युहन्ना 8
8
दुराचारिको छुटकारा
1इङकोन्हुअ्सो इसु जाइतुन आरदाङता हानिहि। 2वा एर्हिमाङ आरोङ थानता हानेहि रो झाराङ द्याङगेलाइ वाकोता लोहि। कालाउ इसु योम्हि रो द्याङगेलाइहेङ बिद्या पिहि। 3धरममास्टरगेलाइ रो फरिसिगेलाइ दुराचारता रिम निङचाका एलोङ बेबालहेङ चुमाहि रो इङकोहेङ माझाता जाअ्पाहि। 4एम्बालाइ इसुहेङ दोअ्हि, “मास्टर, इदोइ बेबाल दुराचार पालाउ रिम निङचाहि। 5नियमता मोसा इसिकालाइहेङ उन्ठुइ तोतेङ सेअ्लि केलाइहेङ हुकुम पिकाहि। ना याको बारेता हाइ दोअ्खेना?”#लेबि २०:१०; नियम २२:२२-२४ 6एम्बालाइ वाको जाच पालि रो वासेहेङ फतुर लागाइलि द्वाङ बे दोअ्तेङ एसा दोअ्का हिघाखे। कुलाउ इसु तुघुरतेङ भोनोता आङगुलिहोइ लेखेलि तेङहि। 7जेलाउ एम्बालाइ वासेहेङ हिअ्तेङ दोङ हि, कोलाउ वा जाअ्तेङ एम्बालाइहेङ दोअ्हि, “नेलाइता जाइ कुकरम पाका मान्थु, इङको इदोइ बेबालहेङ लाम्फा उन्ठुइ तोकाको।” 8कालाउ आरोङ तुघुरतेङ वा भोनोता लेखेलि तेङहि। 9जेलाउ एम्बालाइ इदोइ हिङहि, कोलाउ वाराङगेलाइ रो जामालाइ एमिएमि पातेङ हानिहि। इङकोन्हुअ्सो इसु खिनिङ इङको बेबालदोफा एकालाङ हिन्दिन्हाहि। इङको बेबालचाहिँ वाको आगा जाअ्तेङहि। 10इसु इङको बेबालहेङ खाङतेङ दोअ्हि, “खोइ कुनु, नासेहेङ फतुर लागाइकालाइ हिसो हानेहि? हासुङ बुङ नासेहेङ दार मापिहि?” 11इङको बेबाल दोअ्हि, “प्रभु, हासुङ मापिहि।” इसु दोअ्हि, “का बुङ नासेहेङ दार माप्याङका। हाने, कालाउ आरोङ कुकरम मापा।”]#८:११ इदोइ दारजागेलाइ लाम्फाको हेन्जाङ बाइबलगेलाइता मान्थु।
इसु दुनियाको जोल्का
12इसु आरोङ एम्बालाइहेङ दोअ्हि, “का दुनियाको जोल्का एइ। कासेहेङ पिताइका कितिकितिकाता माहिगिलावा, कुलाउ वा ज्यानको जोल्का निनावा।”#मत्ति ५:१४; युहन्ना ९:५
13कोलाउ फरिसिगेलाइ वासेहेङ दोअ्हि, “ना ताइकोङ बारेता दासि पिखेना। नाङको दासि सत माज्यावा।”#युहन्ना ५:३१
14इसु दोअ्हि, “का ताइकोङ बारेता दासि पिखा, कोलाउबुङ काङको दासि सत हि। का गेखा, का हितासो लोका हिघा रो का हिसो हानेदोङखा। कुलाउ नेलाइ मागेस्वाना, का हितासो ल्वाङका रो हिसो हानेदोङखा। 15नेलाइ द्याङको ठहरहोइ निया पासुखेना, का हासुकोङ निया मापाखा। 16का निया पाघा पानु बुङ, काङको निया सत ज्यावा। हाइदोनु निया पाका का एक्लाङ मान्थुघा, कुलाउ का हिघा रो कासेहेङ दिङगिल्का आबा हि। 17नेलाइको नियमता बुङ न्हेमि द्याङको दासि सत जेङखे दोअ्तेङ लेखेन्हाका हि।#नियम १९:१५; गान्देका ३५:३० 18ताइको बारेता का ताइमिङ दासि पिखा रो कासेहेङ दिङगिल्का आबा काङको बारेता दासि पिखे।”
19एम्बालाइ वासेहेङ हिअ्हि, “नाङको आबा हिता हि?”
