युहन्ना 16
16
1“नेलाइको खान्धुर मालाअ्न्हाको दोअ्तेङ दोङ का इदोइ काथा नेलाइहेङ दोअ्का एइ। 2एम्बालाइ नेलाइहेङ यहुदि कचहरिसाअ्गेलाइसो ओल्हेपागिलावा। जातिङको इसिका पहर लोदोङखे, जेलाउ नेलाइहेङ सेअ्का पाकाहेङ परमेस्वरको सेवा पादोङखा दोअ्तेङ फोमपावा। 3एम्बालाइ इदोइ काम पावा, हाइदोनु एम्बालाइ आबाहेङ नाल्का मान्थु रो कासेहेङ बुङ मानाल्खे। 4कुलाउ इदोइ काथा का नेलाइहेङ दोअ्का हिघा। जेलाउ इङको पहर ल्वावा, कोलाउ नेलाइहेङ हाइ दोअ्का हिघाखा दोअ्तेङ नेलाइहेङ फोम जेनावा। लाम्फा दोङ का नेलाइहेङ इदोइ काथा मादोअ्घा, हाइपानु का नेलाइदोफा हिघाखा।
पुनित हाङसाको काम
5“एला का कासेहेङ दिङगिल्काकोता हानेदोङखा। कालाउ बुङ ‘ना हिसो हानेदोङखेना?’ दोअ्तेङ नेलाइ हासुङ कासेहेङ माहिअ्स्वाना। 6का नेलाइहेङ इदोइ काथा दोअ्का खातिर नेलाइको कोन्धाङ पिरहोइ पोङघाका हि। 7कुलाउ का नेलाइहेङ सत काथा दोअ्खा, का हानेकाता दोङ नेलाइको भालाइ हि। हाइदोनु का मान्हेघा पानु, साल्हापिका नेलाइकोता मालावा। 8कालाउ जेलाउ वा ल्वावा, वा दुनियाहेङ कुकरम, धरमाति रो नियाको बारेता दागि ठर्हायावा। 9कुकरमको बारेता, हाइदोनु एम्बालाइ कार्हुता खान्धुर मापाखे। 10धरमाति काथाको बारेता, हाइदोनु का आबाकोता हानाङका रो नेलाइ कासेहेङ आरोङ मातिङस्वाना। 11नियाको बारेता, हाइदोनु इदोइ दुनियाको राजपाकाहेङ दार पिलिदोका हि।
12“का नेलाइहेङ दोअ्का काथा आरोङ हेन्जाङ हि, कुलाउ एला नेलाइ इङको काथा सहेलि मादोस्वाना। 13जेलाउ वा पुनित हाङसा ल्वावा, कोलाउ वा नेलाइहेङ गोताङ सतता थोङगिलावा। वा ताइको पाहासो माधुयावा। वा जेदोङ हिनावा, इङकोङ धुयावा रो जेङलि लोका काथागेलाइ नेलाइहेङ हुकुम पाप्यावा। 14वा काङको प्रताप पावा, हाइदोनु जेदोङ काङको एइ, इङको कासो र्हुतेङ नेलाइहेङ इङको पाप्यावा। 15जे जेथे आबादोफा हि, इङको काङको एइ। इदोङखातिर का दोअ्घा, जेदोङ काङको एइ इङको कासो र्हुतेङ पुनित हाङसा नेलाइहेङ हुकुम पाप्यावा।
चात्यागेलाइ सुर्ता रो लेङ
16“आतुइसा पहरन्हुअ्सो नेलाइ कासेहेङ आरोङ मातिङस्वाना, कालाउ आतुइसा पहरन्हुअ्सो कासेहेङ आरोङ तिङस्वाना।” 17कोलाउ वाको आधेमि चात्यागेलाइ ताताइमिता दोअ्हि, “वा केलाइहेङ इदोइ हाइ दोअ्का एइ? ‘आतुइसा पहरन्हुअ्सो नेलाइ कासेहेङ मातिङस्वाना, कालाउ आरोङ आतुइसा पहरन्हुअ्सो नेलाइ कासेहेङ तिङस्वाना’ रो ‘हाइपानु का आबाकोता हानेदोङखा।’” 18एम्बालाइ दोअ्हि, “वा ‘आतुइसा पहरन्हुअ्सो’ दोअ्का हाइ एइ? केलाइ माग्याङ, वा हाइ दोअ्दोङखे।”
