लुका 8
8
1ओहाङःसैको लोनेः येसु सहर् सहर्गनमा गाव् गाव्गनमा तोमःती वाह्ती ओउःइ परमेस्वर्कोः राजीकोः पेओ कुरा स्यान्तीमा थोल्ह्ती तोलाङ् आल्आ। ओउःकुस्पाय् येसुकोः बार छ्युङ्ह्ओमयःमा यात्नीस् लान्इ ङायःआक्तीको स्याक्ओ मोमःचोःलम्मा आल्आकाय्। 2ओउः मोमःचोःकःहाङः यात्चाक् माग्दाला त तोओ मरीयम् खेःतो ओउःकायःपाय् येसुइ सात्गोता लान् ल्हेस्ओ खेःतो। 3अरु मोमःचोःपाय् योआना त तोओ ओउःकोः बुधा चुजा त तोओ हेरोद् राजाकोः दर्बाल्हाङः काम् जाङ्ह्ओ खेःतो। फेरी सुसानामा खेःतो। ओउःमयःइमा नाःतो अरु मोमःचोःलम्इमा येसु वाह्ती आल्ओ बेलाहाङः ओउःकायःमा ओउःकुस् वाह्ओमयःकायःमा जेःगा बयःती खाङ्ती दोह्ती स्यास्आथास।
4ओहाङःसैको येसु न्यास्तोक् बेलाहाङः सहर् सहर्सै नाःतो मान्तालम् हुम्लाङ् वाङ्आकाय्। ओउः हुम्ती मुओलम्कायः येसुइ क्लोन्कोःदीङ् त नोःती वीनःराय् ल्हाक्धार्नालेः स्यान्आथास। 5“लौ सायःती मुन दा। यात्चाक् बीया चोया वार्साकायः चीङ्ती राङ्ताङ् आल्आ। राङ्ताङ् आल्ती ओहाङः वार्तोक्हाङः कोय् बीया ल्याम्हाङः दीह्आल्आ। ल्याम्हाङः दीह्आक्तीको ओउः बीया चोयाकायः मान्तालम्इमा दोम्इ झोतीलेः वाय्आकानी वाःलम्इमा दाह्ती वाङ्ती सेक्ती माक्जेःआकानी। 6अरु बीया चोयाखे बाङ् ह्र्युङ्हाङः दीह्आल्आ। ओहाङःसैको साःपाय् नाःतो नाःल त झ्यान्ते दुङ्आक्तीको साःकायः न्याम्इ सोत्ताक्ओ बेलाहाङः मात् झ्योम्ह्तीलेः सीजेःआ। 7फेरी अरु बीया चोयाखे चुःराङ् बन्राङ्हाङः दीह्आल्आ। ओउःखे बन्कुस् ब्रक्त लन्ह्ती यार्ती सीआ। 8अरु बीया चोयाखे पेओ साःहाङः दीह्ती दीह्आक्तीको दुङ्ती न्ह्योरःती न्ह्योरःती लन्ह्ती आन सायःनाः। यात् बोत्सै तीन् घोगा वाङ्आ। लौ इ ङाइ तोओ पेतो चीःतीलेः सायःनु दा” त दाय्ह्ती येसुइ तोआथास।
9ओउःत तोआक्तीको “लौ इ वीनःराय्कोः माने दोह्लो” त दाय्ह्ती व्हत्वाङ्इतो 10“नीङ् परमेस्वर्कोः कुरा ग्याओलम्खेकायः ओउःकोः राजीकोः चीःआक्मालो कुरा पेतो चीःसा दोःतेःनै। अरु मान्तालम्खे वीनःराय् झुङ्आले सायःसा खाय्नानी माने चीःसा दोःइली। इतलेः ओउःमयःइ परमेस्वर्कोः राजीकोः कुरापाय् योतीमा च्यवःसा खाय्नीली सायःतीमा चीःसा खाय्नीली। 11लौ ओउः वीनःराय्कोः माने इलेःआः। 