लुका 7
7
1ओउःतलेः येसुइ स्यान्ती तोआथास ओहाङःसैको आल्ती कफर्नाहुम् त तोओ सहर्ताङ् दाह्ती वाङ्आकाय्। 2-3ओउःहाङः दाह्ती वाङ्तोक्हाङः यात्चाक् रोमी देस्कोः सीपाही हाकीम् मुओ खेःतो। ओउः हाकीम्कोः काम् जाङ्ह्ओ नोकरी आन जीक्ती सीखेःओ खेःतो। ओहाङःसैको “येसुइ जीक्ओलम्कायः स्याक्ताक्नौ” त दाय्ह्ओ कुरा सायःआक्तीको ओउः हाकीम्इ लयःकोः नोकरीकायः आन राप्ती झ्यान्ते येसुकःताङ् यात्नीस्चाक् यहुदीलम्कोः ताङ्ह्ओ मान्तालम् ल्होक्आकान्। “ङाकोः नोकरीकायः स्याक्ताक्लाङ् वाङ्अ” त दाय्ह्ओ काःहाल्ती तेसाकायः ल्होक्आकान्। 4ल्होक्आक्तीको ओउःमयः येसुकःताङ् वाङ्ती ओउःकः आन युङ्तीलेः काःहाल्आथै। “ओउः नोकरीकोः मालीक्पाय् आन पेओ मान्ता लेःआः बा। 5ओउःइ ङीकोः यहुदीया जात्लम्कायः आन राप्नाःताङी ङीकायः थनःओ कीम्मा जाङ्ह्आबत्ताङी। ओउःत झ्यान्ते ओउःकोः नोकरी स्याक्ताक्सा पेलेःनाः” त दाय्ह्ती येसुकायः काःहाल्ती तोआथै। 6इत तोआक्तीको येसु ओउः हाकीम्इ ल्होक्ओ मान्तालम्कुस् आल्ती ओउःकोः कीम् द्याङ्तो दाह्खेःतोक् बेलाहाङः ओउः हाकीम्इपाय् लयःकोः साथीलम् येसुकःताङ् ल्होक्आकान्। ओउःमयः येसुकायः क्रुस्ती हाकीम्इ ल्होक्ओ कुरा नोःती “लौ प्रभुय नाङ्कायः इलो लेखा लीह्सीःओ बयःसा खेःहाङ्ल। ङा इच्युक् मीचोःओ मान्ताकायः क्रुस्सा थेङा ङाकोः कीम्ताङ् वाङ्सामा खेःहाङ्ल नाङ्च्युक् ताङ्ह्ओ मान्ताकःताङ् ‘ङा वाङ्सा ज्योल’ तमा ताःआलाङःस। 7इहाङः वाङ्मामाःत लोक्तोसै गानाक्ती तोचाक्ची दै ओहाङःसैको ङाकोः नोकरी स्याक्लेःनाः। 8ङासै ताङ्ह्ओ आधीकारीइ गानाक्ती तोओ ङाखेइ जाङ्ह्सालेः खेःनाङः ङाकोः सीपाहीलम्खेइमा ङाइ गानाक्ती तोओ कुरा जाङ्ह्सा खेःनै बा। यात्चाक् सीपाहीकायः ‘आल्अ’ त दाय्ह्ती तोओ कुस्ब्रक्त ओउःपाय् आल्लेःनाः अरुकायः ‘वाङ्अ’ त दाय्ह्ती तोओ कुस्ब्रक्त ओउःपाय् वाङ्लेःनाः। ङाकोः यात्चाक् नोकरीकायः ‘इत हायःउ’ त दाय्ह्ती तोआक्तीको ओउःइपाय् ओउःतलेः हायःनौ। इतलेः नाङ्इ तोआक्तीको ङाकोः नोकरी स्याक्लेःनाः बा” त दाय्ह्ती तोती ओउः हाकीम्इ येसुकायः कुरा ल्होक्आथै। 