इसु दोअ्हि, “नेलाइ ना ते कासेहेङ ना काङको आबाहेङ नाल्सुखेना। नेलाइ कासेहेङ नाल्का हिनु, काङको आबाहेङ बुङ नाल्सुधाना।” 20इदोइ काथा वा थानता बिद्या पिलाउ दान पिका भाकारको भेर्पा दोअ्का हिघाहि। कुलाउ हासुङ वासेहेङ मारिम्हि, हाइदोनु वाको पहर आरोङ लोका मान्थुघाहि।
इसुको चेतानि
21इसु आरोङ एम्बालाइहेङ दोअ्हि, “का हानाङका, नेलाइ कासेहेङ भोस्वाना रो नेलाइ ताइको कुकरमता सिस्वाना। जेता का हानाङका, नेलाइ लोलि मादोस्वाना।”
22यहुदिगेलाइ दोअ्हि, “या ते अपहते कि पाङ ना हाइ एइ? हाइदोनु या ‘जेता का हानाङका नेलाइ लोलि मादोस्वाना’ दोअ्तेङ दोअ्खे।”
23कालाउ इसु एम्बालाइहेङ दोअ्हि, “नेलाइ लेताको एइ। का र्हुताको एइ। नेलाइ इदोङ दुनियाको एइ। का इदोइ दुनियाको माको। 24का नेलाइहेङ दोअ्घा, ‘नेलाइ ताइको कुकरमता सिस्वाना, हाइदोनु का वाआङ एइ दोअ्तेङ नेलाइ खान्धुर मापासुन्हा पानु ताइको कुकरमता सिस्वाना।’”
25एम्बालाइहेङ वासेहेङ दोअ्हि, “ना हासु एइ कुनु?”
इसु एम्बालाइहेङ दोअ्हि, “का वाआङ एइ, जाइ का नेलाइहेङ लाम्फासो दोङ दोअ्दोङखा। 26का नेलाइको बारेता दोअ्लि रो निया पालि हेन्जा दोङ हि। कुलाउ कासेहेङ दिङगिल्का सत हि रो वासो का जेदोङ हिङघा इङको दोङ काथा का दुनियाहेङ दोअ्खा।”
27आबाको बारेता वा दोअ्का एइ दोअ्तेङ एम्बालाइ मागेहि। 28आरोङ इसु दोअ्हि, “जेलाउ नेलाइ का द्याङको चानहेङ र्हुता कुरुसता तोल्हेस्वाना, का वाआङ एइ दोअ्तेङ नेलाइ गेस्वाना। का ताइकोङ खाबराता हाइदोङ मापाखा, कुलाउ आबाको धिरपाका काथागेलाइ धुइखा दोअ्तेङ गेस्वाना। 29कासेहेङ दिङगिल्का कादोफा हि। वा कासेहेङ एक्लाङ लाअ्नाङ मान्थु, हाइदोनु का दिनाङ वासेहेङ लेङचा पाका काम पाखा।” 30इसु इदोइ काथा धुइलाउ हेन्जाङ द्याङगेलाइ वासेहेङ खान्धुर पाहि।
आब्राहामको चानचामिन्दि
31इसु ताइमिर्हुता खान्धुर पाका यहुदिगेलाइहेङ दोअ्हि, “नेलाइ काङको कथनता हिसुन्हा पानु नेलाइ जातिङकोङ काङको चात्या एइ। 32कोलाउ नेलाइ सत हाइ एइ इङको गेस्वाना रो सत नेलाइहेङ फुका पाप्यावा।”
33एम्बालाइ वासेहेङ दोअ्हि, “केलाइ आब्राहामको सान्तान एइ रो एलाथिकापा हासुकोङ बान्धाइता परेका मान्थुन्हाहि। ‘नेलाइ फुक्का जेङस्वाना’ दोअ्तेङ हेसापा दोअ्स्वाना?”#मत्ति ३:९; लुका ३:८
34इसु एम्बालाइहेङ दोअ्हि, “जातिङको, का नेलाइहेङ दोअ्खा, कुकरम पाका झाराङ कुकरमको बान्धाइ एइ। 35बान्धाइ जेलाउ बुङ साअ्ता माहिखे, कुलाउ चानचाहिँ जेलाउ बुङ साअ्ता हिखे। 36एन्साङ पातेङ चान नेलाइहेङ फुका पापाहि पानु नेलाइ जातिङको फुका जेङस्वाना। 37का गेखा नेलाइ आब्राहामको चानचामिन्दि एइ। कुलाउ नेलाइ कासेहेङ सेअ्लि भोसुखेना, हाइदोनु काङको कथन नेलाइता थामे मानिङखे। 38जेदोङजेदोङ का काङको आबाहिलाउ तिङका हिघा, इङकोङ का दोअ्खा। नेलाइ बुङ जेदोङ नेलाइको आबासो हिङका हिसुन्हा, इङकोङ पासुखेना।”
39एम्बालाइ वासेहेङ दोअ्हि, “केलाइको आबा ते आब्राहाम एइ।”
इसु एम्बालाइहेङ दोअ्हि, “नेलाइ आब्राहामको चानचामिन्दि हितेङ हिनु ते, आब्राहाम जेदोङ काम पाहि इङकोङ पासुधाना। 40का परमेस्वरसो हिङका सत काथा नेलाइहेङ दोअ्का हिघा, कुलाउ एला नेलाइ कासेहेङ सेअ्लि भोसुखेना। आब्राहाम इसिका काम मापाहि। 41नेलाइको आबा जेदोङ पाहि, नेलाइ इङकोङ काम पासुखेना।”
