युहन्ना 11
11
लाजरसको सिका
1लाजरस मिङको एमि द्याङ मासाअ्धेका हिघाखे। इङको मरियम रो वाको बाइ मार्थाको देरा बेथानियाको हिघाखे।#लुका १०:३८-३९ 2प्रभुहेङ आतर लाइपितेङ वाको खोकोइ ताइको पुसुङहोइ योअ्पिका मरियम या दोङ हिघाहि। याकोङ ओने लाजरस मासाअ्धेका हिघाखे।#युहन्ना १२:३ 3इदोइ न्हेमि बाइओने इसुकोता एसा दोअ्तेङ बानाल पिगिल्हि, “प्रभु, जाइहेङ ना इन्ताना पाखेना, इङको मासाअ्धेका हि।”
4इदोइ बानाल हिङतेङ इसु दोअ्हि, “इदोइ मासाअ्धेकाहोइ सिकाता माथुकापाङ, कुलाउ या परमेस्वरको प्रतापको भाअ्सिङ एइ, कोलाउ इदोइसो परमेस्वरको चानको प्रताप ज्याको।” 5इसु मार्था, इङकोको ओने मरियम रो लाजरसहेङ इन्ताना पाघाखे। 6कोलाउबुङ लाजरस मासाअ्धेका हि दोअ्का हिङतेङ वा जेता हिघाहि, आरोङ न्हे दिना इन्ताङ हि।
7इङकोन्हुअ्सो इसु चात्यागेलाइहेङ दोअ्हि, “ते एला केलाइ आरोङ यहुदिया घुरितेङ हानाइने।”
8चात्यागेलाइ वासेहेङ दोअ्हि, “मास्टर, एलाङ खिनिङ यहुदिगेलाइ नासेहेङ उन्ठुइ तोलि भोघाखे, हाइ आरोङ ना इन्ताङ हानाना?”
9इसु दोअ्हि, “हाइ ए दिनाता तेन्हे घान्टा माजेङखे कुनु? दिनाता हिगिल्का पाकालाइहेङ माबोखेखे, हाइदोनु इङको इदोइ दुनियाको जोल्का तिङखे। 10कुलाउ न्हिसिङता हिगिल्का पाकालाइ बोखेन्हाखे, हाइदोनु इङको द्याङता फाइसालामका मान्थुखे।”
11इङकोन्हुअ्सो इसु एम्बालाइहेङ दोअ्हि, “केलाइको सानाइति लाजरस निन्धाता परेका हि, कुलाउ इङकोहेङ निन्धासो ल्होपालि का इन्ता हानाङका।”
12चात्यागेलाइ वासेहेङ दोअ्हि, “प्रभु, इङको निन्धाता परेका हि पानु इङको एलावा।” 13इसु इङकोको सिकाको बारेता दोअ्का हिघाखे, कुलाउ एम्बालाइ चाहिँ जातिङको निन्धाको बारेता दोअ्का एइ फोमपाहि।
14इसु एम्बालाइहेङ सोझाङ दोअ्पिहि, “लाजरस सिलि दोहोइ। 15नेलाइ खान्धुर पसु दोअ्तेङ नेलाइको भाअ्सिङ का इन्ता मान्थुकाता लेङचा हिघा। जेदोङ जेङलाउ बुङ केलाइ इङकोता हानाइने।”
16कोलाउ दिदुमस दोअ्का थोमा ताइको दोसाङको चात्यागेलाइहेङ दोअ्हि, “ते, केलाइ बुङ हानाइने रो वाकोदोफाङ स्याइने।”
इसु लाजरसहेङ सिन्हुपाका
17जेलाउ इसु बेथानियाता थुकालिलोहि, कोलाउ लाजरसहेङ तोमता ताअ्का द्या दिना जेङलिदोका गेहि। 18बेथानिया यरुसलेमसो सुम किलोमिटर झोको दुरे हिघाहि। 19हेन्जा यहुदिगेलाइ मार्था रो मरियमकोता इङकोको ओने सिकाता थुमथुमाइ पिलि लोका हिघाखे। 20इसु लोदोङखे दोअ्का हिङतेङ मार्था हानेहि रो वासेहेङ दामाताङ दुसुहि, कुलाउ मरियम साअ्ताङ हि।
21कोलाउ मार्था इसुहेङ दोअ्हि, “प्रभु, ना इता हिकाहिनु ते काङको ओने मासिधावा। 22कुलाउ एला बुङ का गेखा, ना परमेस्वरदोफा जेदोङ र्हेकाना, परमेस्वर नासेहेङ प्यावा।”
23इसु मार्थाहेङ दोअ्हि, “नाङको ओने आरोङ सिन्हु तावा।”
24मार्था वासेहेङ दोअ्हि, “का गेखा, इङको आखिरको दिनाता सिकालाइ सिन्हुकाता आरोङ सिन्हुतेङ ल्होकावा।”
25इसु इङकोहेङ दोअ्हि, “सिकासो सिन्हुका रो ज्यान का दोङ एइ। कासेहेङ खान्धुर पाका सिलाउ बुङ सिन्हु तावा। 26कालाउ सिन्हुका रो कासेहेङ खान्धुर पाका झाराङ हेअ्लाउ मास्यावा। हाइ ना इदोइ काथा खान्धुर पाना?”