9ओउः हाकीम्इ तोओ कुरापाय् येसुइ ग्याङ्ह्तीलेः सायःआकान्। “ओउः रोमी देस्कोः मान्ताइ ङाकायः आन ङ्हाम्आताङः बा। ओउःच्युक् ङ्हाम्ओ मान्तापाय् ङाइ गाःहाङः खेःयामा क्रुस्धाङ्ङल। माः रैस इस्राएल् देस्कोः यहुदी मान्तालम्कःगनमा गलमा क्रुस्धाङ्ङल” त दाय्ह्ती येसुइ ओउःकुस् वाह्ओमयःकःताङ् ल्हेःती तोआथास। 10ओहाङःसैको ओउः हाकीम्इ ल्होक्ओ मान्तालम् कीम्ताङ् द्यान्ह्ती पाय्ह्आक्तीको ओउः जीक्ती मुओ नोकरी जुगाङ् सेलः स्याव्ओ च्यवःआकानी।
11ओउः जीक्ओ मान्तापाय् सेलः स्याव्आ ओहाङःसैको लोनेकोः दीन्हाङः येसुमा ओउःकुस् वाह्ओमयःमा नायन् त तोओ सहर्ताङ् आल्आकाय्। ओउःमयःकुस् नाःतो अरु हुम्ओ मान्तालम्मा आल्आकाय्। 12आल्ती सहर्कोः धोकाहाङः दाह्तोक्हाङः सहर्सै यात्चाक् तोहालेः सीओ गोय्चोःकायः लात्ती वानःओ खेःतो। ओउः सीओ मान्ताकोः आमा ह मुओ खेःतो आपामा पुःचोङ् हौचोङ्मा नाःआक्ल। ओहाङःसैको ओउः सीओ मान्ताकायः लात्ती वानःतोक्हाङः आमाकुस् सहर्कोः मान्तालम् नाःतो रुय्क्ती गुल्ह्ती क्रेस्लाङ् वाङ्ओ खेःइतो। 13ओहाङःसैको ओउः सीओ चोःकोः आमाकायः येसुइ च्यवःती योनःआथै। “ताः र्याःल” त दाय्ह्ती येसुपाय् ओउः सीओ मान्ताकोः म्हाङ्कःताङ् वाङ्आ। 14येसु वाङ्ती ओउः सीओ मान्ताकायः लात्ओ सहसीङः दीन्ह्ती दीन्ह्तोक्हाङः ओउःकायः लात्ओ मान्तालम् न्यास्आकाय्। ओउःमयः न्यास्आक्तीको “लौ हौय ‘च्योक्अ दा’ त तोलेःनेःनाङ्” त दाय्ह्ती येसुइ तोथातो 15ओउःत तोओ कुस्ब्रक्तलेः ओउः सीओ मान्तापाय् लुपुक्त च्योक्माआ नोःसामा बोङःआकान्। ओउःत हायःआक्तीको ओउः चोःपाय् येसुइ आमाकायः पाय्क्आकान्। 16ओहाङःसैको ओउः ङ्हा सीओ मान्तापाय् च्योक्ओ लेःआः त च्यवःती एत च्यवःओ मान्तालम्इ आन रैती “दोङ्सीलेः ङीकःहाङः यात्चाक् आन ताङ्ह्ओ परमेस्वर्कोः कुरा छ्यानःओ मान्ता दाह्आबत्आतय्ही बा” त दाय्ह्तीमा “परमेस्वर्पाय् लयःकोः मान्तालम्कायः दल्ताक्लाङ् वाङ्ओ लेःआः बा” त दाय्ह्तीमा परमेस्वर्कायः लुङ्तीमा ताङ्ह्ताक्तीमा तोआकानी। 17ओहाङःसैको ओउःत दाय्ह्ती नोःओ कुरा सबै यहुदीया देस्हाङः फानःतीलेः छ्यानःओ खेःतो।
