मत्ती 25
25
1परमेस्वर्कोः राजी गतलो वाङ्नाः दाय्ह्सा यात्ज्योः वीनःराय् मुनाः। बीहा जाङ्ह्तोक्हाङः दस्जन द्याङ्ह्मयःलम् बत्ती लात्ती दुलही रोम्लाङ् आल्आकाय्। 2ओउः दस्जन मोमःचोःपाय् पास्जन व्हाय्तो चीःओ मान्तालेः खेःइतो ओउः अरु पास्जन व्हाय्तो चीःओ खेःइली। 3-4ओउः चीःओलम्खेइ वेओ सातीमा लात्ती वानःनीतो ओउः अरु चीःमालोलम्खेइ वेओ सातीपाय् लात्नीली। 5ओउः दुलहीकायः ज्याङःतो ल्युङ्ह्ती मुसा थेङा ओउः दस्जन एनःबुस्ती एनःआकाय्। 6ओहाङःसैको ओउःमयः सबै एनःती लोने दोङ् याह्दीङ्हाङः ‘लौ दुलही दाह्आ द्याह् ओउःकायः रोम्लाङ् आल्न दा’ त दाय्ह्ती गोःआकानी 7एत गोःआक्तीको ओउः दस्जन द्याङ्ह्मयःलम्इ च्योक्ती लःलयःकोः बत्ती हवःताक्सा बोङःआकानी। 8हवःताक्सा बोङःतोक्हाङः ओउः चीःमालोलम्इ अरुकः ल्हेःती ‘लौ बल साती बयःताङी दै ङीकोः सातीपाय् द्याह् द्योक्ओआः बा’ त दाय्ह्ती तेइतो 9‘खेःल ङीकोः साती नीङ्कायःमा थोप्ल। साती वीनःओ साहुकःताङ् लेःलाङ् आल्न दा’ त दाय्ह्ती ओउः चीःओ द्याङ्ह्मयःलम्इ तोआथास। 10एत तोआक्तीको ओउः चीःमालोलम् साहुकःताङ् लेःलाङ् आल्इतो ओउःमयः आल्ती लेःतोक्हाङः ओउः दुलही वाङ्आ। दुलही वाङ्ती ओउः पास्जन साती नाःओ द्याङ्ह्मयःलम्खे ओउःकुस् आल्ती ओउःकोः कीम्ताङ् पोक्आकाय्। पोक्आक्तीको कीम्कोः धोका राक्ओ खेःतो। 11ओउः अरु पास्जनखे कीम्हाङः ज्याङःतो दाह्ती ‘लौ ङीकायः कीम् फोल्ताङी दा’ त दाय्ह्ती गोःनीतो 12‘खेःल नीङ्कायः ङाइ तय्ह्नेःनाङ्सल’ त दाय्ह्ती ओउः कीम्कोः आपाइ कीम् फोल्सा ग्याल। 13लौ उया नीङ्पाय् धय्ती ल्युङ्ह्ती मुन ओउः मान्ताकोः चोः गलखा वाङ्नाः त नीङ्इ जुगाङ् चीःतेःनीली” त दाय्ह्ती येसु दाय्ह्आ।
14“फेरी परमेस्वर्कोः राजी इलो लेखालेः यात्चाक् मालीक् लोक्तो देस्ताङ् आल्सा चीङ्आ। आल्सा चीङ्तोक्हाङः ओउःइ लयःकोः नोकरीलम् गोत्ती स्योताङ् स्योताङ् ओउःमयःकायः काम्मा पैसामा बयःआथास। 15यात्चाक्कायः पास् लाख् रुपीया बयःआकान् यात्चाक्कायः नीस् लाख् बयःआकान् अरुकायः यात् लाख् रुपीया बयःआकान् इतलेः काम् जाङ्ह्साकायः नोकरी नोकरीपाय् गुच्युक् पेतो चीःनौ ओउःच्युक्लेः ओउःकायः बयःओ खेःतो। बयःआक्तीको ओउः मालीक् मान्तापाय् लोक्तो आल्आ। 16ओहाङःसैको मालीक् आल्आक्तीको ओउः पास् लाख् त्याक्ओ नोकरी चीस् लेःतीमा वीनःतीमा अरु पास् लाख् दोःआ। 17फेरी ओउः नीस् लाख् त्याक्ओ नोकरीमा चीस् लेःतीमा वीनःतीमा अरु नीस् लाख् दोःआ 18ओउःनीस् नोकरीखेइ पैसा क्युताक्चुतो ओउः यात् लाख् रुपीया त्याक्ओ नोकरीइ साःहाङः घाङ् व्हह्र्ती ओउःकोः मालीक्इ बयःओ यात् लाख् रुपीया पाम्ह्ती नुस्आकान्। 