युहन्ना 13
13
इसु ताइको चात्यागेलाइको खोकोइ झाका
1लाअ्पिका पारबाको लाम्फा इदोइ दुनियासो बेदाङगि जेङतेङ आबाकोता हानेका वाको पहर लोहोइ दोअ्का इसु गिहि। कालाउ दुनियाता हिका ताइको द्याङहेङ इन्ताना पातेङ वा एम्बालाइहेङ आखिरिथिकापाङ इन्ताना पाहि।
2कालाउ दिलिमाको चाकाको पहर दियाबलस सिमोनको चान यहुदा इस्करियोतको मनता इसुहेङ रिम्पाका ठहर लाम्फासोङ ह्वाअ्पिलिदोका हिघाहि। 3आबा गोताङ थोक वाको खुरता पिका हि, वा परमेस्वर पाहासो लोका एइ रो परमेस्वरकोता दोङ हानेदोङखे दोअ्का काथा इसु गेघाखे। 4कालाउ वा चाकासो ल्होहि रो गुअ्का धाबा एपाहा ताअ्तेङ एलोङ चेउताइ ताइको केङखेनेता तेअ्हि। 5कोलाउ वा भान्दाता चि हुहि, चात्यागेलाइको खोकोइ झातेङ चेउताइहोइ एम्बालाइको खोकोइ योअ्पिलि तेङहि।
6जेलाउ इसु सिमोन पत्रुसकोता लोहि, कोलाउ पत्रुस वासेहेङ दोअ्हि, “प्रभु, हाइ ना काङको खोकोइ झाकाना?”
7इसु पत्रुसहेङ दोअ्हि, “का हाइ पादोङखा ना माग्याना, कुलाउ न्हुअ्सो ग्याना।”
8पत्रुस वासेहेङ दोअ्हि, “ना काङको खोकोइ हेअ्लाउ माझाकाना।”
इसु इङकोहेङ दोअ्हि, “का नाङको खोकोइ माझापिघा पानु कादोसा नाङको हाइदोङ भाग मान्थ्वावा।”
9सिमोन पत्रुस वासेहेङ दोअ्हि, “एन्सा एइ पानु प्रभु, काङको खोकोइ खिनिङ माको, कुलाउ काङको खुर रो पुरिङसुदाङ झापि।”
10इसु इङकोहेङ दोअ्हि, “चिउलिदोका द्याङहेङ खोकोइबिना बो हाइदोङ झालिमागोइखे, इङको पुनित जेङखे। कालाउ नेलाइ पुनित हिसुन्हा, कुलाउ झाराङ ते माको।” 11हाइदोनु ताइमिहेङ खान्धुरअहित पाकाहेङ इसु नाल्का हिघाहि। इदोङखातिर वा दोअ्का हिघाहि, “कुलाउ झाराङ माको।”
12चात्यागेलाइको खोकोइ झालिदोकान्हुअ्सो ताइको गुअ्का धावा लागाइतेङ इसु आरोङ योम्हि। कोलाउ वा एम्बालाइहेङ दोअ्हि, “हाइ नेलाइ गेसुखेना, का नेलाइको भाअ्सिङ हाइ पाघा?#लुका २२:२७ 13नेलाइ कासेहेङ मास्टर रो प्रभु दोअ्सुखेना, इङको नेलाइ मुनासिप दोअ्सुखेना, हाइदोनु का वाआङ एइ। 14एदि नेलाइको प्रभु रो मास्टर जेङतेङ का नेलाइको खोकोइ झाका हिघा पानु नेलाइ बुङ एमि भेनेङको खोकोइ झापिसु। 15हाइपानु का नेलाइहेङ एलोङ नामुना तिङपातेङ जेसापा का नेलाइको भाअ्सिङ पाघा, नेलाइ बुङ एन्साङ पासु। 16जातिङको का नेलाइहेङ दोअ्खा, कामत्या ताइको गिर्हिखान्तेङ बाराका माजेङखे, कालाउ बानाल चुम्पुका बानाल पिगिल्काखान्तेङ बाराका माजेङखे।#मत्ति १०:२४; लुका ६:४०; युहन्ना १५:२० 17एदि नेलाइ इदोइ काथा गेसुन्हा रो इङको पासुन्हा पानु, नेलाइ सहसाम्पा जेङस्वाना।
ताइमि रिमनिङचाका इसुको न्हुअ्धुइका
(मत्ति २६:२०-२५; मर्कुस १४:१७-२१; लुका २२:२१-२३)
18“का नेलाइ झाराङको बारेता दोअ्का माको, का हासुहेङ साल्का एइ इङकोहेङ का नाल्खा। कुलाउ धरमकिताब पोङघा ज्याको दोअ्तेङ इदोइ जेङहि, ‘काङकोङ तोले चाका काङको दुस्मन जेङहि।’#ले ४१:९ 19इदोइ जेङका खान्तेङ लाम्फा एला दोङ का नेलाइहेङ दोअ्खा, जेलाउ इङको जेङलि ल्वावा, का वाआङ एइ दोअ्तेङ नेलाइहेङ खान्धुर ज्याको। 20जातिङको का नेलाइहेङ दोअ्खा, जाइहेङ का दिङगिलाङका वासेहेङ र्हुका कासेहेङ र्हुकावा रो कासेहेङ र्हुका कासेहेङ दिङगिल्काहेङ र्हुकावा।”#मत्ति १०:४०; मर्कुस ९:३७; लुका ९:४८; १०:१६
21इदोइ काथा दोअ्कान्हुअ्सो इसु हाङसाता अधिर जेङहि रो वा दासि पितेङ दोअ्हि, “जातिङको का नेलाइहेङ दोअ्खा, नेलाइता ए मि कासेहेङ रिम्पावा।”
22इसु इदोइ काथा हासुको बारेता दोअ्का एइ दोअ्तेङ चात्यागेलाइ एमि भेनेङहेङ खाङसु पाहि। 23वाको चात्यागेलाइता इसु इन्ताना पाका चात्याचाहिँ वाको तुम्ताता बेझेम्तेङ हिघाखे। 24कोलाउ सिमोन पत्रुस इङकोहेङ तिप्नि पातेङ हिअ्हि, “वा इदोइ हासुको बारेता दोअ्का एइ।”
25इसुको तुम्ताता बेझेम्तेङ दोङ इङको वासेहेङ हिअ्हि, “प्रभु, इङको हासु एइ?”
