युहन्ना 7
7
खोपार्हाता बासाहिका पारबा
1इङकोन्हुअ्सो इसु गालिल माउजाता दोङ घुराइगिल्हि, कुलाउ वा यहुदियाता हानेलि माकिअ्हि। हाइदोनु यहुदि आगुवागेलाइ वासेहेङ सेअ्लि दाउता हिघाखे। 2एला यहुदिगेलाइको खोपार्हाता बासाहिका पारबा#७:२ खोपार्हाता बासाहिका पारबा जाइहेङ यहुदिगेलाइ बालिचेतेङ सान्तेका पारबा बुङ दोअ्घाखे। लोलि तोम्का हिघाहि।#लेबि २३:३४; नियम १६:१३ 3इसुको ओनेगेलाइ वासेहेङ दोअ्हि, “इदोइ थामे लाअ्तेङ यहुदियाता हाने रो नाङको पागिल्का कामगेलाइ इन्ता बुङ नाङको चात्यागेलाइ तिनाको। 4जेदोङ द्याङ मिङचलेपालि भोखे, इङको सिपापा काम मापाखे। ना इदोइ कामगेलाइ पाखेना पानु ताइमिहेङ दुनियाहेङ देखाल पापि।” 5(हाइपानु वाको ओनेगेलाइ बुङ वासेहेङ खान्धुर मापाघाखे।)
6इसु एम्बालाइहेङ दोअ्हि, “काङको मुनासिप पहर एलाबुङ लोका मान्थु, कुलाउ नेलाइको भाअ्सिङ ते गोताङ पहर मुनासिप हि। 7दुनिया नेलाइहेङ दिगमिग पालि मादोखे, कुलाउ कासेहेङ ते दिगमिग पाखे। हाइपानु दुनियाको बारेता इङकोको कामगेलाइ आसाति हि दोअ्तेङ का दासि पिखा। 8नेलाइ पारबा मानेलि हानेसु, काचाहिँ एला मान्हाङका। हाइदोनु काङको पहर एका बुङ पोङघानाङ मान्थु।” 9एम्बालाइहेङ एसा दोअ्तेङ वा गालिलताङ हि।
10कुलाउ इसुको ओनेगेलाइ पारबाता हानिकान्हुअ्सो वा बुङ हासुहेङ मागेपासिङ सिपापा इन्ता हानिहि। 11पारबाता यहुदि आगुवागेलाइ इसुहेङ भोदोङ घाखे रो “वा हिता हि?” दोअ्तेङ हिअ्दोङघाखे।
12इन्ता हेन्जाङ द्याङगेलाइ वाको बारेता काथा पादोङ घाखे। आधेमि दोअ्घाखे, “वा रेम्का हि।” आधेमि, “माको, या द्याङगेलाइहेङ मिथ्याता पादोङखे।” 13कुलाउ यहुदि आगुवागेलाइहेङ थितेङ वाको बारेता हासुङ खुला मादोघाखे।
पारबाता इसुको बिद्या
14पारबाको माझाता इसु थानलिअ्ता दुल्हि रो बिद्या पिहि। 15यहुदि आगुवागेलाइ भारभुसाइ मानेतेङ एसा दोअ्हि, “इदोइ द्याङ माधिरसिङ हेसापा इदोइझोको गेका जेङहि?”
16कोलाउ इसु एम्बालाइहेङ दोअ्हि, “काङको धिरपाका बिद्या काङकोङ माको, कुलाउ वाको एइ, जाइ कासेहेङ दिङगिल्हि। 17एदि हिदिङ द्याङ परमेस्वरको लाल्सा साअ्लि खाङखे पानु, काङको धिरपाका बिद्या परमेस्वरपाहासो लोका एइ बे काङको ताइकोङ पाहासो लोका एइ इङको वा ग्यावा। 18जाइ ताइकोङ पाहासो धुइखे, वा ताइकोङ मान भोखे, कालाउ बुङ जाइ ताइमिहेङ दिङगिल्काको मान भोखे, इङको सत एइ रो वाता जाल मान्थुखे। 19हाइ मोसा नेलाइहेङ नियम मापिहि? कुलाउ नेलाइ हासुङ इङको नियम मासाअ्सुखेना। नेलाइ हाइपालि कासेहेङ सेअ्लि भोसुखेना?”
