युहन्ना 12
12
बेथानियाता इसु
(मत्ति २६:६-१३; मर्कुस १४:३-९)
1लाअ्पिका पारबाको तु दिनालाम्फा इसु बेथानियाता लोहि। इन्ता लाजरस हिघाखे, जाइहेङ इसु सिकासो सिन्हुपाका हिघाहि। 2एम्बालाइ वाको भाअ्सिङ इन्ता दिलिमाको चाका त्यार पाहि। मार्था चाका चोदोङघाहि, लाजरस बुङ इसु रो बो बान्सालाइदोफाङ चालि योम्काहिघाखे। 3कोलाउ मरियम आधा लिटर झोको जाङका जटामसिको मालामालाका आतर चुमातेङ इसुको खोकोइता लागाइपिहि। कालाउ वाको खोकोइ ताइको पुसुङहोइ योअ्हि रो आतरको मालामालाहोइ साअ् पोङघाहि।#लुका ७:३७-३८
4कालाउ इसुको चात्यागेलाइता ए मि जाइ वासेहेङ रिम्पालि भोका यहुदा इस्करियोत दोअ्हि, 5“इदोइ आतर सुम साइ रुपाको टाका#१२:५ सुम साइ रुपाको टाका इदोइ सुमसाइ रुपाको टाका चाहिँ एमि द्याङको एबाअ्सारको जेला झोको जेङखे। ता पिअ्तेङ इङको टाका निरधनगेलाइहेङ पिनु माजेङधाङ?” 6कुलाउ इङको निरधनगेलाइको ख्याल ताअ्तेङ इदोइ दोअ्का मान्थुघाखे। हाइपानु इङको खुका हिघाहि रो टाकाको जाबि इङकोङ ताअ्घाखे, कालाउ इन्तासो खुघाखे। 7इसु दोअ्हि, “यासेहेङ हाइदोङ मादोसु, कासेहेङ लिअ्लिको भाअ्सिङ यासेहेङ इङको पालि पिसु। 8हाइदोनु निरधनगेलाइ दिनाङ नेलाइदोफा ह्यावा, कुलाउ का ते दिनाङ नेलाइदोफा माह्याङका।”#नियम १५:११
9इसु बेथानियाता हि दोअ्का गेतेङ हेन्जाङ यहुदिगेलाइ इन्ता लोहि। एम्बालाइ इसुहेङ खिनिङ माको, कुलाउ वा सिकासो सिन्हुपाका लाजरसहेङ बुङ खाङलि दोअ्तेङ लोका हिघाखे। 10एन्साङ मुल धामिगेलाइ लाजरसहेङ बुङ सेअ्लि निधो पाहि। 11हाइदोनु लाजरस पातेङ यहुदिगेलाइता हेन्जाङ मि खेङन्हातेङ इसुहेङ खान्धुर पालि तेङका हिघाखे।
यरुसलेमता इसुको दुल्का
(मत्ति २१:१-११; मर्कुस ११:१-११; लुका १९:२८-४०)
12जुम्निखेप लाअ्पिका पारबाता लोका हेन्जाङ द्याङगेलाइ इसु यरुसलेमता लोदोङखे दोअ्का हिङहि। 13कालाउ एम्बालाइ सोर्हाइको दालेङगेलाइ चुम्तेङ वासेहेङ सेउपालि र्हिकाइतेङ ओल्हेहि,
“जय ज्याको! सहसाम्पा परमप्रभुको मिङता लोका इस्राएलको राजा!”#ले ११८:२५-२६
14कालाउ गाधाको एलोङ चान निङतेङ इसु इङकोर्हुता धोल्हि, जिसिका लेखेन्हाका हिः
15“सियोनको चामिन्दि, माथि।
खाङ, नाङको राजा गाधाको चानर्हुता धोल्तेङ लोदोङखे।”#जकरिया ९:९
