मत्ती 27
27
1ओहाङःसैको न्याम् थोङ्खयःओहाङः ओउः ताङ्ह्ओ पुरोहीत्लम्मा अरु यहुदीकोः ताङ्ह्ओ मान्तालम्मा “लौ येसुकायः सात्पाःथै” त होम्काय्ती नोःकाय्आकाय्। 2एत नोःकाय्आक्तीको येसुकायः पानःती आलःती पीलातस् त तोओ अन्चलादीस्कःताङ् दाक्आथै।
3ओहाङःसैको ओउःमयःइ “येसुकायः सात्पाःथै” त तोओ चीःती ओउः ङ्हा दाक्ओ यहुदा त तोओ ल्हुङ् द्यान्ह्ती “लौ ङाइ पेमालो हायःआलाङः” त म्हर्ती दाक्झ्याङ्कोः तीस् चान्दी रुपीया पाय्क्लाङ् आल्आ। 4ओउः ताङ्ह्ओ पुरोहीत्लम्मा अरु ताङ्ह्ओ मान्तालम्कःताङ् वाङ्ती “लौ ङाइ आन रेव्तो हायःती जुगाङ् पेओ मान्तापाय् सात्साकायः दाक्आलाङः बा” त दाय्ह्ती तोउती ती “ङीकायः दोह्मा दयःल ओउःपाय् नाङ्कोः काम् लेःआः” त दाय्ह्ती त्याङ्आकाय्। 5ओउःमयः एत त्याङ्आ त खेःओ ओउः तीस् चान्दी रुपीया मन्दीर्हाङः ताती ल्होक्आक्तीको यहुदा आल्आ। आल्आक्तीको लयःकायः कय्क्हाङः लाइ स्रुप्ती कुय्क्ती सात्आकास। 6यहुदा आल्आक्तीको ओउः ताङ्ह्ओ पुरोहीत्लम्इ रुपीया रोत्ती “इपाय् मान्ताकोः वयःकोः पैसा लेःआः। ओउःपाय् मन्दीर्कायः बयःसा स्याव्ल” त दाय्ह्ती नोःकाय्ती 7लोने ओउः पैसा बयःती यात्चाक् कुमाल्कोः राङ्पाय् “लौ इहाङः देसी मान्तालम् पाम्ह्सा तेस्राङ् स्याव्पाः” त दाय्ह्ती ओउः राङ् लेःआकानी। 8ओउःत झ्यान्ते ओउः राङ्पाय् तेन्छ्याङ्मा “वयःकोः राङ्” त तोओ लेःआः 9ओउःत हायःती उय्ह्लेकोः परमेस्वर्कायः चीःओ येरीमीयाइ ङ्हा तोओ कुरा ताप्तो स्याव्ओ। ओउःपाय् “लौ यहुदीलम्इ ओउःकायः होम्काय्ती गम्ओ मोल्पाय् ओउः तीस् चान्दी रुपीया त्याक्ती 10परमेस्वर्इ ङाकायः तोओलो लेखा ओउः कुमाल्कोः राङ्लेः लेःआकानी” त दाय्ह्ती येरीमीयाइ तोआकान्।
11ओहाङःसैको पीलातस्कःताङ् दाक्ती वानःआक्तीको येसुकायः ओउःकोः मीक्हाङः चीङ्ताक्आथै। पीलातस्कोः मीक्हाङः चीङ्तोक्हाङः “नाङ्पाय् यहुदीलम्कोः राजालेःतेः खेःतेःनाःया” त दाय्ह्ती ओउःइ येसुकायः व्हत्थातो “नाङ्इ तोओलो लेखा ओउःतलेः खेःनाङः” त दाय्ह्ती येसु त्याङ्आ। 12ओहाङःसैको ओउः ताङ्ह्ओ पुरोहीत्लम्मा अरु ताङ्ह्ओ मान्तालम्इमा येसुकायः आन गाल्तुम्ती नोःथातो येसुपाय् दोह्मा त्याङ्ल 13ओउःत झ्यान्ते पीलातस्इ ओउःमयःकोः कुरा सायःती “लौ ओउःमयःइ नाङ्कायः आन गाल्तुम्ती नोःतेःनाः ओउः नाङ्इ सायःतेःउलुया” त दाय्ह्ती येसुकायः व्हत्थातो 14येसुपाय् फेरीलेः दोह्मा त्याङ्ल ओउःत झ्यान्ते पीलातस् आन ग्याङ्ह्ओ खेःतो।