20इन्ता हिका द्याङगेलाइ दोअ्हि, “नासेहेङ मासान खोअ्का हि। हासु नासेहेङ सेअ्लि भोदोङखे?” 21इसु एम्बालाइहेङ दोअ्हि, “एलोङ काम का पाघा, कालाउ नेलाइ झाराङ इदोइता भारभुसाइ सुखेना। 22मोसा नेलाइहेङ खाताना#७:२२ खतना जामाल येअ्निको जेङलाउ वाको तातुइको आगाको धाले चेतेङ थाल्काहेङ खतना दोअ्खे। इदोइ यहुदिगेलाइको कबोलको रो पुनितताको चिनो हिघाहि। को रित पिका हि, (इदोइ मोसा पाहाको माको, कुलाउ आबा खालगेलाइसो एइ) माइसाका दिनाता नेलाइ द्याङगेलाइहेङ खतना पासुखेना।#लेबि १२:३; सिरजाइ १७:१० 23मोसाको पिका नियम बाधा माज्याको दोअ्तेङ एदि हिदिङ द्याङ माइसाका दिनाता खाताना पाखे पानु, का ए मि द्याङहेङ माइसाका दिनाता एल्पापिघा दोअ्तेङ हाइ नेलाइ कादोफा चेर पासुखेना?#युहन्ना ५:९ 24र्हाइ खान्तेङ माको, कुलाउ उचित खाल्सो निसाप पासु।”
ख्रिस्टबारे द्याङगेलाइको ठहर
25यरुसलेमको आधेमि द्याङगेलाइ दोअ्हि, “हाइ एम्बालाइको सेअ्लि भोका द्याङ याआङ माको कुनु? 26खाङसु, या ते झाराङको आगाता खुला धुइदोङखे, कुलाउ एम्बालाइ यासेहेङ हाइदोङ मादोअ्खे। हाइ या दोङ ख्रिस्ट एइ दोअ्तेङ धरम आगुवागेलाइ जातिङको मानेलि तोमहोइ ना हाइको? 27या हितासो लोहि केलाइ झाराङ गेन्हाखे। कुलाउ जेलाउ ख्रिस्ट देखाल प्यावा, कोलाउ वा हितासो लोहि हासुङ माग्यावा।”
28इसु थानता दुल्तेङ बिद्या पिलाउ, वा बारा गालाता दोअ्हि, “नेलाइ कासेहेङ नाल्सुखेना रो का हितासो लोका हिघा, इङको बुङ गेसुखेना। का ताइकोङ लाल्सासो लोका माको, कुलाउ जाइ कासेहेङ दिङगिल्हि वा सत हि। नेलाइ वासेहेङ मानाल्सुखेना। 29कुलाउ का वासेहेङ नाल्खा, हाइदोनु का वासो लोका एइ रो वा कासेहेङ दिङगिल्का एइ।”
30इदोङखातिर एम्बालाइ इसुहेङ रिम्लि भोहि, कुलाउ हासुङ वासेहेङ खुर मालागाइहि, हाइदोनु वाको पहर एलाबुङ लोलितोम्का मान्थुघाहि। 31कुलाउ इन्ता हिका हेन्जाङ द्याङगेलाइ वासेहेङ खान्धुर पाहि, कालाउ एम्बालाइ दोअ्हि, “जेलाउ ख्रिस्ट ल्वावा, कोलाउ हाइ याको पाका कामगेलाइखान्तेङ हेन्जा सरबङहिका कामगेलाइ वा पावा कुनु?”
इसुहेङ रिम्लि भोका
32जेलाउ इसुको बारेता द्याङगेलाइको काथापाका फरिसिगेलाइ हिङहि, कोलाउ मुल धामिगेलाइ रो फरिसिगेलाइ वासेहेङ रिम्लि थानको अर्दलिहेङ दिङगिल्हि।
33इसु दोअ्हि, “आरोङ आधे पहरथिकापा का नेलाइदोफा ह्याङका, इङकोन्हुअ्सो का कासेहेङ दिङगिल्काकोता हानाङका। 34नेलाइ कासेहेङ भोस्वाना, कुलाउ मानिङस्वाना रो जेता का हानाङका, नेलाइ इन्ता लोलि मादोस्वाना।”
35कोलाउ यहुदिगेलाइ ताताइमिता दोअ्लि तेङहि, “या हिसो हानेलि खाङदोङखे रो केलाइ यासेहेङ लिङलिमाद्वाङ? हाइ या ग्रिकगेलाइको माझाता राइन्हातेङ हिका यहुदिगेलाइकोता हानेतेङ ग्रिकगेलाइहेङ बिद्या पिलि भोखे? 36याको दोअ्का, ‘नेलाइ कासेहेङ भोस्वाना, कुलाउ मानिङस्वाना रो जेता का ह्याङका, नेलाइ लोलि मादोस्वाना’ इदोइ कथन हाइ एइ?”
