मत्ती 26
26
1-2ओउःत स्यान्आक्तीको येसुपाय् ओउःकुस् वाह्ओमयःकःताङ् ल्हेःती “लौ चीत्सैपाय् ङीकोः ‘च्योल्ओ’ त तोओ छ्यात्कोः दीन् दाह्नाः त नीङ्इ चीःतेःनानी। ओउः बेलाहाङः ओउः मान्ताकोः चोः त तोओकायः अरुइ सीङःहाङः योकोःती सात्साकायः दाक्नाःथै” त दाय्ह्तीमा ओउःमयःकायः तोआथास। 3ओहाङःसैको ओउः ताङ्ह्ओ पुरोहीत्लम्मा धर्मा स्यान्ओमयःमा अरु ताङ्ह्ओ मान्तालम्मा हुम्ती कयाफा त तोओ प्रधान् पुरोहीत्कोः दर्बाल्ताङ् वाङ्आकाय्। 4हुम्ती वाङ्आक्तीको “लौ अरुइ चीःमाःत ङीइ गत हायःती येसुकायः चुम्ती सात्सा खाय्नाःतय्ही। 5च्योल्ओ दीन्कोः भोस् जाङ्ह्तोक्हाङः ओउःकायः चुम्ती पानःसा स्याव्ल। मान्तालम्इ ल्हुङ् मल्ह्तो स्याव्ती ङीकुस् कायःकाय्ती मीन्ह्काय्नाःतय्ही यादो” त दाय्ह्ती ओउःमयःखे नोःकाय्आकाय्।
6ओहाङःसैको येसुखे बेथानी गाव्हाङः आल्ती सीमोन् कोह्री त तोओकोः कीम्हाङः जेःती मुओ खेःतो। 7ओउःहाङः जेःतोक् बेलाहाङः यात्चाक् मोमःचोःइ आन महङ्गोमा पेतो सय्ङ्ओ सातीलेः स्याक्बाङ्कोः तुमुकाहाङः लात्ती वाङ्अ। कीम्हाङः पोक्ती ओउः मोमःचोःइ येसुकःताङ् वाङ्ती तुमुका फोल्ती ओउः पेतो सय्ङ्ओ साती येसुकोः तालाङ्हाङः ल्हुक्ती गम्आकान्। 8एत हायःओ च्यवःती येसुकुस् वाह्ओमयः ल्हुङ् मल्ह्तो स्याव्ती “लौ इलो पेओ सातीपाय् दोह् हायःती त्युरुतीलेः वाय्ओआः। 9ओउः साती वीनःती ओउःकोः मोल्कोः पैसापाय् ह्र्यात्लम्कायः बयःसा खेःओ खेःतो” त दाय्ह्ती नोःकाय्ती ओउःमयःइ मोमःचोःकायः जान्ती तोआथै। 10ओउःमयःइ जान्ती तोओ चीःती “ओउःकायः जान्लाम् ओउःइ ङाकायः आन पेतो जाङ्ह्जेःआबत्ताङः। 11दोह् हायःती दाय्ह्सा ह्र्यात्लम्खेपाय् नीङ्कःगन गलमा मुलेःनै ङाखे नीङ्कःगन गलकायःमा मुङल। 12इ मोमःचोःइपाय् ङाकोः सीती पाम्ह्तोक्हाङःकायः ङ्हासैलेः ङाकोः आङ्हाङः सातीइ ल्यानःआबत्ताङः बा। 13दोङ्सी दाय्ह्भनाङ् ल्हाव्ह्दैबाङ्हाङः गाःहाङःमा ङाकोः पेओ समचार् थोल्ह्ती तोचानाः ओहाङःलेः इ मोमःचोःकोः एत पेतो जाङ्ह्ओमा सबै चीःताक्साकायः ल्हाक्नानी बा” त दाय्ह्ती येसुइ तोआथास।