12ओउः बीया चोया त तोओखे परमेस्वर्इ बयःओ पेओ कुरालो लेखा लेःआः। ओहाङःसैको कोय् मान्तालम्खे परमेस्वर्कोः कुरा सायःनानी सायःआक्तीको सैतान् त तोओ वाङ्ती ओउः सायःओलम्कोः ल्हुङ्तुक्सै ओउः पेओ कुरा सेक्ती आलःनौ। ओउःत झ्यान्ते ओउः मान्तालम्इ पेतो ङ्हाम्माःत रौ जीङः दोःइली। इ मान्तालम्पाय् ल्याम्कोः साःहाङः दीह्ओ बीया चोयालो लेखालेः मुनै। 13ओहाङःसैको अरु मान्तालम्खेइ परमेस्वर्कोः कुरा म्रोतीलेः ल्हुङ्हाङः ग्याइतो लोने लीह्सीःओ बेला वाङ्नाः त खेःया ओउः कुरा फेनानी। इ मान्तालम्पाय् रुत् ज्युम्ह्तो आलःमालो बाङ् ह्र्युङ्हाङः दीह्ओ बीया चोयालो लेखा मुलेःनै। 14ओहाङःसैको अरु मान्तालम्खेइ परमेस्वर्कोः कुरा सायःती ओउःकोः काम् जाङ्ह्आक्नीतो लोने लयः झाक्ओ काम्कायः रुःओ ल्हुङ् वाङ्नाः पैसा क्युसा बोङःओ ल्हुङ् वाङ्नाः लीङ्हायःओ ल्हुङ् वाङ्नाः त खेःयाकायः परमेस्वर्कोः काम् जाङ्ह्सा लोने ग्याइली। इ मान्तालम्पाय् यार्ती वाय्ओ सायःसा खाय्मालो चुःकुस् दुङ्ओ बीयालो लेखा मुलेःनै। 15अरु मान्तालम्खेइ परमेस्वर्कोः कुरा सायःती पेओ ल्हुङ्हाङः सेती ङ्हाम्आक्तीको ओउःकोः काम् गुह्र्माःत ब्याव्तीलेः जाङ्ह्नानी। इ मान्तालम्पाय् ओउः पेओ साःहाङः दीह्ओ बीया चोयालो लेखा मुलेःनै” त दाय्ह्ती येसुइ छ्यानःआथास।
16“ओहाङःसैको बत्ती हवःआक्तीको सुइमा भान्दाइ कोमःती गम्नीली खात्माल्ग नुस्नीली। हवःआक्तीको कीम्हाङः पोक्ओलम्कायः थोङ्ताक्साकायः बत्तीपाय् यास्ओ थाव्हाङः गम्नानी। इतलेः परमेस्वर्कोः पेओ कुरा सबैकायः चीःताक्साकायः छ्यानःसा खेःतो। 17दोह् दोह्लो तेन्छ्याङ् छ्यान्ह्आक्मालो मुनाः ओउःलेः लोनेः छ्यानःतो स्याव्नाः। दोह् दोह् कुरालो मान्तालम्कायः तेन्छ्याङ् नुस्तीलेः मुनाः ओउःमा लोनेः सबैकायः छ्यानःतोलेः स्याव्नाः। 18लौ परमेस्वर्कोः कुरा पेतो ङ्हाम्तीलेः सायःनु दा। सुसुखे इ कुरा ल्हुङ्हाङः सेती गम्ती नाःतोपाय् नाःलेःनै ओउःकायःलेः न्हाङ्तोलेः बयःनाःथास। सुसुखेकुस् नाःतो नाःमाःत मुलेःनै ओउःकोः दोह् दोह् कुरापाय् ‘इच्युक्लेः नाःआलाङः’ त म्हर्ती लयःकायः ताःचाःइसी ओउःलेः सबै लाती आल्नाः” त दाय्ह्ती येसुइ तोआथास।
