मर्कुस 1
1
चिभुअ्लि पिका युहन्नाको पारचार
(मत्ति ३:१-१२; लुका ३:१-१८; युहन्ना १:१९-२८)
1परमेस्वरको चान इसु ख्रिस्टको रेम्काबानाल एसापा सुरु जेङखे। 2यसैया आगाधुइकाको किताबता एसापा लेखेका हि:
“खाङ, का काङको सादेलचरहेङ नाङको आगाआगा दिङगिलाङका,
जाइ नाङको दामा त्यार पावा।”#मलाकि ३:१
3हिङसु, उदादाङका थामेता एमि द्याङ बारा गालाहोइ एसा दोअ्दोङखे:
“प्रभु लोका दामा त्यार पासु,
वाको तेगिल्का दामा सोझ्याइसु!”#यसैया ४०:३
4चिभुअ्लि पिका युहन्ना कुकरम लाअ्पालिको भाअ्सिङ पछुतोको चिभुअ्लि पारचार पातेङ उदादाङका थामेता देखाल पिहि। 5गोताङ यहुदिया मुलुक रो यरुसलेमता हिकालाइ झाराङ वाकोता लोहि। कालाउ ताताइको कुकरम मानितेङ युहन्नासो यर्दन झोराता चिभुअ्लि र्हुहि। 6युहन्ना उटको मुइसासो थिरका धाबा लागाइघाखे रो केङखेनेता धालेको तेपाना तेअ्घाखे कालाउ जिर्हाम रो झार मह चाघाखे।#२ राजा १:८ 7वा एसा दोअ्तेङ पारचार पाहि, “जाइ कान्हुअ्सो ल्वावा वा काखान्तेङ सरबङहिका हि, कालाउ तुघुरतेङ वाको जुताको फिता होअ्लि सोबाइका का मान्थुघा। 8का नेलाइहेङ चिहोइ चिभुअ्लि पिका हिघा, कालाउ बुङ वा नेलाइहेङ पुनित हाङसाहोइ चिभुअ्लि प्यावा।”
इसुको चिभुअ्लि र्हुका
(मत्ति ३:१३-४:११; लुका ३:२१-२२; ४:१-१३)
9युहन्ना एसापा पारचार पातेङहिका पहरता इसु गालिलको नासरतसो लोहि रो युहन्नासो यर्दन झोराता चिभुअ्लि र्हुहि। 10इसु चिसो ओल्हेतेसाङ वा सादेल हेन्हाका रो पुनित हाङसाहेङ कुरजाभाइपाङ ताइमिर्हुता खुअ्तेङहिका तिङहि। 11कालाउ सादेलसो इसिका गाला लोहि, “ना काङको माया पाका चान हिना, नादोफा का हेन्जाङ लेङचाका हिघा।”#सिरजाइ २२:२; ले २:७; यसैया ४२:१; मत्ति ३:१७; १२:१८; मर्कुस ९:७; लुका ३:२२
12इङकोन्हुअ्सो पुनित हाङसा इसुहेङ ओदोङघरि उदादाङका थामेता चुमपुहि। 13दियाबलसको जाचता वा न्हेकुरि दिना उदादाङका थामेता हि। वा झार गुपुसगेलाइदोफा हि रो सादेलको सादेलचरगेलाइ वाको सेवा पाहि।
इसु द्यामि जालेघाकालाइहेङ काइका
(मत्ति ४:१२-२२; लुका ४:१४-१५; ५:१-११)
14युहन्ना रिमनिङचाका न्हुअ्सो परमेस्वरको रेम्काबानाल पारचार पातेङ इसु गालिलता लोहि। 15वा दोअ्हि, “पहर पोङघाका हि रो सादेलको सारभि भेर्पा लोकाहि। कुकरम मानेसु रो रेम्काबानालता खान्धुर पासु।”#मत्ति ३:२
16गालिल चावान्दिको काम्बेसो हानेकाताङपालाउ इसु सिमोन रो वाको ओने अन्द्रियासहेङ चावान्दिता जाले थाल्तेङहिका तिङहि। हाइपानु एम्बालाइ जालेघाका हिघाखे। 17इसु एम्बालाइहेङ दोअ्हि, “कासेहेङ पिताइसु रो का नेलाइहेङ हाया माको, द्याङगेलाइ काङकोता चुमाका बानाह्याङका।” 18एम्बालाइ ओदोङघरि ताइको जाले लाअ्तेङ वासेहेङ पिताइहि।
19कालाउ आसा दुरे हानिकान्हुसो इसु जब्दियाको न्हेमि चान याकुब रो युहन्नाहेङ नाउता योम्तेङ जाले जोतेङ हिका तिङहि।
20इसु एम्बालाइहेङ काइहि रो एम्बालाइ ताइको आबा जब्दियाहेङ काम पाकालाइदोसा नाउता लाअ्तेङ वासेहेङ पिताइहि।
इसु मासान खोअ्का द्याङहेङ एल्पाका
(लुका ४:३१-३७)