14ओहाङःसैको येसुइ एत तोआक्तीको यात्चाक् येसुकोः बारजन छ्युङ्ह्ओमयः यहुदा इस्करीयोत् त तोओपाय् बाहीरताङ् ग्ल्युङ्ह्ती ओउः ताङ्ह्ओ पुरोहीत्लम्कायः क्रुस्लाङ् आल्आ। 15आल्ती ओउःमयःकायः क्रुस्आक्तीको “लौ ङाइ येसु दाक्ती ल्हानेःनाङ्स त खेःया ङाकायः दोह्लोतेः बयःनानाङ्स” त दाय्ह्ती व्हत्थासतो “ङीइ तीस् चान्दी रुपीया बयःनेःनाङ्स” त दाय्ह्ती तोती गम्आथै। 16ओउःत झ्यान्ते ओउः दीन्सै यहुदाइ येसुकायः लात्ती दाक्सा ओखन् बोङःआकान्।
17ओहाङःसैको ओउः फमालो लाङ् जेःओ छ्यात्कोः ङ्हाकोः दीन् दाह्आ। ओउः दीन्हाङः छ्यात्कोः भोस् चन्तायःसाकायः येसुकुस् वाह्ओमयः ओउःकःताङ् वाङ्ती “इ च्योल्आ दीन्कोः भोस्पाय् ङी गाःहाङः आल्ती नाङ्कायः जाङ्ह्नेःनाङ्सु” त दाय्ह्ती व्हत्नीतो 18“लौ सहर्ताङ् पोक्ती यात्चाक्कायः क्रुस्नु दा। क्रुस्आक्तीको ओउःकायःपाय् ‘लौ ङीकोः गुरुइ इत तोसाकायः ल्होक्आताङी “लौ ङाकोः बेला दाह्ओआः। ङाइमा ङाकुस् वाह्ओमयःइमा तेन्कोः च्योल्ओ दीन्कोः भोस् नाङ्कोः कीम्हाङः जेःनाङःसु” ’ त दाय्ह्ती तोनु दा” त दाय्ह्ती येसुइ ओउःमयःकायः तोती ल्होक्आथास। 19ओहाङःसैको ल्होक्आक्तीको ओउःमयः आल्ती येसुइ तोओलो लेखा जाङ्ह्ती ओउः भोस्कायः चन्तायःआकानी। 20एत चन्तायःती खाय्आक्तीको ओउःनम्कोः राम्हसैलोहाङः येसुमा ओउःकोः लयःइ छ्युङ्ह्ओ बारजनमा वाङ्ती ओउः भोस् जेःआकानी। 21भोस् जेःतोक्हाङः “दोङ्सी दाय्ह्भनाङ् नीङ् मान्ताकःगन मुओ यात्चाक्इ ङाकायः लोन्तेःसै दुस्मान्कःताङ् दाक्आनाःताङः बा” त दाय्ह्ती येसुइ तोआथास। 22एत तोओ सायःआक्तीको ओउः बारजनपाय् ल्हुङ्हाङः लीह्ती “अ प्रभुय ओउः मान्तापाय् ङालेः खेःलया” त दाय्ह्ती ओउःमयःइ सबै व्हत्थातो 23“ङाकुस् झोल्हाङः लाङ् न्योःती मुओ मान्तापाय् ओउःइलेः ङाकायः दुस्मान्कःताङ् दाक्नाःताङः। 24ओउः मान्ताकोः चोः त तोओपाय् सीलाङ् आल्सा खेःतो। ओउःत हायःओ उय्ह्लेकोः आखरःहाङःलेः रय्ह्ती मुनाः। ओउःत स्याव्सा खेःसापाय् खेःलेःतो ओउः ङाकायः सात्सा दाक्ओ मान्ताकायःपाय् लोने गुच्युक् पेमालो न्युम्ह्नाःथै बा। ओउः मान्ताकोः आमाइ ओत्ओ दीन्पाय् गुच्युक् पेजेःमालो खेःतो। ओउः चोः ओत्माया पेजेःतो बा” त दाय्ह्ती येसुइ तोआथास। 25ओउःत तोती झ्यान्ते येसुकायः लोने दाक्ओ मान्ता यहुदा त तोओपाय् “अ गुरुय ओउः मान्तापाय् ङालेः खेःलया” त दाय्ह्ती येसुकायः व्हत्थातो “ओउःत नाङ्इ तोतेःआची” त दाय्ह्ती येसु त्याङ्लेःआ।
