मत्ती 24
24
1ओउःतलेः येसु दाय्ह्आ ओहाङःसैको दाय्ह्आक्तीको येसु मन्दीर्सै ग्ल्युङ्ह्ती आल्आ। ओहाङः ग्ल्युङ्ह्ती आल्तोक्हाङः ओउःकुस् वाह्ओमयः वाङ्ती “लौ इ मन्दीर्कोः दर्बाल्लम् योउ दै” त दाय्ह्ती तोथातो 2“इ दर्बाल्लम् नीङ्इ द्याह् च्यवःतेःनीतो लोन्तेसै ओउःपाय् जुगाङ् ह्र्योङ्ती वाय्तो स्याव्जेःनाः। ओउः ह्र्योङ्ती वाय्तोक्हाङःपाय् यात्ज्याङ् बाङ्मा अरुकुस् द्योप्काय्ती मुबाय्इली” त दाय्ह्ती येसुइ तोआथास। 3ओहाङःसैको आल्ती ओउः जैथुन्सायः बुम्ताङ् दाह्ती वाङ्आकाय्। ओहाङः दाह्ती वाङ्ती येसु लयःझुङ्आले च्युङःती मुतोक्हाङः ओउःकुस् वाह्ओमयः वाङ्ती “लौ नाङ्इ मेस् तोओ मन्दीर् ह्र्योङ्ती वाय्सा कुरापाय् गलखा स्याव्नाः आने ओहाङःसै नाङ् द्यान्ह्ती वाङ्सा दीन्मा ल्हाव्ह्दैबाङ्कोः द्युम्सा दीन्मा वाङ्खेःओ गत हायःती ङीइ ङ्हासै तय्ह्चाङःसु” त दाय्ह्ती व्हत्थातो 4“लौ नीङ्पाय् पेतो धय्ती मुजेःन दा ओहाङःसैको नीङ्कायः अरुलम्इ माःती होम्सा बोङःतेःनै त खेःया ओउःमयःइ नीङ्कायः ब्रःताक्सा खाय्नीली। 5लोन्ते नाःतो मान्तालम् ‘लौ ओउः वाङ्सा खेःओ चाक्पाय् ङा लेःआः ङ’ त दाय्ह्ती माःती ङाकोः मय्ङ् पेह्ती वाङ्नै ओउःमयः दाय्ह्ओ कुरा नाःतो मान्तालम्इ ङ्हाम्नानी। 6फेरी लोन्तेमा ‘लौ इहाङःपाय् लदाय् जाङ्ह्नानी ओहाङःमा लदाय् जाङ्ह्सा बोङःनानी’ त दाय्ह्ती नोःओ सायःतेःनानी ओउः कुरा सायःतोक्हाङः ल्हुङ् र्याङःमाःत मुन इत हायःओ स्याव्सा खेःलेःनाः ओउः बेलाहाङः ल्हाव्ह्दैबाङ्कोः द्युम्ओ दीन् वाङ्धाङ्ल। 7ओनम् दीन् यात्ज्योः देस्कोः मान्तालम् अरु देस्कोः मान्तालम्कुस् मीन्ह्काय्नै यात्ज्योः राजामा अरु राजाकुस्मा कायःकाय्मानै। थाव् थाव्हाङः ताङ्ह्ओ ल्याङ्मा वाङ्नाः जोक्तो अनीकाल्मा स्याव्नाः। 8इ दीन्लम् स्याव्तोक्हाङः लीह्ती वाह्ओ बेलाहाङः वाङ्खयःनाः बा। 9लोने अरुलम्इ नीङ्कायः पानःती लीह्ताक्साकायः दाक्तेःनै कोय्कायः सात्तेःनै। ‘लौ ओउःलम्इ येसुकायः ङ्हाम्नानी’ त दाय्ह्ती सबै जात्कोः मान्तालम् नीङ्कः ल्हुङ् मल्ह्तो स्याव्नै। 10ओउःत झ्यान्ते नाःतो ङ्हाम्ओ मान्तालम्इ ङाकायः फेनाःताङः लःलयःमयःकः ल्हुङ् जीक्तो स्याव्ती लयःमयःकायः सात्लाङ् दाक्नानी। 