लुका 9
9
1ओहाङःसैको येसुइ लयः छ्युङ्ह्ओ बारजनलम्कायः गोत्ती वानःती ओउःमयःकायः जीक्ओलम्कायः स्याक्ताक्सा ग्वम्मा लान्कायः गानाक्ती तोसा ग्वम्मा बयःआथास। 2ग्वम् बयःआक्तीको ओउःमयःकायः परमेस्वर्कोः पेओ राजीकोः कुरा थोल्ह्ती तोसाकायःमा जीक्ओलम्कायः स्याक्ताक्साकायःमा ल्होक्आथास। 3ल्होक्तोक् बेलाहाङः “लौ वाह्ती आल्तोक् बेलाहाङः दोह्मातेः लात्तेःचानी। दङ्ग थैलो जेःगालम् पैसामा दोह्मा नीस् कमीत्मा लात्ती आलःलाम्। 4गाव्खेलोकोः कीम्कोः मान्तालम्इ नीङ्कायः रोम्ती कीम्हाङः पोक्ती एनःसा दोःताक्तेःनै ओउः थाव्सै फेती आल्धाङ्माच्युक्कायः ओउः यातै कीम्हाङःलेः फेमाःत मुन। 5ओहाङःसैको गाव्खेलोकोः मान्तालम्इ नीङ्कायः रोम्तेःइली ओउःमयःकोः गाव् फेतोक्हाङः ‘इमयःइ पेतोलेः हायःनीली’ त छ्यानःसाकायः ओउः गाव्कोः फुत्साःपाय् नाङ्कोः दोम्सै काह्ती वाय्नु” त दाय्ह्ती येसुइ तोआथास। 6इत तोआक्तीको ओउः बारजन आल्ती गाव् गाव्गन ब्याह्ती वाह्ती गाःहाङः खेःयामा परमेस्वर्कोः पेओ समचार् तोती छ्यानःमाआकानी जीक्ओलम्कायः स्याक्ताक्माआकानी।
7येसुमा ओउःकुस् वाह्ओमयःइमा जाङ्ह्ओ कुरा सायःआक्तीको गालील अन्चल्कोः हेरोद् त तोओ राजाइ आन ग्याङ्ह्ती मुओ खेःतो। कोय् मान्तालम्खे “लौ तेह्काल सात्ओ युहनापाय् उह्ती च्योक्ती देङी सेलः मुलेःनाः” त दाय्ह्ती नोःइतो 8अरुखे “खेःल इ मान्तापाय् उय्ह्ले सीओ एलीया फेरीलेः थाती वाङ्ओआः” त दाय्ह्ती नोःआकाय्। अरुखे “ओउःपाय् यात्चाक् उय्ह्लेकोः परमेस्वर्कोः कुरा छ्यानःओमयः देङीलेः उह्ती च्योक्ती मुलेःनाः” त दाय्ह्ती नोःकाय्आकाय्। 9इत नोःकाय्ओ कुरा सायःती “लौ युहनाखेकायः ङाइ पाल्ती सात्आलाङः बा। ओउःत झ्यान्ते इ द्याह् वाङ्ओ परमेस्वर्कोः काम् जाङ्ह्ओ मान्तापाय् सुखेलो” त दाय्ह्ती हेरोद् राजा आन ग्याङ्ह्तीलेः दाय्ह्आ। “इ सुखेलो” त दाय्ह्ती येसुकायः हेरोद् राजाइ क्रुस्सा आन बोङःआकान्।
10ओहाङःसैको ओउः बारजन छ्युङ्ह्ती ल्होक्ओमयःपाय् येसुकःताङ् द्यान्ह्ती वाङ्आक्तीको ओउःमयः ब्याह्ती वाह्तोक्हाङः जाङ्ह्ओ कुरालेः सबै ल्हाक्ती तोआथै। ल्हाक्ती तोआक्तीको ओउः बारजनकायः येसुइ बेथ्सैदा त तोओ सहर् द्याङ्तो मुओ चीङःचाङःत खेःओहाङः आलःआथास। 