19एम्बालाइ वासेहेङ हिअ्लि लाल्सा पादोङखे दोअ्का गेतेङ इसु दोअ्हि, “‘आतुइसा पहरन्हुअ्सो नेलाइ कासेहेङ मातिङस्वाना रो आतुइसा पहरन्हुअ्सो कासेहेङ तिङस्वाना’ दोअ्का काथाको माने हाइ एइ दोअ्का बारेता हाइ नेलाइ ताताइमिता सावालजावाफ पादोङसुखेना? 20जातिङको, का नेलाइहेङ दोअ्खा, नेलाइ खारस्वाना रो बिलाप पास्वाना, कुलाउ दुनिया लेङचावा। नेलाइ पिर पास्वाना, कुलाउ नेलाइको पिर लेङता फेरेन्हावा। 21जामाल जोन्माइका पहरता बेबालहेङ बेथा निङचाखे, हाइदोनु इङकोको पहर लोका हिखे। कुलाउ जेलाउ वा जामाल जोन्माइखे, कोलाउ इङकोहेङ इङको पिरको फोम माजेङखे, हाइपानु दुनियाता एलोङ जामालको जोलोम जेङहि दोअ्का काथाता इङको लेङचाखे। 22एसापा दोङ एला नेलाइहेङ पिर जेङखे, कुलाउ का आरोङ नेलाइहेङ तिनाङका रो नेलाइको कोन्धाङ लेङचाका ज्यावा। कालाउ हासुङ नेलाइको लेङ नेलाइसो माघिङन्हावा। 23इङको दिना नेलाइ कासेहेङ हाइदोङ माहिअ्स्वाना। जातिङको का नेलाइहेङ दोअ्खा, नेलाइ काङको मिङता आबादोफा जेदोङ र्हेस्वाना, वा नेलाइहेङ प्यावा। 24एलाथिकापा नेलाइ काङको मिङता हाइदोङ र्हेका मान्थुसुन्हा। र्हेसु, कालाउ नेलाइ निङस्वाना। एसापा नेलाइको लेङ पोङघा ज्याको।
दुनियाहेङ जितिका
25“इदोइ काथा का नेलाइहेङ उपमाता दोअ्का हिघा। कुलाउ पहर लोदोङखे, जेलाउ का नेलाइदोफा आरोङ उपमाता माधुयाङका, कुलाउ आबाको बारेता नेलाइहेङ गेपाङ दोअ्ताङका। 26इङको दिना नेलाइ काङको मिङता र्हेस्वाना। का नेलाइको भाअ्सिङ आबादोफा पुकार पाप्यायाङका दोअ्तेङ नेलाइहेङ मादोअ्ताङका। 27हाइदोनु आबा ताइमिङ नेलाइहेङ इन्ताना पाखे, हाइपानु नेलाइ कासेहेङ इन्ताना पाका हिसुन्हा रो का परमेस्वर पाहासो लोघा दोअ्तेङ खान्धुर पाका हिसुन्हा। 28का आबासो लोघा, कालाउ दुनियाता लोका हिघा रो आरोङ का दुनियाहेङ लाअ्तेङ आबाकोता हानेदोङखा।”
29चात्यागेलाइ वासेहेङ दोअ्हि, “एला ना गेपाङ धुइदोङखेना, उपमाता माको। 30एला केलाइ गेन्हाहि, ना गोताङ काथा गेखेना, कालाउ नासेहेङ हासुङ हिअ्लि जरुरि मान्थु। एन्साङ केलाइ खान्धुर पान्हाखे, ना परमेस्वरसो लोका एइ।”
31इसु एम्बालाइहेङ दोअ्हि, “हाइ नेलाइ एला खान्धुर पासुखेना? 32खाङसु, पहर लोदोङखे, जातिङको लोका हि। जेलाउ नेलाइ राइन्हातेङ ताइकोङ थामेता हानेस्वाना रो कासेहेङ एकालाङ लाअ्स्वाना। कोलाउबुङ का एकालाङ मान्थुघा, हाइदोनु आबा कादोफा हि। 33का नेलाइहेङ इदोइ काथा इदोइ खातिरहोइ दोअ्का हिघा, काता नेलाइहेङ सुबिस्ता ज्याको। दुनियाता नेलाइहेङ जोखिम ज्यावा, कुलाउ हिमत पासु, का दुनियाहेङ जितिका हिघा।”
Currently Selected:
युहन्ना 16: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