18ओउःतोक् बेलाहाङःपाय् बाप्तीस्मा जाङ्ह्ओ युहना झ्याल्खानहाङः थुनती गम्ओ खेःतो। ओहाङःसैको “येसुइ आन ग्याङ्ह्सीःओ काम्लम् जाङ्ह्लेःनौ” त दाय्ह्ती ओउःकुस् वाह्ओलम्इ युहनाकायः ल्हाक्ती तोआथै। 19ओउःत तोओ सायःआक्तीको ओउःइ नीस्चाक् लयःकुस् मुओलम् येसुकुस् नोःसाकायः ल्होक्आकान्। “लौ ‘ओउः परमेस्वर्इ तोती गम्ओ वाङ्सा खेःचाक्ओपाय् नाङ्लेःतेः खेःतेःनाःया खेःतेःलया। खेःतेःल त खेःयाकायः ङीइ अरुकायः ल्युङ्ह्ती योती मुसा खेःनाङी यादो’ त दाय्ह्ती येसुकायः व्हत्लाङ् आल्ज दा” त दाय्ह्ती ओउःनीस्कायः तोती ल्होक्आकान्। 20ओउःनीस्पाय् येसुकःहाङः दाह्ती वाङ्आक्तीको “लौ ‘परमेस्वर्इ तोती गम्ओ वाङ्सा खेःचाक्ओ नाङ्लेःतेः खेःतेःनाःया खेःतेःलया। खेःतेःल त खेःयाकायः ङीइ अरुकायः ल्युङ्ह्ती योसा खेःनाङी यादो’ त दाय्ह्ती व्हत्साकायः बाप्तीस्मा जाङ्ह्ओ युहनाइ ल्होक्आताङःच” त दाय्ह्ती ओउःनीस्इ येसुकायः तोआकाचु। 21ओहाङःसैको ओउःनीस् व्हत्लाङ् वाङ्तोक् बेलाहाङःपाय् येसुइ नाःतो जीक्ओ मान्तालम्कायःमा लान्इ ङायःओलम्कायःमा मीक् लोक्ओलम्कायःमा स्याक्ताक्ओ खेःतो। 22ओउःत झ्यान्ते “लौ युहनाकःताङ् द्यान्ह्ती पाय्ह्ज दा। ओउःकायःपाय् ङाइ जाङ्ह्ओ काम्लम्कोः दोह् दोह्लो नीङ्जीइ च्यवःतेःआकाजु सायःतेःआकाजु ओउःलेः युहनाकायः ल्हाक्ती छ्यानःलाङ् आल्ज दा। मीक्इ च्यवःआक्मालो मान्तालम्इपाय् द्याह् च्यवःसा खाय्नानी क्ल्योय्बाङ् मान्तालम्इमा द्याह् पेतो वाह्सा खाय्लेःनानी। कोह्र् चाओलम् द्याह् सेलः स्याव्नै नो लोक्ओलम्इ पेतो सायःसा खाय्नानी जुगाङ् सीओलम्मा उह्ती च्योक्लेःनै ह्र्यात्लम्कायः परमेस्वर्कोः पेओ कुरापाय् तोओलेः मुनाः। 23लौ उया सुसुइपाय् गलकायःमा ङाकायः ल्हुङ् क्रोङ्तोलेः ङ्हाम्नानी ओउःपाय् चोङाय्तोलेः स्याव्नै” त दाय्ह्ती येसुइ त्याङ्ती तोआथाच। 24ओहाङःसैको येसु त्याङ्आक्तीको ओउः नीस्चाक् युहनाकुस् वाह्ओमयः द्यान्ह्ती पाय्ह्आक्तीको ओउःहाङः हुम्ती मुओ मान्तालम्कायः येसुइ युहनाकायः नोःओ कुरा स्यान्आथास। “लौ याक्गार्सीःमालो देस्ताङ् आल्तोक् बेलाहाङः दोह्लो योलाङ् आल्तेःआकाय्। मारुःइ ल्हङ्गाय्ताक्ओ वेर् ह योलाङ् आल्ओ खेःतेःइली। 25खेःल त खेःया दोह् हायःलाङ् आल्तेःआकाय्। पेओ दीङ्ह्ओ नाय् लावओ मान्ता योलाङ् आल्ओ खेःतेःइली पेओ नाय् लावओ मान्ता योसाकायः राजाकोः दर्बाल्ताङ् आल्सालेः खेःतो। 