19ओहाङःसैको येसुकोः आमामा हौचोङ्लम्मा ओउःकः वाङ्सा बोङःनीतो नाःतो मान्तालम् हुम्ती मुओ त झ्यान्ते ओउःकःताङ् द्याङ्तो दाह्सा खाय्नीली। 20येसुकःताङ् द्याङ्तो दाह्सा खाय्माःत झ्यान्ते अरुइ “लौ नाङ्कोः आमाचोङ् नाङ्कायः क्रुस्साकायः बाहीरहाङः दाह्ती मुनै” त दाय्ह्ती येसुकायः छ्यानःथातो 21“लौ ङाकोः आमाचोङ्मा हौचोङ्मा सुसुलो दाय्ह्सा सुसुइ परमेस्वर्इ बयःओ पेओ कुरा ङ्हाम्ती जाङ्ह्नानी ओउःमयः ङाकोः आमाचोङ् हौचोङ्लो लेखा मुनै” त दाय्ह्ती येसु त्याङ्आ।
22ओहाङःसैको यात् दीन्हाङः येसुमा ओउःकुस् वाह्ओमयःमा गालील त तोओ ताङ्ह्ओ दुम्हान्ताङ् आल्ती दोङ्गाहाङः लन्ह्आकाय्। दोङ्गाहाङः लन्ह्आक्तीको “लौ तीःकोः उःसै त्यात्लाङ् आल्इ” त दाय्ह्ती येसुइ ओउःकुस् वाह्ओमयःकायः तोआथास। 23ओउःत तोआक्तीको ओउःमयः आल्ती वाह्तोक्हाङः येसु एनःबुस्ती झ्यान्ते दोङ्गाहाङः एनःलेःआ। ओहाङःसैको जोक्तो गाय्ध वाङ्ती मारुःइ तीः आन ल्यङःकर्ताक्ती दोङ्गाकायः ब्लीङ्ताक्खेःआथै। 24दोङ्गाकायःपाय् तीः पोक्ती ज्युप्खेःओ बेलाहाङः येसुकुस् वाह्ओमयः आन रैती ओउःकायः म्हाङ्ती “अ गुरुय ङीजा दोङ्गा ज्युप्ती सीखेःनाःतय्ही बा” त दाय्ह्ती तोथातो ती येसु म्र्याती च्योक्ती मारुःकायःमा ल्यङःकर्ओ तीःकायःमा जान्तीलेः तोआकान्। तोआक्तीको मारुःमा दीःजेःआ दुम्हान्मा एवेङ्त स्याव्आ। 25दुम्हान्पाय् जुगाङ् एवेङ्त स्याव्आक्तीको “दोह् हायःतीतेः ङाकायः ङ्हाम्तेःनाङ्सल” त दाय्ह्ती येसुइ दोङ्गाहाङः मुओलम्कायः तोआथास ओउःमयः ग्याङ्ह्ती रैती मुइतो “लौ इजा गत खेःओ मान्तालो ती। दोङ्सीलेः ओउःइ गानाक्ती तोओ कुरालेः मारुःलम्कायःमा तीःलम्कायःमा ग्याताक्नौ बा” त दाय्ह्ती येसुकुस् वाह्ओमयः नोःकाय्आकाय्।
26ओहाङःसैको गालील दुम्हान्कोः उःसै आल्ती गेरासेने त तोओ देस्ताङ् दाह्ती वाङ्आकाय्। 27ओउःहाङः दाह्ती वाङ्ती दोङ्गासै ग्ल्युङ्ह्आक्तीको यात्चाक् लान्इ ङायःओ सहर्कोः मान्ताइ येसुकायः क्रुस्लाङ् वाङ्आ। लान्इ ङायःआक्तीको ओउः मान्तापाय् लयःकोः सहर्कायः फेती ज्याङःतोहाङःसै कीम्हाङः एनःमाःत तेस्राङ्हाङः सोह्लेः ब्याह्तीमा एनःतीमा वाह्ओ खेःतो। 