युहन्ना 9
9
इसु कान्हाहेङ एल्पाका
1ए नि इसु हानेकाताङपालाउ ए मि जोलोमसोङ कान्हाहेङ तिङहि। 2वाको चात्यागेलाइ वासेहेङ हिअ्हि, “मास्टर, हासु कुकरम पाहि? या बे याको आबा आमाइ? कालाउ या कान्हा जोन्मेहि।” 3इसु दोअ्हि, “ना ते या कुकरम पाहि ना याको आबा आमाइ, कुलाउ परमेस्वरको काम इदोइ द्याङता देखाल ज्याको दोअ्तेङ दोङ वा कान्हा जेङका एइ। 4कासेहेङ दिङगिल्काको कामगेलाइ केलाइ दिना हिलाउ दोङ पालिगोयाङ। न्हिसिङ जेङकान्हुअ्सो हासुङ काम पालि माद्वावा। 5दुनियाता हिपाधाउ का दोङ दुनियाको जोल्का एइ।”#मत्ति ५:१४; युहन्ना ८:१२
6इदोइ काथा दोअ्तेङ वा भोनोता थोअ्हि रो थोअ्चिहोइ भोनो मोअ्तेङ कान्हाको मिता लाइपिहि। 7कालाउ वा इङकोहेङ दोअ्हि, “हाने, सिलोआमको (जाइको माने दिङगिल्का) चावान्दिता हानेतेङ झा।” इङको हानेतेङ झाहि रो तिङका जेङतेङ घुरिहि।
8इङकोको भेर्पाकोलाइ रो इङकोहेङ भिक र्हेका तिङकालाइ दोअ्हि, “योम्तेङ भिक र्हेका द्याङ हाइ याआङ माको?”
9आधेमि दोअ्हि, “या इङकोङ एइ।” बोमि दोअ्हि, “माको, या इङकोङभाइका तिङखे।” इङको दोअ्हि, “एइ, का इङकोङ एइ।”
10कोलाउ एम्बालाइ इङकोहेङ हिअ्हि, “ना मि हेसापा कहेन्हाहि कुनु?”
11इङको दोअ्हि, “इसु दोअ्का ए मि द्याङ भोनो मोअ्तेङ काङको मिता लागाइपितेङ दोअ्हि, ‘सिलोआमको पोखरिता हानेतेङ झा।’ कालाउ इन्ता हानेतेङ झाघा रो का तिङका जेङघा।”
12एम्बालाइ इङकोहेङ हिअ्हि, “इङको हिसो हि कुनु?”
इङको दोअ्हि, “का माग्याङका।”
फरिसिगेलाइसो हिअ्काहाअ्का
13इङकोन्हुअ्सो कान्हा जेङका इङको द्याङहेङ एम्बालाइ फरिसिगेलाइकोता चुमाहि। 14जेदोङ दिना इसु इङकोको मि हेपिका हिघाहि, इङको माइसाका दिना हिघाहि। 15फरिसिगेलाइ इङकोहेङ हिअ्हि, “ना हेसापा तिङका जेङन्हा?” इङको एम्बालाइहेङ दोअ्हि, “वा काङको मिता भोनो मोअ्तेङ लाइपिहि, कालाउ का झाघा रो तिङका जेङघा।”
16फरिसिगेलाइता आधेमि दोअ्हि, “इङको द्याङ परमेस्वरपाहासो लोका माको, हाइपानु इङको माइसाका दिना मामानिखे।”
कुलाउ आधेमि दोअ्हि, “हेसापा कुकरमि द्याङ इसिका कामगेलाइ पालि द्वावा?” एसापा एम्बालाइको माझाता बेमेल जेङलि हानेहि।
17फरिसिगेलाइ इङकोहेङ आरोङ हिअ्हि, “वा नाङको मि हेपिहि, एला वाको बारेता ना हाइ दोअ्खेना?”
इङको दोअ्हि, “वा आगाधुइका हि।”
18मि तिङका द्याङको आबा आमाइहेङ काइतेङ माहिअ्पाधाउ यहुदिगेलाइ इङको कान्हा हिघाहि रो तिङका जेङहि दोअ्तेङ खान्धुर मापाहि। 19कोलाउ एम्बालाइ ओबालाइहेङ हिअ्हि, “हाइ या नेलाइकोङ चान एइ जाइ जोलोमसोङ कान्हा हिघाहि? कालाउ हेसापा इङको तिङलि दोका जेङहि?”