15ओहाङःसैको ओउः च्योल्ओ दीन्कोः छ्यात्हाङः साल् साल्कायः यात्चाक् झ्याल्खानहाङः थुनओ मान्ताकायः अन्चलादीस्इ फेन्सा खेःतो त जवआकानी। सुकायः “लौ इकायःलेः फेन्पाः” त दाय्ह्ती यहुदीलम्इ तेती तोआकानी ओउः मान्ताकायः पीलातस्इ फेन्ताक्ओ खेःतो। 16ओहाङःसैको ओउः साल्हाङः यात्चाक् सबैइ तय्ह्ओ मान्ता बरबा त तोओ झ्याल्खानहाङः थुनती गम्ओ खेःतो। 17ओउःत झ्यान्ते ओउः यहुदीलम् पीलातस्कोः दर्बाल्हाङः हुम्ती वाङ्आक्तीको पीलातस्पाय् ओउःमयःकःताङ् आल्ती “लौ ङाइ सुकायः फेन्सा झाक्तेःनै बरबाखे फेन्चाङःया ओउः ख्रीस् त तोओ येसुखे फेचाङःया” त दाय्ह्ती व्हत्आथास 18ओउः मान्तालम् ल्हुङ्हाङः लती झ्यान्ते येसुकायः सात्साकायः दाक्आथै त पीलातस्इ चीःती ओउःतलेः व्हत्आथास। 19ओहाङःसैको ओउः दर्बाल्हाङः च्युङःती मुतोक्हाङः पीलातस्कोः बुधीइ ओउःकःताङ् समचार् ल्होक्आथै “लौ इ पेओ मान्ताकायः दोह्मा रेव्तो हायःताक्लाम् दोह् हायःती दाय्ह्सा तेन्कोः रात्हाङः ङाइ ओउःकायः माङःखाहाङः च्यवःती आन लीह्सीःओ दोःआलाङः बा” त दाय्ह्ती तोसा ल्होक्आकान् 20“येसुकायः दोह्मा हायःताक्लाम्” त पीलातस्कोः बुधीखेइ कुरा ल्होक्उतो ओउः ताङ्ह्ओ पुरोहीत्लम्मा अरु यहुदीलम्कोः ताङ्ह्ओ मान्तालम्इमा हुम्ती वाङ्ओलम्कायः होम्ती “लौ ‘बरबाखेकायः फेन्पाःथै येसुखेकायः सात्पाःथै’ त तोनु” त दाय्ह्ती स्यान्आथास। 21ओउःत झ्यान्ते “लौ सुकायः फेन्चेःनाङ्स” त पीलातस्इ व्हत्तोक्हाङः “बरबाकायः फेन्उदा” त दाय्ह्ती सबै हुम्ओलम् त्याङ्आकाय्। 22“ओउःत झ्यान्ते इ ख्रीस् त तोओ येसुकायः दोह् हायःचाङः” त दाय्ह्ती पीलातस्इ फेरीलेः व्हत्थासतो “ओउःकायः क्ल्याय्ओ सीङःहाङः योकोःती सात्पाःथै” त दाय्ह्ती त्याङ्आकाय्। 23“इकायः दोह् हायःती सात्चाङः र। ओउःइ दोह् रेव्ओ हायःउतो ती” त दाय्ह्ती पीलातस्इ तोती “ओउःकायः क्ल्याय्ओ सीङःहाङः योकोःती सात्पाःथै” त दाय्ह्ती ओउः हुम्ती मुओलम्इ न्हाङ्तोलेः गोःआकानी 24ओहाङःसैको ओउःमयःकायः होम्सा खाय्माःत झ्यान्ते “ङाकुस् कायःकाय्सा चीङ्नै” त चीःती पीलातस् सबैकोः मीक्हाङः लयःकोः क्रुत् तीःइ जेस्ती “लौ योनु दा इ पेओ मान्ताकोः वयःपाय् जेस्ती वाय्तो ङा छय्ङ्तोलेः मुनाङः। ओउःकायः सात्सा काम्पाय् ङाकोः खेःबाय्ल नीङ्इ जाङ्ह्नु दा” त दाय्ह्ती तोआथास। 25“लौ ओउःपाय् ङीकोः काम् लेःआः ओउःकोः वयः ङीकायःमा ङीकोः प्लोमःदाने मोमःदानेकायःमा गाल्तुम्ती नोःपाःताङी” त दाय्ह्ती हुम्ओलम् त्याङ्आकाय्। 26ओउःत त्याङ्ओ सायःती पीलातस्इ बरबाखेकायः फेन्आकान् येसुखेकायः लाइ स्राप्ती घान्आक्तीको ओउःकोः सीपाहीलम्कःताङ् सात्साकायः ल्हाआथै।