11ओउःमयः चीङःचाङःत खेःओहाङः आल्इतो “येसुपाय् ओउःहाङः आल्ती मुओ” त अरुइ चीःती नोःकाय्ती नाःतो मान्तालम् ओउःकायः गुल्ह्ती हुम्ती वाङ्आकाय्। वाङ्आक्तीको ओउः हुम्ती वाङ्ओ मान्तालम्कायः येसुइ रोम्ती त्याक्ती परमेस्वर्कोः राजीकोः कुरा स्यान्ती तोमाआथास जीक्ओलम्कायः स्याक्ताक्माआथास। 12ओउःत हायःदा हायःदापाय् न्याम्मा याह्आथास। न्याम् याह्ती झ्यान्ते ओउः बारजनपाय् येसुकःताङ् वाङ्ती “इहाङःपाय् कीम् नाःमालो थाव् लेःआः बा। जेःगामा दोह्मा नाःल। इ सायःती हुम्ओ मान्तालम्कायः द्याङ्तो द्याङ्तो जेःगाकायःमा एनःसा थाव्कायःमा बोङःलाङ् ल्होक्पाःथास दा” त दाय्ह्ती येसुकायः तोनीतो 13“खेःल नीङ्इतेः जेःगा बयःनुसु दा” त दाय्ह्ती येसु त्याङ्आ। “गत हायःचाङःसु ङीकःहाङःपाय् पोङाकेरः लाङ्मा नीस्ज्योः र्युम्ह्ङाः ह मुनाः। इच्युक् नाःतो हुम्ओ मान्तालम्कायः ङीइ अरु जेःगा लेःती बयःसा खेःतो” त दाय्ह्ती ओउः बारजन तोआथै। 14ओउः हुम्ओ मान्तापाय् गोय्चोः झुङ्आले पास् हजार्च्युक् खेःइतो। ओहाङःसैको “लौ इ हुम्ओ मान्तालम्कायः फाक्ती फाक्तीलेः पचास् पचास्जनकोः दन्काल्हाङः तोङ्क तोङ्क च्युङःताक्नुसु” त दाय्ह्ती येसुइ ओउः बारजनकायः तोआथास। 15इत तोआक्तीको ओउः हुम्ओलम्कायः फाक्ती फाक्ती च्युङःताक्आथास। 16च्युङःताक्आक्तीको ओउः पोङाकेरः लाङ्मा नीस्ज्योः र्युम्ह्ङाःमा त्याक्ती लाङ्काताङ् त्याव्ती योती परमेस्वर्कायः “च्युता” त दाय्ह्ती तोआकान्। इत तोआक्तीको लाङ्मा ङाःमा फन्ह्ती ओउःकुस् वाह्ओमयःकायः ल्हाती दोल्कावःसाकायः बयःआकान्। 17ओउः लाङ्मा ङाःमा दोल्कावःआक्तीको सबै मान्तालम्इ कोस्तोलेः जेःआकानी। ओउःमयः जेःच्युक् जेःआक्तीको येसुकुस् वाह्ओमयःइ लाङ्कोःमा ङाःकोःमा वेओ य्हुन्ह्लम् सेक्ती हुम्ह्ती धाकर्हाङः काआकानी बारगोता धाकर्च्युक्कायः ब्लीङ्तोलेः काआकानी बा।
18ओहाङःसैको यात्दीन्हाङः येसु लयःकुस्लेः परमेस्वर्कायः तोतोक् बेलाहाङः ओउःकुस् वाह्ओमयः वाङ्आकाय्। ओउःकःताङ् वाङ्आक्तीको येसुइ याज्योः कुरा व्हत्आथास “लौ ङाकायःपाय् मान्तालम्इ गत नोःनै ती। ‘इपाय् सुलो’ त व्हत्तोक्हाङः गत गत त्याङ्नै” त दाय्ह्ती येसुइ ओउःकुस् वाह्ओमयःकायः व्हत्आकान् 19“यात्नीस्खेइ नाङ्कायः ‘बाप्तीस्मा बयःओ युहना लेःआः’ त नोःनै अरुखे ‘एलीया’ अरुखे ‘यात्चाक् उय्ह्ले सीओ परमेस्वर्कोः कुरा छ्यानःओमयः उह्ती च्योक्ओ लेःआः’ ओउःतलेः दाय्ह्ती नोःनै” त दाय्ह्ती त्याङ्इतो 20“नीङ्खेपाय् गततेः नोःतेःनै” त दाय्ह्ती येसुइ व्हत्आथास “नाङ्पाय् परमेस्वर्इ तोती गम्ओ ख्रीस् लेःतेःआः” त दाय्ह्ती पत्रुस् त्याङ्आ। 