26लौ उया दोह् योलाङ् आल्तेःआकाय् दाय्ह्सा परमेस्वर्कोः कुरा छ्यानःती तोओ मान्ता योलाङ् आल्तेःआकाय् बा। माः रैस बुरु दोङ्सी दाय्ह्भनाङ् उय्ह्लेकोः परमेस्वर्कोः कुरा छ्यानःओ मान्तालम्सै युहनापाय् ताङ्ह्लेःनाः बा। 27युहनापाय् ङाकोः ङ्हासै वाङ्ओआः ओउःकायः नोःओ कुरापाय् उय्ह्लेहाङःसै परमेस्वर्कोः आखरःहाङः लेखती मुलेःनाः। इखेकायः ‘लौ नाङ् वाङ्माःतोक्हाङःसै ङ्हालेः ङाकोः कुरा तोसा मान्ता ल्होक्नेःनाङ् बा। ओउःइपाय् नाङ् वाङ्साकायः ल्याम् पेतो जाङ्ह्ताक्लेःनौ’ त दाय्ह्ती परमेस्वर् दाय्ह्ओ कुरा लेखती मुनाः। 28दोङ्सीलेः दाय्ह्भनाङ् ल्हाव्ह्दैबाङ्कोः सबै मान्तालम्सै युहनापाय् ताङ्ह्लेःनाः बा। माःसापाय् माः लेःआः सुसुखेइ ङाइ स्यान्ओ परमेस्वर्कोः कुरा ङ्हाम्ती परमेस्वर्कोः राजीहाङः मुलेःनै ओउःपाय् युहनासै ताङ्ह्लेःनै बा। माः रैस ओउः राजीहाङः मुओ अरुसै मीओ मान्तापाय् ओउःमा युहनासै ताङ्ह्लेःनाः बा” त दाय्ह्ती येसु दाय्ह्आ। 29ओहाङःसैको येसुकोः दाय्ह्ती नोःओ कुरा सायःआक्तीको ओउः पैसा उथावओ मान्तालम्इमा अरु हुम्ओ मान्तालम्इमा परमेस्वर्पाय् लुङ्ती ताङ्ह्ताक्ती “परमेस्वर्इ आन पेतो हायःआकान् बा” त दाय्ह्ती तोआकानी। ओउःमयःखेइ ङ्हासैलेः लःलयःइ जाङ्ह्ओ रेव्ओ काम्लम् फेती युहनाइ बयःओ बाप्तीस्मा त्याक्ती झ्यान्ते येसुइ तोओ युहनाकोः कुरा झाक्तीलेः सायःआकानी। 30ओउः फरीसीलम्मा धर्मा स्यान्ओलम्खेमा युहनाकोः बाप्तीस्मा त्याक्सा ग्याइली इतलेः परमेस्वर्इ ओउःमयःकायः दोक्ती बयःओ काम् जाङ्ह्सामा ग्याइली। 31इत चीःती येसुइ ओउःमयःकः ल्हेःती “लौ नीङ् तेन्छ्याङ्कोः ग्यामालो मान्तालम्पाय् दोह्लो लेखा मुतेःनै दाय्ह्सा। 32नीङ्पाय् बजार्हाङः साङ्ह्ओ हौलम्लो लेखा मुतेःनै बा। ओउः हौलम्पाय् ‘लौ ङीइ बीहा जाङ्ह्ती बाङ्सुली मुत्ती साङ्ह्ओ बेलाहाङःमा नीङ् ङीकुस् चोङाय्तीलेः स्याह्सामा ग्यातेःइली। सीओ मान्ताकायः क्रेस्ती साङ्ह्तोक्हाङःमा नीङ्इ ङीकुस् र्याःसामा ग्यातेःजेःतेःइली’ त दाय्ह्ती लयःमयःकोः साथीलम्कायः क्लुङ्तीलेः तोनानी। 