28ओहाङःसैको येसुकायः च्यवःआक्तीको ओउः मान्ता येसुकःताङ् बाःती स्यवलाङ् वाङ्ती “अ नाङ् सबैसै ताङ्ह्ओ परमेस्वर्कोः चोःतेःआः ङाकायःतेः दोह् हायःलाङ् वाङ्ओतेःआः। लौ ङाकायःतेः न्युम्ह्ताक्तेःचाःची दा” त सोतोलेः दाय्ह्ती येसुकः आन तेती तोआकान् 29दोह् हायःती दाय्ह्सा येसुइ “इकायः ल्हेस्ती फेउ” त दाय्ह्ती लान्कायः गानाक्ती तोआकान्। ओउः मान्ताकायःपाय् लान्इ नाःतोलेः आन ब्रःताक्झुङ्आथै। ब्रःओ बेलाहाङः अरुलम्इ ओउःकायः चुम्ती आन साङ्लाइ पानःती गम्सा बोङःनीतो ओउः मान्ताइ साङ्ला तेत्ती वाय्आकान्। वाय्आक्तीको ओउःकायः लान्इ याक्गार्सीःमालो राङ्हाङः रुनःआथै। 30ओहाङःसैको ओउः ब्रःओ मान्ताकायः “नाङ् गतलोतेः मय्ङ्तेःनाः” त दाय्ह्ती येसुइ व्हत्थातो “ङाकायः पल्तन् त मय्ङ्आताङः” त दाय्ह्ती ओउः मान्ता त्याङ्आ। ओउःकायः ङायःओ लान्लम्पाय् पल्तन्च्युक् नाःतो खेःइतो। 31ओहाङःसैको “लौ ङीकायः कामःनालाताङ् ल्होक्तेःचाःताङी दा” त दाय्ह्ती लान्लम्इ येसुकायः तेती तोआथै। 32ओउःत तेती तोतोक्हाङः ओउःमयः मुओ ध्याप्हाङः नाःतो प्याक् ह्राम्ती मुओ खेःतो ओउःत झ्यान्ते “लौ ङीकायः उनोको प्याक्लम्कायः ङायःलाङ् ल्होक्ताङी” त दाय्ह्ती ओउः लान्लम्पाय् तेआकाय्। “लौ उया ओउःकायः ङायःलाङ् आल्न” त दाय्ह्ती येसुइ ग्याती तोथासतो 33तोआक्तीको लान्लम्इ मान्ताकायः फेती ओउः ह्राम्ती मुओ प्याक्लम्कायः ङायःआकानी। ङायःआक्तीको प्याक्लम्पाय् सबै ब्रःती वारताङ् तन्ती आल्ती तोन्ती तोन्ती सबै ताङ्ह्ओ दुम्हान्कोः तीःहाङः ज्युप्ती ज्युप्तीलेः सीजेःआकाय्। 34ओहाङःसैको प्याक्लम्पाय् सबै तीःहाङः ज्युप्ती सीओ च्यवःती ओउः प्याक्कायः ह्रामःओ मान्तालम् क्रव्ती ओउःमयःइ मेस्लो च्यवःओ कुरालेः सहर्हाङःमा गाव् गाव्हाङःमा सबैकायः ल्हाक्ती छ्यानःआकानी। 35ओउःमयःइ छ्यानःओ कुरा सायःती ओहाङःकोः मान्तालम् येसुकःताङ् योलाङ् वाङ्आकाय्। वाङ्आक्तीको ओउः लान्लम्इ ङ्हा फेओ मान्तापाय् येसुकोः दोम्हाङः च्युङःती द्याह् सोह् खेःमाःत नाय् लावओमा सेलः मुओमा च्यवःआकानी। इत च्यवःतीलेः ओउः योलाङ् वाङ्ओलम्पाय् रैआकाय्। 36ओहाङःसैको ओउःमयःकायः ओउः अरु येसुइ स्याक्ताक्ओ काम् च्यवःओ मान्तालम्इपाय् ओउः स्याक्ताक्ओ कुरा सबै ल्हाक्ती छ्यानःआकानी। 