16इङको काथागेलाइ वाको चात्यागेलाइ लाम्फा मागेहि। कुलाउ इसुको प्रताप जेङकान्हुअ्सो इदोइ काथा वाको बारेता लेखेन्हाका हिघाहि रो इदोइ काम वाको भाअ्सिङ एम्बालाइ पाका एइ दोअ्का एम्बालाइ फोमपाहि।
17इसु लाजरसहेङ तोमसो काइतेङ सिकासो सिन्हुपालाउ वाको दोसाता हिका हेन्जाङ द्याङगेलाइ वाको दासि पितेङ दोङ हि। 18वा इदोइ चिनो पाका हिघाहि दोअ्तेङ हिङका हिनाङ बुङ हेन्जाङ द्याङगेलाइ वासेहेङ दुसुलि हानेका हिघाखे। 19कोलाउ फरिसिगेलाइ एमि भेनेङहेङ दोअ्लि तेङहि, “खोइ, केलाइ हाइदोङ पालि मादोन्हाहि। तिङदोङसुखेना दुनियाङ इङकोहेङ पिताइलि दोहोइ।”
ताइको सिकाबारे इसुको न्हुअ्धुइका
20लाअ्पिका पारबाता उपासाना पालि हानेकालाइता आधेमि ग्रिकगेलाइ बुङ हिघाखे। 21एम्बालाइ गालिलको बेथसेदाता हिका फिलिपकोता लोतेङ एसा दोअ्तेङ पुकार पाहि, “मास्टर केलाइ इसुहेङ दुसुलि भोन्हाखे।” 22फिलिप हानितेङ अन्द्रियासहेङ दोअ्हि, कालाउ अन्द्रियास रो फिलिप हानितेङ इदोइ काथा इसुहेङ हिङपाहि।
23इसु एम्बालाइहेङ दोअ्हि, “एला का द्याङको चानको प्रताप जेङका पहर लोका हि। 24जातिङको, का नेलाइहेङ दोअ्खा, गोहोमको सिहाँ भोनोता बिअ्न्हातेङ मासिहि पानु इङको एलोङ हिखे। कालाउ बुङ इङको सिहि पानु इङको हेन्जाङ फल सेपाखे। 25एन्साङ पातेङ ताइको ज्यानहेङ दाया पाकालाइ इङको राम्पाखे। कुलाउ ताइको ज्यानहेङ इदोइ दुनियाता म्हुइका दोअ्कालाइ असिम ज्यानको भाअ्सिङ इङको जोगाइतेङ ताअ्खे।#मत्ति १०:३९; १६:२५; मर्कुस ८:३५; लुका ९:२४; १७:३३ 26हासुङ काङको कामत्या जेङखे पानु इङको कासेहेङ पितायाको रो का जेता हिघा, काङको सेबक बुङ इन्ता ह्यावा। हासुङ काङको कामत्या जेङखे पानु आबा इङकोको मान पावा।
27“एला काङको बायु बिकल जेङका हि, का हाइ दोअ्ताङका? ‘आबा, कासेहेङ इदोइ पहरसो बान्चेपा’ दोअ्ताङका? माको, इदोङ खातिर दोङ का इदोइ पहरथिकापा लोका हिघा। 28आबा, नाङको मिङको प्रताप पा।”
कोलाउ सादेलसो इसिका गाला हिङहि, “का इङको प्रताप पाका हिघा रो आरोङ पाङका।” 29इन्ता जाअ्तेङ हिका द्याङगेलाइ इदोइ हिङतेङ दोअ्हि, “इदोइ बादेल गुरगुराइका एइ!” आधेमि दोअ्हि, “सादेलचर वादोफा धुइका एइ!”