20इङकोको आबा आमाइ एम्बालाइहेङ दोअ्हि, “एइ, या केलाइको चान एइ रो या जोलोमसोङ कान्हा हिघाहि। 21कुलाउ या हेसापा तिङका जेङहि रो याको मि हासु हेपिहि इङको केलाइ माग्याङ। इङकोको बोइसा थेम्का हि, इङकोहेङ दोङ हिअ्सु। ताइको बारेता इङको ताइमिङ दोअ्तावा।” 22इङकोको आबा आमाइ यहुदि आगुवा गेलाइदोफा थिघाखे। हाइदोनु जाइ वासेहेङ ख्रिस्ट दोअ्तेङ मन्जुर पाखे, इङकोहेङ कचहरिसाअ्सो ओल्हेपालि गोयाङ दोअ्तेङ एम्बालाइ लाम्फा दोङ राजि जेङका हिघाखे। 23इदोङखातिर इङकोको आबा आमाइ “याको बोइसा थेम्का हि, यासेहेङ दोङ हिअ्सु” दोअ्का हिघाखे।
24कोलाउ एम्बालाइ इङको कान्हा द्याङहेङ न्हे खेप काइतेङ दोअ्हि, “परमेस्वरहेङ प्रताप पि। केलाइ गेन्हाखे, इदोइ द्याङ कुकरमि एइ।”
25इङको दोअ्हि, “वा कुकरमि हि बे माहि, का माग्याङका। एलोङ काथा खिनिङ का गेखा, का कान्हा हिघाखा, कुलाउ एला तिङका जेङघा।”
26एम्बालाइ इङकोहेङ दोअ्हि, “वा नासेहेङ हाइ पाहि? वा नाङको मि हेसापा हेपिहि?”
27इङको एम्बालाइहेङ दोअ्हि, “का नेलाइहेङ लाम्फा दोङ दोअ्होइका, कुलाउ नेलाइ माहिङसुन्हा। एला आरोङ हाइपालि इङकोङ काथा हिङलि भोसुखेना? नेलाइ बुङ वाको चात्या जेङलि भोसुखेना बे हाइको?”
28एम्बालाइ इङकोहेङ चेरतेङ दोअ्हि, “ना कि वाको चात्या एइ, कुलाउ केलाइ ते मोसाको चात्या एइ। 29केलाइ गेन्हाखे मोसादोफा परमेस्वर धुइका हिघाहि, कुलाउ केलाइ मागिन्हाखे इदोइ द्याङचाहिँ हिताको एइ।”
30इङको एम्बालाइहेङ दोअ्हि, “हिसिका भारभुसाइका काथा! वा हितासो लोहि नेलाइ मागेसुखेना, कुलाउ काङको मि वा हेपिहि। 31केलाइ गेन्हाखे, परमेस्वर कुकरमिगेलाइको काथा माहिङखे, कुलाउ परमेस्वरहेङ थिका रो वाको लाल्सा साअ्का खामालको काथा परमेस्वर हिङखे। 32दुनियाको लाम्फासोङ एलाथिकापा जोलोमकोङ कान्हाको मि हासुङ हेपिका हेअ्लाउ बुङ हिङका मान्थु। 33एदि इदोइ द्याङ परमेस्वरसो मालोका हिनु वा हाइदोङ पालि मादोधावा।”
34एम्बालाइ इङकोहेङ दोअ्हि, “ना कुकरमता जोन्मेका हिघान्हा, हाइ एला ना केलाइहेङ धिरपालि भोखेना?” कालाउ एम्बालाइ इङकोहेङ कचहरिसाअ्सो बाहार ओल्हेपागिल्हि।
हाङसाको कान्हा
35जेलाउ यहुदि आगुवागेलाइ इङकोहेङ ओल्हेपागिल्हि दोअ्का इसु हिङहि कोलाउ इङकोहेङ दुसुतेङ दोअ्हि, “हाइ ना का द्याङको चानहेङ खान्धुर पाखेना?”
36इङको वासेहेङ दोअ्हि, “मास्टर, वा हासु हि? का वासेहेङ खान्धुर पाङका।”
37इसु इङकोहेङ दोअ्हि, “ना वासेहेङ तिङका हिन्हा, कालाउ नादोफा धुइका वा दोङ एइ।”
38इदोइ हिङतेङ इङको वासेहेङ सेउपातेङ दोअ्हि, “प्रभु, का खान्धुर पाङका!”
39इसु दोअ्हि, “का नियाको भाअ्सिङ इदोइ दुनियाता लोघा, हाइपानु मातिङकालाइ तिनाको रो तिङकालाइचाहिँ कान्हा ज्याको।”
40इदोइ काथा हिङतेङ वाको भेर्पा हिका फरिसिगेलाइता आधेमि वासेहेङ दोअ्हि, “हाइ केलाइ बुङ कान्हा एइ कुनु?”
41इसु एम्बालाइहेङ दोअ्हि, “नेलाइ कान्हा हिनु ते कुकरमको दागि माजेङसुधाना, कुलाउ नेलाइ ‘केलाइ तिङन्हाखे’ दोअ्सुखेना, इदोइखातिर नेलाइको कुकरम हितेङह्यावा।”
Currently Selected:
युहन्ना 9: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