21इसु चात्यागेलाइदोफा कफर्नहुमता हानेहि रो माइसाका दिनाता यहुदि कचहरिसाअ्ता दुल्तेङ वा बिद्या पिलि तेङहि। 22कालाउ एम्बालाइ वाको बिद्याता भारभुसाइहि। हाइपानु वा एम्बालाइहेङ धरम मास्टरगेलाइ भाइपा माको, कालाउ बुङ खाबारासो धिरपाहि।#मत्ति ७:२८-२९ 23इङको पहर कचहरिसाअ्ता मासान खोअ्का एमि द्याङ हिघाहि। 24इङको एसा दोअ्तेङ र्हिकाइहि, “ओइ नासरतको इसु, केलाइहेङ नाङकोदोफा हाइ मतलब? हाइ ना केलाइहेङ मुअ्पालि लोका हिना? का नासेहेङ नाल्खा, ना परमेस्वरको पुनित जन हिना।” 25कालाउ बुङ इसु इङको वासेहेङ एसा दोअ्तेङ हाकाराइहि, “सिकापा हि रो इङकोसो ओल्हेतेङ हाने।” 26ओदोङघरि मासान इङको द्याङहेङ झाकालोङपातेङ बारा गालाहोइ र्हिकाइतेङ इङको द्याङसो ओल्हितेङ हानेहि। 27इदोइ तिङका झाराङ भारभुसाइहि रो एम्बालाइ दोअ्तेङ ताताइमिता हिअ्लि तेङहि, “माको, इदोङ हाइ? या ते नावा बिद्या कि नाउ। वा खाबारापातेङ मासानगेलाइहेङ हुकुम पिलाउ, एम्बालाइ वाको हुकुम मानिखे।” 28कालाउ ओदोङघरि इसुको मिङ गालिल माउजाको चारबितिङ चारचाराइहि।
इसु हेन्जाङ मासाअ्धेकालाइहेङ एल्पाका
(मत्ति ८:१४-१७; लुका ४:३८-४१)
29इसु कचहरिसाअ्सो ओल्हितेङ याकुब रो युहन्नादोसा सिमोन रो अन्द्रियासको साअ्ता दुल्हि। 30सिमोनको जुबे मेसाधुअ्तेङ जिम्तेङ हिघाहि रो इसु लोतेङसाङ एम्बालाइ इदोइ काथा वासेहेङ हिम्पाहि। 31इसु भेर्पा लोतेङ वाको खुर चातेङ ल्होपाहि रो मेसा वासेहेङ लाअ्हि। कालाउ वा ओबालाइको सेवा पालि तेङहि।
32बेला दुबिकान्हुसो द्याङगेलाइ वाकोता मासाअ्धेकालाइ रो मासान खोअ्कालाइ झाराङहेङ चुमाहि। 33पुरको गोताङ द्याङगेलाइ साअ्को सालेङता जोम्हि। 34इसु हेन्जाङ खालको मासाअ्धेकालाइहेङ एल्पाहि रो हेन्जाङ कातामुन्डागेलाइहेङ ओल्हेपाहि, कालाउ बुङ मासानगेलाइ वासेहेङ नाल्का हिनाङसिङ इसु एम्बालाइहेङ धुइलि मापिहि।
इसु गालिलता बिद्या पिलि तोम्का
(लुका ४:४२-४४)
35र्हिमा फाइसालामका खान्तेङ हेन्जा लाम्फा ल्होतेङ इसु बाहार निचालाका थामेता हानेहि रो इन्ता पुकार पाहि। 36सिमोन रो वाकोदोफा हिकालाइ वासेहेङ भोतेङहानेहि। 37इसुहेङ निङकान्हुअ्सो एम्बालाइ वासेहेङ दोअ्हि, “झाराङ नासेहेङ भोदोङखे।” 38कालाउ इसु एम्बालाइहेङ दोअ्हि, “लोसु, केलाइ भेर्पाको बो पुरगेलाइता हानाइने रो इन्ता बुङ का पारचार पालि निनाको, हाइपानु याकोङ भाअ्सिङ का लोका हिघा।” 39कालाउ गोताङ गालिलता एम्बालाइको कचहरिसाअ्गेलाइता पारचार पातेङ रो मासानहेङ ओल्हेपातेङ वा हिगिल्हि।#मत्ति ४:२३; ९:३५
इसु रोग्याल्होकालाइहेङ एल्पाका
(मत्ति ८:१-४; लुका ५:१२-१६)
40एमि रोग्याल्होका#१:४० रोग्याल्होका नियमता इसिका द्याङहेङ समाजसो भेनेङ ताअ्घाखे। इसुकोता लोतेङ तिर्हो थोतेङ एसा दोअ्तेङ बिम्ति पाहि, “ना लाल्सा पानु कासेहेङ एल्पालि द्वाना।” 41इदोइ हिङतेङ वा ताइको खुरहोइ वासेहेङ साइहि रो दोअ्हि, “का लाल्सा पाखा, ना एल।” 42इङको दोङ पहर रोग्याल्होका वाकोसो हानेहि रो वा एल्हि। 43कालाउ इसु वासेहेङ हुकुम पितेङ एसा दोअ्तेङ ओदोङघरि दिङगिल्हि, 44“खाङ, ना इदोइ हासुहेङ मादोअ्, कालाउ बुङ हानितेङ ना ताइमिहेङ धामिकोता तिम्पा रो ना एल्काता द्याङगेलाइहेङ दासिको भाअ्सिङ मोसाको हुकुम आन्सार भोक पि।”#लेबि १४:१-३२
45कालाउ बुङ इङको ओल्हितेङ हानेहि रो इदोइ बारेता चारबितिङ हिङपागिल्हि। इङकोभाअ्सिङ इसु आरोङ पुरगेलाइता सोझाङ दुल्लि मादोहि रो हासु मान्थुका थामेभारि हिलितेङहि। कालाउ बुङ द्याङगेलाइ चारबितिङसोङ वाकोता लोहि।
Currently Selected:
मर्कुस 1: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