11ओहाङःसैको नाःतो माःती तोओलम् ‘लौ ङापाय् परमेस्वर्कोः कुरा छ्यानःओ मान्ता लेःआः ङ’ त दाय्ह्ती वाङ्ती ओउःमयःइ स्यान्ओ कुरा नाःतोलम्इ ङ्हाम्नानी 12ओउः बेलाहाङः आन रेव्तो स्याव्नाः ओउःत झ्यान्ते नाःतोलम् ङाकायः पेतो राप्ताङःल 13सुसुखे ङाकायःमा ङाकोः कुराकायःमा फेमाःत ग्रमःत मुनै ओउःलेः दल्तो स्याव्नै। 14ओहाङःसैको ओउः द्युम्ओ दीन्कोः ङ्हासै परमेस्वर्कोः राजीकोः पेओ कुरा ल्हाव्ह्दैबाङ्हाङः सबै मान्तालम्कायः चीःताक्सा थेङालेः थोल्ह्ती तोसा खेःतो। थोल्ह्ती तोआक्तीको ओउः द्युम्ओ दीन् वाङ्लेःनाः।
15-16फेरी गलखा नीङ्इ ओउः रेव्तो ह्रावःओचाक्पाय् वाङ्सा स्याव्मालो थाव्हाङः चीङ्ती मुओतेः च्यवःतेःनानी परमेस्वर्कोः कुरा छ्यानःओ दानीएल् त तोओ ङ्हासै दाय्ह्ओलो लेखालेः ओउःनम् दीन्हाङः यहुदीयाहाङः मुओलम् स्यालुङ्ताङ् क्रव्तेःपै। सुसुइ इ कुरा पह्रनै ओउःकोः माने पेतो चीःपाःनी। 17ओउः क्रव्सा बेलाहाङः कीम् बाहीरहाङः मुओलम् कीम्हाङः पोक्मामाःत माल्ताल् त्युम्ह्मामाःत क्रव्सा खेःतो। 18फेरी राङ्हाङः मुओलम् लयःकोः क्रमःनाय् रोत्ती वानःसाकायः सुमा कीम्ताङ् पाय्ह्लाम्। 19ओहाङःसैको ओनम् दीन्हाङः चोःतुक् लात्ओ मोमःचोःकायःमा दुत् खोलःती बयःओ आमालम्कायःमा आन लीह्तो स्याव्नै। 20ओउःत झ्यान्ते ‘इ लीह्सीःओपाय् न्याम् झ्युङ्ओहाङःमा धोओ दीन्हाङःमा वाङ्ताक्लाम्’ त दाय्ह्ती परमेस्वर्कायः तेती तोसा। 21न्याम् झ्युङ्ओ बेलाहाङः धोओ दीन्हाङः क्रव्सा खेःतो त खेःया आन जोक्तो लीह्ओ स्याव्नाः। ल्हाव्ह्दैबाङ्कोः जाङ्ह्तोक्हाङःसै ओउःच्युक् जोक्तो लीह्सीःओ स्याव्धाङ्ल लोन्तेसैमा फेरी स्याव्नाः जुगु। 22ओउः लीह्तो स्याव्सा बेलाहाङःपाय् परमेस्वर्इ लयःइ चल्ओ मान्तालम्कायः ज्याङःतो स्याव्ताक्उलु ज्याङःतो स्याव्आ त खेःया सुमा स्याक्सा खाय्नीली। 23फेरी गलखा सुलाङःइ ‘लौ ख्रीस् त तोओ इहाङःलेः मुनाः’ अरुखेइ ‘ओहाङःलेः मुनाः’ त तोओ सायःतेःनानी त खेःया ओउः कुरा ङ्हाम्तेःचानी। 24लोन्तेहाङः मान्तालम् ‘लौ ङापाय् ख्रीस् लेःआः’ तमा ‘लौ ङापाय् परमेस्वर्कोः कुरा छ्यानःओ मान्ता लेःआः’ तमा माःती तोती वाङ्नै फेरी आन ग्याङ्ह्राय्मा जाङ्ह्नानी। ओउःमयःइ सबैकायःमा थ्योन्ह्ती होम्सा बोङःनानी परमेस्वर्कोः चल्ओमयःकायःमा होम्सा बोङःनानी ओउःमयःखेकायः होम्सा खाय्नीली। 