30इसु एम्बालाइहेङ दोअ्हि, “इदोइ गाला काङको भाअ्सिङ जेङका माको, कुलाउ नेलाइको भाअ्सिङ एइ। 31एला इदोइ दुनियाको निया ज्याङ। इदोइ दुनियाको राजपाका बाहार थालन्हावा। 32कालाउ जेलाउ का सुमिङसो तोल्हेन्हाङका, का गोताङ द्याङहेङ ताइमिभारि हेराङका।” 33वा ताइको सिका हिदोइ थरिहोइ ज्याङ एइ, इङको टिप्नि पिलि वा एसा दोअ्का हिघाहि।
34द्याङगेलाइ वासेहेङ हिअ्हि, “ख्रिस्ट दिनादिनाङ ह्यावा दोअ्का नियमसो केलाइ हिङका हिन्हाहि। कुलाउ द्याङको चान तोल्हेन्हालिङ गोयाङ दोअ्तेङ ना हेसापा दोअ्लि द्वाना? एदोइ द्याङको चानचाहिँ हासु एइ?”#ले ११०:४; यसैया ९:७; इजकिएल ३७:२५; दानिएल ७:१४
35इसु एम्बालाइहेङ दोअ्हि, “आरोङ आतुइसा पहरथिकापा जोल्का नेलाइको माझाता ह्यावा। जोल्का नेलाइदोफा हिपाधाउ तेगेल्सु, कोलाउ कितिकितिका नेलाइहेङ माथुमाको। जाइ कितिकितिकाता हिगिल्खे पानु, इङको हिसो हानेदोङखा, इङको मागेखे। 36जेलाउथिकापा जोल्का नेलाइदोफा हि जोल्काता खान्धुर पासु रो नेलाइ जोल्काको चानचामिन्दि जेङस्वाना।” इदोइ काथा दोअ्कान्हुअ्सो, इसु इन्तासो हानेहि रो एम्बालाइसो म्होतेङ हि।
यहुदिगेलाइको अखान्धुर
37इसु द्याङगेलाइको आगाता हेन्जाङ भारभुसाइका कामगेलाइ पाका हिघाहि, कोलाउबुङ एम्बालाइ वासेहेङ खान्धुर मापाहि। 38कालाउ एसापा यसैया आगाधुइकाको कथन पोङघालि लोहिः
“परमप्रभु, केलाइको बानाल हासु खान्धुर पाहि?
कालाउ परमप्रभुको सरबङहिका काम हासुहेङ तिम्पाहि?”#यसैया ५३:१
39इदोइखातिर एम्बालाइ खान्धुर पालि मादोहि रो यसैया आरोङ एसा दोअ्हि:
40“परमेस्वर एम्बालाइको मि तुअ्पापिका हि
रो एम्बालाइको कोन्धाङ थाङका पापिका हि।
एसापा एम्बालाइ मिहोइ मातिनाको,
कालाउ कोन्धाङहोइ माग्याको,
माकोनुते एम्बालाइ घुर्यावा,
कालाउ का एम्बालाइहेङ एल्पालि गोयाङ।”#यसैया ६:१०
41यसैया इदोइ काथा दोअ्हि, हाइपानु इङको वाको प्रताप तिङहि रो वाको बारेता दोअ्हि।
42कोलाउबुङ हेन्जाङ यहुदि आगुवागेलाइ इसुहेङ खान्धुर पाहि, कुलाउ फरिसिगेलाइ एम्बालाइहेङ कचहरिसाअ्सो ओल्हेपागिलाङ दोअ्का थितेङ इङको मन्जुर मापाहि। 43हाइदोनु एम्बालाइ परमेस्वरको बाखिन्काखान्तेङ द्याङको बाखिन्का हेन्जा मोन्दाताघाखे।
खान्धुर मापाका दागि ज्यावा
44इसु बारा गालाता दोअ्हि, “कासेहेङ खान्धुर पाकालाइ कासेहेङ माको, कुलाउ कासेहेङ दिङगिल्काहेङ खान्धुर पाखे। 45जाइ कासेहेङ तिङखे, इङको कासेहेङ दिङगिल्काहेङ तिङखे। 46का दुनियाता जोल्का जेङतेङ लोका हिघा, कोलाउ कासेहेङ खान्धुर पाका कितिकितिकाता माह्याको।
47“हासुङ काङको बचन हिङखे रो मासाअ्खे पानु, का इङकोको निया मापाङका। हाइदोनु का दुनियाको निया पालि लोका माको, कुलाउ दुनियाहेङ सिन्हुपालि लोका एइ। 48कासेहेङ इन्कार पाका रो काङको बचन मार्हुकाको भाअ्सिङ ए मि नियापाका हि। जाइ कथन का धुइघा इङको आखिर दिनाता इङकोको निया पावा। 49हाइदोनु का ताइकोङ पाहासो माधुइघा, कुलाउ का हाइ दोअ्लिगोइका एइ रो हाइ धुइलि गोइका एइ, कासेहेङ दिङगिल्का आबा ताइमिङ कासेहेङ हुकुम पिका हि। 50का गेखा, वाको हुकुम असिम ज्यान एइ। इदोइखातिर का जेदोङ धुइखा, आबा कासेहेङ दोअ्काभाइपाङ धुइखा।”
Currently Selected:
युहन्ना 12: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