19ओहाङःसैको ज्याङःतोहाङः ओउःमयःकोः मालीक् पाय्ह्ती नोकरीलम्कुस् नोःलाङ् गोत्आथास। 20गोत्आक्तीको ओउः पास् लाख् त्याक्ओ नोकरीइपाय् वाङ्ती ‘अ प्रभुय ङाकायः पास् लाख् बयःतेःआची लौ ओउः पास् लाख्कुस् ङाइ अरु पास् लाख् क्युती वानःती पाय्क्नेःनाङ्’ त दाय्ह्ती सबै दस् लाख् रुपीया पाय्क्आकान्। 21पाय्क्आक्तीको ‘लौ आन पेतोतेः हायःजेःतेःआकान् रैस। इ मीओ काम्पाय् नाङ्इ पेतोलेः हायःतेःआकान् त झ्यान्ते ङाइ अरु ताङ्ह्ओ काम् बयःनेःनाङ् लौ ङाकुस् चोङाय्ती मुअ’ त दाय्ह्ती ओउःकोः मालीक् दाय्ह्आ। 22ओहाङःसैको ओउः नीस् लाख् रुपीया त्याक्ओ नोकरीमा वाङ्ती ‘अ प्रभुय ङाकायः नीस् लाख् बयःतेःआची ङाइ अरु नीस् लाख् क्युती वानःती पाय्क्नेःनाङ्’ त दाय्ह्ती सबै चार् लाख् रुपीया पाय्क्आकान्। 23पाय्क्आक्तीको ‘लौ आन पेतोतेः हायःजेःतेःआकान् रैस। इ मीओ काम्पाय् नाङ्इ पेतोलेः हायःतेःआकान् ओउःत त झ्यान्ते ङाइ अरु ताङ्ह्ओ काम्लम् बयःनेःनाङ्। लौ ङाकुस् चोङाय्ती मुअ’ त दाय्ह्ती ओउः मालीक् दाय्ह्आ। 24ओहाङःसैको ओउः यात् लाख् रुपीया त्याक्ओ मान्तापाय् वाङ्ती ‘अ प्रभुय नाङ्पाय् खह्र्ओ मान्ता लेःआः त ङाइ चीःआलाङः। बीया चोया वार्मालो राङ्सै नाङ्इ आन सायः त्युम्ह्ती वानःनानी तमा चीःआलाङः 25ओउःत खेःया ङापाय् रैती नाङ्इ बयःओ यात् लाख् रुपीया लात्ती साः घाङ्हाङः नुस्आलाङः। ओउः पैसा ङा द्याह् वानःती पाय्क्नेःनाङ्’ त दाय्ह्ती ओउः नोकरी दाय्ह्तो 26‘अ नाङ् अल्सीओ पेमालो मान्तातेः। ङाइ लयः वार्मालो राङ्सै सायः त्युम्ह्ती वानःनाङः ओउःत नाङ्इ चीःतेःआकान्। 27ओउःत झ्यान्ते ङाकोः पैसा त्याक्आक्तीको नाङ्इ चीस् लेःतीमा वीनःती ङाकोः पैसा क्युताक्सा खेःतेःतो ओहाङःसैको ङा पाय्ह्ती दाह्आक्तीको न्हाङ्तोलेः त्याक्सा दोःचाङः खेःतो’ त दाय्ह्ती मालीक्इ जान्आथै। 28‘लौ ओउःकोः यात् लाख् रुपीया त्याक्ती ओउः दस् लाख् नाःओ नोकरीकायः बयःनु’ त दाय्ह्ती अरुकायः हुकुम् बयःआकान्। 29‘सुसु नाःओलेः मुनाः ओउःपाय् न्हाङ्तोलेः दोःलेःनाः सुसु नाःमालो मुनाः ओउःकोः दोह् मुनाः ओउःमा लाती आलःसा खेःतो। 30ओहाङःसैको इ अल्सीओ नोकरीकायः आलःती बाहीरताङ् ल्होक्नु ओहाङः ओउःपाय् आन लीह्तो मुनाः’ त दाय्ह्ती ओउः मालीक्इ तोआकान्।