25लौ इ कुरा स्याव्ओकोः ङ्हासैलेः ङाइ तोनेःनानाङ्स 26ओउःत झ्यान्ते मान्तालम्इ ‘लौ ख्रीस्पाय् मान्ता याक्गार्सीःमालोहाङः वाङ्आ’ त दाय्ह्ती तोतेःनै त खेःया ओहाङः योलाङ् आल्तेःचै। ओहाङःसै अरुइ ‘लौ ख्रीस्पाय् अरुइ चीःमालो कीम्हाङः मुलेःनाः’ त दाय्ह्ती तोतेःनै त खेःया ओउःमयःइ तोओ कुरा ङ्हाम्तेःचानी 27दोह् हायःती दाय्ह्सा ङा मान्ताकोः चोःत तोओकोः दोङ् द्यान्ह्ती वाङ्तोक्हाङः दाह्न्याम्सै ब्लक्न्याम्ताङ् प्लीङ्ह्ओ न्याम्लो लेखा ङा वाङ्ओपाय् सबै च्यवःसा दोःनै। 28लौ गाःहाङःलो सीओ मायः मुनाः ओहाङःलेः गीधलम् हुम्ती वाङ्नै ओउःतलेः ङा वाङ्तोक्हाङः सबै ङाकःताङ् हुम्लाङ् वाङ्लेःनै।
29ओहाङःसैको ओउः लीह्ओ दीन्लम् दप्आक्तीको न्याम्मा लाह्मा पेतो थोङ्ल। कार्लम्मा फेल्बाङ्सै ग्लेःनाः फेल्बाङ्हाङः मुओ थोक्लम्पाय् सबै ह्रेन्तोलेः स्याव्नाः। 30ओहाङःसैको फेल्बाङ्हाङः ओउः मान्ताकोः चोः वाङ्सा खेःओ चीन्ह च्यवःनानी। च्यवःआक्तीको ल्हाव्ह्दैबाङ्हाङः सबै जात्कोः मान्तालम्इ क्रेस्नानी। ओउःमयःइ मान्ताकोः चोः त तोओ आन पेतो अङ्ग थङ्गत एङःसीःतो थोङ्ती मुस्हाङः वाङ्ओ च्यवःनानी। 31वाङ्आक्तीको ओउःइ लाङ्काकोः ल्होक्ओमयः ताङ्ह्ओ तुरहीकोः हाव्नयःकुस्इ ल्होक्ती परमेस्वर्इ छ्युङ्ह्ओ मान्तालम्कायः ल्हाव्ह्दैबाङ्कोः चार्दोवासै हुम्ती वानःनाःथास।
32ओउः बेलाहाङः गल वाङ्नाः त चीःसाकायः न्याम्सीकोः स्यान्राय् तय्ह्नु दा। न्याम्सीकोः मात् तुरःतोक् बेलाहाङःपाय् न्याम् रावःओ दाह्खेःनाः त नीङ्इ चीःसा खाय्तेःनानी। 33ओउःलो लेखा ङाइ मेस् तोओ कुरा स्याव्तोक्हाङः ‘ओउः मान्ताकोः चोः त तोओ वाङ्खेःआ’ तमा चीःसा खाय्तेःनानी। 34दोङ्सी दाय्ह्भनाङ् तेन्छ्याङ्कोः मान्तालम् सोय्ह्ती सीधाङ्माच्युक्हाङः इ कुरा सबै ताप्तो स्याव्नाः। 35फेरी ल्हाव्ह्दैबाङ्मा फेल्बाङ्मा लोन्ते म्हीत्जेःनाः ङाइ तोओ कुरा गलमा मीह्ती वाय्ल।
36फेरी ओउः कुरा गलखा ताप्तो स्याव्नाः त चीःसा सुइमा चीःनीली परमेस्वर्कोः ल्होक्ओमयःइमा चीःनीली ओउःकोः चोःइमा चीःउलु ङाकोः परमेस्वर् आपाइ झुङ्आले चीःनौ। 