33इतलेः बाप्तीस्मा बयःओ युहना वाङ्ती मुतोक्हाङः ओउःखेइ धाक्सायःकोः ती तुङ्माःत उपाङ् काओ जवती झ्यान्ते ‘लौ इपाय् लान्इ ङायःओ चाक् लेःआः बा’ त दाय्ह्ती नोःकाय्तेःइतो 34ङा मान्ताकोः चोः त तोओ वाङ्ती मुतोक्हाङः ङाखेइ जेःती तुङ्तो मुओआः ङ ओउःत झ्यान्ते ङाकायः ‘लौ इपाय् जेःक्राक् तुङ्क्राक् लेःआः पैसा जेःओ मान्तालम्कुस्मा रेव्ओ काम् जाङ्ह्ओलम्कुस्मा ब्राङ्तोलेः वाह्नाः’ त दाय्ह्ती नोःकाय्तेःनै। 35ओउःत नोःकाय्तेःइतो बुरु परमेस्वर्कोः व्हाय्ओ स्यान्राय्पाय् ओउः कुरा ङ्हाम्ती जाङ्ह्ओलम्इ ह ‘माः इ कुरा व्हाय्ओ लेःआः बा’ त तय्ह्सा खाय्नानी” त दाय्ह्ती येसुइ तोआथास।
36ओहाङःसैको फरीसीलम्कोः यात्चाक्इ “लौ ङाकोः कीम्ताङ् जेःलाङ् वाङ्अ दै” त दाय्ह्ती येसुकायः गोत्आथै। इत गोत्आक्तीको येसुपाय् ओउः फरीसीकोः कीम्ताङ् आल्ती पोक्ती ओउःकुस् जेःती मुओ खेःतो। 37ओहाङःसैको ओउःकुस् जेःतोक्हाङः ओउः सहर्हाङःलेः यात्चाक् रेव्ओ काम् जाङ्ह्ओ मोमःचोः मुओ खेःतो। ओउः मोमःचोःइपाय् “येसुलेः ओउः फरीसीकोः कीम्हाङः जेःती मुनाः” त चीःती ओउः कीम् पोक्ती वाङ्आ। 38ओउःहाङः पोक्ती वाङ्तोक्हाङः ओउः मोमःचोःइ आन महङ्गोमा पेतो सय्ङ्ओ सातीलेः स्याक्बाङ्कोः तुमुकाहाङः वानःआकान्। ओहाङःसैको साती वानःती ओउः मोमःचोःइपाय् येसुकःताङ् वाङ्ती ओउःकोः कीस्हाङः चीङ्ती आन र्याःधै मुओ। र्याःती मुतोक्हाङः ओउःकोः मीक्क्लीः ग्लेःती येसुकोः दोम् न्यात्ताक्आथै। ओउःत न्यात्ताक्ओ त झ्यान्ते ओउः मोमःचोःइपाय् येसुकोः दोम्पाय् लयःकोः म्याङ्इ थ्युर्आथै। थ्युर्आक्तीको येसुकोः दोम्हाङः बाःती तुमःआक्तीको ओउः मोमःचोःइ ओउः पेतो सातीइ ओउःकोः दोम् ल्यानःआथै। 39ओहाङःसैको इत हायःओ ओउः सीमोन् त तोओ फरीसीइ च्यवःती “लौ इ येसुपाय् परमेस्वर्कोः कुरा चीःती छ्यानःओमयःकोः खेःल रैस। ओउःपाय् परमेस्वर्कोः कुरा चीःओ चाक् त खेःयाकायः इ ओउःकायः दीन्ह्ओ मोमःचोःकायः दोह् खाल्कोः रेव्ओ मोमःचोः लेःआः त तय्ह्सा खाय्चाः खेःतो” त दाय्ह्ती ल्हुङ्हाङः म्हर्तो 40“लौ सीमोन् यात् कुरा ङाइ तोचेःनाङ् दा” त दाय्ह्ती येसुइ तोआथै “गतलो आने गुरुय” त दाय्ह्ती सीमोन्इ व्हत्उतो 41“यात्चाक् साहु मान्ताइ नीस्चाक्कायः रीन्कोः पैसा बयःआकान्। यात्चाक्खेकायः पास् सै रुपीया बयःओ खेःतो अरुखेकायः पचास् रुपीया ह रीन् बयःओलेः। 