मर्कुस 8
8
इसु द्या हाजारहेङ चापाका
(मत्ति १५:३२-३९)
1एनि आरोङ हेन्जा द्याङगेलाइ जोम्हि, कालाउ बुङ एम्बालाइदोसा चाकाचिज हाइदोङ मान्थुघाहि। कोलाउ इसु चात्यागेलाइहेङ ताइकोता काइतेङ दोअ्हि, 2“इदोइ द्याङगेलाइहेङ तिङतेङ का हेन्जाङ दायाघा। एबालाइ काङकोदोफा हिका नानि सुम्नि जेङहोइ। एला एबालाइदोसा चालि हाइदोङ मान्थु। 3एबालाइहेङ म्हितुपाङ साअ्ता दिङगिल्नु दामाताङ झाका लोनावा। एबालाइता आधेमि दुरेसो लोका हि।” 4इसुहेङ चात्यागेलाइ दोअ्हि, “इसिका हाइ दोङ मान्थुका थामेता एबालाइहेङ हितासो चुमातेङ चापालि?” 5इसु एम्बालाइहेङ हिअ्हि, “नेलाइदोसा हेअ्लोङ तोले हि?” एम्बालाइ दोअ्हि, “न्हिअ् लोङ हि।”
6इसु द्याङगेलाइहेङ चाउरता योम्लि हुकुम पिहि। कालाउ वा न्हिअ्लोङ तोले खुरता र्हुतेङ च्याबास पिहि रो तोले पेङतेङ द्याङगेलाइहेङ बाखाराइपिलि लागाइहि। चात्यागेलाइ इङको तोले चुमपुतेङ द्याङगेलाइहेङ बाखाराइपिहि। 7एम्बालाइदोफा आतुइसा म्हुम्हुइका हायागेलाइ बुङ हिघाखे। इसु इङको हायाको भाअ्सिङ बुङ च्याबास पितेङ चात्यागेलाइहेङ बाखाराइलि लागाइहि। 8कालाउ द्याङगेलाइ चाहि रो चातेङ दाइका पोङन्हाकागेलाइ जोम्पालाउ न्हिअ् डालो पोङघाहि। 9इन्ता चाका द्याङगेलाइ द्या हाजार हिघाखे। 10वा एम्बालाइहेङ बिदा पितेङ चात्यागेलाइदोफा ओदोङघरि नाउता धोल्तेङ दलमनुथा माउजाभारि हानेहि।
फरिसिगेलाइ चिनो र्हेका
(मत्ति १६:१-४)
11फरिसिगेलाइ इसुकोता लोतेङ गालबाजि पालि तेङहि रो वासेहेङ जाच र्हुलि सादेलसो एलोङ चिनो र्हेहि।#मत्ति १२:३८; लुका ११:१६ 12इदोइ हिङतेङ इसु र्हिङका सास तान्हितेङ दोअ्हि, “इदोइ खाल हाइपालि चिनो भोखे? जातिङको का नेलाइहेङ दोअ्खा, इदोइ खालहेङ हिदिङ चिनो माप्यावा।”#मत्ति १२:३९; लुका ११:१९ 13कालाउ इसु एम्बालाइहेङ लाअ्तेङ वा आरोङ नाउता धोल्तेङ ओदोइपार हानेहि।
फरिसि रो हेरोदको साउरि
(मत्ति १६:५-१२)
14चात्यागेलाइ ताइदोफा तोले चुमालि निल्का हिघाहि रो नाउता एम्बालाइदोफा एलोङ खिनिङ तोले हिघाहि। 15इसु एम्बालाइहेङ एसा दोअ्तेङ चेतानि पिहि, “नेलाइ फरिसिगेलाइको रो हेरोदको साउरिसो जोगितेङ हिसु।”#लुका १२:१ 16कालाउ बुङ केलाइदोसा तोले मान्थुनासिङ वा एसा दोअ्का एइ दोअ्तेङ एम्बालाइ ताताइमिता गालबाजि पालि तेङहि। 17इसु इदोइ गेतेङ एम्बालाइहेङ दोअ्हि, “नेलाइदोसा तोले मान्थु दोअ्तेङ हाइपालि नेलाइ गालबाजि पासुखेना? हाइ नेलाइ आरोङ बुङ मागेसुखेना? हाइ नेलाइको मन उन्ठुइ भाइपाङ थाङका हि? 18हाइ मिँ हितेङ बुङ नेलाइ मातिङसुखेना? हाइ न्हातोङ हितेङ बुङ नेलाइ माहिङसुखेना? हाइ नेलाइहेङ फोम मान्थु?#यर्मिया ५:२१; इजकिएल १२:२; मर्कुस ४:१२ 19जेलाउ का नालोङ तोले ना हाजारको माझाता पेङकाहिघाखा, कोलाउ हेथे डालो पोङन्हाकागेलाइ नेलाइ जोम पाका हिघासुन्हा?” एम्बालाइ वासेहेङ दोअ्हि, “तेन्हे डालो जोम्पान्हाहि।” 20इसु आरोङ हिअ्हि, “कालाउ जेलाउ न्हिअ् लोङ तोले द्या हाजारको माझाता पेङका हिघाखा, कोलाउ हेथे डालो पोङन्हाकागेलाइ नेलाइ जोम्पाका हिघासुन्हा?” एम्बालाइ वासेहेङ दोअ्हि, “न्हिअ् डालो जोम्पान्हाहि” 21इसु एम्बालाइहेङ दोअ्हि, “कोलाउ हाइ नेलाइ आरोङ मागेसुखेना?”