37ओउः मान्ताकोः चोः वाङ्सा बेलाहाङः उय्ह्लेकोः नोआह् त तोओकोः बेलाहाङःलो लेखा स्याव्नाः 38-39नोआह् मुतोक्हाङः तीः लय्ङ्ती लन्ह्ती वाङ्धाङ्माखाहाङः मान्तालम्इ जेःधै तुङ्धै मोमःचोःकायः वानःधै गोय्चोःकुस् पाय्ह्धै मुइतो ओउःमयःकायः दोह् स्याव्खेःनाः त जुगाङ् चीःमालो खेःइतो। नोआह्पाय् तीःजहास्हाङः पोक्आक्तीको ह चीःलेःनीतो ओउः तीःपाय् रेन्ह्तो लन्ह्ती वाङ्ती झ्यान्ते जहास् पोक्मालो मान्तालम्कायः तीःइ आलःती ज्युप्ती वाय्आथास। ओउःमयःइ ‘दोह् दयःखेःचाःतय्ही’ त ङ्हापाय् चीःआक्नीली ओउःलो लेखालेः ‘मान्ताकोः चोः दाह्खेःनाः’ तमा ङ्हापाय् चीःसा सुमा दोःइली। 40ओउः बेलाहाङः नीस्चाक् राङ् तव्ह्ती मुचाःच यात्चाक्खेकायः ङाकःताङ् आलःनाःथै ओउःकोः साथीखे आलःमाःत मुनाः। 41फेरी नीस् मोमःचोःइ आम्ह् ग्रायःती मुचाःच यात्चाक्खेकायः ङाकःताङ् आलःनाःथै ओउःकोः साथीखे आलःमाःत मुनाः। 42ओउःत खेःया पेतो धय्ती ल्युङ्ह्ती मुन नीङ्कोः प्रभु गलखा वाङ्नाः त नीङ्इ चीःतेःनीली। 43कुःसा बोङःओ चोर्लम् ‘द्याह्मयः वाङ्नै’ त कीम्कोः आपाइ चीःसा दोःनाः त खेःया ओउः कीम्कोः मान्ताइ ल्युङ्ह्ती मुती झ्यान्ते चोर्लम्कायः पोक्सा दोःताक्उलु। इत नीङ्इ चीःतेःनानी। 44ओउः कीम्कोः आपालो लेखा नीङ्मा ल्युङ्ह्ती मुसा खेःतेःइतो दोह् हायःती दाय्ह्सा ओउः मान्ताकोः चोः त तोओ नीङ्इ ताःमालो बेलाहाङः वाङ्लेःनाः।
45पेओ काम् जाङ्ह्सा नोकरी दोह् हायःनौ दाय्ह्सा। ओउःकोः मालीक्इ ओउःकायः सबै कीम्कोः नोकरी योसाकायःमा जेःगा ज्याला बोसाकायःमा ग्वम् बयःनाःथै। 46ओहाङःसैको ओउः मालीक्पाय् लोक्तो आल्आक्तीको द्यान्ह्ती पाय्ह्ती वाङ्तोक्हाङः ओउः नोकरीइपाय् काम् पेतो जाङ्ह्धै मुओ च्यवःनौ त खेःया ओउः नोकरीकः मालीक्पाय् आन झाक्ती म्रोनाः। 47ओउःकः म्रोती झ्यान्ते दोङ्सी दाय्ह्भनाङ् ओउः नोकरीकायः मालीक्इ लयःकोः कीम्कोः काम्लम् माल्ताल्लम् योसाकायःमा जुगाङ् ल्हीन्ह्तीलेः बयःनाःथै। 48खेःल ओउः नोकरीपाय् ल्हुङ् पेमालो स्याव्ती ‘लौ ङाकोः मालीक् रेन्ह्तोलेः पाय्ह्ल’ त म्हर्ती 49-50मालीक्कोः थोक्लम् जेःती तुङ्ती झ्यान्ते ङोतीलेः अरु नोकरीलम्कायः घान्लेःनौ ओहाङःसैको ओउः नोकरीइ तय्ह्सा चीःमालो दीन्हाङः ओउःकोः मालीक्पाय् पाय्ह्ती दाह्ती लयःकोः नोकरीइ पेमालो काम् जाङ्ह्धै मुओ च्यवःनौ 51ओउःत झ्यान्ते ओउः नोकरीकायः जोक्तो न्युम्ह्ताक्ती ल्होक्नौ ल्होक्आक्तीको ओउः नोकरी आन र्याःती लीह्तो स्याव्आनाः।
Currently Selected:
मत्ती 24: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