42ओहाङःसैको नीस्चाक्इ लयःकोः रीन् पाय्क्सा खाय्चुलु ओउःत झ्यान्ते साहुइ ओउः नीस्चाक्कायः रीन् फेतीलेः वाय्आकान्। रीन् फेती वाय्आक्तीको ओउः रीन् त्याक्ओ नीस्पाय् सुखेलो ओउः साहुकः अरुसै झाह्ती मुनाःच” त दाय्ह्ती येसुइ व्हत्ती तोआथै। 43“सुखेकायः नाःतो रीन् फेती वाय्ओ खेःतो ओउःपाय् अरुसै साहुकः झाह्ती मुलेःनाः माःर” त दाय्ह्ती सीमोन् त्याङ्आ। “माः नाङ्इ चीःतीलेःतेः त्याङ्तेःआ रैस” त दाय्ह्ती तोती 44येसुइ ओउः मोमःचोःकःताङ् ल्हेःती “लौ इ मोमःचोःकायः योउ दा। नाङ्कोः कीम् पोक्तोक्हाङः ङाकायः नाङ्खेइ दोम् जेस्सा तीःतेः दोह्मा बयःतेःचीली इ मोमःचोःखेइ लयःकोः मीक्क्लीःइ ङाकोः दोम् जेस्आक्तीको लयःकोः म्याङ्इ थ्युर्आताङः। 45नाङ्खेइ ङाकायः रोम्ती बाःती तुमःतेःचीली ओउःखेइ ङाकायः कीम् पोक्ओहाङःसै आन बाःती दोम् तुमःझुङ्नाःताङः। 46नाङ्खेइ ङाकायः तालाङ्हाङः साती गम्तेःचीली ओउःखेइ ङाकायः दोम्हाङः आन पेओ सातीइ ल्यानःआताङः बा। 47लौ उया इ मोमःचोःकोः नाःतो रेव्ओ काम् जाङ्ह्झ्याङ्कोःपाय् परमेस्वर्इ क्युम्ह्तोलेः वाय्नौ दोह् हायःती दाय्ह्सा ओउःइ आन राप्ओ काम् जाङ्ह्लेःआकान्। ओउःखेइ आन राप्उतो सुसुखेइ रेव्ओ काम्लम्पाय् नाःतो जाङ्ह्माःत झ्यान्ते नाःतो क्युम्ह्ती वाय्सा खेःहाङ्ल ओउः मान्ताइमा नाःतो राप्उलु” त दाय्ह्ती येसुइ सीमोन्कायः तोआकान्। 48ओहाङःसैको ओउः मोमःचोःकायः येसुइ “लौ नाङ्इ जाङ्ह्ओ रेव्ओ काम्लम्कोः जाङ्ह्झ्याङ्पाय् क्युम्ह्ती वाय्ओ लेःआः” त दाय्ह्ती तोआथै। 49इत तोओ सायःआक्तीको येसुकुस् जेःती मेओलम् लयःमयःकुस् नोःकाय्ती “लौ इ रेव्ओ काम्लम् क्युम्ह्ती वाय्सा खाय्ओ चाक्पाय् सुलो” त दाय्ह्ती तोनीतो 50येसुइ ओउः मोमःचोःकायः “लौ ङाकायःतेः पेतोलेः ङ्हाम्तेःआची ओउःत झ्यान्ते नाङ् दल्लेःतेःनाः। ल्हुङ् धोमाय्तोलेः पाय्ह्अ दा” त दाय्ह्ती तोआथै।
Currently Selected:
लुका 7: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
