युहन्ना 18
18
इसुहेङ रिम्का
(मत्ति २६:४७-५६; मर्कुस १४:४३-५०; लुका २२:४७-५३)
1इदोइ काथा दोअ्लिदोतेङ इसु ताइको चात्यागेलाइदोफा किद्रोन जोलाओदोइपार हानेहि। इन्ता एलोङ बागान हिघाहि। इसु ताइको चात्यागेलाइदोफा इन्ता दुल्हि। 2वासेहेङ रिम्पाका यहुदा बुङ इङको थामे नाल्का हिघाहि, हाइदोनु इसु ताइको चात्यागेलाइदोफा इन्ता हानेघाखे। 3इङको पहर गिसा, उका रो काति चुमका सिपाल्हाइको ए हुल रो मुल धामि कालाउ फरिसिगेलाइ दिङगिल्का थानको पालेगेलाइ चुम्तेङ यहुदा इन्ता लोहि।
4कोलाउ ताइमिर्हुता लोलितोम्का गोताङ काथा गेतेङ इसु आगा सरेहि रो एम्बालाइहेङ दोअ्हि, “नेलाइ हासुहेङ भोदोङसुखेना?”
5एम्बालाइ वासेहेङ दोअ्हि, “नासरतको इसुहेङ।”
इसु एम्बालाइहेङ दोअ्हि, “का वाआङ एइ।” कालाउ वासेहेङ रिम्पापिका यहुदा बुङ एम्बालाइदोफाङ जाअ्तेङ हिघाहि। 6जेलाउ इसु एम्बालाइहेङ “का वाआङ हिघा” दोअ्हि, कोलाउ एम्बालाइ न्हुअ् पासाइतेङ भोनोता लोङहि। 7आरोङ इसु एम्बालाइ हिअ्हि, “नेलाइ हासुहेङ भोदोङसुखेना?” एम्बालाइ दोअ्हि, “नासरतको इसुहेङ।” 8इसु दोअ्हि, “का नेलाइहेङ दोअ्होइका, का वाआङ एइ। एदि नेलाइ कासेहेङ भोदोङसुखेना पानु इदोइ द्याङगेलाइहेङ चाहिँ हानेलि पिसु।”
9“ना कासेहेङ पिकालाइता एमिहेङ बुङ का माराम्पाघा” दोअ्तेङ वाको दोअ्का कथन पोङघाको दोअ्तेङ इदोइ जेङहि।
10एन्सालाउ सिमोन पत्रुस ताइमिदोफा हिका काति ओल्हेपातेङ मुल धामिको बान्धाइको दामपाहा न्हातोङ पुकापापिहि। जाइको मिङ माल्खस हिघाहि।
11इसु पत्रुसहेङ दोअ्हि, “काति दाबिता ह्वाअ्। हाइ आबा कासेहेङ पिका तु:को बाति माआम्लि?”#मत्ति २६:३९; मर्कुस १४:३६; लुका २२:४२
इसु हन्नासकोता चुम्पुन्हाका
12इङकोन्हुअ्सो सिपाल्हाइको हुल, एम्बालाइको काप्तान रो यहुदि आगुवागेलाइको दिङगिल्का थानको पालेगेलाइ इसुहेङ रिम्हि रो वासेहेङ धेउहि। 13लाम्फा एम्बालाइ वासेहेङ हन्नासकोता चुम्पुहि, जाइ इङको बाअ्सारको मुल धामि कैयाफाको जुवा हिघाखे। 14इदोङ इङकोङ कैयाफा हिघाखे, जाइ राइतिको भाअ्सिङ ए मि द्याङ सिलि दोङ भालाइ हि दोअ्तेङ यहुदि आगुवागेलाइहेङ मतो पिका हिघाखे।#युहन्ना ११:४९-५०
पत्रुसको लाङ नामन्जुर
(मत्ति २६:६९-७०; मर्कुस १४:६६-६८; लुका २२:५५-५७)
15सिमोन पत्रुस रो इसुको भेनेङ ए मि चात्या वासेहेङ पिताइहि। इङको भेनेङ चात्याचाहिँ मुल धामिको नाल्का हिघाखे रो इसुदोफाङ मुल धामिको सालेङता दुल्हि। 16कुलाउ पत्रुस बाहार द्वारता जाअ्धिहि। इङको भेनेङ चात्याचाहिँ जाइ मुल धामिको नाल्का हिघाखे, बाहार ओल्हेतेङ द्वारता हिका बेजानहेङ दोअ्तेङ पत्रुसहेङ लिअ्ता चुमाहि। 17कोलाउ द्वारता हिका इङको बेजान पत्रुसहेङ हिअ्हि, “हाइ ना बुङ इदोइ द्याङको चात्या माको?”
