युहन्ना 17
17
ताइको भाअ्सिङ इसुको पुकार
1इदोइ काथा दोअ्लिदोकान्हुअ्सो इसु सादेलभारि खाङतेङ दोअ्हि, “आबा, पहर थुकालिलोका हि, नाङको चानको प्रताप देखाल पापि रो चान नाङको प्रताप देखाल पाको। 2हाइपानु ना वासेहेङ गोताङ द्याङगेलाइर्हुता खाबारा पिका हिन्हा, कोलाउ ना वासेहेङ पिका झाराङहेङ वा असिम ज्यान प्याको। 3एला असिम ज्यान इदोइ एइ, एम्बालाइ ना एमिखिनिङ सत परमेस्वरहेङ नालाको रो नाङको दिङगिल्का इसु ख्रिस्टहेङ नालाको। 4जेदोङ काम ना कासेहेङ पिन्हा, इङको पोङघा पातेङ नासेहेङ सुमिङता का प्रतापि पाका हिघा। 5आबा, दुनियाको सिरजाइ जेङका लाम्फा नाङको लोकाता कासेहेङ प्रतापि बान्हाइ।
चात्यागेलाइको भाअ्सिङ इसुको पुकार
6“दुनियासो जेदोङ द्याङगेलाइ ना कासेहेङ पिन्हा, का एम्बालाइहेङ नाङको मिङ देखाल पापिका हिघा। एम्बालाइ नाङको हिघाखे, कालाउ ना एम्बालाइ कासेहेङ पिन्हा रो एम्बालाइ नाङको कथन साअ्का हि। 7एम्बालाइ एला गेहि, ना कासेहेङ पिका गोताङ काथा नासो लोका एइ। 8हाइदोनु जेदोङ धुइका ना कासेहेङ पिन्हा, का एम्बालाइहेङ पिका हिघा रो एम्बालाइ इङको र्हुका हि। का नासो लोका एइ दोअ्तेङ एम्बालाइ जातिङको गेका हि। कालाउ ना कासेहेङ दिङगिल्का एइ दोअ्तेङ एम्बालाइ खान्धुर पाका हि। 9का दुनियाको भाअ्सिङ पुकार मापाखा, कुलाउ का एम्बालाइको भाअ्सिङ पुकार पाखा, जाइहेङ ना कासेहेङ पिका हिन्हा। हाइदोनु एम्बालाइ नाङकोङ एइ। 10काङको गोताङ जेदोङ हि नाङको एइ रो नाङको जेदोङ हि काङको एइ। काङको प्रताप नेलाइता देखाल जेङका हि।
11“का आरोङ दुनियाता माह्याङका, कुलाउ एबालाइ ते दुनियाता ह्यावा। हाइपानु काचाहिँ नाङकोता लोदोङखा। पुनित आबा, ना कासेहेङ पिका नाङको मिङता एम्बालाइहेङ हिफाजत ताअ् रो केलाइ भाइपाङ एम्बालाइ बुङ ए ज्याको। 12जेलाउथिकापा का एम्बालाइदोफा हिघाखा, ना कासेहेङ पिका नाङको मिङता एम्बालाइहेङ रेम्फा ताअ्घा रो एम्बालाइहेङ बान्चेपाघा। कालाउ एम्बालाइता बिगारको चानबिना बो हासुङ मुअ्का माजेङहि, हाइपानु धरमकिताब पोङघा जेङलि जरुरि हिघाहि।#ले ४१:९; युहन्ना १३:१८
13“एला का नाङकोता लोदोङखा। दुनियाता हिलाउ इदोइ काथा का धुइखा, एम्बालाइता काङको लेङ पोङघा ज्याको। 14का एम्बालाइहेङ नाङको कथन पिघा, कुलाउ दुनिया एम्बालाइहेङ दिगमिग पाहि। हाइपानु एम्बालाइ दुनियाको माको, जेसापा का दुनियाको माको। 15ना एम्बालाइहेङ दुनियासो चुम्पु दोअ्तेङ का पुकार मापाङका। कुलाउ एम्बालाइहेङ दियाबलससो हिफाजत ताअ्पि। 16जेसापा एम्बालाइ दुनियाको माको, का बुङ दुनियाको माको। 17एम्बालाइहेङ सतता पुनित पापि, नाङको कथन सत हि। 18जेसापा ना कासेहेङ दुनियाता दिङगिलन्हा, का बुङ एम्बालाइहेङ दुनियाता दिङगिल्का हिघा। 19एम्बालाइको भाअ्सिङ का ताइमिहेङ पुनित पाखा, कोलाउ नेलाइ बुङ सतता पुनित जेङसु।
खान्धुरिगेलाइको भाअ्सिङ इसुको पुकार
20“का एबालाइको भाअ्सिङ खिनिङ पुकार मापाङका, कुलाउ एबालाइको बानालसो कासेहेङ खान्धुर पाकालाइको भाअ्सिङ बुङ पुकार पाङका। 21हाइपानु एम्बालाइ झाराङ एलोङ ज्याको। आबा, जेसापा ना काता हिन्हा रो का नाता हिघा, एन्साङ एम्बालाइ बुङ केलाइता ह्याको। कालाउ ना कासेहेङ दिङगिलन्हा दोअ्तेङ दुनिया खान्धुर पाको। 22जेदोङ प्रताप ना कासेहेङ पिका हिन्हा, का एम्बालाइहेङ पिका हिघा रो केलाइ ए जेङकाभाइपाङ एम्बालाइ बुङ ए ज्याको। 23का एम्बालाइता, कालाउ ना काता हिका भाइपाङ एम्बालाइ बुङ ए ज्याको। ना कासेहेङ दिङगिल्का एइ, कालाउ कासेहेङ इन्ताना पाकाभाइपा ना एम्बालाइहेङ बुङ इन्ताना पान्हा दोअ्तेङ दुनिया ग्याको।
24“आबा, का लाल्सा पाखा, ना कासेहेङ पिकालाइ का जेता हिघा एम्बालाइ कादोफाङ ह्याको रो काङको प्रताप तिनाको। जेदोङ प्रताप दुनियाको सिरजाइ जेङका लाम्फासो दोङ कासेहेङ इन्ताना पाका हिनाङ ना कासेहेङ पिका हिघान्हा।
25“धरमाति आबा, दुनिया नासेहेङ मानाल्खे, कुलाउ का नासेहेङ नाल्खा। कालाउ ना कासेहेङ दिङगिल्का एइ दोअ्तेङ चात्यागेलाइ गेखे। 26का नाङको मिङ एबालाइता देखाल पापातेङह्याङका, कोलाउ जेदोङ इन्तानाहोइ कासेहेङ ना इन्ताना पान्हा, इङको एम्बालाइता ह्याको रो का एम्बालाइता ह्याङका।”
Currently Selected:
युहन्ना 17: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