27सीपाहीलम्कःताङ् ल्हाआक्तीको ओउःमयःइ येसुकायः दर्बाल्कोः चौकीहाङः लात्ती वानःती ओउः पल्तन्लम्कायः सबै हुम्लाङ् गोत्आकानी। 28पल्तन्लम्कायः सबै गोत्ती वानःआक्तीको येसुकायः राजालो लेखा दुओ क्रमःनाय् लावआकानी। 29ओहाङःसैको “मुकुत्” दाय्ह्ती येसुकायः चुःकोः क्याह्ओ फोङ्ती ल्हुप्आक्तीको ङोय्कोः क्रुत्हाङः चुम्सा क्रात्कोः दङ्ग बयःआकानी। एत हायःआक्तीको ङीःराय् जाङ्ह्सा थेङा “लौ भालातेः वाङ्तेःआ नाङ् यहुदीलम्कोः राजाय” त दाय्ह्ती आह्रे ख्याल् जाङ्ह्ती स्यवआकानी। 30फेरी ओउःकायः द्युर्इ द्युरःमाआकानी ओउः क्रात्इपाय् थोःमाआकानी। 31ओहाङःसैको येसुकायः एतलेः ङीःआक्तीको ओउः दुओ नाय् ल्ह्युन्ती ओउःकोः लयःकोः नाय्लम्इ फेरी लावती ओउःकायः बाहीरताङ् लात्ती क्लाःती क्ल्याय्ओ सीङःहाङः सात्लाङ् आलःआकानी।
32ओहाङःसैको बाहीरताङ् लात्ती ग्ल्युनःतोक्हाङः ओउः सीपाहीलम्इ यात्चाक् क्युरीनी देस्सै वाङ्ओ मान्ता सीमोन् त तोओपाय् च्यवःती ओउःकायः येसुकोः सात्सा खेःओ सीङः लात्ताक्आकानी। 33ओहाङःसैको आल्ती येसुकायः गोल्गोथा त तोओ दुलुङःताङ् लात्ती वानःआथै। गोल्गोथा त तोओकोः माने पुह्रुमःराङ् लेःआः। 34ओहाङः दाक्ती वानःआक्तीको येसुकायः तीतेपतीकुस् ल्याव्ह्ओ धाक्सायःकोः तीः बयःथातो बल म्रेमःआक्तीको ओउःपाय् तुङ्सा ग्याल। 35ओहाङःसैको साःहाङः यास्ओ सीङः पोत्ती बान्ह्अग अरु सीङः घ्यालःती क्ल्याय्ती गम्आक्तीको ओउः क्ल्याय्ती गम्ओ सीङःहाङः येसुकायः पानःती ओउःकोः दोम्क्रुत्हाङः खील्इ थाक्ती योकोःती गम्आथै। ओउःकोः नाय् लयःमयःकायः वेःसाकायः ओउः सीपाहीलम्इ बाङ् खेलती योआकानी। 36-37येसुकोः थाराय्हाङः ओउःकायः गाल्तुम्ती नोःओ कुरा इतलेः लेखती गम्आकानी “इपाय् येसुलेः यहुदीलम्कोः राजा” त दाय्ह्ओ लेखआकानी। लेखआक्तीको ओउः सीपाहीलम् ओहाङः च्युङःती येसुकायः योआकानी। 38ओहाङःसैको येसुकोः ङोय्सैमा यात्चाक् ओउःकोः वेःसैमा यात्चाक् नीस् दाकु मान्तालम्कायः अरु क्ल्याय्ओ सीङःहाङः गम्आकानी। 39ओहाङःसैको येसु सीङःहाङः योकोःती मुतोक्हाङः च्योल्ती वाह्ओ मान्तालम्इ ओउःकायः खुनःती नोःआथै 40“अ नाङ्पाय् ‘मन्दीर् ह्र्योङःआक्तीको सुम् दीन्हाङः नया जाङ्ह्नाङः’ ततेः दाय्ह्ओतेःआः। ओउःत खेःया लयःकायः दल्ताक्स दा। नाङ् परमेस्वर्कोः चोः त तोओलेः खेःतेःनाः त खेःया लौ उया सीङःसै ग्ल्युङ्ह्ती वाङ्अ” त दाय्ह्ती हेला क्लाःती गोःआथै। 