एम्बालाइ वासेहेङ दोअ्हि, “केलाइ दुराचारता जोन्मिका माको! केलाइको आबा एलोङ हि, वा परमेस्वर हि।”
आसातिको चानचामिन्दि
42इसु एम्बालाइहेङ दोअ्हि, “परमेस्वर नेलाइको आबा हिका हिनु ते नेलाइ कासेहेङ इन्ताना पासुधाना, हाइदोनु का परमेस्वरसो ओल्हेतेङलोघा। का ताइकोङ लाल्सासो लोका माको, कुलाउ वा कासेहेङ दिङगिल्हि। 43काङको दोअ्का नेलाइ हाइपालि मागेसुखेना? हाइदोनु नेलाइ काङको कथन हिङलि मादोस्वाना। 44नेलाइ ताइको आबा दियाबलसको एइ रो नेलाइको आबाको लाल्सा पोङघा पालि नेलाइको मनसुबा हि। इङको ते लाम्फासो दोङ ज्यानमारा हिघाहि रो सतेदोफा इङकोहेङ हाइदोङ वास्ता मान्थु। हाइदोनु इङकोता सत मान्थु। जेलाउ इङको असत धुइखे, इङको ताइकोङ आनिबानिमाफिक धुइखे, हाइदोनु इङको असत एइ रो असतको आबा एइ। 45का सत धुइखा, कुलाउ नेलाइ कासेहेङ खान्धुर मापासुखेना। 46नेलाइता हासु कासेहेङ कुकरमको कसुर लागाइलि द्वावा? एदि का सत धुइखा पानु, हाइपालि नेलाइ कासेहेङ खान्धुर मापासुखेना? 47जाइ परमेस्वरको एइ इङको परमेस्वरको धुइका हिङखे। नेलाइ परमेस्वरको माको, इदोइखातिर नेलाइ माहिङसुखेना।”
इसु रो आब्राहाम
48यहुदि आगुवागेलाइ इसुहेङ दोअ्हि, “केलाइको दोअ्का मुनासिप एइ, ना सामरि हिना रो नासेहेङ मासान खोअ्काहि।”
49इसु दोअ्हि, “कासेहेङ मासान खोअ्का मान्थु। का ताइको आबाको मानभाउ पाखा, कुलाउ नेलाइ कासेहेङ बादनाम मासुखेना। 50का ताइकोङ प्रताप माभोखा, कालाउ ए मि हि जाइ प्रताप भोखे रो ठहर पाखे। 51जातिङको का नेलाइहेङ दोअ्खा, एदि हासुङ काङको कथन साअ्खे पानु इङको हेअ्लाउ सिका माचाख्यावा।”
52यहुदि आगुवागेलाइ दोअ्हि, “एला केलाइ निधो जेङहि, नासेहेङ मासान निङचाकाङ एइ। आब्राहाम सिहि, आगाधुइकालाइ बुङ सिहि, कुलाउ ना दोअ्खेना ‘हासुङ काङको कथन साअ्हि पानु इङको हेअ्लाउ सिका माचाख्यावा।’ 53हाइ केलाइको खाल आब्राहामखान्तेङ बुङ बाराका एइ? वा सिहि, कालाउ आगाधुइकालाइ बुङ सिहि। नाचाहिँ ताइमिङहेङ हासु एइ दोअ्तेङ जिकिर पाखेना?”
54इसु दोअ्हि, “एदि का ताइकोङ प्रताप पाघा पानु काङको प्रताप बेकार ज्यावा। कासेहेङ प्रताप पिका काङको आबा हि, जाइहेङ नेलाइ ‘केलाइको परमेस्वर’ दोअ्सुखेना। 55नेलाइ वासेहेङ नाल्का मान्थुसुन्हा, कुलाउ का वासेहेङ नाल्खा। का वासेहेङ मानाल्खा दोअ्घा पानु का नेलाइभाइपाङ असत जेनाङका। कुलाउ का वासेहेङ नाल्खा रो वाको कथन साअ्खा। 56नेलाइको खाल आब्राहाम काङको लोका दिना तिङलि रेसेतेङ हिघाखे रो इङको तिङहि कालाउ लेङचाहि।”
57इदोइखातिर यहुदि आगुवागेलाइ इसुहेङ दोअ्हि, “ना एलाबुङ द्याकुरिते बाअ्सार थुकाका मान्थुन्हा, कोलाउ हेसापा ना केलाइको खाल आब्राहामहेङ तिङन्हा?”
58इसु एम्बालाइहेङ दोअ्हि, “जातिङको का नेलाइहेङ दोअ्खा, आब्राहाम हिकाखान्तेङ लाम्फासोङ का हिदोङघा।” 59कोलाउ एम्बालाइ इसुहेङ तोलि दोअ्तेङ उन्ठुइ कुर्हाइहि, कुलाउ वा म्होतेङ थानसो बाहार ओल्हितेङ हान्हेहि।
Currently Selected:
युहन्ना 8: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