27मार्था वासेहेङ दोअ्हि, “एइ प्रभु, का खान्धुर पाखा, ना दुनियाता लोका ख्रिस्ट, परमेस्वरको चान हिना।”
28इदोइ दोअ्तेङ मार्था हानेहि रो ताइको ओने मरियमहेङ काइतेङ सिपापा दोअ्हि, “मास्टर थुकालिलोहि रो नासेहेङ काइदोङखे।” 29इदोइ हिङतेङ मरियम ओदोङघरि ल्होतेङ वाकोता हानेहि। 30इङको पहरथिकापा इसु देराता थुकालिलोका मान्थुघाहि, कुलाउ वा इङकोङ थामेता हिघाहि जेता मार्था वासेहेङ दुसुका हिघाहि। 31साअ्ता इङकोहेङ थुमथुमाइ पिलि लोका यहुदिगेलाइ मरियम ओदोङघरि ल्होतेङ बाहार हानेका तिङतेङ, इङको ओनेको तोमता खार्लि हानेका एइ दोअ्कागेतेङ इङकोहेङ पिताइहि।
32जेलाउ मरियम इसु हिका थामेता लोहि रो वासेहेङ तिङहि, कोलाउ एसा दोअ्तेङ इङको वाको खोकोइता पोमभेलेहि, “प्रभु, ना इता हिकाहिनु ते काङको ओने मासिधावा।”
33जेलाउ इसु मरियमहेङ खारतेङहिका रो इङकोदोफा लोका यहुदिगेलाइ बुङ खारतेङहिका तिङहि, कोलाउ वा हाङसाता अधिर जेङतेङ हेन्जाङ तु: जेङहि। 34वा एम्बालाइहेङ हिअ्हि, “नेलाइ इङकोहेङ हिसो ताअ्का हिसुन्हा?”
एम्बालाइ वासेहेङ दोअ्हि, “प्रभु, लोतेङ खाङ।”
35इसु खारहि। 36इदोइ तिङतेङ यहुदिगेलाइ दोअ्हि, “खाङसु, वा लाजरसहेङ हेथे दाया पाघाहि।”
37कुलाउ आधेमि दोअ्हि, “हाइ कान्हाको मि हेपिका या हाइ लाजरसहेङ बुङ सिकासो बान्चेपालि मादोधावा कुनु?”
38कोलाउ इसु आरोङ हेन्जाङ अधिर जेङतेङ तोम्ता हानेहि। इदोइ तोम एलोङ कन्दराता हिघाहि। इङकोको नुइ एलोङ उन्ठुइहोइ थुम्का हिघाहि। 39इसु दोअ्हि, “उन्ठुइ लाअ्पासु।”
सिका द्याङको बाइ मार्था वासेहेङ दोअहि, “प्रभु, इदोइ पहर थिकापा ते इङको न्हाम्लि तोमहोइ वाला, हाइपानु इङको सिका द्या दिना जेङहोइ।”
40इसु इङकोहेङ दोअ्हि, “हाइ का नासेहेङ ‘ना खान्धुर पान्हा पानु परमेस्वरको प्रताप तिनाना’ दोअ्तेङ दोअ्का माको कुनु?”