21“इ कुरापाय् सुकायःमा छ्यान्ह्तेःचानी दा” त दाय्ह्ती येसुइ तोआथास। 22“ङा मान्ताकोः चोः त तोओपाय् आन लीह्सीःओ गोरःसा खेःतो। यहुदीकोः ताङ्ह्ओ मान्तालम्मा धर्मा स्यान्ओलम्मा ताङ्ह्ओ पुरोहीत्लम्मा ओउःकः ल्हुङ् मल्ह्तो स्याव्ती झ्यान्ते ओउः मान्ताकोः चोःकायः सात्लेःनाःथै। ओउःकायःपाय् सात्सापाय् सात्नीतो सुम् दीन् पुत्आक्तीको ओउःपाय् उह्ती च्योक्लेःनाः” त दाय्ह्तीमा येसुइ लोनेः स्याव्सा कुरा स्यान्ती तोआथास।
23“लौ सुसुपाय् ङाकुस् वाह्सा झाक्नै ओउःलेः दीन्का दीन् लयःकोः कुरा म्हयःसती ङाकुस् वाह्सा थेङा लीह्सीःओ गोरःसामा सीसा सीमाच्युक्लेः ग्याती मुसा खेःतो। 24सुसुखे ङाकोः काम् जाङ्ह्सा थेङालेः ‘ङा झाक्ओ कुरा फेसामा ग्याङल ङा सीसामा ग्याङल’ त म्हर्चै ओउःलेः लोनेः सीती वाय्तो स्याव्चै। सुसुखे ङाकोः काम् जाङ्ह्सा थेङा सीबत्नाःताङः ओउःलेः लोनेः रौ जीङः दोःनै। 25माः रैस यात्चाक्इ ल्हाव्ह्दैबाङ्कोः सबै दोःसाकायः लयःकोः जीङः वाय्तोलेः स्याव्नाः त खेःया ओउः मान्तापाय् दोह् पेतो स्याव्चाः र आह्रे दोःओआः बा। 26सुसुखे ङाकः ङाइ तोओ कुराकः ब्लाय्क्चनै ओउःकः ओउः मान्ताकोः चोः त तोओ लोने वाङ्सा दीन्हाङः ब्लाय्क्लेःनाः। ओउः दीन्हाङःपाय् ओउः मान्ताकोः चोः त तोओपाय् अङ्ग थङ्गत थाती ओउःकोः आपालो ताङ्ह्तोलेः परमेस्वर्कोः ल्होक्ओमयःकुस् वाङ्लेःनाः। 27दोङ्सीलेः दाय्ह्भनाङ् यात्नीस् इहाङः सायःती मुओ मान्तालम्इ लयः सीमाःच्युक्हाङःलेः परमेस्वर्कोः राजीलेः च्यवःसा दोःनै” त दाय्ह्ती येसु स्यान्ती तोआथास।
28ओउःत तोआथास ओहाङःसैको यात् सात पुत्आक्तीको पत्रुस्मा याकुब् युहना नीस्पुःचाःमा ओउः सुम्चाक्कायः येसुइ लात्ती आलःती परमेस्वर्कायः तोसा थेङा स्यालुङ्कोः च्योःताङ् लनःआथास। 29ओउःहाङः लनःती दाह्आक्तीको परमेस्वर्कायः तोतोक् बेलाहाङः ओउःकोः रुप् ल्हेस्ती थाङ्ती ओउःकोः नाय् आन भाम् फीर्लीक्त छोओ खेःतो। 