पत्रुस दोअ्हि, “का माको।”
18इन्ता कामत्या रो पालेगेलाइ चुङकाता जाअ्तेङ मे एम्तेङ हिघाखे। कालाउ पत्रुस बुङ एम्बालाइदोफाङ जाअ्तेङ मे एम्लि तेङहि।
मुल धामि इसुहेङ हिअ्का
(मत्ति २६:५९-६६; मर्कुस १४:५५-६४; लुका २२:६६-७१)
19मुल धामि इसुहेङ वाको चात्यागेलाइ रो वाको बिद्याको बारेता हिअ्हि। 20इसु इङकोहेङ दोअ्हि, “का झाराङको आगाता दोअ्का हिघा। का दिनाङ कचहरिसाअ्ता रो थानता बिद्या पिका हिघा, जेता झाराङ यहुदिगेलाइ जोम्खे। का सिपापा हाइदोङ दोअ्नाङ मान्थुघा। 21कासेहेङ हाइपालि हिअ्खेना? का एम्बालाइहेङ हाइ दोअ्घा इङको हिङकालाइहेङ दोङ हिअ्। का दोअ्का काथागेलाइ एबालाइ दोङ ग्यावा।”
22इसु इदोइ काथा दोअ्लाउ भेर्पा जाअ्का पालेगेलाइता ए मि वासेहेङ चाउरेतेङ एसा दोअ्हि, “हाइ मुल धामिदोफा एसापा नुइ लागेखेना?”
23इसु इङकोहेङ दोअ्हि, “का माजेङका दोअ्काहिघा पानु इङकोको दासि पि, कुलाउ एदि का मुनासिप दोअ्का हिघा पानु कासेहेङ हाइपालि दान्हाइखेना?” 24कोलाउ हन्नास इसुहेङ धेउन्हाकाङ हालतता मुल धामि कैयाफाकोता दिङगिल्हि।
पत्रुसको न्हे रो सुम नामन्जुर
(मत्ति २६:७१-७५; मर्कुस १४:६९-७२; लुका २२:५८-६२)
25सिमोन पत्रुस जाअ्तेङ मे एम्दोङघाखे। एम्बालाइ इङकोहेङ दोअ्हि, “हाइ वाको चात्यागेलाइता ए मि ना बुङ माको?”
पत्रुस दोअ्हि, “का माको।”
26मुल धामिको कामत्यागेलाइता ए मि, जाइको ताइकोको न्हातोङ पत्रुस पुक्कापापिका हिघाखे, इङको हिअ्हि, “हाइ का नासेहेङ इङकोदोफा बागानता तिङका माको कुनु?” 27कोलाउ आरोङ पत्रुस नामन्जुर पाहि रो ओदोङघरि धाङगाइ ओहि।
इसुहेङ पिलातसकोता चुम्पुका
(मत्ति २७:१-२,११-३१; मर्कुस १५:१-२०; लुका २३:१-५,१३-२५)
28जुम्नि दिना ए र्हिमाङ एम्बालाइ इसुहेङ कैयाफाको साअ्सो रोमि बाराहाकिम पिलातसको महलता चुम्पुहि। एम्बालाइ महलता मादुल्हि, हाइदोनु लाअ्पिका पारबाको भातेर चालिको भाअ्सिङ एम्बालाइ ताइमिहेङ पुनित ताअ्लि भोघाखे।#१८:२८ पिलातस यहुदि मान्ठुघाहि, ओदोङभाअ्सिङ यहुदिगेलाइ वाको महल लिअ्ता मादुल्हि एम्बालाइको रितिरिवाज दोअ्खे एदि एम्बालाइ बो जात्याको साअ् लिअ्ता दुल्हि पानु अपुनित जेङघाखे। 29इदोइखातिर एम्बालाइकोता बाहार ओल्हेतेङ पिलातस दोअ्हि, “नेलाइ हाइ फतुर लागाइस्वाना?”