26ओहाङःसैको जेःतोक्हाङः येसुइ लाङ् रोत्ती परमेस्वर्कायः “च्युता” त तोआकान्। “च्युता” त तोआक्तीको येसुइ लाङ् फन्ह्ती ओउःकुस् वाह्ओमयःकायः वेःती दोल्कावःआकान् “लौ इ जेःसाकायः नोह्न इपाय् ङाकोः आङ् लेःआः” त दाय्ह्ती फन्ह्ओ लाङ् बयःआथास। 27ओउः लाङ् बयःआक्तीको येसुइ धाक्सायःकोः तीःमा मानाहाङः रोत्ती परमेस्वर्कायः “च्युता” त तोआकान्। एत तोआक्तीको ओउः धाक्सायःकोः तीः सबैकायः दोल्कावःती बयःआकान् “लौ नीङ् सबैलम्इ तुङ्नु दा। 28इपाय् ङाकोः वयः लेःआः। ङाकोः वयःपाय् नाःतो मान्ताकोः रेव्ओ कुरा क्युम्ह्ती वाय्साकायः त्युरुनाः। इमा परमेस्वर्इ तोती गम्ओ रौ कुरा लेःआः बा। 29दोङ्सी दाय्ह्भनाङ् ङाकोः परमेस्वर् आपाकोः राजीहाङः नाङ्कुस् तुङ्धाङ्माच्युक्हाङः धाक्सायःकोः तीः ङाइ तुङ्चाङः जुगु” त दाय्ह्ती येसुइ तोआथास।
30एत तोआक्तीको यात्ज्योः भजन् गीत् मेआक् ओउःमयः बाहीर ग्ल्युङ्ह्ती जैथुन् त तोओ बुम्ताङ् आल्आकाय्। 31ओहाङःसैको आल्ती “लौ द्याह्मयःपाय् नीङ् सबै ङाकायः फेती क्रव्तेःनै। दोह् हायःती दाय्ह्सा इतलेः आखरःहाङः रय्ह्ती मुनाः ‘लौ भेदालम्कोः ह्रामःओ मान्ताकायः परमेस्वर्इ सीताक्लेःनौ सीताक्आक्तीको ओउः भेदालम्पाय् इःताङ् उःताङ् स्रोत्ती भ्यामःती क्रव्नै’ त दाय्ह्ती लेखती मुनाः 32इतलेः स्याव्आक्सा खेःतो लोने सीआक्तीको उह्ती च्योक्ओहाङःपाय् ङाइ नीङ्कायः स्यालःती गालीलहाङः क्रुस्नेःनानाङ्स” त दाय्ह्ती येसुइ छ्यानःती तोथासतो 33पत्रुस्इ एत तोओ सायःती “खेःल अरुखेइ सबैइ नाङ्कायः फेती क्रव्नै त खेःयामा ङाखेइपाय् गलमा फेनाङ्ल” त दाय्ह्ती येसुकायः तोआकान्। 34“दोङ्सी दाय्ह्भनाङ् देङी याह्दीङ्हाङः वाः गोःधाङ्माच्युक्हाङः नाङ्इ सुम् पेन्ह्कायः ङाकायः ‘तय्ह्ङल बा’ त दाय्ह्ती तोतेःनौ” त दाय्ह्ती येसुइ रेक्ती तोथातो 35“खेःल बा ङा नाङ्कुस्इ सीसालेः खेःयामा ङाइ ओउःत माःओ कुरा तोबाय्ङल” त दाय्ह्ती पत्रुस्इमा तोआथै ओउःकोः साथीलम्इमा ओउःतलेः तोआकानी।