37इत छ्यानःआक्तीको ओउः गेरासेने देस्कोः मान्तालम्पाय् आन रैती येसुकःताङ् वाङ्ती “ङीकःसै आल्अ दा” त दाय्ह्ती ओउःकायः तेती तोआकानी। ओउःमयःइ “आल्अ” त दाय्ह्ती तोती झ्यान्ते येसु दोङ्गाहाङः लन्ह्ती द्यान्ह्सा बोङःउतो ती 38लन्ह्तोक् बेलाहाङः “लौ ङामा नाङ्कुस् वाह्पाङः” त दाय्ह्ती ओउः लान्इ ङ्हा फेओ मान्ता येसुकः तेलाङ् वाङ्तो 39“खेःल नाङ्कोः कीम्ताङ् पाय्ह्ती ‘लौ परमेस्वर्इपाय् इत इत कायःती आन पेतो जाङ्ह्आताङः बा’ त नीङ्कोः मान्तालम्कायः ल्हाक्ती छ्यानःउ दा” त दाय्ह्ती येसुइ तोआथै। ओहाङःसैको ओउः मान्ता पाय्ह्ती “लौ येसुइ इत पेतो हायःआताङः बा” त दाय्ह्ती ओउःइ सबै सहर्हाङः ब्याह्ती वाह्ती ओउः कुरा थोल्ह्ती तोआकान्।
40ओउः लान्इ फेओ मान्ताखेइ ओउः कुरा ओउःतलेः थोल्ह्ती तोआकान् ओहाङःसैको येसुखे तीःकोः उःसै त्यात्ती पाय्ह्ती वाङ्ती ओहाङः दाह्ती वाङ्तोक्हाङः नाःतो मान्तालम्इ येसुकायः रोम्सा थेङा हुम्ती ल्युङ्ह्ती मुओ खेःइतो। 41-42ओहाङःसैको यात्चाक् याय्रुस् त तोओ थनःओ कीम्कोः ताङ्ह्ओ मान्ता वाङ्ती येसुकायः बाःती स्यवआथै। ओउःकोः यातैज्याङ् ह बार बर्स स्याव्ओ चोःद्याङ् जोक्तोलेः जीक्ती सीखेःओ खेःतो ओउःत झ्यान्ते स्यवतोक् बेलाहाङः “लौ ङाकोः कीम्ताङ् चोःद्याङ्कायः स्याक्ताक्लाङ् वाङ्अ दै” त दाय्ह्ती येसुकः काःहाल्ती तेआ। याय्रुस् इत तेओ सायःती ग्याती येसुपाय् ओउःकुस् पाय्ह्आकाय्। ओउःमयः पाय्ह्ती आल्तोक्हाङः नाःतो मान्तालम्इ हुम्लाङ् वाङ्ती येसुकायः आन न्हेङःआथै। 43ओउःमयःकःगन यात्चाक् वयः वयःओ पीर्इ ङायःओ मोमःचोःमा वाङ्आ। ओउः मोमःचोःपाय् बार बर्सच्युक्कायः आङ्रयःबाङ् जीक्ओ खेःतो ओउःकायः सुइमा स्याक्ताक्सा खाय्नीली। 44ओहाङःसैको ओउः मोमःचोःपाय् येसुकोः काह्सै वाङ्ती ओउःकोः नाय्कोः च्योनःतेङ् दीन्ह्आकान् येसुकोः नाय् दीन्ह्माकादे ओउः मोमःचोःकोः वयःपाय् थुम्ह्माकादे। 45ओउःकायः दीन्ह्तोक्हाङः “सुइ ङाकायः दीन्ह्ओ ती” त दाय्ह्ती येसुइ व्हत्थासतो सबै हुम्ओलम्इ “ङाइपाय् खेःल बा ङाइपाय् खेःल” त त्याङ्आकाय् “लौ गुरुय इच्युक् नाःतो मान्तालम्इ सबैइ नाङ्कायः न्हेङःती दीन्ह्तेःनाः रैस” त दाय्ह्ती पत्रुस्मा त्याङ्तो 46“खेःल सुलाङःइ दीन्ह्आताङः बा ङाकोः स्याक्ताक्सा ग्वम् ज्याल्आ त सायःआलाङःस” त दाय्ह्ती येसु दाय्ह्आ। 