30एम्बालाइ वासेहेङ दोअ्हि, “इदोइ द्याङ कुकरमि मान्थुनु केलाइ यासेहेङ नाङकोता हाइपालि चुमाधाङ कुनु?”
31पिलातस एम्बालाइहेङ दोअ्हि, “नेलाइ यासेहेङ चुमपुसु रो नेलाइको ताइकोङ नियममाफिक याको निसाप पासु।”
यहुदि आगुवागेलाइ इङकोहेङ दोअ्हि, “हिदिङ द्याङहेङ ज्यानदार पिका खाबरा केलाइहेङ मान्थु।” 32इसुको सिका हिदोइ रितहोइ ज्याङ इङकोको तिप्नि पितेङ वाको दोअ्का कथन पोङघालि एसा जेङका हिघाहि।#युहन्ना ३:१४; १२:३२
33पिलातस आरोङ महललिअ्ता हानेहि रो वा इसुहेङ काइतेङ दोअ्हि, “हाइ ना यहुदिगेलाइको राजा हिन्हा?”
34इसु दोअ्हि, “ना ताइमिङ एसा दोअ्खेना बे काङको बारेता नासेहेङ बो हासुङ दोअ्हि?”
35पिलातस दोअ्हि, “हाइ का यहुदि एइ कुनु? नाङकोङ जात्या रो मुल धामिगेलाइ नासेहेङ काङकोता चुमाहि। ना हाइ पान्हा?”
36इसु दोअ्हि, “काङको सारभि इदोइ दुनियाको माको। काङको सारभि इदोइ दुनियाको हिका हिनु काङको सेवापाकालाइ काङको भाअ्सिङ फेअ्सुधावा रो का यहुदि आगुवागेलाइको खुर्ता मापरेधाङका। कुलाउ काङको सारभि दुनियाको माको।”
37पिलातस इसुहेङ हिअ्हि, “एन्सा पानु, हाइ ना राजा दोङ हिना ते?”
इसु दोअ्हि, “का राजा हिघा दोअ्तेङ ना ताइमिङ दोअ्दोङखेना। याकोङ भाअ्सिङ का जोन्मेका एइ रो याकोङ भाअ्सिङ सतको दासि पिलि का इदोइ दुनियाता लोका एइ। झाराङ जाइ सतको पाहाता हि, इङको काङको दोअ्का साअ्खे।”
38पिलातस इसुहेङ हिअ्हि, “सत हाइ एइ?” इदोइ दोअ्तेङ वा बाहार यहुदिगेलाइकोता हानेहि रो एम्बालाइहेङ दोअ्हि, “का याता हाइदोङ फतुर मानिङखा। 39लाअ्पिका पारबाता बाअ्सारकिअ्पाङ ए मि थुनुवाहेङ नेलाइको भाअ्सिङ लाअ्पिका नेलाइको चलन हि। हाइ नेलाइ भोसुखेना, इदोइखेप यहुदिगेलाइको राजाहेङ लाअ्प्याङका?”
40कुलाउ एम्बालाइ र्हिकाइतेङ दोअ्हि, “यासेहेङ माको, बारब्बाहेङ लाअ्पि!” बारब्बाचाहिँ डाकु हिघाहि।
Currently Selected:
युहन्ना 18: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