31ओउः मान्ताकोः चोः अङ्ग थङ्ग त ताङ्ह्ओ ल्होक्ओमयःकुस् वाङ्तोक्हाङः ओउःपाय् राजालो लेखा च्युङःती मुनाः। 32ओहाङःपाय् सबै जात्कोः मान्तालम् हुम्ती वाङ्नै वाङ्आक्तीको ओउःमयःकायः मान्ताकोः चोःइ नीस् भाक्ताङ् वेङ्ह्ताक्नाःथास। 33ओउःइ पेओ मान्तालम्खेकायः ओउःकोः ङोय्दोहाङः गम्नाःथास रेव्ओलम्खेकायः ओउःकोः वेःदोहाङः गम्नाःथास। 34ओउः ङोय्दोहाङः मुओलम्कायः ‘लौ नीङ्कः ङाकोः परमेस्वर् आपा आन म्रोलेःनाः। ओउःकोः राजी याक्ती मुलाङ् वाङ्न दा। ओउः राजीपाय् ल्हाव्ह्दैबाङ्कोः जाङ्ह्तोक्हाङःसै नीङ्कायः गम्ओ लेःआः 35दोह् हायःती दाय्ह्सा ङा योङ्क्राय्तोक्हाङः ङाकायः आम्ह्तेः बयःतेःआनाङ्स। तीः अप्तोक्हाङः तीः बयःतेःआनाङ्स ङा साथी नाःमालो बेलाहाङः ङाकायः रोम्तेःआनाङ्स। 36फेरी नाय् नाःमालोहाङः ङाकायःतेः नाय् बयःतेःआनाङ्स जीक्ओ स्याव्तोक्हाङः ङाकायः स्यास्तेःआनाङ्स ङा झ्याल्खानहाङः मुतोक्हाङः ङाकायः क्रुस्लाङ् वाङ्तेःआकाय्’ त दाय्ह्ती ओउः राजाइ तोथासतो 37ओउः पेओलम् ग्याङ्ह्ती ‘लौ प्रभुय ङीइ गलखा नाङ् योङ्क्राय्ओ च्यवःती आम्ह् बयःनेःआलाङ्स। तीः अप्ओ नाङ्कायः गलखा तीः वानःनेःआलाङ्स। 38गलखा नाङ् साथी नाःमालो च्यवःती नाङ्कायः रोम्नेःआलाङ्स नाय् नाःमालो च्यवःती नाय् बयःनेःआलाङ्स। 39नाङ् जीक्तो मुओ झ्याल्खानहाङः मुओ च्यवःती ङीइ गलखा नाङ्कायः क्रुस्लाङ् वाङ्आलाङी’ त दाय्ह्ती व्हत्आकानी 40‘दोङ्सीलेः दाय्ह्भनाङ् नीङ्इ ङाकोः अरुसै मीओ ङ्हाम्ओ मान्ताकायः पेओ काम् जाङ्ह्तेःआकान् त खेःया ओउः काम्पाय् ङाकायःमा जाङ्ह्तेःआनाङ्स बा’ त दाय्ह्ती ओउः राजा त्याङ्नाः। 41ओहाङःसैको पेओलम्कः त्याङ्आक्तीको ओउः राजापाय् ओउःकोः वेःदोहाङः मुओ रेव्ओलम्कःताङ् ल्हेःती ‘लौ नीङ्कायःतेः परमेस्वर्इ न्युम्ह्ताक्तेःनै। ओउः सैतान्कायःमा ओउःकुस् मुओलम्कायःमा तय्क्ओ गलमा म्हीत्मालो म्हेःताङ् आलःतेःपै। 42ङापाय् योङ्क्राय्ओ खेःङोतो आम्ह्पाय् बयःतेःनाङ्सल तीः अप्ङोतो ङाकायः तीःतेः वानःतेःनाङ्सल। 43साथी नाःमालोहाङः ङाकायः रोम्तेःनाङ्सल जीक्ओ बेलाहाङः झ्याल्खानहाङः मुओहाङः ङाकायः क्रुस्लाङ् वाङ्तेःइली’ त दाय्ह्ती तोथासतो 44‘लौ प्रभुय गलखा नाङ् योङ्क्राय्ओमा तीः अप्ओमा च्यवःती ङीइ बयःनेःनाङ्सल। फेरी नाङ् नाय् नाःमाःत मुओ गलखा बयःनेःनाङ्सल साथी नाःमालो बेलाहाङः जीक्ती मुओ बेलाहाङः झ्याल्खानहाङः मुओ बेलाहाङः ङीइ गलखा च्यवःती नाङ्कःहाङः वाङ्ङीली’ त दाय्ह्ती ग्याङ्ह्ती व्हत्नीतो 45‘दोङ्सीलेः दाय्ह्भनाङ् इ ङाकोः अरुसै मीओ मान्ताकायःतेः नीङ्इ बयःतेःनीली त झ्यान्ते ङाकायःमा बयःतेःनाङ्सल। 46लौ इ रेव्ओलम्खेपाय् गलकायःमा न्युम्ह्तो स्याव्पै ओउः पेओलम्खे गलमा द्योक्मालो रौ जीङः दोःपै’ त दाय्ह्ती राजाइ तोनाःथास” त दाय्ह्ती येसुइ लयःकुस् वाह्ओमयःकायः स्यान्आथास।
Currently Selected:
मत्ती 25: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