36ओहाङःसैको गेत्समनी त तोओ राङ्ताङ् दाह्ती वाङ्आकाय्। ओहाङः दाह्ती वाङ्ती “लौ इहाङः च्युङःती मुन ङाइ ओहाङः आल्ती परमेस्वर्कायः तोच्युक्हाङः” त दाय्ह्ती येसुइ लयःकुस् वाह्ओमयःकायः तोआथास। 37एत तोआक्तीको पत्रुस्मा जबदी त तोओकोः चोःनीस् याकुब् युहनामा ओउः सुम्चाक्कायः लयःकुस् आलःआकान्। आलःआक्तीको येसु ल्हुङ्हाङः आन र्याङःतीमा लीह्तीमा स्याव्आ। 38-39“लौ ङापाय् ल्हुङ्हाङः आन सीसा लेखा लीह्ती मुनाङः। नीङ्पाय् इहाङः योती ल्युङ्ह्ती मुन दा” त दाय्ह्ती ओउः सुम्चाक्कःसै बल लोक्तो ज्याल्गार्ती आल्ती साःताङ् बाःआ। साःताङ् बाःतोक्हाङः “अ ङाकोः आपाय खाय्नाः त खेःया ओउः आन लीःओ भारीपाय् ङाकायः लात्ताक्लाम्। इत तेती तोलेःनाङ्तो ङा झाक्ओ खेःल लयः झाक्ओखे जाङ्ह्उ दै” त दाय्ह्ती येसुइ तोआकान्। 40एत तोआक्तीको येसु चीङ्ती ओउः सुम्चाक्कःताङ् द्यान्ह्ती ओउःमयः एनःओलेः च्यवःआकान्। ओउःमयः एनःओ च्यवःती “अ सीमोन्य नाङ्पाय् एनःतीतेः मुजेःआ तेःआः बा। नाङ्इ यातै घन्ताच्युक्कायः ल्युङ्ह्ती मुसातेः खाय्मातेःउलु” त दाय्ह्ती येसुइ पत्रुस्कायः तोआथै। 41“लौ द्याह् ल्युङ्ह्ती मुन ल्युङ्ह्ती मुतोक्हाङः लयःकायः ‘ङीइ रेव्तो जाङ्ह्साकायः ताक्तेःचाःताङी’ त परमेस्वर्कः तेन। ल्हुङ्हाङः नीङ् ल्युङ्ह्साकायः ग्यासातेः ग्यातेःनै बा। आङ्पाय् ह्र्याम्ती झ्यान्ते नीङ् लेती मुसा खाय्तेःनीली” त दाय्ह्तीमा येसुइ सबैकायः तोआथास। 42ओउः सुम्चाक् लयःकुस् वाह्ओमयःकायः एतलेः तोआक्तीको येसु फेरीलेः आल्ती परमेस्वर्कायः “लौ ङाकोः आपाय इ ङाकोः चाक्ओ काम्पाय् ङाइ आःताः जाङ्ह्माःत दप्सा दोःल त खेःया लौ उया नाङ् झाक्ओ काम् ङाइ दप्ती जाङ्ह्नाङः” त दाय्ह्ती तोआकान्। 43ओहाङःसैको तोआक्तीको येसु द्यान्ह्ती ओउः सुम्चाक्पाय् आन एनःबुस्ती झ्यान्ते फेरीलेः एनःओ च्यवःआकान्। 44ओहाङःसै येसु फेरी बल लोक्तो आल्ती मेस्लो लेखा ओउःकोः परमेस्वर् आपाकायः तेती तोआकान्। 45इत तोआक्तीको ओउः सुम्चाक्कःताङ् द्यान्ह्ती “नीङ् एनःतीलेःतेः मुझुङ्तेःनै। लौ द्याह् ओउः बेला दाह्ओआः। द्याह्पाय् ओउः मान्ताकोः चोः त तोओकायः रेव्ओलम्कःताङ् दाक्ती आलःनानी। 46लौ च्योक्ती आल्इ। ङाकायः दाक्सा बोङःओ मान्तापाय् दाह्ती वाङ्ओआः बा” त दाय्ह्ती येसुइ तोथासतो।