26इसु दोअ्हि, “जाइहेङ का तोले चोभेर्तेङ प्याङका, इङको इङकोङ एइ।” कोलाउ वा तोले चोभेर्हि रो सिमोनको चान यहुदा इस्करियोतहेङ पिहि। 27तोले र्हुकान्हुअ्सो दियाबलस इङकोलिअ्ता दुल्हि।
कोलाउ इसु इङकोहेङ दोअ्हि, “ना जेदोङ पालि हि, इङको मारफाङ पा।” 28कुलाउ वा हाइपालि इङकोहेङ एसा दोअ्हि दोअ्तेङ चालि योम्कालाइ हासुङ मागेहि। 29हाइदोनु आधेमि इदोइ फोमपाहि, यहुदा दोफा टाकाको जाबि हिनाङ इसु इङकोहेङ पारबाको भाअ्सिङ गोइका आनेमाने चोलाको रो निरधनगेलाइहेङ आधे प्याको दोअ्का एइ। 30कोलाउ तोले र्हुकान्हुअ्सो यहुदा इस्करियोत, ओदोङघरि बाहार ओल्हेतेङ हानेहि। इङको पहर न्हिसिङ जेङलिदोका हिघाहि।
इसुको नावा हुकुम
31जेलाउ यहुदा बाहार हानेहि कोलाउ इसु दोअ्हि, “एला का द्याङको चान प्रतापि जेङका हिघा रो परमेस्वर काता प्रतापि जेङका हि। 32एदि परमेस्वर का द्याङको चानता प्रतापि जेङहि पानु परमेस्वर ताइमिङता का द्याङको चानहेङ प्रतापि पावा, कालाउ वा इदोइ मारफाङ पावा।
33“आतुइका जामालाइ, आधे आरोङ पहरथिकापा का आरोङ आतुइसा पहरथिकापा नेलाइदोफा ह्याङका। नेलाइ कासेहेङ भोस्वाना रो जेसापा का यहुदि आगुवालाइहेङ दोअ्घा, एला नेलाइहेङ बुङ दोअ्ताङका, ‘जेता का हानेदोङखा, नेलाइ लोलि मादोस्वाना।’#युहन्ना ७:३४ 34एलोङ नावा हुकुम का नेलाइहेङ प्याङकाः नेलाइ एमि भेनेङहेङ इन्ताना पासु। नेलाइहेङ का जेसापा इन्ताना पाका हिघा, नेलाइ बुङ एमि भेनेङहेङ एन्साङ इन्ताना पासु।#युहन्ना १५:१२,१७; १ युहन्ना ३:२३; २ युहन्ना १:५ 35एदि नेलाइ एमि भेनेङहेङ इन्ताना पासुन्हा पानु, इदोइसोङ झाराङ ग्यावा, नेलाइ काङको चात्या एइ।”
पत्रुसको नामन्जुरि
(मत्ति २६:३१-३५; मर्कुस १४:२७-३१; लुका २२:३१-३४)
36सिमोन पत्रुस इसुहेङ हिअ्हि, “प्रभु, ना हिसो हानेदोङखेना?”
इसु दोअ्हि, “का जेता हानेदोङखा, ना एला कासेहेङ पिताइलि माद्वाना, कुलाउ न्हुअ्सो ते ना कासेहेङ पितायाना।”
37पत्रुस वासेहेङ दोअ्हि, “प्रभु, का हाइपालि एला दोङ नासेहेङ पिताइलि माद्वाङका? नाङको भाअ्सिङ का ताइको सास बुङ प्याङका।”
38इसु इङकोहेङ दोअ्हि, “हाइ ना ताइको बायु काङको भाअ्सिङ प्याना? जातिङको का नासेहेङ दोअ्खा, ना कासेहेङ सुम खेप मानाल्खा दोअ्तेङ इन्कार मापापाधाउ धाङगाइ माओकावा।”
Currently Selected:
युहन्ना 13: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
