतेङ हानेदोङघाहि। इन्तासो हानेकाताङ पालाउ वाको चात्यागेलाइ गोहोमको सिसा पेलि तेङहि।#नियम २३:२५ 24इदोइ तिङतेङ फरिसिगेलाइ इसुहेङ दोअ्हि, “खाङ, माइसाका दिनाता जे पालि मुनासिप मान्थु एम्बालाइ हाइपालि इङकोङ पाखे?” 25वा एम्बालाइहेङ दोअ्हि, “जेलाउ दाउद रो वाकोदोफा हिकालाइ चाका सामान मान्थुलाउ म्हितुकाता वा हाइ पाहि? हाइ नेलाइ हेअ्लाउ पर्हेका मान्थुसुन्हा? 26झाराङ खान्तेङ बारा धामि अबियाथारको पालाता परमेस्वरको थानता दाउद दुल्हि रो परमेस्वरहेङ चार्हाइका तोले चाहि। जाइ धामिगेलाइ बिना बो हासु बुङ चालि माएल्घाखे। कालाउ बुङ दाउद ते ताइमिखिनिङ माचासिङ ताइको सानाइतिगेलाइहेङ बुङ चालि पिहि।”#लेबि २४:९; १ समुएल २१:१-६
27इसु एम्बालाइहेङ दोअ्हि, “माइसाका दिना द्याङको भाअ्सिङ बानेका एइ, द्याङ माइसाका दिनाको भाअ्सिङ माको। 28इदोङखातिर का द्याङको चान माइसाका दिनाको बुङ प्रभु एइ।”
Currently Selected:
मर्कुस 2: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