47येसुइ ओउःत तोतोक्हाङः यहुदा त तोओ यात्चाक् येसुकोः बारजन छ्युङ्ह्ओमयःपाय् ओहाङः दाह्ती वाङ्आ। ओउःकुस् नाःतो तरवाल्मा दङ्ग लात्ओ मान्तालम् वाङ्आकाय्। ओउःमयःकायः ओउः यहुदीलम्कोः ताङ्ह्ओ पुरोहीत्लम्इमा अरु ताङ्ह्ओ मान्तालम्इ ल्होक्आथास। 48ओउः ल्होक्ती वाङ्ओलम्कायः येसुकायः दाक्सा बोङःओ यहुदाइ ङ्हासै वाङ्ती “लौ सुकायः ङाइ ग्रोम्ती स्यवनाङः ओउःपाय् नाङ्इ चुम्सा खेःओ चाक् लेःआः ओउःकायः पेतो चुम्ती पानःनु दा” त दाय्ह्ती स्यान्आथास। 49ओउःत झ्यान्ते येसुकः दाह्तोक्हाङः यहुदा वाङ्ती “अ गुरुय” त दाय्ह्आक् ओउःकायः ग्रोम्आथै। 50एत ग्रोम्लाङ् वाङ्तोक्हाङः “अ हौय नाङ्इ हायःसा बोङःओ काम्पाय् जाङ्ह्उ दा” त दाय्ह्ती येसुइ तोआकान्। ओहाङःसैको यहुदाकोः साथीलम्इ वाङ्ती येसुकायः चुम्ती आलःसा बोङःनीतो 51यात्चाक् येसुकुस् चीङ्ती मुओ मान्ताइ लयःकोः च्युपे प्युक्ती यात्चाक् प्रधान् पुरोहीत्कोः नोकरी मान्ताकोः नो ग्रेह्ती वाय्आकान्। 52ओउः मान्ताकोः नो ग्रेह्तोक्हाङः “नाङ्कोः तरवाल् दाप्हाङः काती गम्उ। च्युपे ह्रीह्ओलम्पाय् च्युपेइ सात्ती वाय्लेःनै। 53ङा परमेस्वर् आपाकः तेचाङः त खेःया ओउःइ बार हजार् ल्होक्ओमयःकोः पल्तन्लम् ङाकायः दल्ताक्साकायः ल्होक्नाःताङः ङाइ इत हायःसा खाय्नाङः त नीङ्इ चीःतेःनीली यादो। 54इत हायःसा खाय्नाङःसु ओउः ल्होक्ओमयः वाङ्नै त खेःया ओउः उय्ह्लेकोः आखरःहाङः रय्ह्ती लेखओ कुरापाय् ताप्सा दोःल” त दाय्ह्ती येसुइ तोआकान्। 55ओहाङःसैको ओउःकायः पानःलाङ् वाङ्ओ मान्तालम्कःताङ् ल्हेःती “ङा चोर्लो लेखा नीङ्इ दङ्ग च्युपे लात्ती ङाकायः चुम्सा बोङःतेःनेःनानाङ्स। लौ दीन्का दीन्पाय् नीङ्कुस् मुती मन्दीर्हाङः स्यान्झुङ्ङोतो ओउःतोक्हाङः ङाकायः चुम्तेःनाङ्सल। 56बुरु ओउः आखरःहाङः रय्ह्ओ कुरा ताप्तो स्याव्साकायः इतलेः हायःतेःआकानी” त दाय्ह्ती येसुइ तोआथास। ओहाङःसैको सबै येसुकुस् वाह्ओमयः ओउःकायः फेती क्रव्आकाय्।