इसु सिन्हुका चि
37एला पारबाको न्हुअ् दिना रो पारबाको मुल दिनाता, जाअ्तेङ इसु बारा गालाता एसा दोअ्हि, “एदि हासुङ आम्लि किअ्नु इङको काङकोता ल्वाको रो आमाको।#लेबि २३:३६ 38जाइ कार्हुता खान्धुर पाखे, धरमकिताबको दोअ्कामाफिक ‘इङकोको कोन्धाङलिअ्तासो सिन्हुका चिको झोरागेलाइ झोतेङ ओल्ह्यावा।’#इजकिएल ४७:१; जकरिया १४:८” 39इदोइ काथा वा पुनित हाङसाको बारेता दोअ्का हिघाहि, जेदोङ पुनित हाङसा वार्हुता खान्धुर पाकालाइ निङलि तोम्का हिघाखे। हाइपानु पुनित हाङसा एलाथिकापा पिनाङ मान्थुघाहि, हाइदोनु इसुको प्रताप एलाथिकापा जेङनाङ मान्थुघाहि।
द्याङगेलाइता बेमेल
40इदोइ काथा हिङका आधे द्याङगेलाइ दोअ्हि, “या ते जातिङकोङ आगाधुइका हिघाहि।” 41आधिमि दोअ्हि, “या ख्रिस्ट एइ।” कुलाउ आधेमि दोअ्हि, “हाइ ख्रिस्ट गालिलसो ल्वावा कुनु? 42ख्रिस्ट दाउदको खालसो रो दाउदकोङ देरा बेथलेहेमसो ल्वाङ दोअ्तेङ हाइ धरमकिताब दोअ्का मान्थु कुनु?”#२ समुएल ७:१२; यर्मिया २३:५-६; मिका ५:२ 43एसापा द्याङगेलाइको माझाता वाको खातिर बेमेल जेङहि। 44एम्बालाइता हेअ्मि वासेहेङ रिम्लि भोहि, कुलाउ वासेहेङ हासु बुङ खुर मालागाइहि।
यहुदि धरममास्टरगेलाइको अखान्धुर
45कोलाउ थानको अर्दलिगेलाइ मुल धामिगेलाइ रो फरिसिगेलाइकोता लोहि। एम्बालाइ एबालाइहेङ दोअ्हि, “नेलाइ इङकोहेङ हाइपालि माचुमासुन्हा?” 46अर्दलिगेलाइ दोअ्हि, “इदोइ द्याङको धुइका भाइपा ते केलाइ हेअ्लाउ हिङका मान्थुघान्हाहि।” 47फरिसिगेलाइ दोअ्हि, “इङको नेलाइहेङ सुदाङ आवाइपाहि ना हाइको? 48हाइ धरममास्टरगेलाइ रो फरिसिगेलाइता हासुङ वार्हुता खान्धुर पाका हि? 49कुलाउ इदोइ चेअ्सु, जाइ नियम मागेखे, इङको साराप निङचाको।”
50एम्बालाइता ए मि निकोदेमस, जाइ लाम्फा ए खेप इसुकोता लोका हिघाखे, इङको दोअ्हि, 51“हाइ केलाइको नियमहोइ दागि द्याङको काथा माहिङसिङ रो इङको हाइ पाका हि मागेसिङ इङकोहेङ फतुर लागाइलि मिल्याङ कुनु?” 52एम्बालाइ वासेहेङ दोअ्हि, “हाइ ना बुङ गालिलको एइ? धरमकिताब भोतेङ खाङ, कालाउ ग्याना, गालिलसो आगाधुइका माओल्ह्याङ।”
53[कोलाउ झाराङ द्याङगेलाइ ताताइको साअ्भारि हानेहि।
Currently Selected:
युहन्ना 7: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