इसु मिँ मातिङकाहेङ एल्पाका
22इङकोन्हुअ्सो इसु चात्यागेलाइदोफा बेथसेदा लोहि। द्याङगेलाइ एमि कान्हाहेङ वाकोता चुमाहि रो इङकोहेङ साइपि दोअ्तेङ वाकोदोफा बिम्ति पाहि। 23इसु इङको कान्हा द्याङको खुर चातेङ इङकोहेङ देरासो बाहार चुमाहि रो इङकोको मिँता थोअ्तेङ इङकोर्हुता ताइको खुर ताअ्तेङ इङकोहेङ हिअ्हि, “हाइ ना आतुइसा तिङखेना?” 24कालाउ र्हुता खान्तेङ इङको दोअ्हि, “का द्याङगेलाइहेङ सिङगेलाइभाइपाङ तेगिल्का तिङखा।” 25कोलाउ इसु आरोङ वाको मिँता खुरताअ्हि रो वा खाङकाखाङकाङ पाहि। वा ताइको मिँ तिङहि रो गोताङ चिज रेम्फा तिङलि तेङहि। 26कोलाउ इसु इङकोहेङ देराभारि मादुल्लि हुकुम पितेङ वाको साअ्ता दिङगिल्हि।
इसु हासु हि?
(मत्ति १६:१३-२०; लुका ९:१८-२१)
27इङकोन्हुअ्सो इसु रो वाको चात्यागेलाइदोफा कैसरिया फिलिप्पिको देरागेलाइता हानेहि। दामाता हानेकाताङ पालाउ वा ताइको चात्यागेलाइहेङ एसा दोअ्तेङ हिअ्हि, “द्याङगेलाइ हाइ दोअ्खे, का हासु हिघा?” 28एम्बालाइ इसुहेङ दोअ्हि, “आधेमि दोअ्खे, ‘चिभुअ्लि पिका युहन्ना।’ आधिमि दोअ्खे, ‘एलिया’ दोअ्खे। आधिमिचाहिँ हिदिङ एमि ‘आगाधुइका’ हिवाला दोअ्खे।”#मर्कुस ६:१४-१५; लुका ९:७-८ 29इसु एम्बालाइहेङ हिअ्हि, “कालाउ बुङ नेलाइचाहिँ हाइ दोअ्सुखेना, का हासु हिघा?” पत्रुस दोअ्हि, “ना ख्रिस्ट हिना।”#युहन्ना ६:६८-६९ 30कालाउ इसु एम्बालाइहेङ वाको बारेता हासुहेङ हाइदोङ मादोअ्सु दोअ्तेङ हुकुम पिहि।
इसु वाको सिकाको बारेता दोअ्का
(मत्ति १६:२१-२३; लुका ९:२२)
31इङकोन्हुअ्सो इसु चात्यागेलाइहेङ ताइको बारेता एसापा दोअ्लि तेङहि, “का द्याङको चान हेन्जाङ तु: निङचालि गोयाङ। आगुवा, मुल धामिगेलाइ रो धरममास्टरगेलाइसो नामन्जुरि, सिलि कालाउ सुम्निन्हुसो सिन्हुतेङ ल्होलि गोयाङ।” 32एसापा इसु इदोइ काथा गेपाङ दोअ्हि। कालाउ बुङ इदोइ हिङतेङ पत्रुस वासेहेङ एपाहा चुमपुतेङ हाकाराइलि तेङहि। 33कालाउ बुङ घुरितेङ ताइको चात्यागेलाइहेङ खान्तेङ, पत्रुसहेङ इसु एसा दोअ्तेङ हाकाराइहि, “ओइ दियाबलस, कासो दुरे हाने! हाइपानु नाङको मन परमेस्वरपाहा मान्थु, कालाउ बुङ द्याङपाहा हि।”
इसुहेङ पिताइलि
(मत्ति १६:२४-२८; लुका ९:२३-२७)
34इङकोन्हुअ्सो इसु ताइको चात्यागेलाइ रो इन्ता हिका द्याङगेलाइहेङ ताइकोता काइतेङ दोअ्हि, “जाइ कासेहेङ पिताइलि लाल्सा पाखे इङको ताइमिहेङ नामन्जुरि पाको रो ताइको कुरुस फातेङ#८:३४ कुरुस फातेङ इदोइ दोअ्का इसुको भाअ्सिङ तु: ल्होपालि रो सिलि बुङ राजि जेङलि। कासेहेङ पितायाको।#मत्ति १०:३८; लुका १४:२७ 35हाइदोनु जाइ ताइको बायु बान्चेपालि लाल्सा पावा, वा इङको गुमाइपावा, कालाउ बुङ काङको रो रेम्काबानालको भाअ्सिङ ताइको बायु गुमाइपाका, इङको बान्चेपावा।#मत्ति १०:३९; लुका १७:३३; युहन्ना १२:२५ 36हाइदोनु द्याङ गोताङ दुनिया निङतेङ ताइको बायु गुमाइपानु इङकोहेङ हाइ नाफा ज्यावा? 37माकोनु द्याङ ताइको बायुको बदलाता हाइ पिलि द्वावा? 38कालाउ इदोइ दुराचारि रो निठुरि पुस्ताता जाइ कासो रो काङको कथनसो लेदेरावा, का द्याङको चान बुङ आबाको प्रतापता पुनित सादेलचरदोफा लोलाउ इङकोसो लेदेराङका।”
Currently Selected:
मर्कुस 8: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