57ओहाङःसैको येसुकायः पानःती आलःती कयाफा त तोओ प्रधान् पुरोहीत्कःताङ् लात्ती वानःआकानी। ओउः प्रधान् पुरोहीत्कुस् सबै तोङ्ह्ओ पुरोहीत्लम्मा अरु यहुदीलम्कोः ताङ्ह्ओ मान्तालम्मा येसुकोः कुरा सायःलाङ् हुम्ती मुआकाय्। 58फेरी येसुकायः आलःतोक्हाङः पत्रुस्इ लोने लोनेसै ओउःकायः गुल्ह्ती ओउः प्रधान् पुरोहीत्कोः दर्बाल्ताङ् दाह्आ। दाह्आक्तीको “द्याह् येसुकायः दोह् स्याव्नाः” त दाय्ह्ती म्हर्ती ओउःपाय् दर्बाल्कोः आङ्गन्हाङः पोक्ती नोकरीलम्कुस् च्युङःती मुओ। 59ओहाङःसैको ओउः ताङ्ह्ओ पुरोहीत्लम्मा ओउःमयःकुस् हुम्ती मुओलम्इमा येसुकायः सात्सा थेङा ओउःकायः माःती गाल्तुम्ती नोःसा मान्तालम्कायः बोङःआकानी। 60नाःतो माःती तोसा ग्याओ मान्तालम् वाङ्इतो ओउःकोः कुरालम् खात्माःत झ्यान्ते स्याव्मालो खेःतो। ओहाङःसैको लोने नीस्चाक् चीङ्ती 61“लौ इपाय् ‘परमेस्वर्कोः मन्दीर्कायः ङाइ ह्र्योङःती वाय्नाङः वाय्आक्तीको सुम् दीन्हाङः नया जाङ्ह्सा खाय्नाङः’ त दाय्ह्ती इ मान्ताइपाय् तोआकान् बा” त दाय्ह्ती ओउःनीस्इ येसुकायः माःती गाल्तुम्ती नोःआकाच। 62ओउःत झ्यान्ते ओउः प्रधान् पुरोहीत्पाय् चीङ्ती “लौ इमयःकोः गाल्तुम्ती तोओ कुरा सायःआक्तीको नाङ्इ त्याङ्ती नोःतेःनाःया नोःतेःल” त दाय्ह्ती येसुकायः व्हत्थातो 63ओउःपाय् दोह्तमा त्याङ्ल ओउःत झ्यान्ते “लौ ङीकोः दोङ् परमेस्वर्कोः मय्ङ् पेह्ती ङाइ तोनेःनाङ् दोङ्सीलेः ओउः ख्रीस् त तोओ परमेस्वर्कोः चोःपाय् नाङ्लेःतेः खेःतेःनाःया त तोची दा” त दाय्ह्ती ओउः प्रधान् पुरोहीत्इ तोथातो 64“नाङ्इ तोओलो लेखा ओउःतलेः खेःनाङः। लौ ङाइ तोनेःनानाङ्स लोन्तेसै ओउः मान्ताकोः चोः त तोओपाय् परमेस्वर्कोः गुल्ह्दाङ् स्याव्आक्तीको ओउःकोः ग्वम् दोःती लाङ्कासै मुस्हाङः ग्ल्युङ्ह्ती वाङ्ओ च्यवःतेःनानी” त दाय्ह्ती येसुइ तोआथास। 