41-42ओउःमयःइमा एत तोआकानी ओउः ताङ्ह्ओ पुरोहीत्लम्मा ओउःकायः ङीःआथै “लौ ‘ओउःइपाय् अरुकायः दल्ताक्ताङःआकान्’ त दाय्ह्ओ लेःआः लयःकायः दल्ताक्सा खाय्सल। लौ ओउःपाय् इस्राएल्कोः राजा लेःआः माःर ओउःत खेःया सीङःसै लयः ग्ल्युङ्ह्ती वाङ्पाः। ओउःत हायःआक्तीको ङीइ ओउःकोः कुरा ङ्हाम्चाङःसु। 43ओउःइपाय् ‘ङापाय् परमेस्वर्कोः चोः लेःआः ङ’ त दाय्ह्ती परमेस्वर्कायः ङ्हाम्तीलेः तोआकास ओउःत खेःया परमेस्वर्इ लयःकोः चोःकः म्रोती झ्यान्ते ओउःकायः दल्ताक्सा ग्यानाःया ग्यालया त योनाङःसु” त दाय्ह्ती ओउःमयः धर्मा स्यान्ओमयःमा अरु यहुदीलम्कोः ताङ्ह्ओ मान्तालम्कुस्मा नोःकाय्आकाय्। 44ओउः येसुकुस् योकोःती गम्ओ दाकुनीस्इमा ओउःतलेः येसुकायः हेला क्लाःआथै।
45ओहाङःसैको बार बजे न्याम् तोकोतोय्ह्हाङःसै लोने तीन् बजे न्याम् योहोरीच्युक्हाङःकायः ओउः देस्हाङःपाय् जुगाङ् च्याक्तो स्याव्आ। 46फेरी न्याम् योहोरी बेलाहाङःपाय् येसु यहुदी भासा नोःती “एलोय् एलोय् लमा सबक्थानी” त दाय्ह्ती सोतोलेः दाय्ह्आ। ओउः कुराकोः माने इलेःआः “अ ङाकोः परमेस्वर्य अ ङाकोः परमेस्वर्य दोह् हायःतीतेः ङाकायःतेः फेतेःआची” त दाय्ह्ओ लेःआः। 47येसु एतलेः गोःतोक्हाङः यात्नीस् द्याङ्तो मुओलम्इ “एलोय् एलोय्” त दाय्ह्ओ सायःती “लौ ओउःइ एलीया त तोओकायः गोःनौ” त दाय्ह्ती नोःकाय्आकाय्। 48एत नोःती यात्चाक्इ क्रीम्ओ धाक्सायःकोः तीःहाङः नाय् जोःआक्तीको सीङःकोः च्योःहाङः पोतोलःती येसुकायः प्योती स्योनःती तुङ्ताक्सा बयःथातो 49अरुलम्इ “खेःल ल्युङ्ह्ती मुइ एलीयाइपाय् येसुकायः फान्ती क्लाःलाङ् वाङ्नाःया वाङ्लया त योनी दा” त दाय्ह्ती तोआकानी। 50ओहाङःसैको येसु फेरीलेः सोतो गोःआक्तीको ओउःकोः नामे रुआङ् ज्याल्आ। 51ओउःकोः सास् ज्याल्माकादे सहर्हाङः ओउः मन्दीर् कीम् दुङ्हाङः हेङ्केती खोओ नाय्पाय् त्यावःअसै कामःअ दाह्तीलेः क्रत्ती नीस् फाक् स्याव्माकादे फेरी ताङ्ह्ओ ल्याङ् वाङ्ती बाङ्लम् वाक्ती 52उय्ह्ले सीओ परमेस्वर्कोः मान्तालम्कोः तेस्लम् फोल्ह्आकाय्। फोल्आक्तीको ओहाङः मुओलम् उह्ती च्योक्आकाय् 53लोने येसु उह्ती च्योक्आक्तीको ओउः मान्तालम् यरुसालेम्हाङः नाःतो थाआकाय्। 54ओहाङःसैको ल्याङ् वाङ्तोक्हाङः ओउः सीपाहीलम्कोः हवल्दार्मा अरु ओउःकुस्इ येसुकायः योती मुओलम् इ ग्याङ्ह्सीःओ कुरा च्यवःती आन रैती “लौ इ मान्तापाय् दोङ्सीलेः परमेस्वर्कोः चोःलेः खेःतो रैस बा” त दाय्ह्ती दाय्ह्आकाय्। 