30येसु इत थाङ्ती स्याव्तोक्हाङः अरु उय्ह्लेकोः नीस्चाक् मोसामा एलीया त तोओनीस् येसुकुस् नोःकाय्लाङ् थाओ खेःतो। 31ओउः नीस्चाक् इतलेः अङ्ग थङ्गत थाआक्तीको येसुकायः लोनेः स्याव्सा खेःओ कुरा तोती “यरुसालेम्हाङः सीसा खेःतो” त दाय्ह्ओ नोःकाय्आकाय्। 32ओउःमयः नोःकाय्तोक्हाङः ङ्हासै पत्रुस् सुम् साथीचोङ् न्हय्ङ्त एनःती मुओ खेःइतो मोसा एलीयानीस् थाती नोःकाय्तोक् बेलाहाङः पत्रुस्मा ओउःकोः साथीनीस्मा च्योक्ती लेती ओउः ल्हेस्तो स्याव्ओ येसुमा ओउःकुस् थाती मुओ नीस्चाक् नोःकाय्ती मुओ च्यवःआकानी। 33ओहाङःसैको मोसा एलीयानीस्इ येसुकायः वेङ्सा बोङःओ बेलाहाङः “अ गुरुय ङी इहाङः वाङ्ती मुओपाय् गुच्युक् पेजेःतो। लौ ङीइ सुम्ज्योः झ्युह्रुक् कीम् जाङ्ह्नेःनेःनानाङ्स। यात्ज्योः कीम् नाङ्कायःलेः यात्ज्योः मोसाकायः यात्ज्योः एलीयाकायः” त दाय्ह्ती पत्रुस्इ बल चीःमाःत तोआथै। 34इत तोतोबालेलेः रेनःझेनःत मुस् वाङ्ती ओउःमयःकायः घमःआथास। मुस् घमःती वाङ्तोक्हाङः पत्रुस्मा ओउःकोः साथीनीस् आन रैआकाय्। 35ओहाङःसैको मुस्सै यात्ज्योः हाव्नयः वाङ्ती “लौ इपाय् ङाकोः आन राप्ओ लयःइ छ्युङ्ह्ओ चोः लेःआः बत्ताङः। ओउःइ तोओ कुरालेः पेतो सायःनु दा” त दाय्ह्ती दाय्ह्ओआः। इत दाय्ह्आक्तीको येसु लयःकुस्लेः मुओ त पत्रुस् साथीचोङ् च्यवःआकानी। 36ओउःमयःइ च्यवःओ सायःओ कुरापाय् येसुकोः सुम्चाक् वाह्ओमयःइ ओउः बेलाहाङःपाय् सुकायःमा ल्हाक्ती छ्यान्ह्नीली।
37ओहाङःसैको ओउःनम् दीन्कोः स्याङ्ह्लोहाङः येसुमा ओउः सुम्चाक् वाह्ओमयःमा स्यालुङ्सै ग्ल्युङ्ह्ती वाङ्तोक् बेलाहाङः नाःतो मान्तालम् येसुकायः क्रुस्लाङ् वाङ्आकाय्। 38ओउः हुम्ती वाङ्ओलम्कुस् यात्चाक्इ सोतो गोःती “अ गुरुय ङाकोः चोःकायः योनःतीलेः योउ दा। इजा ङाकोः यातैज्योः ल्हुङ्गोरे चोः लेःआः। 39बेला बेलाहाङः पाह्र् पाह्र्लेः ओउःकायः लान्इ ङायःलाङ् वाङ्ती आन हीह्ताक्ती कुयःताक्नाःथै। ओहाङःसैको ङायःतोक्हाङः ओउःकोः म्होतोङ्सै भोप् ग्ल्युङ्ह्लेःनाः ओउःकायः ओउः लान्इ आन जीक्ताक्ती फेसा ग्याल। 40नाङ्कुस् वाह्ओमयःकःताङ् ङा मेस्लेः काःहाल्लाङ् वाङ्ङोतो ओउःमयःइ इ लान्कायः ल्हेस्ती वाय्सा खाय्बाय्नीली” त दाय्ह्ती ओउः मान्ताइ येसुकायः तोआथै। 