65एत तोओ सायःआक्तीको ओउः प्रधान् पुरोहीत् ल्हुङ्कोः रो मल्ह्ती लयःकोः नाय् क्रत्आकास “लौ ओउःइ परमेस्वर्कायः रेव्तोलेः नोःओआः बा। द्याह् अरु गाल्तुम्ती नोःओलम्कायः सायःसा परल। नीङ्इ लयःकोः नोइ ओउःकोः रेव्तो तोओ सायःतेःआकानी 66ओउःत झ्यान्ते इकायः द्याह् दोह् हायःसाआः” त दाय्ह्ती हुम्ओलम्कायः तोथासतो “ओउःकोः रेव्ओ हायःझ्याङ्कायः सात्पाःथै” त दाय्ह्ती त्याङ्आकाय्। 67एत त्याङ्आक्तीको मान्तालम्इ येसुकायः खेन्हाङःलेः द्युर्इ द्युरःमाआथै घान्माआथै अरुलम्इ ओउःकायः मीक् बोमःआक्तीको क्रुत्इ प्र्याक्ती 68“लौ नाङ् ख्रीस् त तोओपाय् सुइ घान्तेःआ त तोताङी दा” त दाय्ह्ती व्हत्आथै।
69ओहाङःसैको एत स्याव्तोक्हाङः पत्रुस्पाय् दर्बाल् बाहीरहाङः च्युङःती मुधाङ्ओ खेःतो। ओहाङः मुतोक्हाङः यात्चाक् मोमःचोः नोकरी वाङ्ती “लौ नाङ्मा गालीलसै वाङ्ओ येसुकुस् वाह्ओतेःआः” त दाय्ह्ती तोथातो 70“खेःल बा नाङ् दाय्ह्ओ कुरापाय् ङाइ दोह्मा चीःबाय्ङल” त दाय्ह्ती माःती सबै ओउःकुस् मुओलम्कोः मीक्हाङः त्याङ्लेःआ। 71त्याङ्आक्तीको पत्रुस् आङ्गन्कोः दय्ह्लौताङ् ज्याल्आ। ओहाङः ज्याल्ती मुतोक्हाङः अरु नोकरी मोमःचोः वाङ्ती ओउःकायः च्यवःती “लौ इपाय् नासरेत्कोः येसुकुस्लेः वाह्ओआः” त दाय्ह्ती ओहाङः मुओलम्कायः छ्यानःआकान् 72“खेःल बा सत्ते ताम्बै जेः ओउःकायः ङाइ जुगाङ्मा तय्ह्ङल” त दाय्ह्ती पत्रुस् फेरीलेः माःती त्याङ्आ। 73-74ओहाङःसैको देङीलोहाङः ओहाङः मुओलम् वाङ्ती “दोङ्सीलेः नाङ्पाय् ओउःकुस् गालीलसै वाङ्ओतेः खेःतेःनाः। नाङ् गालीलकोः मान्तालो लेखा नोःतेःनाः बा” त दाय्ह्ती तोथातो “ङा माःती त्याङ्आ त खेःया लौ परमेस्वर्इ प्रनःपाःताङः। ओउः मान्ताकायः ङाइ जुगाङ् तय्ह्ङल” त दाय्ह्ती पत्रुस् त्याङ्आ। ओउःत त्याङ्ओ कुस्ब्रक्त यात्ज्योः वाः गोःआ। 75ओहाङःसैको ओउः वाः गोःओ सायःती “लौ वाः गोःधाङ्माःखाहाङः नाङ्इ सुम् पेन्ह्कायः ‘लौ ओउःकायः तय्ह्ङल बा’ त दाय्ह्ती नोःतेःनाःची” त येसु ङ्हा दाय्ह्ओ कुरा पत्रुस्इ गीलआकान्। एत गीलआक्तीको ओउःपाय् बाहीर ग्ल्युङ्ह्ती आन ल्हुङ् लीह्तीलेः र्याःती आल्आ।
Currently Selected:
मत्ती 26: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