55फेरी नाःतो येसुकुस् गालीलसै वाङ्ओ मोमःचोःलम्इमा बल लोक्तोसै योती मुओ खेःइतो। ओउःकुस् वाङ्तोक्हाङः ओउःमयःइ येसुकायः सोर्तीलेः स्यास्आकानी। 56ओउः मोमःचोःलम्कःहाङः मरीयम् माग्दालामा याकुब् युसेफ् नीस्पुःचाःकोः आमा मरीयम् त तोओमा जबदीकोः बुधीमा मुओ खेःइतो।
57-58ओहाङःसैको येसुकोः सात्नम् दीन्कोः न्याम् ब्लक्ओ बेलाहाङः यात्चाक् अरीमाथीया गाव्कोः साहु मान्ता युसेफ् त तोओ पीलातस्कःताङ् आल्ती येसुकोः म्हाङ्कायः “ङाकायः ल्हाची दा” त दाय्ह्ती तेआ। ओउः युसेफ् त तोओपाय् येसुकायः ङ्हाम्ओ मान्ता खेःतो। ओहाङःसैको पीलातस्कः तेआक्तीको “लौ येसुकोः म्हाङ् इकायः ल्हाउ” त दाय्ह्ती ओउः अन्चलादीस् पीलातस्इ हुकुम् बयःआकान्। 59ओउःत झ्यान्ते युसेफ् आल्ती येसुकोः म्हाङ् त्याक्ती पेओ नाय्इ खुप्आकान्। 60खुप्आक्तीको येसुकोः म्हाङ्पाय् युसेफ्इ लात्ती आलःती लयःकायः तोहा जाङ्ह्ओ चेनःबाङ्हाङः व्हह्र्ती द्यावःओ ल्युमःपुक् घाङ्हाङः काती गम्आकान्। काती गम्आक्तीको ल्होप्ओ बाङ् तुलुती ओउः घाङ् बोमःआकान्। बोमःआक्तीको युसेफ् पाय्ह्आ। 61येसुकोः म्हाङ् एत पाम्ह्ती गम्ओहाङः मरीयम् माग्दालामा ओउः अरु मरीयम्मा तेस् द्याङ्तो च्युङःती मुआकाच।
62ओहाङःसैको येसुकायः सात्नम् दीन्कोः स्याङ्ह्लोपाय् यहुदीलम्कोः धोओ दीन् खेःतो। ओउः दीन्हाङः ओउः पुरोहीत्लम्मा फरीसीलम्मा हुम्ती पीलातस्कःताङ् वाङ्आकाय्। 63ओउःकःताङ् वाङ्आक्तीको “लौ हजुर् येसुपाय् ‘सुम् दीन्हाङः उह्ती च्योक्नाङः’ त दाय्ह्ती ओउःइ सेलः मुधाङ्ओहाङः माःती तोआकान् इत ङीइ चीःनाङःसु 64ओउःत झ्यान्ते ओउःकोः पाम्ह्ओ घाङ्पाय् सुम् दीन्च्युक्कायः पेतो योताक्उ दै उया ओउःकुस् वाह्ओमयःइ याह्दीङ्हाङः वाङ्ती ओउःकोः म्हाङ् कुःचानी यादो। कुःआक्तीको ‘लौ ओउःपाय् उह्ती च्योक्ओआः’ त माःओ सबै मान्तालम्कायः तोचानी त खेःया इ काम्पाय् न्हाङ्तोलेः पेमालो स्याव्नाः” त दाय्ह्ती पीलातस्कः तेआकाय् 65“लौ उया ल्युङ्ह्सा सीपाहीलम् मुनै ओउःमयः द्याह् आलःती ओउः तेस्पाय् पेतो ल्युङ्ह्ती गम्नु” त दाय्ह्ती पीलातस् त्याङ्आ। 66ओउःत झ्यान्ते ओउःमयःइ सीपाहीलम् लात्ती आलःती ओउः घाङ् बोमःओ बाङ्कायः साःइ लेक्ती ओउः सीपाहीलम्कायः ल्युङ्ह्ताक्आकानी।
Currently Selected:
मत्ती 27: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