41“लौ नीङ् ङ्हाम्मालो ग्यामालो मान्तालम्पाय् नाङ्कुस् ङा गुच्युक् ज्याङःतोलेः स्यान्ती मुसा खेःङोतो। नीङ्कोः ङ्हाम्मालो ल्हुङ् योती गुच्युक्हाङः लीह्ती गोरःसा खेःनाङः र” त दाय्ह्ती येसु तोउतो ओउः आपाकायः “लौ नाङ्कोः चोःपाय् इताङ् वानःधाङ्अ” त दाय्ह्तीमा तोआकान्। 42ओउः चोः वानःतोक्हाङः ओउः लान्इ फेरीलेः चोःकायः ङायःती कुयःताक्ती तोस्थातो ओउः लान्कायः येसुइ जान्ती तोती ल्हेस्ताक्आथै। लान् ल्हेस्ती चोः स्याक्ताक्आक्तीको ओउः चोःपाय् येसुइ आपाकायः पाय्क्ती ल्होक्आकान्। 43ओहाङःसैको इत ताङ्ह्ओ परमेस्वर्कोः ग्वम्इ स्याक्ताक्ओ च्यवःती सबै योती मुओलम् आन ग्याङ्ह्आकाय्।
अरुलम्इ येसुकोः काम् च्यवःती ग्याङ्ह्ती मुतोक्हाङः येसुइ लयःकुस् वाह्ओमयःकायः तोती 44“लौ इ ङाइ तोओ नीङ्इ ल्हुङ्हाङः सेतीलेः गम्नु दा। ओउः मान्ताकोः चोः त तोओकायःपाय् स्याङ्ह्ससै पेमालो मान्तालम्कःताङ् ल्हालाङ् दाक्नानी” त दाय्ह्ती ओउःमयःकायः स्यान्थासतो 45ओउःइ स्यान्ओ कुराकोः माने पेतो तय्ह्आक्नीली ओउः कुराकोः मानेपाय् चीःताक्मासा थेङा ओउःमयःकायः छ्यान्ह्ल। ओउःमयःकायः छ्यान्ह्मालो खेःतो ओउःमयःइ “इ कुराकोः माने दोह्लो” त दाय्ह्ओ ओउःकुस् वाह्ओमयःइ रैती झ्यान्ते व्हत्सामा ग्याइली।
46ओहाङःसैको “लौ ङीलम्कःहाङः सुखेलो ताङ्ह्नाःतय्ही” त दाय्ह्ती येसुकुस् वाह्ओमयः नोःकाय्ती काय्काय्ती मुओ खेःतो। 47इत काय्काय्तोक् बेलाहाङः ओउःमयःकोः ल्हुङ्तुक्कोः कुरा चीःती झ्यान्ते येसुइ यात्चाक् हौलम्कायः वानःती लयःकोः कीस्हाङः चीङ्ताक्आकान् 48“लौ सुसुइ ङाकोः काम् जाङ्ह्साकायः इलो खेःओ मीओ हौलम्कायः रोम्ती त्याक्बत्नाःताङः ओउःइलेः ङाकायःमा रोम्नाःताङः। फेरी सुसुइ ङाकायः ङ्हाम्ती रोम्नाःताङः ओउःइलेः ङाकायः ल्होक्ओ परमेस्वर् आपाकायःमा रोम्नानी। नीङ्लम्कःहाङः सुसु ‘ङा सबैसै मीलेःनाङः’ त लयः ताःनाःस ओउःलेः अरुसै ताङ्ह्लेःनाः बा” त दाय्ह्ती येसु तोआथास। 49ओहाङःसैको “लौ गुरुय यात्चाक्इ नाङ्कोः मय्ङ् पेह्ती लान् ल्हेस्ताक्ती वाय्ओ मान्तालेः क्रुस्आलाङःसु। ओउःपाय् ङीकुस् वाह्मालो त झ्यान्ते ‘इत हायःलाम्’ त दाय्ह्ती त्याःती तोआलाङःसु” त दाय्ह्ती युहनाइ येसुकायः ल्हाक्ती तोथातो 50“ओउःकायः त्याःलाम्। सुसुलो नीङ्कोः बीरोत्पाय् खेःइली ओउःलेः नीङ्कुस् भीङ्तेःनै” त दाय्ह्ती येसु त्याङ्आ।