41एम्बालाइ तोमको नुइसो उन्ठुइ लाअ्पाहि। कालाउ इसु र्हुता खान्तेङ दोअ्हि, “आबा, का नासेहेङ च्याबास दोअ्खा, हाइपानु ना काङको पुकार हिङन्हा। 42का गेखा, ना काङको पुकार जेलाउ बुङ हिङखेना। कुलाउ इता जाअ्कालाइको भाअ्सिङ का इदोइ दोअ्का एइ। कोलाउ ना कासेहेङ दिङगिल्का एइ दोअ्तेङ एम्बालाइ खान्धुर पाको।”
43इदोइ काथा दोअ्कान्हुअ्सो वा बार्का गालाहोइ र्हिकाइतेङ दोअ्हि, “लाजरस, बाहार ओल्हेतेङ लोउ।” 44कोलाउ ओदोङघरि सिका लाजरस खुर खोकोइ मान्चाउलि लुन्धाइन्हातेङसाङ तोमसो बाहार ओल्हेतेङ लोहि। कालाउ इसु एम्बालाइहेङ दोअ्हि, “इङकोको मान्चाउलि खाइपिसु रो इङकोहेङ हानेलि पिसु।”
इसुहेङ सेअ्लि भोका
(मत्ति २६:१-५; मर्कुस १४:१-२; लुका २२:१-२)
45मरियमकोता लोका हेन्जाङ यहुदिगेलाइ इसुको पाका काम तिङतेङ वासेहेङ खान्धुर पाहि। 46कुलाउ एम्बालाइता आधेमिचाहिँ फरिसिगेलाइकोता हानेहि रो इसुको पाका कामगेलाइ दोअ्पिहि।
47मुल धामिगेलाइ रो फरिसिगेलाइ बाराकचहरिको सदसेगेलाइहेङ काइहि रो एम्बालाइहेङ दोअ्हि, “एला केलाइ हाइ पाङ? हाइदोनु इङको द्याङ ते हेन्जाङ चिनोगेलाइ पादोङखे। 48यासेहेङ एसाङ लाअ्पिन्हाहि पानु झाराङ यासेहेङ खान्धुर पावा रो रोमिगेलाइ लोतेङ केलाइको पुनितथामे रो केलाइको यहुदि जात्या न्हेमिहेङ मुअ्पा प्यावा।”
49कुलाउ एम्बालाइता ए मि कैयाफा, जाइ इङको बाअ्सारको बारा धामि हिघाखे, वा एम्बालाइहेङ दोअ्हि, “नेलाइ हाइ बुङ मागेसुखेना! 50गोताङ सारभि मुअ्का जेङकाखान्तेङ भुरुङ राइतिगेलाइको भाअ्सिङ ए मि द्याङ सिलि दोङ रेम्का ज्याङ दोअ्का नेलाइ मागेसुखेना?”
51इदोइ इङको ताइकोङ पाहासो दोअ्का मान्थुघाहि, कुलाउ इङको बाअ्सारको बारा धामि जेङका हिनाङ यहुदि जात्यागेलाइको भाअ्सिङ इसु सिलिगोयाङ दोअ्का आगाधुइका धुइका एइ। 52यहुदि जात्यागेलाइको भाअ्सिङ खिनिङ इङको इदोइ दोअ्का मान्थुघाहि, कुलाउ राइन्हातेङ हिका परमेस्वरको चानचामिन्दिगेलाइहेङ एदोसाङ जोम्पालि इदोइ दोअ्का हिघाहि। 53एन्साङ इङको दिनासो एम्बालाइ वासेहेङ सेअ्लि मतो पाहि।
54इदोइखातिर इसु आरोङ यहुदिगेलाइको माझाता खुलेआम माहिगिल्हि। कुलाउ इन्तासो उदादाङका थामेको भेर्पाता हिका एफ्राइम दोअ्का पुरता हानेहि रो इन्ता चात्यागेलाइदोफा हि।
55यहुदिगेलाइको लाअ्पिका पारबा लोलि तोम्का हिघाहि। देरा देरासो हेन्जाङ द्याङगेलाइ ताताइमिहेङ चोखाइलि दोअ्तेङ लाअ्पिका पारबा लाम्फा दोङ यरुसलेमता हानेहि। 56कोलाउ एम्बालाइ इसुहेङ भोहि, कालाउ एम्बालाइ थानता जाअ्लाउ ताताइमिता दोअ्लि तेङहि, “नेलाइहेङ हिसिका लागेखे, हाइ वा पर्बाता ल्वावा?” 57मुल धामिगेलाइ रो फरिसिगेलाइ चाहिँ इसुहेङ रिम्लि वा हिता हि दोअ्तेङ हासुङ गेनु बानाल पालि दोअ्का हुकुम पिका हिघाखे।
Currently Selected:
युहन्ना 11: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