47ओउःत दाय्ह्आक्तीको “ङाकायः तय्ह्आताङः” दाय्ह्ती म्हर्ती ओउः मोमःचोःपाय् रैती रीङ्ह्ती येसुकःताङ् बाःती स्यवलाङ् वाङ्आ। वाङ्आक्तीको सबैकोः मीक्हाङःलेः ओउःकोः पीर्कोः कुरामा स्याक्ताक्ओ कुरामा घोती छ्यान्ह्आथै। 48ओउः मोमःचोःइ सबै घोती छ्यान्ह्आक्तीको “लौ उया हौद्याङ् ङाकायःतेः पेतोलेः ङ्हाम्तेःआची रैस ओउःत झ्यान्ते नाङ् सेलःलेः स्याव्तेःनाः। ल्हुङ् धोमाय्तोलेः पाय्ह्अ” त दाय्ह्ती येसुइ तोआथै।
49ओहाङःसैको ओउःत तोतोक् बेलाहाङःपाय् यात्चाक् याय्रुस्कोः कीम्सै ल्होक्ओ मान्ता ओउःकायः तोलाङ् दाह्आ “लौ नाङ्कोः चोःद्याङ्जा सीजेःआ बा। इ गुरुकायः द्याह् वानःसा परल” त दाय्ह्ती याय्रुस्कायः तोथातो ती 50ओउःमयःइ तोओ कुरा येसुइ सायःती “लौ ल्हुङ् र्याङःतेःचाः। ङाकायः ङ्हाम्तीलेः वाह्अ ओउःत खेःया नाङ्कोः चोःद्याङ् सेलः स्याव्लेःनाः” त दाय्ह्ती याय्रुस्कायः तोआथै। 51इत तोआक्तीको आल्ती याय्रुस्कोः कीम्हाङः दाह्ती येसुइ ओउःकुस् कीम् पोक्साकायः सुकायःमा ताक्उलु ओउः जीक्ओ चोःकोः आमा आपानीस्मा पत्रुस् युहना याकुब् इ सुम्चाक्कायःमा ह ओउःकुस् पोक्सा ताक्आकान्। 52ओहाङःसैको कीम्हाङःपाय् सबै ओउः चोःकायः क्रेस्ती र्याःती मुओ खेःतो। इत च्यवःती “लौ ताः ताः र्याःतेःनल। ओउःपाय् सीलेःल एनःतीलेः मुओ ह” त दाय्ह्ती तोथासतो 53ओउः र्याःती मुओलम् “इइपाय् ‘चोःपाय् जुगाङ् सीओ लेःआः’ त चीःउलु” त दाय्ह्ती म्हर्ती ओउःमयःखे येसुकायः ङीःती गाक्आथै। 54येसुखेपाय् ओउः मोमःचोःकःताङ् वाङ्ती ओउःकोः क्रुत् चुम्ती “लौ हौय च्योक्अ” त दाय्ह्ती तोथातो 55ओउःत तोतोक्हाङः ओउः मोमःचोःपाय् उह्ती त्याती च्योक्लेःआ। ओउः मोमःचोः च्योक्आक्तीको “लौ इ नाङ्कोः चोःद्याङ्कायः जेःगा बयःजु दा” त दाय्ह्ती येसुइ ओउःकोः आमा आपानीस्कायः तोआकान्। 56इत च्यवःती ओउः आमा आपानीस् आन ग्याङ्ह्ओलेः खेःचतो “इ ङाइ स्याक्ताक्ओ कुरापाय् सुकायःमा छ्यान्ह्लाम्” त दाय्ह्ती येसुइ ओउःनीस्कायः तोआथाच।
Currently Selected:
लुका 8: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