51ओउःतलेः येसुइ त्याङ्ती तोआथास ओहाङःसैको येसुकोः लयःकोः परमेस्वर् आपाकःताङ् द्यान्ह्ती पाय्ह्सा सीतोक् बेलाहाङः दाह्खेःआ। दाह्खेःतोक् बेलाहाङः येसुपाय् ल्हुङ् ग्रमःतलेः यरुसालेम्ताङ् आल्सा चीङ्आ। 52ओउःहाङः आल्तोक् बेलाहाङः यात्ज्योः समारीया गाव्हाङःलेः जेःगामा एनःसा थाव् बोङःसा थेङा येसुइ यात्नीस्चाक् ङ्हासै स्यालःती ल्होक्उतो 53ओउः समारीया गाव्कोः मान्तालम्इ येसुकायः “यरुसालेम्ताङ् आल्सा बोङःनौ” त चीःती ओउःकायः रोम्ती त्याक्सा जुगाङ् ग्याइली। 54गाव्कोः मान्तालम्इ येसुकायः त्याक्सा ग्याइली त च्यवःती “लौ प्रभुय लाङ्कासै ग्ल्युङ्ह्ओ म्हेः गोत्ती इ समारीयाकोः मान्तालम्कायः माक्ती वाय्ताक्पाःतय्ह्नी माःर” त दाय्ह्ती याकुब् युहना नीस् पुःचाःइ येसुकायः तोचुतो 55येसुइ ओउःनीस्कःताङ् ल्हेःती योती “खेःल ओउःपाय् जुगाङ् स्याव्ल” त दाय्ह्ती जान्तीलेः तोआथाच। 56इत तोआक्तीको अरु गाव्ताङ् आल्आकाय्।
57ओहाङःसैको ल्याम्हाङः वाह्ती आल्तोक् बेलाहाङः यात्चाक् येसुकःताङ् वाङ्ती “अ प्रभुय गाःहाङःलो नाङ् आल्तेःचाः ओहाङःलेः ङामा गुल्ह्ती वाङ्नाङः” त दाय्ह्ती येसुकायः तोआथै 58“लौ स्याल्खेकायः ल्हाङ्मा मुलेःनाः वाःखेकायःमा न्यास्सा छ्युत्मा मुनाः ङा मान्ताकोः चोः त तोओखेकायःमा लयःकोः एनःसा थाव्मा दोह्मा नाःङल बा” त दाय्ह्ती येसु त्याङ्आ। 59ओहाङःसैको अरु यात्चाक्कायः “लौ ङाकुस् वाह्अ” त दाय्ह्ती येसुइ तोथातो “अ प्रभु ङाकोः आपा सीती पाम्ह्आक्तीको ह ङा नाङ्कुस् वाङ्चाङः” त दाय्ह्ती ओउः मान्ता त्याङ्आ। 60“खेःल ओउः सीसा खेःओ मान्तालम्खेइ लयःकोः सीओलम्कायः पाम्ह्ती वाय्पानी नाङ्खे परमेस्वर्कोः राजीकोः पेओ कुरा थोल्ह्ती तोलाङ् आल्अ दा” त दाय्ह्ती येसुइ तोआथै। 61ओहाङःसैको अरु यात्चाक् येसुकःताङ् वाङ्ती “ङापाय् नाङ्कुस् वाह्साकायः ग्यालेःनाङः ङ्हासै ङाकोः कीम्कोः मान्तालम्कायः दाम्आक्पाङः। दाम्आक्तीको ङा नाङ्कुस् वाह्लेःनाङः” त दाय्ह्ती येसुकायः तोआकान् 62“खेःल सुसु मान्ताइ ङाकोः कुरा ग्याती जाङ्ह्आक्ती लोने जाङ्ह्सा फेचानी ओउः मान्ताकायःलेः परमेस्वर्इ लयःकोः राजीहाङः त्याक्थाल” त दाय्ह्ती येसु त्याङ्आ।
Currently Selected:
लुका 9: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
